CHUAN DE LANUZA    CONDE D’ARANDA    ALIFONSO I

Articlo 3. Simbolos y capitalidat.

1. A bandera d’Aragón ye a tradizional d’as cuatre barras royas orizontals sobre fundo amariello.

2. L’escudo d’Aragón ye o tradizional d’os cuatre cuartels, rematau por a corona correspondién, que fegurará en o zentro d’o siñal.

3. A capital d’Aragón ye a ziudat de Zaragoza.

4. O día d’Aragón ye o 23 d’abril.

Un d’os dreitos alazetals d’os ziudadans d’un estau democratico ye o de partizipar en a vida publica direutamén u por meyo de representans, libremén triaus en eslezions periodicas por sufrachio universal.

Tamién tienen dreito a azeder en condizions d’igualdat a las funzions y cargos publicos, con os requisitos que siñalen as leis.

Articlo 33. Disposizions chenerals.

1. As Cortes d’Aragón representan a o pueblo aragonés, eixerzen a potestat lechislativa, apreban os presupuestos d’a Comunidat Autonoma, empentan y controlan l’azión d’o Gubierno d’Aragón, y eixerzen as demás competenzias que les n’atorgan a Constituzión, iste Estatuto y a resta de normas de l’ordinamiento churidico.

2. As Cortes d’Aragón son inviolables.

Articlo 34. Autonomía parlamentaria.

As Cortes estableixen as suyas propias Ordinazions, apreban os suyos presupuestos y regulan l’Estatuto d’os suyos funzionarios y personal. As Ordinazions s’apreban por mayoría absoluta d’os suyos miembros.

Articlo 35. Seu.

A seu permanén d’as Cortes d’Aragón ye a ziudat de Zaragoza, en o Palazio de l’Alchafaría, sin de perchudizio de que se puedan zelebrar sesions en atros puestos dintro d’o territorio d’Aragón.

Articlo 36. Composizión.

As Cortes d’Aragón, seguntes s’estableixca en a lei eleutoral, estarán integradas por un numero de Deputaus y Deputadas comprendiu entre sisanta y zinco y uitanta, correspondendo ta cada zircunscripzión eleutoral un numero tal que a zifra d’abitans prezisos ta designar un Deputau a la zircunscripzión más poblada no arribe ta 2,77 vegadas a correspondién a la menos poblada.

Articlo 37. Rechimen eleutoral.

1. As Cortes d’Aragón tendrán caráuter unicameral y estarán constituyidas por Deputaus y Deputadas eslechius por sufrachio universal, igual, libre, direuto y secreto.

2. As Cortes d’Aragón estarán eslechidas por un periodo de cuatre añadas.

3. A eslezión se verificará atendendo a criterios de representazión proporzional, que asegure, antimás, a representazión d’as diversas zonas d’o territorio.

4. A zircunscripzión eleutoral estará a provinzia.

5. Estarán eslechibles a Cortes d’Aragón os ziudadans y ziudadanas que, tenendo a condizión politica d’aragoneses, y d’alcuerdo con lo previsto en a lei eleutoral, sigan en pleno uso d’os suyos dreitos politicos.

6. A lei eleutoral, aprebada en as Cortes d’Aragón por mayoría absoluta, determinará as causas d’ineslechibilidat y incompatibilidat d’os Deputaus.

Articlo 38. Estatuto d’os Deputaus.

1. Os Deputaus y Deputadas a Cortes d’Aragón no estarán vinculaus por mandato imperativo y estarán inviolables, mesmo dimpués d’aber zesau en o suyo mandato, por os votos y opinions que emitan en l’eixerzizio d’o suyo cargo.

2. Mientres o suyo mandato no podrán estar detenius ni retenius por os autos delictivos comesos en o territorio aragonés, fueras de causo de flagrán delito, correspondendo dezidir, en tot causo, sobre a suya inculpazión, engarcholamiento y chudizio a o Trebunal Superior de Chustizia d’Aragón. Difuera de dito territorio, a suya responsabilidat penal estará desichible, en os mesmos termins, debán d’a Sala d’o Penal d’o Trebunal Supremo.

Articlo 39. Organizazión.

1. As Cortes d’Aragón eslechirán, d’entre os suyos miembros, un Presidén, una Mesa y una Deputazión Permanén.

2. As Cortes funzionarán en Pleno y en Comisions.

3. As Comisions estarán permanens y, en o suyo causo, espezials u de rechira. As Comisions permanens tendrán de funzión fundamental, d’entre atras, dictaminar os proyeutos y proposizions de lei, ta o suyo posterior debate y aprebazión en o Pleno.

4. Entre o tiempo en que as Cortes d’Aragón no i sigan reunidas, s’ese rematau o suyo mandato u esen estau disueltas, se i constituyirá una Deputazión Permanén que a suya composizión, eslezión d’os suyos miembros, prozedimientos d’autuazión y funzions regula o Reglamento d’as Cortes.

5. Os Deputaus y Deputadas d’as Cortes d’Aragón se constituyirán en collas parlamentarias, que as suyas condizions de formazión, organizazión y funzions ordina o Reglamento d’a Cambra. Ditas collas parlamantarias partiziparán en a Deputazión Permanén y Comisions, en proporzión a la suya importanzia numerica.

Articlo 40. Funzionamiento.

1. As Cortes d’Aragón se reunirán en sesions ordinarias y estraordinarias.

2. Os periodos ordinarios de sesions se ferán entre setiembre y diziembre, a primera, y entre febrero y chunio, a segunda.

3. As sesions estraordinarias estarán clamadas por O Presidén d’as Cortes d’Aragón, con espezificazión, en tot causo, d’a orden d’o día, a demanda d’a Deputazión Permanén, d’una zinquena parti d’os Deputaus u d’o numero d’as collas parlamentarias que o Reglamento d’as Cortes estableixca, igual como a demanda d’o Gubierno d’Aragón.

Articlo 41. Funzions.

Corresponde a las Cortes d’Aragón:

a) A eslezión, d’entre os suyos miembros, d’o Presidén d’Aragón.

b) A eslezión, nombramiento y zese d’o Chustizia d’Aragón, seguntes o establierto en a lei que lo regule.

c) A designazión d’os Senadors a la que fa menzión l’Articlo 96.5 d’a Constituzión. Ista designazión abrá a fer-se en proporzión a o numero de Deputaus de cada colla parlamentaria, en os termins que estableixca una lei de Cortes d’Aragón.

d) L’eixerzizio d’a iniziativa lechislativa prevista en l’Articlo 87.2 d’a Constituzión.

e) L’eixerzizio d’a iniziativa de reforma d’a Constituzión.

f) A fixazión d’as previsions de carauter politico, sozial y economico que, d’alcuerdo con l’Articlo 131.2 d’a Constituzión, tienga que suministrar a Comunidat Autonoma d’Aragón a o Gubierno d’España, ta la elaborazión d’os proyeutos de planificazión.

g) O refirme d’os alcuerdos de cooperazión a que fa menzión l’Articlo 145.2 d’a Constituzión y o conoiximiento d’os convenios de chestión y prestazión de servizios en os termins previstos en l’Articlo 91.2 d’o presén Estatuto.

h) L’aprebazión d’o programa d’o Gubierno d’Aragón.

i) L’esamen y l’aprebazión d’as suyas cuentas y d’as cuentas d’a Comunidat Autonoma, sin de perchudizio d’o control que corresponda a la Cambra de Cuentas d’Aragón u, en o suyo causo, a o Trebunal de Cuentas.

j) A interposizión d’o recurso d’inconstituzionalidat y a personazión debán d’o Trebunal Constituzional en os confictos de competenzias.

k) L’aprebazión d’os plans chenerals relativos a o desembolique economico d’a Comunidat Autonoma d’Aragón, dintro d’os obchetivos marcaus por a politica economica cheneral.

l) A replega d’a informazión que furnirá o Gubierno d’España sobre pautos internazionals y proyeutos de lechislazión duanera, en tot que faiga referenzia a custions de particular intrés t’Aragón.

m) L’eixerzizio d’a potestat tributaria y l’autorizazión d’o recurso a o credito.

n) O control d’os meyos de comunicazión sozial que a suya titularidat corresponda a la Comunidat Autonoma.

ñ) O control de l’uso d’a delegazión lechislativa a que fa referenzia l’Articlo 43, sin de perchudizio d’o control por os Trebunals.

o) A convalidazión d’os Decretos-leis a que fa referenzia l’Articlo 44.

p) Cualsiquieras atras que le’n atribuigan a Constituzión, o presén Estatuto u a resta d’as ordinazions churidicas.

Articlo 42. Potestat lechislativa.

1. As Cortes d’Aragón eixerzen a potestat lechislativa.

2. A iniziativa lechislativa Corresponde a os miembros d’as Cortes d’Aragón y a o Gubierno d’Aragón, en os termins que estableixcan a lei y o Reglamento d’as Cortes. Por lei de Cortes d’Aragón se regulará a iniziativa lechislativa popular.

Articlo 43. Delegazión lechislativa.

1. As Cortes d’Aragón pueden delegar en o Gubierno d’Aragón a potestat de dictar normas con rango de lei. No i cullirá la delegazión ta l’aprebazión d’o Presupuesto d’a Comunidat Autonoma, a regulazión esenzial d’os dreitos reconoixius por l’Estatuto, o desembolique basico d’as suyas Instituzions u o rechimen eleutoral.

2. As disposizions d’o Gubierno que contienen lechislazión delegada se claman Decretos Lechislativos.

3. A delegazión debe d’estar espresa, meyán lei, ta una materia concreta y con a determinazión d’un plazo chusto ta eixerzer-la. A delegazión s’acotola por l’acabanza d’o plazo u por aprebazión d’o Decreto Lechislativo correspondién. No puede fer-se uso d’a delegazión cuan o Gubierno se troba en funzions por disoluzión d’as Cortes.

4. Cuan se trate d’autorizar a o Gubierno d’Aragón ta formular un nuevo testo articulau, as leis de delegazión bi fixarán con prezisión as bases y criterios a las que debe d’achustar-se o Gubierno en l’eixerzizio d’a delegazión lechislativa. Cuan se trate d’autorizar a o Gubierno ta refundir testos legals, a lei abilitán determinará l’alcanz y os criterios d’a refundizión.

5. O control parlamentario d’a lechislazión delegada se regulará por o Reglamento d’as Cortes d’Aragón y, en o suyo causo, por a mesma lei de delegazión.

Articlo 44. Decretos-leis.

1. En o causo de nezesidat urchén y estraordinaria, o Gubierno d’Aragón puede ditar disposizions lechislativas provisionals baixo a traza de Decreto-lei. No pueden estar obcheto de Decreto-lei o desembolique d’os dreitos, debers y libertaz d’os aragoneses y d’as instituzions reguladas en o Títol II, o rechimen eleutoral, os treudos y o Presupuesto d’a Comunidat Autonoma.

2. Os Decretos-leis quedarán derogaus si en o plazo improrrogable d’os trenta días siguiens a o d’a suya publicazión no estasen convalidaus a esprés por as Cortes d’Aragón dimpués d’un debate y una votazión de totalidat.

3. Sin de perchudizio d’a suya convalidazión, as Cortes d’Aragón pueden tramitar os Decretos-leis como proyeutos de lei adotando l’alcuerdo correspondién dintro d’o plazo establierto por l’apartau anterior.

Articlo 45. Promulgazión y publicazión d’as leis.

Articlo 2. Territorio.

O territorio d’a Comunidat Autonoma se corresponde con l’istorico d’Aragón, y comprende o d’os munizipios, comarcas y provinzias de Uesca, Teruel y Zaragoza.

Articlo 5. Organizazión territorial.

Aragón estrutura a suya organizazión territorial en munizipios, comarcas y provinzias.

Articlo 10. Incorporazión d’atros territorios u munizipios.

Podrán incorporar-se a la Comunidat Autonoma d’Aragón atros territorios u munizipios buegans u enclavaus, meyán o cumplimiento d’os requisitos siguiens, sin de perchudizio d’atros que puedan legalmén desichir-se:

a) Que demanden a incorporazión o Conzello u a más gran parti d’os Conzellos interesaus, y que s’escuite a la Comunidat u provinzia a la que i perteneixcan os territorios u munizipios a agregar.

b) Que l’alcuerden os abitans de ditos munizipios u territorios meyán consulta convocada a esprés y previa l’autorizazión competén.

c) Que os apreben as Cortes d’Aragón y, posteriormén, as Cortes Chenerals de l’Estau, meyán lei organica.

Articlo 81. Organizazión territorial d’Aragón.

1. A organizazión territorial local d’Aragón s’estrutura en munizipios, comarcas y provinzias.

2. Por lei d’as Cortes d’Aragón podrá regular-se a creyazión, organizazión y competenzias d’as arias metropolitanas. D’a mesma traza, regulará as entidaz d’ambito territorial menors a o munizipio.

Relazions con l’Estau.

Articlo 88. Colaborazión con l’Estau.

1. As relazions entre a Comunidat Autonoma d’Aragón y l’Estau se basarán en os prenzipios de leyaltat instituzional, coordinazión y aduya mutua.

2. A Comunidat Autonoma d’Aragón y l’Estau, en o marco d’as suyas respeutivas competenzias, pueden suscribir convenios de colaborazión y emplegar atros meyos adecuaus ta cumplir obchetivos d’intrés común.

3. En o caso d’obras publicas calificadas d’intrés cheneral u que afeuten a atra Comunidat Autonoma, podrán suscribir-se convenios de colaborazión ta la suya chestión.

4. O rechimen churidico d’os convenios d’a Comunidat Autonoma d’Aragón con l’Estau, en a suya demba propia d’autuazión, será establierto por lei de Cortes d’Aragón.

5. A Comunidat Autonoma d’Aragón partizipará en l’establimiento d’os servizios ferroviarios que guarenzien a comunicazión con atras Comunidaz Autonomas u o paso internazional, d’alcuerdo con a normativa estatal.

6. Aragón colaborará tamién con l’Estau meyán organos y prozedimientos multilaterals en os ambitos y custions d’intrés común.

Articlo 89. Partizipazión en instituzions, prozedimientos y organismos estatals.

1. A Comunidat Autonoma d’Aragón partizipará en os organismos y prozedimientos de presa de dezisions de l’Estau que afeuten a las suyas competenzias d’alcuerdo con lo establierto en o presén Estatuto y en as leis de l’Estau.

2. A Comunidat Autonoma d’Aragón partizipará en a elaborazión d’as dezisions estatals que afeuten a la ordenazión cheneral de l’autividat economica en o marco d’o establierto en l’Articlo 131.2 d’a Constituzión.

3. A Comunidat Autonoma partizipará y colaborará con l’Estau, meyán os prozedimientos que íste estableixca, en a programazión, puesto, eixecuzión y chestión d’as infraestruturas estatals situadas en o territorio aragonés.

4. A Comunidat Autonoma partizipará en os prozesos de designazión d’os miembros d’as instituzions, organimos y interpresas publicas de l’Estau con l’alcanz y en os termins establiertos por a lechislazión estatal.

Articlo 90. A Comisión Bilateral de Cooperazión Aragón-Estau.

1. A Comisión Bilateral de Cooperazión s’estableixe como a ferramienta prenzipal de relazión entre a Comunidat Autonoma y l’Estau, sin de perchudizio d’as funzions atribuyidas a atros organos concretos de cooperazión bilateral u multilateral.

2. A ixos efeutos, a Comisión Bilateral de Cooperazión treballa as siguiens funzions:

a) Empentar a realizazión d’autuazions y plans conchuntos ta o desembolique de politicas comuns y, en a suya virtut, suscribir os oportunos convenios de colaborazión.

b) Deliberar y fer propuestas, en o suyo causo, sobre a realizazión de proyeutos lechislativos de l’Estau que afeuten espezialmén a las competenzias y intreses d’Aragón.

c) Diseñar mecanismos de colaborazión mutua en os distintos ambitos seutorials an que s’achunte l’intrés d’as dos alministrazions.

d) Servir de ferramienta ta prevenir pleitos entre as dos alministrazions, igual como prebar d’apachar controversias por vía estrachudizial.

e) Cualsiquier atra funzión que aduye a las fins de cooperazión entre as dos alministrazions que les son propias.

3. A Comisión Bilateral de Cooperazión adota as suyas normas d’organizazión y funzionamiento por alcuerdo d’as dos partis. En tot causo s’achunta en sesión plenaria y cuan lo demande una d’as dos partis, y a suya presidenzia ye eixerzida de traza alternativa en redolins d’un año.

CAPÍTOL II.

Relazions con atras Comunidaz Autonomas.

Articlo 91. Colaborazión con atras Comunidaz Autonomas.

1. A Comunidat Autonoma d’Aragón puede establir con atras Comunidaz Autonomas, espezialmén con as que tiene vinclos istoricos y cheograficos, relazions de colaborazión ta la fixazión de politicas comuns, ta l’eixerzizio eficaz d’as suyas competenzias y ta o tratamiento d’afers d’intrés común.

2. A ixe efeuto, a Comunidat Autonoma d’Aragón pude suscribir con atras Comunidaz Autonomas convenios de colaborazión ta la chestión y prestazión de servizios propios d’a suya competenzia. O Gubierno debe d’informar a las Cortes d’Aragón d’a suya suscripzión en o plazo d’un mes contau dende o día d’a firma. D’a mesma traza s’informará a las Cortes d’Aragón a os efeutos correspondiens.

3. O rechimen churidico d’os convenios y alcuerdos firmaus con atras Comunidaz Autonomas por a Comunidat Autonoma d’Aragón, en o suyo marco propio d’autuazión, será establierto por lei de Cortes d’Aragón.

TÍTOL VIII

Economía y Fazienda.

CAPÍTOL I

Economía d’a Comunidat Autonoma.

Articlo 99. Marco d’autuazión.

1. Toda la riqueza, en as suyas destintas trazas y siga cual siga a suya titularidat, bi ye subornidada a l’intrés cheneral.

2. A Comunidat Autonoma eixerzerá as competenzias de naturaleza economica que se le reconoixen en o presén Estatuto d’alcuerdo con a ordenazión de l’autividat economica cheneral, os obchetivos de politica sozial y economica de l’Estau y dintro d’o pleno respeto a la libertat d’interpresa y competenzia en o marco d’a economía de mercau.

3. As instituzions aragonesas veilarán por l’equilibrio territorial y desembolique sustenible d’Aragón y por a realizazión interna d’o prenzipio de solidaridat, y enfilarán a suya autuazión enta la consecuzión d’o pleno treballo y a millora d’a calidat de vida d’os aragoneses.

Articlo 100. Planificazión y fomento de l’autividat economica.

1 A Comunidat Autonoma, meyán lei, podrá aprebar plans economicos chenerals en o territorio aragonés con a fin d’atender a las nezesidaz coleutivas, equilibrar y conchuntar o desembolique territorial autonomico y seutorial, favoreixer o creiximiento d’a renda y d’a riqueza y o suyo más chusto reparto, empentar os recursos d’o suyo territorio y o suyo aprofeitamiento, y guarenziar un desembolique sustenible.

2. O Gubierno d’Aragón podrá establir interpresas publicas ta la eixecuzión d’as funzions reconoixidas en o presén Estatuto.

Articlo 101. Cooperazión con l’autividat economica d’atras instituzions.

1. O Gubierno d’Aragón ferá parti d’os plans y programas economicos de l’Estau que afeuten a Aragón, en os termins que siñala l’Articlo 131.2 d’a Constituzión.

2. O Gubierno d’Aragón podrá establir u partizipar en instituzions que fomenten o pleno treballo y o desembolique economico y sozial en o territorio aragonés. Asinas mesmo, podrá instar de l’Estau a creyazión d’interpresas mistas que empenten l’autividat economica aragonesa.

3. D’alcuerdo con o que puedan establir as leis de l’Estau, o Gubierno d’Aragón designará os suyos propios representans en os organismos economicos, as instituzions finanzieras y as interpresas publicas de l’Estau, que as suyas competenzias s’estiendan por o territorio aragonés y que, por a suya propia naturaleza, no sigan obcheto de transferenzia a la Comunidat Autonoma.

4. En cualsiquier causo, o Gubierno d’Aragón podrá fer y endrezar ta l’Estau cualsiquier informe, estudio u propuesta relativas a la chestión d’as entidaz ditas en l’apartau anterior u a la suya inzidenzia en a economía aragonesa.

Articlo 102. Consello Economico y Sozial d’Aragón.

1. O Consello Economico y Sozial d’Aragón ye l’organo consultivo en o que se materializa la colaborazión y intervenzión de toz os achens sozials en l’autividat economica y sozial d’a Comunidat Autonoma.

2. Una lei de Cortes d’Aragón regulará a suya organizazión, composizión y funzions.

CAPÍTOL II.

Fazienda d’a Comunidat Autonoma

Articlo 103. Prenzipios.

1. A Comunidat Autonoma d’Aragón, en virtut de l’autonomía finanziera que a Constituzión española le reconoixe y guarenzia, disposa d’a suya propia Fazienda ta la finanziazión, eixecuzión y desembolique d’as suyas competenzias, conforme con os prenzipios de sufizienzia de recursos, equidat, solidaridat, coordinazión, equilibrio finanziero y leyaltat instituzional, y en o marco de l’estableixiu en a Constituzión, en o presén Estatuto d’Autonomía y en a Lei Organica de Finanziazión d’as Comunidaz Autonomas.

2. A Comunidat Autonoma d’Aragón gozará d’o mesmo tratamiento fiscal que a lei atorgue a l’Estau. Asinas mesmo, gozará d’as prerrogativas reconoixidas en as leis ta la chestión d’os suyos dreitos economicos y o cumplimiento d’as suyas obligazions.

Articlo 104. Recursos d’a Comunidat Autonoma.

A Fazienda d’a Comunidat Autonoma estará establida por os siguiens recursos:

1. As rendas d’os treudos propios que estableixca a Comunidat Autonoma.

2. Os recargos que podesen establir-se sobre os treudos de l’Estau.

3. A renda d’os treudos ampraus, de raso u de parti, por l’Estau.

4. Atros recursos finanziers derivaus de l’aplicazión d’o sistema de finanziazión d’as Comunidaz Autonomas vichén en cada momento.

5. A partizipazión en os Fundos de Compensazión Interterritorial, d’alcuerdo con a suya normativa reguladera.

6. As asignazions presupuestarias a que fa referenzia l’Articlo 158.1 d’a Constituzión, d’alcuerdo con a suya normativa reguladera.

7. Atras asignazions con cargo a os Presupuestos Chenerals de l’Estau, d’a Unión Europea u d’atros entes nazionals u internazionals.

8. Os ingresos derivaus de l’aplicazión de l’articlo 107.

9. Os ingresos derivaus de l’aplicazión d’o previsto en l’Articlo 108.

10. O produto d’a emisión de deuda y d’operazions de credito.

11. A renda d’o patrimonio d’a Comunidat.

12. A renda d’as contraprestazions pecuniarias que se satisfaigan a la Comunidat Autonoma por a prestazión de servizios u a realizazión d’autividaz efeutuadas igual en rechimen de Dreito publico como de Dreito privau.

13. Ingresos de Dreito privau, legaus, erenzios u donazions.

14. Cualsiquier atro ingreso de Dreito publico u privau que pueda obtener-se por a Fazienda d’a Comunidat Autonoma.

Articlo 105. Potestat tributaria d’a Comunidat Autonoma d’Aragón.

1. A Comunidat Autonoma d’Aragón tiene capazidat normativa ta establir os suyos propios treudos y os recargos sobre os treudos de l’Estau.

2. A Comunidat Autonoma d’Aragón, d’alcuerdo con a lei de zesión, en relazión con os treudos zedius totalmén, en tot causo, tendrá competenzia normativa en relazión con a fixazión d’o tipo impositivo, as esenzions, as reduzions sobre a base imponible y as deduzions sobre a conduta.

3. En causo de treudos zedius de parti, a Comunidat Autonoma d’Aragón tendrá la capazidat normativa que se i fixe por l’Estau en a lei organica prevista en l’Articlo 157.3 d’a Constituzión u en a respeutiva lei de zesión de treudos.

4. A potestat tributaria d’a Comunidat Autonoma d’Aragón responderá a os prenzipios de cheneralidat, progresividat y igual reparto d’a carga fiscal entre os suyos ziudadans.

5. L’eixerzizio d’as capazidaz normativas a que fan referenzia os apartaus 2 y 3 se realizará en o marco d’as competenzias de l’Estau y d’a Unión Europea.

Articlo 106. Aplicazión y revisión en vía alministrativa d’os treudos en a Comunidat Autonoma d’Aragón.

1. Corresponde a la Comunidat Autonoma a chestión, liquidazión, recaudazión, inspezión y revisión d’os suyos propios treudos y, por delegazión de l’Estau, as relativas a os treudos zedius totalmén por l’Estau a Aragón, de conformidat con a lei. A zesión de treudos comportará, en o suyo causo, as transferenzias d’os meyos personals y materials nezesarios ta l’eixerzizio de dita chestión d’alcuerdo con lo establiu en a suya lei reguladera.

2. A chestión, liquidazión, recaudazión y inspezión d’os treudos zedius parzialmén corresponde a l’alministrazión de l’Estau, sin de perchudizio d’a delegazión que a Comunidat Autonoma pueda replegar d’iste, y d’a colaborazión de que pueda establir-se cuan asinas lo desicha a naturaleza d’o treudo.

3. A revisión por a vía economico-alministrativa d’as reclamazions que os contribuyens puedan interposar-ne contra os autos dictaus en materia tributaria por a Comunidat Autonoma corresponderá a os suyos propios organos economico-alministrativos, sin de perchudizio d’as competenzias en materia d’unificazión de criterio que correspondan a l’alministrazión Cheneral de l’Estau.

4. Por meyo d’una lei d’as Cortes d’Aragón podrá creyar-se una Achenzia Tributaria d’Aragón, a la que se le mandará l’aplicazión de toz os treudos propios, igual como d’os treudos estatals zedius totalmén por l’Estau a Aragón, respeutive a o dispuesto en a lei organica prevista en l’Articlo 157.3 d’a Constituzión.

5. L’alministrazión tributaria de l’Estau y d’a Comunidat Autonoma d’Aragón fomentarán os meyos de colaborazión y coordinazión que sigan prezisos.

6. En o desembolique d’o previsto en l’apartau anterior, ta la chestión tributaria d’os treudos zedius parzialmén, espezialmén cuan lo desicha la naturaleza d’o treudo, s’establirá, d’alcuerdo con l’Estau, un instrumento u ente equivalén en o que i partiziparán, de traza paritaria, l’Alministrazión Tributaria de l’Estau y d’a Comunidat Autonoma.

Articlo 107. Transferenzias, mecanismos de libelazión y solidaridat.

1. O sistema d’ingresos d’a Comunidat Autonoma d’Aragón guarenziará, en os termins previstos en a Lei Organica que preveye l’Articlo 157.3 d’a Constituzión, os recursos finanziers que, atendendo a las nezesidaz de gasto d’Aragón y a la suya capazidat fiscal, aseguren a finanziazión sufizién ta l’eixerzizio d’as competenzias propias en a prestazión d’o conchunto d’os servizios publicos asumius, sin de perchudizio de respetar a realizazión efeutiva d’o prenzipio de solidaridat en tot lo territorio nazional en os termins de l’Articlo 138 d’a Constituzión.

2. A Comunidat Autonoma d’Aragón partizipará en os mecanismos de libelazión y solidaridat con a resta d’as Comunidaz Autonomas, en l’ambito d’o dispuesto en o sistema cheneral de finanziazión, con a fin de que os servizios publicos d’educazión, sanidat y atros servizios sozials prezisos de l’Estau d’o bienestar servius por as diferens alministrazions autonomicas a os suyos ziudadans se posen en libels similars, siempre que se desembolique un esfuerzo similar. Os ditos libels estarán fixaus por l’Estau. A determinazión d’os mecanismos de libelazión y solidaridat se realizará d’alcuerdo con o prenzipio de transparenzia y o suyo resultau s’avaluará todas as zinco añadas.

3. Cuan a Comunidat Autonoma, por meyo d’os recursos tributarios derivaus d’o sistema de finanziazión d’as Comunidaz Autonomas, no i arribe a plegar ta un libel minimo equiparable a la resta d’o conchunto de l’Estau ta os ditos servizios publicos, s’estableixerán os mecanismos de libelazión y solidaridat previstos en a Lei Organica a que fa referenzia l’Articlo 157.3 d’a Constituzión. D’a mesma traza, y si prozede, a Comunidat Autonoma d’Aragón aportará recursos a os mecanismos de libelazión y solidaridat.

4. En tot causo, cualsiquier autuazión de l’Estau en materia tributaria que suponga una variazión d’ingresos, u l’adozión por el de midas que puedan fer recayer sobre a Comunidat Autonoma d’Aragón una variazión d’as suyas nezesidaz de gasto no previstas en a data d’aprebazión d’o sistema de finanziazión vichén, u a la suscripzión de l’Alcuerdo previsto en l’Articlo siguién, determinarán l’adozión d’as midas de compensazión oportunas. D’alcuerdo con o prenzipio de leyaltat instituzional a que fa referenzia l’Articlo 103, a valurazión d’as variazions se referirá a un periodo de tiempo determinau y parará cuenta d’os efeutos positivos y negativos d’as disposizions chenerals dictadas por l’Estau y os ditos efeutos que as disposizions dictadas por a Comunidat Autonoma tiengan sobre l’Estau.

5. Ta determinar a finanziazión que dintro d’o sistema corresponde a la Comunidat, s’atenderá a l’esfuerzo fiscal, a suya estrutura territorial y poblazional, espezialmén, l’aviellamiento, a espardidura, y a baixa densidat de poblazión, igual como os desequilibrios territorials.

Articlo 108. Alcuerdo bilateral economico-finanziero con l’Estau.

A os efeutos de concretar o dispuesto en l’Articlo 104, y de traza espezial a partizipazión territorializada d’Aragón en os treudos chenerals que se i determinen y as condizions ta l’aprebazión de recargos sobre treudos d’o Sistema Fiscal Cheneral, en o marco d’o dispuesto en l’Articlo 157.3 d’a Constituzión y en a lechislazión d’o desembolique, l’alministrazión Cheneral de l’Estau y a Comunidat Autonoma d’Aragón suscribirán un alcuerdo bilateral que se formalizará en Comisión Mista y podrá estar revisau periodicamén de traza conchunta, deberá de tener en cuenta l’esfuerzo fiscal d’Aragón y que atenderá singularmén os criterios de corresponsabilidat fiscal y solidaridat interterritorial.

Articlo 109. Comisión Mista d’Afers Economico-Finanziers Estau-Comunidat Autonoma d’Aragón.

1.- A Comisión Mista d’Afers Economico-Finanziers Estau-Comunidat Autonoma d’Aragón ye l’organo bilateral de relazión entre as dos alministrazions en as materias sobre finanziazión autonomica espezificas aragonesas y dintro d’o marco estableixiu en a Lei Organica de Finanziazión d’as Comunidaz Autonomas.

A ixe efeuto, le corresponde a concrezión, desembolique, autualizazión, siguimiento y adozión de midas de cooperazión en relazión con o sistema de finanziazión, igual como as relazions fiscals y finanzieras entre as dos alministrazions y, más que más, l’adozión d’as midas previstas en l’Articlo 107 d’o presén Estatuto.

2. Corresponde a la Comisión Mista d’Afers Economico-Finanziers Estau-Comunidat Autonoma d’Aragón:

a) Alcordar l’alcanz y condizions d’a zesión de treudos de titularidat estatal y, espezialmén, os porzentaches de partizipazión en a renda d’os treudos estatals zedius de parti.

b) Establir os mecanismos de colaborazión entre l’alministrazión tributaria d’Aragón y l’alministrazión tributaria de l’Estau, igual como os criterios de coordinazión y d’armonizazión fiscal d’alcuerdo con as carauteristicas u a naturaleza d’os treudos zedius.

c) Negoziar o porzentache de partizipazión d’Aragón en o reparto territorial d’os fundos estruturals europeus.

d) Estudiar as inversions que l’Estau realizará en a Comunidat Autonoma d’Aragón.

e) Alcordar a valurazión d’os trespasos de servizios de l’Estau ta la Comunidat Autonoma.

f) Establir os mecanismos de colaborazión entre a Comunidat Autonoma y l’alministrazión Cheneral de l’Estau que sigan prezisos ta l’adecuau eixerzizio d’as funzions de revisión en vía economico-alministrativa.

g) Alcordar os mecanismos de colaborazión entre a Comunidat Autonoma y l’Estau ta l’eixerzizio d’as funzions en materia catastral.

h) Siguimiento d’o cumplimiento de l’Alcuerdo bilateral economico-finanziero previsto en l’Articlo 108.

i) De resultas de l’estableixiu en l’Articlo 107.4, proposar as midas de cooperazión nezesarias ta guarenziar l’equilibrio d’o sistema de finanziazión que estableixe o presén Títol.

3. A Comisión adotará o suyo reglamento interno de funzionamiento por alcuerdo entre as dos delegazions. Os miembros d’a delegazión aragonesa en a Comisión rendirán cuentas a las Cortes d’Aragón sobre o cumplimiento d’as disposizions contenidas en o presén capítol.

Articlo 110. Operazions de credito.

1. A Comunidat Autonoma d’Aragón podrá realizar operazions de credito ta emplir as suyas nezesidaz transitorias de tresorería, respetando os prenzipios chenerals y a normativa estatal.

2. A Comunidat Autonoma, meyán lei de Cortes d’Aragón, podrá recurrir a toda mena de ampre u credito, igual como emitir deuda publica u titols equivalens ta finanziar gastos d’inversión, con arreglo a o dispuesto en a Ley a la que fa referenzia l’Articlo 157.3 d’a Constituzión.

3. O volumen y as carauteristicas d’as emisions s’estableixerán d’alcuerdo con a ordenazión cheneral d’a politica creditizia, en colaborazión con l’Estau y respetando os prenzipios chenerals y a normativa estatal.

4. Os titols emesos tendrán a considerazión de fundos publicos a toz os efeutos.

Articlo 111. Presupuesto.

1. Corresponde a o Gubierno d’Aragón a elaborazión y eixecuzión d’o presupuesto y a las Cortes o suyo desamen, esmienda, aprebazión y control.

2. O presupuesto d’a Comunidat Autonoma estará unico y bi incluyirá a totalidat d’os gastos y ingresos d’o seutor publico autonomico, igual como os numers d’os benefizios fiscals correspondiens a os treudos que cheneren rendas a la Fazienda aragonesa.

3. O presupuesto d’a Comunidat Autonoma tendrá caráuter añal. Fueras d’ixo, si a lei de presupuestos no s’aprebase antis d’o primer día de l’eixerzizio economico correspondién, se considerará automaticamén apolargau o presupuesto de l’eixerzizio anterior dica l’aprebazión d’o nuevo.

4. O Gubierno endrezará ta las Cortes d’Aragón o proyeuto de presupuesto antis d’o zaguer trimestre de l’eixerzizio en curso.

Articlo 112. Cambra de Cuentas d’Aragón.

1. A Cambra de Cuentas d’Aragón ye, sin de perchudizio d’as competenzias que a Constituzión atribuye a o Trebunal de Cuentas, l’organo fiscalizador d’a chestión economico-finanziera, contable y operativa d’o seutor publico d’a Comunidat Autonoma d’Aragón. Asinas mesmo, fiscalizará a chestión economico-finanziera, contable y operativa d’as entidaz locals d’o territorio aragonés, sin de perchudizio d’as competenzias que en iste ambito ostente o Trebunal de Cuentas.

2. A Cambra de Cuentas d’Aragón dependerá direutamén d’as Cortes d’Aragón y eixerzerá as suyas funzions por delegazión d’istas.

3. Una lei de Cortes d’Aragón regulará a suya composizión, organizazión y funzions.

CAPÍTOL III

Patrimonio d’a Comunidat Autonoma d’Aragón

Articlo 113. Patrimonio.

1. A Comunidat Autonoma d’Aragón disposa de patrimonio propio.

2. O patrimonio d’a Comunidat Autonoma d’Aragón estará furniu por toz os biens y dreitos d’os que siga titular, cualsiquiera que siga la suya naturaleza y o títol d’alquisizión.

3. Una lei de Cortes d’Aragón regulará o rechimen churidico d’o patrimonio d’a Comunidat Autonoma, igual como a suya alministrazión, conservazión y esfensa.

CAPÍTOL IV.

Fazienda d’as Entidaz Locals Aragonesas

Articlo 114. Relazions finanzieras con as Entidaz Locals Aragonesas.

1. Corresponde a la Comunidat Autonoma la tutela finanziera respeuto d’as entidaz locals, respetando, en tot causo, l’autonomía reconoixida a las mesmas en os Articlos 137, 140, 141 y 142 d’a Constituzión.

2. A comunidat Autonoma d’Aragón colaborará con as entidaz locals en a chestión, liquidazión, recaudazión y inspezión d’os treudos que tienen atribuyius, respetando a suya autonomía finanziera y conforme con l’estableixiu en a lechislazión basica de l’Estau y a que remane d’as Cortes d’Aragón.

3. Os ingresos d’as entidaz locals consistens en partizipazions en treudos y en subvenzions incondizionadas estatals que se repleguen a traviés d’a Comunidat Autonoma, se repartirán por ísta d’alcuerdo con os criterios legals establiertos por l’Estau ta ditas partizipazions.

4. Con arreglo a o prenzipio de sufizienzia finanziera, a Comunidat Autonoma partizipará en a finanziazión d’as Corporazions Locals aragonesas aportando a las mesmas as asignazions de caráuter incondizional que s’estableixcan por as Cortes d’Aragón y deberán de parar cuenta d’as nezesidaz de gasto y a capazidat fiscal d’os entes locals.

5. O conchunto d’as alportazions realizadas a las Corporazions Locals s’integrará en o Fundo Local d’Aragón.

Azión esterior.

Articlo 96. Azión esterior.

1. A Comunidat Autonoma d’Aragón empentará a suya proyezión en l’esterior y promoverá os suyos intreses en dito ambito. A ixos efeutos, podrá establir ofizinas en l’esterior, con tal que no caigan en o previsto en l’Articlo 149.1.3ª y 10.ª d’a Constituzión.

2. Ta la promozión d’os intreses d’Aragón, a Comunidat Autonoma d’Aragón podrá suscribir alcuerdos de colaborazión en o marco d’as suyas competenzias.

Articlo 97. Pautos y convenios internazionals.

1. A Comunidat Autonoma d’Aragón podrá solizitar d’o Gubierno de l’Estau a zelebrazión de pautos u convenios internazionals en materias d’intrés ta Aragón y, en espezial, en as derivadas d’a suya situazión cheografica como territorio buegatizo con atras rechions europeas.

2. A Comunidat Autonoma d’Aragón, d’alcuerdo con a lechislazión estatal, será informada en primeras d’a feitura de pautos y convenios internazionals en os que afeuten a materias d’as suyas competenzias y espezial intrés, en o suyo causo. En istos supuestos, podrá solizitar a o Gubierno que, en as delegazions negoziaderas, se i calen representans d’a Comunidat Autonoma.

3. A Comunidat Autonoma adotará as midas nezesarias ta la eixecuzión, dintro d’o suyo territorio, d’os pautos internazionals y autos normativos d’as organizazions internazionals en lo que afeuten a las materias propias d’as competenzias d’a Comunidat Autonoma.

Articlo 98. Marco de cooperazión esterior.

1. A Comunidat Autonoma d’Aragón, como territorio buegatizo, promoverá a cooperazión con as rechions europeas con as que comparte, por dito caráuter, intreses economicos, sozials, ambientals y culturals.

2. En o marco d’a cooperazión interrechional, Aragón empentará a cooperazión con atros territorios con os que comparta intreses comuns.

Articlo 6. Dreitos y libertaz.

1. Os dreitos y libertaz d’os aragoneses y aragonesas son os reconoixius en a Constituzión, os incluyius en a Declarazión Universal de Dreitos Umans y en a resta d’instrumentos internazionals d’emparo d’os mesmos suscritos u refirmaus por España, igual como los establiertos en l’ambito d’a Comunidat Autonoma por o presén Estatuto.

2. Os poders publicos aragoneses son vinculaus por istos dreitos y libertaz y han de veilar por a suya protezión y respeto, igual como promover o suyo pleno eixerzizio.

3. Os dreitos y prenzipios d’o Títol I d’iste Estatuto no suposarán una alterazión d’o rechimen de distribuzión de competenzias, ni a creyazión de titols competenzials nuevos u a modificazión d’os que ya existen. Denguna d’as suyas disposizions puede estar desembolicada, aplicada u interpretada de traza que reduzca u amugue os dreitos fundamentals reconoixius por a Constituzión y por os pautos y convenios internazionals ratificaus por España.

Dreitos y debers d’os aragoneses y aragonesas.

Articlo 11. Disposizions chenerals.

1. Os dreitos, libertaz y debers d’os aragoneses y aragonesas son os establiertos en a Constituzión y en iste Estatuto.

2. Qui gozen d’a condizión politica d’aragonés son titulars d’os dreitos regulaus en iste capítol, sin de perchudizio d’a suya estensión ta atras personas, en os termins que estableixca iste Estatuto y as leis.

3. Os poders publicos aragoneses promoverán as midas prezisas ta guarenziar de traza efeutiva l’eixerzizio d’istos dreitos.

Articlo 30. Cultura d’as valors democraticas.

Os poders publicos aragoneses promoverán a cultura d’a paz, meyán a incorporazión de valors de no violenzia, toleranzia, partizipazión, solidaridat y chustizia, espezialmén en o sistema educativo. Asinamesmo, fazilitarán a protezión sozial d’as victimas d’a violenzia y, en espezial, a de chenero y a d’autos terroristas.

Articlo 12. Dreitos d’as personas.

2. Todas as personas tienen dreito a las prestazions sozials destinadas a o suyo bienestar, y a os servizios d’aduya a las responsabilidaz familiars ta apachar a vida laboral y familiar, en as condizions estableixidas por as leis.

Articlo 26. Emplego y treballo.

Os poders publicos d’Aragón promoverán o pleno emplego de calidat en condizions de seguranza; a prevenzión d’os risques laborals; a igualdat d’oportunidaz en l’azeso a o treballo y en as condizions de treballo; a formazión y promozión profesionals, y a conziliazión d’a vida familiar y laboral.

Articlo 27. Vivienda

Os poders publicos d’a Comunidat Autonoma promoverán, de forma efeutiva, l’eixerzizio d’o dreito a la vivienda digna, fazilitando l’azeso en rechimen de propiedat u loguero, meyán a utilizazión razional d’o suelo y a promozión de vivienda publica y protechida, tenendo espezial atenzión ta os chovens y coleutivos más nezesitaus.

Articlo 13. Dreitos y debers en relazión con a cultura.

1. Todas as personas tienen dreito a azeder, en condizions d’igualdat, ta la cultura, ta o desembolique d’as suyas capazidaz creyativas y ta o disfrute d’o patrimonio cultural.

2. Todas as personas y os poders publicos aragoneses tienen o deber de respetar o patrimonio cultural y colaborar en la suya conservazión y en o disfrute.

Articlo 9. Eficazia d’as normas.

1. As normas y disposizions d’a Comunidat Autonoma d’Aragón tendrán eficazia territorial, sin de perchudizio d’as eszepzions que puedan establir-se en cada materia y d’as situazions que aigan de rechir-se por l’estatuto personal u atros regles d’estraterritorialidat.

2. O Dreito Foral d’Aragón tendrá eficazia personal y será de aplicazión a toz os que ostenten a vezindat zevil aragonesa, independienmén d’o puesto d’a suya residenzia, y escepzión feita d’ixas disposizions a las que legalmén se les n’atribuiga eficazia territorial.

3. Os estranchers que alquieran a nazionalidat española remanirán sochetos a la vezindat zevil aragonesa, si en l’inte d’a suya alquisizión tienen vezindat alministrativa en Aragón, malas que manifiesten a suya voluntat en contras, d’alcuerdo con o disposau en a lechislazión de l’Estau.

Articlo 71. Competenzias esclusivas.

En o marco d’as competenzias esclusivas, a Comunidat Autonoma d’Aragón eixerzerá la potestat lechislativa, a potestat reglamentaria, a funzión eixecutiva y l’establimiento de politicas propias, respetando lo dispuesto en os Articlos 140 y 149.1 d’a Constituzión. Corresponde a la Comunidat Autonoma a competenzia esclusiva en as siguiens materias:

2.ª Conservazión, modificazión y desembolique d’o Dreito Foral aragonés, con respeto a o suyo sistema de fuens.

3.ª Dreito prozesal derivau d’as particularidaz d’o dreito sustantivo aragonés.

Articlo 7. Luengas y modalidaz lingüisticas propias.

1. As luengas y modalidaz lingüisticas propias d’Aragón constituyen una d’as manifestazions más siñaleras d’o patrimonio istorico y cultural aragonés, y una valor sozial de respeto, convivenzia y entendimiento.

2. Una lei d’as Cortes d’Aragón establirá as zonas d’uso predominán d’as luengas y modalidaz propias d’Aragón,  regulará o rechimen churidico, os dreitos d’emplego d’os fablans d’istos territorios, promoverá a protezión, recuperazión, ensiñanza y promozión y difusión d’o patrimonio lingüistico d’Aragón, y favoreixerá, en as zonas d’emplego predominán, l’uso d’as luengas propias en as relazions d’os ziudadans con as Alminitrazions publicas aragonesas.

3. Dengún no podrá estar discriminau por razón de luenga.

Articlo 71. Competenzias esclusivas.

En o marco d’as competenzias esclusivas, a Comunidat Autonoma d’Aragón eixerzerá la potestat lechislativa, a potestat reglamentaria, a funzión eixecutiva y l’establimiento de politicas propias, respetando lo dispuesto en os Articlos 140 y 149.1 d’a Constituzión. Corresponde a la Comunidat Autonoma a competenzia esclusiva en as siguiens materias:

4.ª Luengas y modalidaz lingüisticas propias d’Aragón.

Articlo 21. Educazión.

Os poder publicos aragoneses desembolicarán un modelo educativo de calidat y d’intrés publico que guarenzie o libre desembolique d’a personalidat d’os alumnos, en o marco d’o respeto a os prenzipios constituzionals y estatutarios y a las singularidaz d’Aragón.

Articlo 73. Amostranza.

Corresponde a la Comunidat Autonoma la competenzia compartida en ensiñanza en toda la suya estensión, libels y graus, modalidaz y espezialidaz, que, en tot causo, bi incluye a ordenazión d’o seutor de l’amostranza y de l’autividat dozén y educativa, a suya programazión, inspezión y avaluazión; l’establimiento de criterios d’almisión a os zentros sustenius con fundos publicos t’asegurar un rete educativo equilibrau y de caráuter compensatorio; a promozión y refirme a l’estudio; a formazión y o perfezionamiento d’o personal dozén; a guarenzia d’a calidat d’o sistema educativo, y a ordenazión, coordinazión y deszentralizazión d’o sistema universitario d’Aragón con respeto a o prenzipio d’autonomía universitaria.

Articlo 14. Dreito a la salut.

1. Todas as personas tienen dreito a azeder a os servizios publicos de salut, en condizions d’igualdat, universalidat y calidat, y os usuarios d’o sistema publico de salut tienen dreito a la libre eslezión de medico y zentro sanitario, en os termins que estableixen as leis.

2. Os poders publicos aragoneses guarenziarán a esistenzia d’un sistema sanitario publico desembolicau dende os prenzipios d’universalidat y calidat, y a una asistenzia sanitaria digna, con informazión sufizién a o pazién sobre os dreitos que le pertocan como usuario.

3. Os poders publicos aragoneses veilarán espezialmén por o cumplimiento d’o consentimiento informau.

4. Todas as personas podrán espresar a suya voluntat, mesmo de forma abanzada, sobre as intervenzions y tratamientos medicos que deseyan rezibir, en a forma y con os efeutos previstos en as leis.

Articlo 23. Bienestar y coesión sozial.

1. Os poders publicos d’Aragón promoverán y guarenziarán un sistema publico de servizios sozials sufizién ta l’atenzión de personas y grupos, que se mire de plegar enta o suyo pleno desembolique personal y sozial, igual como espezialmén a l’acotolamiento d’as causas y efeutos d’as diversas trazas de marguinazión u esclusión sozial, guarenziando una renda basica en os termins previstos por a lei.

2. Os poders publicos aragoneses promoverán as condizions prezisas ta la integrazión d’as minorías etnicas y, en espezial, d’a comunidat chitana.

Articlo 18. Dreitos y debers en relazión con o meyo ambién.

1. Todas as personas tienen dreito a vivir en un meyo ambién equilibrau, sustenible y respetuoso ta la suya salut, d’alcuerdo con os estandars y os libels de protezión que determinan as leis. Tienen tamién dreito a gozar d’os recursos naturals en condizions d’igualdat y o deber de fer un uso responsable d’os mesmos y privar o suyo malfurrie.

2. Todas as personas tienen dreito a la protezión debán d’as diferens trazas de contaminazión, d’alcuerdo con os estandars y os libels que se determinen por lei. Tienen tamién o deber de colaborar en a conservazión d’o patrimonio natural y en as autuazions que se faigan ta rematar as diferens trazas de contaminazión, con l’obchetivo d’o suyo sustenimiento y conservazión ta las chenerazions presens y venideras.

3. Todas as personas tienen dreito a azeder ta la informazión meyoambiental de que disposan os poders publicos, en os termins que estableixcan as leis.

4. L’autividat d’os poder publicos se menará por os prenzipios de prevenzión, precauzión y respeto a os dreitos d’as venideras chenerazions.

Os poders publicos aragoneses han de veilar porque totas as personas en o marco d’o desembolique sostenible, d’a partizipazión y d’a utilizazión eficaz y efizién d’o recurso, tienen dreito a disposar d’o furnimiento d’augua en condizions de cantidat y calidat sufiziens ta atender as suyas nezesidaz presens y esdevenideras, tanto ta o consumo umano como ta o desembolique d’autividaz sozials y economicas que permitan a vertebrazión y o reequilibrio territorial d’Aragón.

Amás, os poders publicos aragoneses han de veilar ta evitar os trescoles d’auguas d’as cuencas hidrograficas d’as cualas forma parte a Comunidat Autonoma que afeuten a intreses de sostenibilidat en benefizio d’as chenerazions presens y futuras.

JOAQUÍN COSTA

RAQUEL MELLER

O dreito de tot ziudadano a partizipar en a direzión d’os asuntos publicos, a votar y estar eslechiu y a tener azeso a la funzión publica, estió establiu en a Declarazión Universal d’os Dreitos Umans y churidicamén guarenziau y protechiu por l’articlo 25 d’o Pauto Internazional de Dreitos Zivils y Politicos.

Os aragoneses tienen dreito a partizipar en condizions d’igualdat en os asuntos publicos, en os termins que estableixen a Constituzión, o Estatuto y as leis. Iste dreito ha d’estar promoviu por os poders publicos aragoneses ta la partizipazión individual y coleutiva en os ambitos zivico, politico, cultural y economico

MARÍA DOMÍNGUEZ

Consumidor ye a persona fisica u churidica que alquiere u utiliza como destinatario final, produtos, biens u servizios, autividaz u funzions independienmén d’o caráuter individual u sozial, publico u privau, de qui los produzcan u subministren.

Asinas, as personas consumideras son protechidas por normas de distinta naturaleza, tanto zivils como alministrativas que le atorgan una serie de dreitos y obligazions.

ELVIRA DE HIDALGO

Articlo 74. Meyos de comunicazión sozial.

1. Corresponde a la Comunidat Autonoma la competenzia compartida en meyos de comunicazión sozial y servizios de conteniu audiovisual.

2. A Comunidat Autonoma podrá regular, creyar y mantener a suya propia televisión, radio y prensa y, en cheneral, cualsiquier meyo de comunicazión sozial ta o cumplimiento d’as suyas fins, respetando l’autonomía local.

O Chustizia d’Aragón.

Articlo 59. Disposizions chenerals.

1. O Chustizia d’Aragón, sin de perchudizio d’a instituzión prevista en l’articlo 54 d’a Constituzión y a suya coordinazión con a mesma, en tiene de misions espezificas:

a) A protezión y esfensa d’os dreitos individuals y coleutivos reconoixius en iste Estatuto.

b) A tutela de l’ordinamiento churidico aragonés, veilando por a suya esfensa y aplicazión.

c) A esfensa d’iste Estatuto.

2. En l’eixerzizio d’a suya funzión, o Chustizia d’Aragón podrá visurar:

a) L’autividat de l’Alministrazión d’a Comunidat Autonoma, constituyida ta istos efeutos por o conchunto d’organos integraus en o Gubierno d’Aragón, igual como por a totalidat d’os entes adotaus de personalidat churidica dependiens d’o mesmo.

b) L’autividat d’os entes locals aragoneses y d’as comarcas, os suyos organismos autonomos y demás entes que d’ellos dependan, en os termins que estableixca la lei d’o Chustizia.

c) Os servizios publicos chestionaus por personas fisicas u churidicas meyán conzesión alministrativa, sozmesos a control u tutela alministrativa de bella instituzión d’a Comunidat Autonoma d’Aragón.

3. O Chustizia rendirá cuentas d’a suya chestión debán d’as Cortes d’Aragón.

Articlo 60. Lei d’o Chustizia d’Aragón.

Una lei de Cortes d’Aragón concretará l’alcanz d’as funzions d’o Chustizia, igual como lo prozedimiento d’a suya eslezión por ellas y o rechimen d’incompatiblidaz.

O Poder Chudizial en Aragón.

Articlo 63. O Trebunal Superior de Chustizia d’Aragón.

1. O Trebunal Superior de Chustizia d’Aragón ye l’organo churisdizional más altero d’a organizazión chudizial en Aragón, y debán de qui s’acotolan as suzesivas instanzias prozesals cuan no aigan rematau debán d’atro organo churisdizional radicau en a Comunidat Autonoma, y sin de perchudizio d’as competenzias d’o Trebunal Supremo.

2. O Trebunal Superior de Chustizia d’Aragón conoixerá, en tot causo, d’os recursos de casazión fundaus en a infrazión d’o Dreito propio d’Aragón, igual como d’os recursos estraordinarios de revisión que contemple a lei cuentra as resoluzions firmes d’os organos churisdizionals radicau en Aragón. Tamién eixerzerá as demás funzions que en materia de Dreito estatal estableixca la Lei Organica d’o Poder Chudizial.

3. O Presidén d’o Trebunal Superior de Chustizia d’Aragón ye o representán d’o Poder Chudizial en Aragón. Ye nombrau por o Rei, a proposa d’o Consello Cheneral d’o Poder Chudizial.

4. O Presidén d’o Trebunal Superior de Chustizia d’Aragón podrá presentar debán d’as Cortes d’Aragón a memoria anual.

Articlo 64. O Consello de Chustizia d’Aragón.

1. Se creya o Consello de Chustizia d’Aragón. Una lei d’as Cortes d’Aragón determinará a suya estrutura, composizión, nombramientos y funzions dintro d’o marco d’as competenzias d’a Comunidat Autonoma en materia d’Alministrazión de Chustizia en os termins que establexe o presén Estatuto y d’alcuerdo con lo dispuesto en a Lei Organica d’o Poder Chudizial.

2. O Consello de Chustizia d’Aragón tendrá la considerazión, naturaleza, competenzias y facultaz que l’atribuiga la Lei Organica d’o Poder Chudizial. Asinas mesmo, partizipará en toz os prozesos de designazión que l’atribuiga la debandita lei.

Articlo 65. Nombramiento de Machistraus, Chuezes y Secretarios.

O nombramiento de Machistraus, Chuezes y Secretarios en Aragón, se realizará en a traza prevista por a Lei Organica d’o Poder Chudizial, estando merito preferén o conoiximiento acreditau d’o Dreito propio d’Aragón.

Articlo 66. O Menisterio Fiscal en Aragón.

1. O Fiscal Chefe d’o Trebunal Superior de Chustizia reprensienta a o Menisterio Fiscal en Aragón.

2. As funzions d’o Fiscal Chefe d’o Trebunal Superior de Chustizia d’Aragón son as que establexe l’Estatuto organico d’o Menisterio Fiscal.

3. A memoria anual d’a Fiscalía d’o Trebunal Superior de Chustizia d’Aragón estará endrezada por o Fiscal Chefe ta o Consello de Chustizia d’Aragón y la podrá presentar debán d’as Cortes d’Aragón y o Gubierno d’Aragón.

CAPÍTOL II

L’Alministrazión de Chustizia

Articlo 67. Meyos a o servizio de l’Alministrazión de Chustizia.

1. Corresponde a la Comunidat Autonoma d’Aragón a competenzia sobre tot o personal a o servizio de l’Alministrazión de Chustizia que no faiga parti d’o Poder Chudizial, d’alcuerdo con o dispuesto en a Lei Organica d’o Poder Chudizial.

2. A Comunidat Autonoma d’Aragón ostenta competenzia sobre os meyos materials de l’Alministrazión de Chustizia d’Aragón.

3. Corresponde a la Comunidat Autonoma la organizazión, a dotazión, y a chestión d’as ofizinas chudizials y d’os organos y servizios d’aduya a os organos churisdizionals. A Comunidat Autonoma podrá, d’alcuerdo con l’Estau, partizipar en a chestión d’as cuentas de depositos y consignazions chudizials y d’as suyas rendas.

4 Corresponde a la Comunidat Autonoma la ordenazión y organizazión d’os servizios de chustizia gratuita y orientación churidico gratuita.

Articlo 68. Demarcazión y plantas chudizials.

1. Corresponde a la Comunidat Autonoma determinar as buegas d’as demarcazions territorials d’os organos churisdizionals. A capitalidat d’as demarcazions chudizials se fixará por lei d’as Cortes d’Aragón.

2. O Gubierno d’Aragón partizipará, d’alcuerdo con a Lei Organica d’o Poder Chudizial, en a creyazión u transformazión d’o numero de sezions u chudgaus en l’ambito d’o suyo territorio.

Articlo 69. Clausula subrogatoria.

Antimás d’as competenzias d’esprés previstas por o presén Estatuto, a Comunidat Autonoma d’Aragón eixerzerá as funzions y facultaz que a Lei Organica d’o Poder Chudizial atribuiga a o Gubierno d’España con relazión a l’Alministrazión de Chustizia en Aragón.

Articlo 78. Notarios y rechistradors.

1. Os notarios y rechistradors d’a propiedat y mercantils serán nombraus por a Comunidat Autonoma, de conformidat con as leis de l’Estau, estando merito preferén o conoiximiento d’o Dreito propio d’Aragón y espezificamén o suyo Dreito Foral.

2. A Comunidat Autonoma partizipará en a fixazión d’as demarcazions correspondiens a las Notarías y a os Rechistros d’a propiedat y mercantils en Aragón, d’alcuerdo con lo previsto en as leis chenerals de l’Estau.

3. Corresponde a os organos churisdizionals d’a Comunidat Autonoma o conoiximiento d’os recursos contra la calificazión de documentos u clausulas concretas d’os mesmos, que aigan de tener azeso ta un Rechistro publico d’Aragón y sigan refirmaus en o Dreito Foral aragonés.

Articlo 28. Zenzia, comunicazión sozial y creyazión artistica.

1. Os poders publicos aragoneses promoverán a investigazión, o desembolique y a innovazión zentifica, teunolochica y teunica de calidat, igual como a creyatividat artistica.

2. D’igual traza, promoverán as condizions ta guarenziar en o territorio d’Aragón l’azeso sin de discriminazions a os servizios audiovisuals y a las teunolochías d’a informazión y a comunicazión.

3. Corresponde a os poders publicos aragoneses promover as condizions para guarenziar o dreito a una informazión veraz, que os suyos contenius respeten a dignidat d’as personas y o pluralismo politico, sozial y cultural.

Articlo 20. Disposizions chenerals

Corresponde a os poders publicos aragoneses, sin de perchudizio de l’azión estatal y dintro d’o marco d’as suyas competenzias:

L‘autonomía personal se configura como un nuevo dreito ta toz os ziudadans. A Lei de Promozión de l’Autonomía Personal y Atenzión a las personas en situazión de Dependenzia disposa que totas as personas mayors u con discapazidat que no puedan valer-se por ellas mesmas serán atendidas por as alministrazions publicas, qui tienen a obligazión de guarenziar l’azeso a os servizios publicos y a las prestazions economicas más adecuadas a las suyas nezesidaz.

Os poders publicos aragoneses promoverán midas que guarenzien l’autonomía y a integrazión sozial y profesional d’as personas con discapazidat, asinas como a suya partizipazión en a vida d’a comunidat y promoverán l’amostranza y l’uso d’a luenga de sinos española que premita a las personas xordas alcanzar a plena igualdat de dreitos y debers.

BALTASAR GRACIÁN

Articlo 29. Fomento d’a integrazión sozial d’as personas inmigrans.

Os poders publicos d’Aragón promoverán as politicas nezesarias ta la integrazión sozioeconomica d’as personas inmigrans, a efeutividat d’os suyos dreitos y debers, a suya integrazión en o mundo educativo y a partizipazión en a vida publica.

Articlo 24. Protezión personal y familiar.

Os poders publicos aragoneses endrezarán as suyas politicas d’alcuerdo con os siguiens obchetivos:

a) Amillorar a calidat de vida y o bienestar de todas as personas.

b) Guarenziar a protezión integral d’a familia y os dreitos de toda traza de convivenzia reconoixida por a ordinazión churidica.

c) Guarenziar a igualdat entre l’ombre y a muller en toz os ambitos, con ficazio espezial a la educazión, l’azeso a l’emplego y as condizions de treballo.

d) Guarenziar o dreito de todas as personas a no estar discriminadas por razón d’a suya opzión sexual y identidat de chenero.

e) Guarenziar a protezión d’a nineza, en espezial cuentra toda traza d’esplotazión, malos tratos u albandono.

f) Favoreixer a emanzipazión d’os chóvens, aduyando-les en o suyo azeso a o mundo laboral y a la vivienda.

g) Guarenziar a protezión d’a chen gran, ta que desemboliquen un vida digna, independién y partizipativa.

Articlo 20. Disposizions chenerals

Corresponde a os poders publicos aragoneses, sin de perchudizio de l’azión estatal y dintro d’o marco d’as suyas competenzias:

c) Promover a correzión d’os desequilibrios economicos, sozials y culturals entre os diferens territorios d’Aragón, fomentando a suya mutua solidaridat.