Elvira de Hidalgo
Voz envolvente, mayestra sin igual
Valderrobres / Vall de Roures, 1891 – Milán, 1980
Elvira Juana Rodríguez Raglán (o suyo pai, Pedro, yera de Granada; a suya mai, Miguela, d’o mesmo Valderrobres) amostró dende nina uns esplendius dotes ta la mosica. Instalada a suya familia en Barzelona, o suyo pai la levó a estudiar canto a o Conservatorio d’o Liceu con a soprano Conchita Bordalba. L’aduya d’un mezenas le permitió, con tan solo deziséis años, proseguir os suyos estudios en Milán con o mayestro Melchor Vidal y debutar en o teatro San Carlo de Napoles interpretando a Rosina en o barbero de Sevilla. Ixe aplaudidismo papel, que interpretará muitas vezes, supondrá l’inizio precoz d’una carrera fulgurán: logada ta autuar en París y Montecarlo, autuará tamién en El Cairo y en Praga.
Prenió o “Hidalgo” d’a suya lola paterna. Elvira yera una soprano dramatica de coloratura (tamién clamada soprano d’agilità), con una voz áchil capable d’executar as notas a gran velozidat, con un estilo ornamentau, con grolleos. Poseyeba un timbre calido, suave y dulze por una parte, pero tamién poderoso y vibrán. Ixe rechistro tan amplo le permitiba atrivir-se con agudos mui intensos y controlar os grieus grazias a una teunica innovadera en a tesitura de peito, que transmitirá más tarde a la suya alumna Maria Callas.
Vida
En 1910, con tasamén deziueito años, ya ye aclamada en Estaus Unius. Ye a más choven en debutar como prima donna en o Metropolitan de Nueva York, an será a Gilda de Rigoletto chunto a o gran tenor Enrico Caruso (tamién interpretará ixa obra años más tarde, en o dezenio de 1920, con Miguel Fleta en Buenos Aires y en Madrit). De tornada ta Europa le aguardan Viena, Florenzia y, a l’año siguién o debut en o Constanzi de Roma, o Teatro Real de Madrit y o Liceu de Barcelona. Cuan en 1916 a Scala de Milán zelebró o zentenario de El barbero de Sevilla, Elvira d’Hidalgo estió a indiscutible Rosina: un personache vivaz, trazero y caprichoso, a o mesmo tiempo que candoroso y malinconico en o cual sabió penetrar psicolochicamén, tal vez porque se pareixeba bella cosa a ella.
En istos años, a suya fama crexió. Se casó en 1915 con un marqués italiano, Guido Zarabelli, d’o que enviduará muito luego, y se codió con chens ricas y poderosas: estió pretendida y amada por politicos y aristocratas, se le declaroron l’Aga Khan y un Romanov… pero ella anteponió perén a suya carrera a las suyas pasions y afeutos. Más tarde, en 1928, se casará de nuevas ista vez con o franzés Armand Bette, de qui levará una vida pro independién. Elvira no renunzió a os suyos viaches por o mundo (dende os eszenarios más consolidaus d’Europa y America dica atros menos abituals, como La Habana u Helsinki).
Obra
Entre o dezenio d’os trenta, fue espaziando as suyas autuazions; comprendió que a suya voz, a la cuala eba forzau dica o limite, no podeba dar más de sí. Con más de cuaranta años, o ritmo de vida y o trachín d’os viaches demandaban una tregua, y reorientó a suya carrera ta la ensiñanza. Dende 1936 dio clases de canto en Atenas. Estió astí an, un día, plegó en a suya aula una adoleszén apocada y d’aparienzia acompleixada: “un patito fiero” en o cual a profesora deteutó un tresoro amagato.
Filla d’emigrans en Estaus Unius, a neoyorkina Maria Anna Cecilia Sofia Kalogeropoúlou eba tornau ta Grezia con a suya mai y con a suya chirmana. Elvira, cuals plantiamientos pedagochicos pasaban por inzentivar o compañerismo entre os suyos alumnos sin escudiar a desichenzia ni a disziplina, invirtió en ixa choven tot o suyo saper y o suyo esfuerzo. Convenzida de tener debán de ella a una soprano de primer orden (fren a o criterio d’a suya anterior profesora, que la consideraba mezzosoprano), vulcó en a zagala as teunicas con as cualas ella mesma eba trunfau: una dosificazión milimetrica de l’aire basada en una estrema obredura d’o vedau ta la emisión y ataque d’agudos y sobreagudos. D’ista traza se forchó Maria Callas como una soprano sfogato, ilimitada, d’amplismos rechistros.
Diva
Ixa gran diva alzó gratitut eterna ta la suya mayestra: “A Elvira de Hidalgo debo tota a mía preparazión y a mía formazión artistica como autriz y mosica. Amás de dar-me a suya valiosa ensiñanza, ista muller me dio tamién o suyo corazón”. En efeuto, l’aragonesa no nomás le mostró a esclatar a suya valura mosical y o suyo potenzial en o canto: la transformó fisicamén, le imprentó eleganzia, la convirtió en autriz, le dotó de parlache chestual, dramatismo y espresividat. Amás le dio autoestima y seguranza, estió consellera, confidén y complize. Elvira trobó en Maria a filla que nunca no tenió y exerzió bel papel maternal ta ella. En a Grezia ocupada por os alemans, paró a la suya nineta ta cantar as dos operas más representativas d’a luita por a libertat y cuentra a tortura: Tosca, de Puccini, y Fidelio, de Beethoven. A partir d’astí, María prenzipió a ubrir o suyo propio libro.
Más tarde, en o dezenio de 1950, Elvira de Hidalgo marchó ta o Conservatorio d’Ankara, presidió churaus y tribunals, y en 1959 tornó ta Milán, an estió catedratica vitalizia d’o Conservatorio d’a Scala. Perén eba estau una muller ristolera, vital y integradera, que desprendeba bogalería y simpatía, y en os suyos vente zaguers años no perdió brenca d’ixe caráuter: compachinaba as clases de canto con a vida sozial, prodigando-se en zenas y fiestas en casa, veiladas a as cualas no mancaban chens d’a cultura y as artes, periodistas, empresarios, etz. Manteneba un estreito contauto con a suya quiesta Maria Callas y se le trencó l’alma cuan a diva d’orichen griego murió de rapiconté, en o suyo apartamento de París, fren a un retrato d’Elvira. Correba 1977 y no plegarían a tres años os que le sobreviviría a suya mayestra.
Referenzias
- Virginia López Enano (2018): “Elvira de Hidalgo, la soprano española que descubrió a María Callas. El País Semanal. https://elpais.com/elpais/2018/08/21/eps/1534848978_452121.html
- Juan Villalba (2021): Elvira de Hidalgo. De prima donna a maestra de María Callas. Madrid: Fórcola Ediciones.
- Elvira de Hidalgo. Donare la divinità. Vicky Calavia. Documental de 2021 (55 minutos). Tráiler en https://vimeo.com/vickycalavia
- Mujeres que son tesoros. Guía didáctica. Zaragoza, Instituto Aragonés de la Mujer, 2020. https://bibliotecavirtual.aragon.es/i18n/catalogo_imagenes/grupo.cmd?path=3718032
Autividaz didauticas
Personaches inmortals
Elvira de Hidalgo fazió grans interpretazions en os suyos personaches femeninos, a os cuals imprentó una singular riqueza chestual. Valendo-te de cualques informazions que damos en a biografía, y d’atros datos que puedes mirar en internet, completa iste cuadro de personaches a os cuals dio vida, con as suyas obras y autors correspondiens.
| Personache | Obra | Compositor |
| Rosina | ||
| La Sonámbula | ||
| Zerlina | Mozart | |
| L’elisir d’amore | ||
| Gilda | Verdi |
Soluzions:
Rosina. El barbero de Sevilla. Rossini
Amina. La Sonámbula. Bellini
Zerlina. Don Giovanni. Mozart meterlo un poco más
Adina. L’elisir d’amore. Donizetti
Gilda. Rigoletto. Verdi
Escuitar a Elvira de Hidalgo y a la suya alumna
Ordena istos rechistros de voz femenina, d’o más agudo a o más grieu:
Mezzosoprano / Contralto / Soprano
Soluzión: soprano (voz aguda), mezzosoprano (voz meya), y contralto (voz grieu).
Anque fazió atras grans interpretazions, en El Barbero de Sevilla, de Rossini, Elvira dio lo millor d’o suyo arte. Amás d’escurruchar as suyas virtuz como cantaire ta o personache de Rosina, a Hidalgo esplegaba una atrautiva mesa en eszena, acobaltando o chuego d’a seduzión femenina a traviés d’o parlache amagato d’o ventallo.
Un exemplo d’a suya eszelenzia como soprano ye “Una voce poco fa” de El barbero de Sevilla.
Elvira cuaternó pros gravazions en discos de pizarra ta gramofono en estudios de Milán, Atenas y Londres. A suya voz ha puesto conservar-se grazias a cualques recopilazions en disco compauto, sumando alportazions de particulars y intercalando cualques d’ellas con gravazions de María Callas.
Averigua sobre parolas que seguramén no abrás escuitau nunca: Qué ye un aria? Qué ye un bis? Qué ye un disco de pizarra? Qué ye un gramofono?
María Callas ye considerada a gran voz femenina que dominó o panorama operistico mundial entre os dezenios de 1950 y 1970. A suya singular belleza (más bien glamour) y eleganzia, a suya vida personal y sozial, la convirtioron en un personache enormemén popular.
Entender a opera y más cosas
María Callas estió una pieza importán en a popularizazión d’un chenero que siempre eba teniu unas connotazions de mosica “ta uns pocos”, “difizil d’entender”, ezetera. Dentra en o nuestro conteniu adedicau a Miguel Fleta y veyerás que ixa idea de “mosica elitista” no lo yera guaire. Dimpués d’ella, sopranos y tenors como Montserrat Caballé u Luciano Pavarotti, por nombrar nomás que a un par d’els, han contribuyiu a que a opera sía perzibita de traza más popular.
A cultura popular, a la fin y a o cabo, ye repleta d’alportazions vincladas a o mundo d’a opera, que dixa asinas d’estar perzibito como bella cosa tan “esclusiva”.
Investiga y replega informazión sobre istas dos obras artisticas (una zinta de 1935 y un disco de rock de 1975) que tienen o mesmo títol (ixo incluye a posibilidat d’apreziar totas dos obras y desfrutar-las en a suya integridat):
- Una noche en la Ópera (zinta d’os Chirmans Marx): bella vez has sentiu a frase: “Isto pareixe o cambrote d’os chirmans Marx”?
- Una noche en la Ópera (disco d’o grupo britanico Queen): o suyo tema más popular ye “Bohemian Rhapsody”. Qué ye una rapsodia?
Personalidaz chermanas
Elvira de Hidalgo entabló amistat y buena relazión con atras mullers dezididas y empentaderas que fazioron d’a suya creyatividat y o suyo arte un arma ta desembolicar-se en un mundo dominau por os ombres.
Relaziona istos nombres con a descripzión que millor las define:
1) Anna Pávlova
2) Coco Chanel
3) Loïe Fuller
4) Josephine Baker
a) Bailarina, cantaire y autriz luitadera por os dreitos sozials
b) Diseñadora franzesa d’alta custura
c) Gran bailarina d’o Ballet Imperial Ruso
d) Bailarina, autriz, produtora y escritora estadounidense, innovadera en mesas en eszena y efeutos visuals
Soluzions: 1-c; 2-b; 3-d; 4-a
O lugar d’Elvira… ta l’eternidat
Elvira de Hidalgo naxió en Valderrobres o 28 d’aviento de 1891.
Sitúa Valderrobres/Vall de Roures en o mapa d’Aragón. A qué provinzia y comarca perteneixe?
Ista localidat perteneixe a o dominio lingüistico d’o catalán d’Aragón. Aprende un poco más sobre ixa realidat diversa y enriquidora en ista web.
A suya familia no yera enradicada en ixa localidat, s’instaló en Barzelona estando Elvira mui chicota, y ista (vagamundo entre os suyos años de vida artistica y, más tarde, asentada por a suya profesión en Grezia, Turquía y Italia y sin familiars en a suya villa natal) nunca no mantenió lazos visteros con ella. Pero Valderrobres y os suyos vezins sabioron estar a l’altaria. Dende a suya muerte en chinero de 1980, Elvira escansaba en un fosal milanés: con o paso d’os años,en no renovar-se o loguero, se daba a posibilidat que as suyas restas isen a parar ta la fuesa comuna.
O Conzello de Valderrobres y a Fundazión Valderrobres Patrimonial inizioron unas chestions que dioron o suyo fruito con o treslado d’as restas d’Elvira ta o fosal d’a capital d’o Matarraña, con o recordatorio a la suya fegura, y una esposizión permanén con materials, obchetos, documentos y imachens que nos amanan a la personalidat d’ista muller unica.
Valderrobres ye una villa con un patrimonio mui intresán y situada en un entorno mui acullidor. Programa una escursión que incluiga, pro, una vesita a o museu adedicau a la suya ilustre filla. Aduya-te a partir d’iste enlaz.
Ya en 2003 ixa villa eba aculliu una gala lirica d’omenache a la suya ilustre filla, organizada por l’Asozcación de Amigos de la Música de Zaragoza.
Más rezienmén, investigazions (como una tesis dotoral d’a Universidat Complutense a cargo de Zoila Martínez) y atras obras y proyeutos divulgativos como os que zitamos entre as referenzias… han aduyau a que Elvira de Hidalgo sía cada vez más reconoxida.
DIRECCIÓN GENERAL DE POLÍTICA LINGÜÍSTICA
Departamento de Educación, Cultura y Deporte
Parque Empresarial Dinamiza (Recinto Expo)
Avenida de Ranillas, 5D - 2ª planta
50018 Zaragoza
Tfno: 976 71 54 65
Colabora:
