En tiempos d’a Segunda Republica, entre a primera metat d’o dezenio de 1930, se creoron en España zientos de bibliotecas, sobre tot en o mundo rural, que dica alavez eba mancau d’autividaz artisticas y culturals. En 1937 María Moliner redautó unas Instrucciones para el servicio de pequeñas bibliotecas, con a finalidat d’orientar y alentar a os bibliotecarios sin d’esperenzia, sobre tot a os destinaus a chicotas localidaz, an toz se conoixen. En ixas instruzions, les indicaba que o esito d’a biblioteca pendeba en buena parte d’o suyo treballo, o d’estimular a leutura y saber orientar a o leutor. Dar a cadagún o libro cual leutura le intresará, le atrapará y deseyará repetir, seguntes os suyos gustos y as suyas afizions.

Leye os siguiens fragmentos escritos por María Moliner y comenta-los.

O bibliotecario, ta meter entusiasmo en a suya fayena, amenesta creyer en istas dos cosas: en a capazidat d’amilloramiento espritual d’a chen a qui va a servir, y en a eficazia d’a suya propia misión ta contribuyir a iste amilloramiento.

No será buen bibliotecario l’individuo que rezibe invariablemén a o forano con parolas que tenemos gravadas en o zelebro, a fuerza de sentir-las, os que con una misión cultural emos vesitau lugars españols: «Mire vusté: en iste lugar son mui zerrils: vusté les fable d’ir a o baile, a o futbol u a o zine, pero… A la biblioteca…!».

En o vuestro lugar a chen no ye más zerril que en atros lugars d’España ni que en atros lugars d’o mundo. Prebaz a fablar-les de cultura y veyerez cómo os suyos uellos s’ubren y as suyas cabezas se mueven en un zeño d’asentimiento, y cómo invariablemén responden: Ixo, ixo ye o que nos fa falta: cultura! Els presienten, en efeuto, que ye cultura o que amenesten, que sin ella no i hai posibilidat de liberazión efeutiva, que nomás ella ha de dotar-les d’empenta sufizién ta incorporar-se a la marcha fatal d’o progreso umán sin risque d’estar revulcaus: sienten tamién que a cultura que a els les ye negada ye un privilechio más que confiere a bellas chens sin garra superioridat intrinseca sobre els, a vezes con una valor moral nula, una superioridat efeutiva en estimazión d’a soziedat, en posizión economica, ezetera. Y se revolven contra isto que vagamén comprenden pedindo, cultura, cultura…

Leyer un libro u veyer una zinta te puede levar a mundos esconoixius, a conoixer atras chens y atras trazas de vida u a vivir apasionans aventuras. María Moliner tamién dixó escrito:

A educazión ye a base d’o progreso; considero que leyer ye un dreito mesmo espritual y que, por tanto, cualsiquier ziudadán en cualsiquier puesto ha de tener a man o libro u os libros que deseyase leyer.

Creyes que leyer estimula a imachinazión y a creyatividat? Creyes que tener más educazión aduya a conseguir un treballo millor y prosperar en a vida? Argumenta as tuyas respuestas.

O dizionario que redautó María Moliner yera bella cosa distinto a l’editau por a Real Academia Española. Iste indicaba cómo caleba emplegar correutamén as parolas mientres que o de l’aragonesa esplicaba tamién, con exemplos, cómo s’utilizaban en a realidat, cómo las emplegaba a chen en a carrera, mesmo indicando esprisions coloquials u vulgars. No imposaba normas sino que yera un dizionario d’uso. D’ixa traza, tanto os que fablaban español como os que lo quereban aprender podeban comprender millor o significau de cada parola y, amás, maniar-la d’una manera adecuada.

A causa d’as suyas carauteristicas, muitos escritors lo prefirioron como aduya a la ora d’escribir as suyas obras literarias. Asinas, Miguel Delibes dizió d’él: “ye una obra que chustifica tota una vida”. Y Fernando Savater: “yera l’unico dizionario que se podeba maniar en iste país”.

O 10 de febrero de 1981, nomás uns días dimpués d’o feneiximiento de María Moliner, o colombiano Gabriel García Márquez, que ganaría o Premio Nobel de Literatura en 1982, publicó en os diarios una carta en a cuala siñalaba cuánto debeba a María Moliner. Le pareixeba una prodeza estraordinaria que ese estau capable d’escribir sola, a man, en a suya casa, sin garra aduya, una obra que pareixeba aber estau confezionada por un numbroso grupo d’espezialistas de gran renombre dotaus con abundans meyos y un gran presupuesto. Seguntes aseguraba o novelista, yera más de dos vezes más largo que o d’a Real Academia Española y más de dos vezes millor. Él amenestaba tener siempre a man o dizionario redautau por l’aragonesa, o “más completo, más útil, más acuzioso y más divertiu d’a luenga castellana”, an eba adubito plasmar a realidat d’una luenga viva. Ista, como si estase arena, se le eslampaba d’entre os didos a os academicos, partidarios d’escuras definizions y cuentrarios a azeutar l’emplego de nuevas parolas dica que ya yeran richidas y gastadas por l’uso.

Uns años dinantes querió conoixer a tan sorprendén muller. Viacheó a España creyendo que sería famosa, pero, con gran sorpresa ta él, resultó que pocos la conoixeban. Finalmén adubió dar con un d’os suyos fillos, que le indicó que a suya mai yera mui malauda y no rezibiba vesitas. Cuan María Moliner feneixió, García Márquez aseguró que se trobó como si ese perdiu a un ser quiesto. Belún que, sin saber-lo, eba treballau sin descanso ta él. Una persona unica que “pretendió agafar a o vuelo totas as parolas d’a vida” ta meter-las a la disposizión de toz os que fablan en español.

Sabes quí son Miguel Delibes, Fernando Savater y Gabriel García Márquez? Mira en internet un resumen d’a suya trayeutoria literaria. Mira tamién o títol de cualques d’as suyas obras. Has leyiu beluna? Cuál yera o suyo argumento?

Si bella cosa nos esferenzia d’a resta d’os sers vivos que conoixemos, animals y plantas, ye o parlache, l’uso d’a parola, que nos permite comunicar-nos uns con atros y elaborar pensamientos complexos. As cosas que no tienen nombre no esisten, pues sin una parola que las identifique no podemos informar a no dengún d’a suya esistenzia.

En totas as luengas as parolas tienen un orichen, una etimolochía, y a María Moliner le cuacaba agrupar-las seguntes ixe orichen. En o suyo libro, l’orden tematico primaba sobre l’alfabetico. Asinas, por exemplo, podeébanos saber que balón deriva de bala u que cultura y cautivo tienen una mesma prozedenzia y, por ixo, una mesma radiz.

Ye correuto dezir que un campo permanexe inculto? Y que una persona ye poco cautivada?

Mira d’averiguar si a parola “asasino” tiene bella relazión con l’hachís. U si a parola “inaugurar” ye relazionada con os pornostiques, uns adivinos d’epoca romana.

Mira tamién en internet l’orichen d’as parolas “papel”, “libro”, “biblioteca” y “bercamino”. Ta dar-te una pista: dos d’ellas son relazionadas con plantas y as atras dos, con ziudaz de l’Antiguidat. Sabes por qué?

En cada rechión, encara dentro d’un mesmo país con una mesma luenga, s’utilizan parolas particulars que nomás emplegan que os que allí viven. En Aragón i hai pros, que no entienden os abitadors d’atras partes d’España.

Fe corresponder as parolas utilizadas en Aragón d’a columna zurda con os significaus d’a columna dreita.

1.- Chipiar                                                 a) Desaguisado

2.- Esbafar                                                b) Calambre

3.- Chandrío                                             c) Chismoso

4.- Encorrer                                               d) Goloso

5.- Laminero                                             e) Barrer

6.- Garrampa                                           f) Perseguir

7.- Escobar                                                g) Perder el gas

8.- A cordetas                                           h) Limpio

9.- Escoscado                                           i) Mojar

10.- Alparcero                                           j) A caballito

Soluzión: 1-i, 2-g, 3-a, 4-f, 5-d, 6-b, 7-e, 8-j, 9-h, 10-c

Cuan s’editó o dizionario de María Moliner causó una gran almirazión. Quí yera ixa muller que eba escrito tot un dizionario? Os elochios se suzedioron y dica i abió cuantos academicos que esfendioron que a suya autora eba de formar parte d’a Real Academia Española. Tres d’els, como marcaba o reglamento, proponioron en 1972 que ocupase una plaza que en ixe inte se trobaba vacán. Manimenos, a la fin s’optó por triar a un candidato diferén. Entre as razons que dioron ta refusar o suyo nombramiento figuraba que no yera filologa sino lizenziada en Istoria. Amás, garra muller eba estau nunca miembro de l’Academia dende que estió creada, en 1713.

Y ixo zaguero yera verdat. A primera muller cual nombre sonó ta ingresar en l’Academia estió a poetisa y dramaturga Gertrudis Gómez de Avellaneda. Lo intentó en 1853, pero, dezaga d’un intenso debate, ixe año se plegó a l’alcuerdo de proibir a dentrada de mullers en a instituzión. En años posteriors se fabló d’atras mullers de verdadero merito, como Rosalía de Castro u Concepción Arenal. Pero as puertas de l’Academia siguioron zarradas ta las mullers.

Un causo eszeuzional estió o d’a escritora Emilia Pardo Bazán, cuals obras yeran d’as más leyidas en a suya epoca, tanto en España como en l’estranchero. Prebó d’estar academica en cuantas ocasions, en 1889, 1891, 1912 y 1914. Pero nunca no lo conseguió por a suya condizión de muller, pese a o refirme cheneralizau d’a prensa y de literatos de la talla de Benito Pérez Galdós.

Quí estió a primera muller miembro d’a Real Academia Española? Cuán ingresó? Cuántas academicas bi ha abiu en os suyos más de treszientos años d’istoria d’a instituzión? Totas s’han adedicau en esclusiva a la literatura?

En l’autualidat i hai cuantas mullers academicas y dos d’ellas tienen una espezial relazión con Aragón: Soledad Puértolas y Aurora Egido. Qué sabes d’ellas? Mira en internet informazión sobre a suya vida y a suya trayeutoria profesional.

Uei, en internet, i hai cuantas pachinas web que t’amanan ta la fegura de María Moliner y a o suyo famoso dizionario. Vesita belún d’os siguiens enlazes y comenta qué t’han pareixiu.

Y no nomás ixo. En 2012 s’engueró una obra de teatro titulada El diccionario, cuala protagonista yera María Moliner. Estió escrita por Manuel Calzada y publicada en forma de libro un año dimpués. Y en 2016 s’engueró en o teatro de la Zarzuela de Madrit, María Moliner… una opera! Zentrada en o momento en o cual enzeta a elaborazión d’o suyo dizionario, daba a conoixer as suyas intuizions, as suyas pasions, os suyos recosiros y fantesías, asinas como a cruel enfermedat que en os suyos zaguers años la fazió olbidar totas as parolas que ella mesma definió.