Select Page

Miguel de Molinos

Esprito libre y ensimesmau

Muniesa, 1628 – Roma, 1696

Miguel de Molinos prosigue una peculiar linia d’heterodoxos aragoneses encabezada por Miguel Servet. No tenió una fin tan violenta como o sixenense, pero sí dramatica y a cambra lenta. Tot, por retar a o dogma y por empreñar a o poder, anque no estase ixe o suyo obchetivo.

Naixiu “entre oliveras y mestura en os sasos de Muniesa” (como diz Antón Castro), y dezaga d’una infanzia y adoleszenzia d’as cualas se sabe mui poco, o choven Miguel, fillo de Pedro Molinos y Ana María Zujía, s’establió en Valenzia, benefiziau por una beca atorgada por a ilesia de San Andrés. En a ziudat levantina estudió en os chesuitas, cursó Teolochía y s’ordenó sazerdote en 1652. Estió confesor de monchas y miembro d’a Escuela de Cristo, una congregazión mui estricta adedicada a la reflesión espritual.

Vida

En 1663 estió ninviau ta Roma por a Deputazión d’o Reino de Valenzia, delegau ta azelerar a beatificazión d’o capellán valenziano Francisco Jerónimo Simó. Y d’a Ziudat Eterna ya no en tornaría. Astí ingresó en a delegazión romana d’a Escuela de Cristo y prenzipió a ganar fama como gran pedricador y direutor espritual de personalidaz siñaleras, entre ellas mullers de l’alta soziedat. Como aszeta y “iluminau”, prauticó un estilo de vida austero en busca d’a perfeuzión moral y espritual.

Prezediu d’un Breve tratado de la comunión cotidiana, en 1675 publicó a Guía espiritual que desembaraza al alma y la conduce por el interior camino para alcanzar la perfecta contemplación y el rico tesoro de la interior paz. Ixa obra ya diz muito en o suyo extenso títol. Ta Molinos, l’alma ha d’estar pura, sin de pecau, aleixada de preocupazions y meditazions. Ixe vuedo espritual, ixa cosa, ye o camino más curto ta plegar a Dios. I hai qui veye en ixas doctrinas un parentesco con o budismo y a busca d’o nirvana.

Obra

A Guía espiritual contó con l’aprebazión de teologos (varios d’els zensors d’a Inquisizión) y en años posteriors se traduziría ta o castellán (en cuantas edizions, zaragozana una d’ellas), italián, franzés, olandés, anglés, alemán y ruso. O molinosismo y os suyos metodos “quietistas” ganoron seguidors.

En un primer momento, istas doctrinas no troboron inconvenién, pero dimpués empezoron a cambiar as tornas. Molinos eba escrito unas Cartas a un caballero español desengañado para animarlo a tener oración mental, dándole modo para ejecutarla, prebando de correxir astí cualques puntos que perzibiba que no yeran estau bien interpretaus en a suya Guía espiritual. Pero ixo no bastaba, porque as suyas doctrinas empreñaban a chen muito poderosa en Roma y en a cristiandat.

Ataques sin de tregua

Os chesuitas sentiban que, en a suya esfensa d’a contemplazión fren a la meditazión, o de Muniesa yera dispreziando a o suyo fundador Ignacio de Loyola y os suyos Ejercicios Espirituales. S’acusaba a Molinos d’iniziar en o sistema contemplativo (eszelso y complexo y nomás a l’alcanz de “unas pocas almas privilechiadas”) a “cualsiquier moncha u femina”. Isto esplica muitas cosas. O que escozeba a os chesuitas yera que no pocos conventos de monchas eban pasau de la direzión d’a Compañía a la metodolochía molinosiana.

Se yera metendo a preba a influenzia d’a Compañía de Chesús y a uembra d’ista yera muito larguera. Cualques chesuitas empezoron a chitar ataques sin de tregua y a siñalar-le direutamén como eretico. Molinos escribió a suya esfensa d’a contemplazión sin muito esito, porque tanto ixe como a Guía espiritual estioron incluyius en 1681 en l’Endiz de libros proibitos por o Santo Ofizio. O papa Inocencio XI, tot y con a suya amistat con Molinos, rebló debán de ixas presions.

As doctrinas quietistas estioron sozmetidas a chuizio, consideradas un canzer que s’estendillaba por España y Franzia. Molinos estió apresau en o verano de 1685. O prozeso estió lento porque no yera fázil conseguir prebas d’as presuntas desviazions doctrinals d’o sazerdote aragonés. Baixo tortura, almitió absurdas acusazions d’inmoralidat y abchuró d’as suyas doctrinas. Rebaixau y con una condena a prisión de por vida, feneixió o Día d’os Inozens de 1696. A suya fegura y a suya obra (una espiritualidat innovadera basada en a esperenzia de l’individuo) se recuperarán bien dentrau o sieglo XX.

Referenzias

Amostramos aquí belunas d’ellas.

  • Antón Castro (1993): “Miguel de Molinos. El tormento de la nada”, en Aragoneses ilustres, ilustrados e iluminados (108-113). Zaragoza: Gobierno de Aragón.
  • Wikipedia: https://es.wikipedia.org/wiki/Miguel_de_Molinos
  • Jesús Ezquerra (2014): El profundo de la nada. El desapego de Dios en el místico aragonés Miguel de Molinos. Zaragoza, IFC.
  • Francisco Martín, Miguel Ángel Motis (2019): Miguel de Molinos. Heterodoxia, mística y escritura. Muniesa-Utrillas, Centro de Estudios Miguel de Molinos, Comarca Cuencas Mineras.

Autividaz didauticas

O mistizismo

Como veyes, ixas carauteristicas consonan con o que emos conoixiu d’a suya vida y pensamiento. Miguel de Molinos prosigue una larga tradizión mistica, que en os territorios ispanicos teneba una fuerte implantazión dende sieglos dezaga. O mistizismo no nomás corresponde que a o mundo cristiano, sino que conta con significativos exponents musulmans y hebreu.

Mira informazión sobre istos termins: Sufismo / Cabala.

A tradizión mistica ye cobexada baixo diferens credos y confesions relichiosas. Muitas vezes camina por as suyas marguins y corre o risque d’estar tenida por periglosa si i hai esfensors d’o dogma tan rigorosos y estrictos que consideran que as visions alternativas u un poquet “diferens” atacan direutamén a o nuclio d’a fe.

Mira a definizión de: Dogma.

Creyes que o dogmatismo ye contrario a la libertat de pensamiento? Redauta una breu retolica sobre ixas custions en pocas linias. A biografía de Molinos puede aduyar-te a exemplificar-lo, pero tamién as dentradas que tenemos en ista web arredol de Miguel Servet y (anque de forma no tan cruda) Baltasar Gracián.

Dinantes que Molinos, muitos relichiosos eban seguiu ixa carrera mistica cristiana que tan bien (y con gran calidat literaria) personifican san Juan de la Cruz y santa Teresa de Jesús. Istos dos autors estioron glorificaus y canonizaus tot y que deziban cosas que podrían aber estau intepretadas de traza estorzida. De feito, tampoco no les mancoron problemas en vida y se troboron en muitas ocasions con a zensura y a intoleranzia.

Anque l’autor murió en 1591, ista obra no estió publicada dica 1630. A qué crees que podió deber-se? Te pareixe que os poemas d’o Cantico espiritual son mui relichiosos seguntes “lo rigoroso”… u tal vez as trazas d’espresar-se indican unatra cosa?

Cualques pistas: iste poeta fabla d’amor, de belleza, de recreyo… asimilando-los a o divino. Isto (y atras cosas) caloron en problemas a Juan de la Cruz en a suya orden, la d’os carmelitas, le costó prisión… anque finalmén podió desarrollar a suya obra.

Como dizen Martín y Motis, o mistizismo de Miguel de Molinos “pon eba de no ese rezibiu d’antigo l’aprebazión d’a Ilesia en os escritos d’os grans misticos españols y de san Francisco de Sales, abandonando tot aparato d’estasis y visions mui abundans en os escritos de santa Teresa, reduzindo o suyo camín de perfeuzión a l’ideyal brahmanico de l’anihilazión d’o sentiu y l’entendimiento, o silenzio u muerte misticos, an se funeix a parola, o pensamiento y a voluntat y fabla Dios con l’alma y le amostra a más altera sapenzia”.

Pero o capellán turolense no contó con o beneplazito que sí tenioron atros misticos. No nomás ixo, sino que estió castigau mui duramén. L’amanamiento ta la divinidat por meyo d’a contemplazión como anihilazión y recullimiento, a orazión d’a quietut, a suspensión d’a parola y l’entendimiento… tot ixo cayerá baixo a sospeita teolochica. A desgrazia de Molinos estió que a suya popularidat, o esito que teneban as suyas doctrinas atrayió invidias en a curia papal, movida por intreses politicos.

A Compañía de Chesús exerzeba un poder inmenso en Roma y en gran parti d’a cristiandat. A suya influenzia yera inmensa en o doctrinal y en o educativo, y as doctrinas tan seguidas de Molinos yeran un obstaclo. Ixo esplica os ataques furibundos que le levoron a estar prozesau. A Inquisizión española acullió con satisfazión a condena de de o molinosismo (que yera mui extendiu en Franzia, Italia y España) y d’o suyo lider y seguidors.

Talmén, en refusar y castigar as doctrinas quietistas de Molinos, a Ilesia catolica perdió a ocasión d’aber-se amanau ta una comprensión más universal d’o feito relichioso.

Un paralelismo, relazions “reals” y influenzias de Miguel de Molinos

Unatro ilustre aragonés en Roma

Uns dezenios dinantes, unatro aragonés, iste de Peralta de la Sal, eba dixau en Roma un rastro importán. José de Calasanz (1557-1648) ye un d’os grans nombres d’a istoria d’a Pedagochía. Estió en a ziudat d’os papas an enzetó as iniziativas que fructificoron en a creyazión d’escuelas gratuitas y populars. O fundador d’as Escuelas Pías, amigo y valedor de Galileo y de Campanella, tamién se las eba visto con os chesuitas, que no veyeban con buens uellos as alternativas a o suyo monopolio educativo.

Esplora en a biografía de san José de Calasanz y resume as suyas aportazions a la istoria d’a eduazión.

Cristina de Suezia, una reina diferén

Miguel de Molinos mantenió una intensa relazión, sobre tot epistolar, con a exreina Cristina de Suezia (1626-1689). Muller d’un gran azogue inteleutual (en a suya choventut eba clamau a o filosofo René Descartes a la suya corte en Estocolmo), dezaga d’a suya abdicazión y posterior conversión ta o catolizismo, eba viviu entre Roma y atras ziudaz europeas. S’eba destacau por a suya libertat de pensamiento (o que le atrayeba no pocas criticas en l’ambién romano, mui conservador) y se sintió atrayida por o quietismo proponiu por Molinos.

Cristina de Suezia ye un personache muito intresán porque trencó muitos moldes en a suya epoca. Nadó cuentra corrién en custions mui sensibles (como a relichiosa, en renunziar a la firme tradizión protestán d’a suya dinastía, u os rols de chenero y afeutivo-sesuals a os cuals desafió). Esplora un poquet en a suya biografía. I hai un clasico d’o zine de toz os tiempos: a zinta La reina Cristina de Suecia (1933). Tiene una trama romantica más bien edulcorada, pero nomás por veyer a traza en que imple a pantalla a gran actriz Greta Garbo… mereixe a pena. Se puede azeder a ella fazilmén en diferens plataformas. Más rezién, de 2015, tamién se zentraba en a suya fegura a zinta canadiense Reina Cristina Armas Rojas (basada en a obra de teatro La Reine-Garçon).

Molinos, recuperau

Miguel de Molinos ha influyiu en as obras literarias de Ramón María del Vallle Inclán (qui en o suyo libro La lámpara maravillosa aborda custions relazionadas con a reencarnazión y o karma) y Ramón J. Sender (más que más, en a suya novela El verdugo afable). Tamién, de traza muito nitida en María Zambrano (fabla d’a no-cosa como “exerzizio creyador”, mira l’ideyal en a verdat). Ista gran filosofa, que reflesionó sobre as relazions entre lo divino y lo poetico, replega en muitos d’os suyos libros (entre els, Claros del bosque) as ideas de o pensador aragonés y publicó un articlo titulado “Miguel de Molinos reaparecido” (revista Ínsula, 1974), en o cual se preguntaba: “No será que a poesía siempre camina emparellada con a mistica, que sía ella mesma en bella traza una mistica?”.

O quietismo ha quedau enzarrau en un topico que no ye esauto: a suya identificazión cuasi esclusiva con o pensamiento oriental. Seguntes Tellechea, Molinos ye o pionero d’o libre pensamiento y pai d’o razionalismo moderno; ye un teosofo emparentau con l’Orién (…), ye a zima d’a mistica española (…) y represienta un modo aragonés d’estar ereche”.

Cuasi a modo de conclusión… visto tot isto con uellos d’o sieglo XXI, no ye fazil entender cómo os detalles y matiz arredol de custions que en o fondo son tan intimas (l’alma, a conoixenzia d’un mesmo, a paz interior…) podeban devantar tantas pasions, levar ta la muerte u ta la garchola a qui se saliban d’o dogma, anque ta cosa cuestionasen o sucheto autentico d’a fe. En clase podez contimparar y debatir sobre conflictos y situazions que uei en día pueden recordar a aquellas d’o pasau. O tema tiene muitas, muitismas leuturas.

Cualques custions ta concluyir

 

Dende Muniesa, a suya localidat natal, se reinvindica tamién a fegura de Miguel de Molinos, qui da nombre a un Centro de Estudios. Ista entidat cultural, adscrita a l’Instituto de Estudios Turolenses, mira de recuperar a memoria d’un d’os suyos fillos más ilustres.

Emos trigau cuatre frases que dan paso a beluns d’os primers capitols d’a obra prenzipal de Miguel de Molinos, la Guía Espiritual.

    • Ta que Dios escanse en l’alma, s’ha de pazificar siempre o corazón en cualsequier azogue, tentazión u tribulazión.
    • Anque l’alma se veiga privada d’o discurso, ha d’ensistir en a orazión y no aflixir-se, porque ixa ye a suya mayor felizidat.
    • No s’ha d’aflixir l’alma ni ha de dixar fogaril orazión por veyer-se rodiada de sequeras.
    • Ta que l’alma plegue ta la suprema paz interior, ye nezesario que Dios la purgue a o suyo modo, porque no bastan os iexerzizios y mortificazions que ella pueda prener por a suya man.

A parola “alma” apareixe en as cuatre frases: por qué creyes que le da tanta importanzia? Creyes que o mandau ye optimista u pesimista? Da asperanza, da consellos? Siñala obstaclos y inconveniens? Creye que pueden superar-se?

Anque sía poco conoxiu, puede dezir-se que Miguel Molinos puede estar apreziau dende l’autualidat porque aborda custions universals que preocupan a o ser umano dende o prenzipio d’os tiempos. Se sía creyén u no… siempre i hai una parte de nusatros que en bel momento, por fugaz que pueda estar, mira una explicazión traszendén, una chicota luz, una conisión con un bella cosa ideyal… “Y pobre ombre en suenios / perén mirando a Dios entre a boira”, deziba o gran poeta Antonio Machado (poema “Es una tarde cenicienta y mustia”, en Soledades, Galerías y otros poemas, 1907).

Aragoneses ilustres, ilustrados e iluminados

Descarga dende iste enlaz o PDF d’a publicazión Aragoneses ilustres, ilustrados e iluminados, de Antón Castro y José Luis Cano, editada por o Gobierno de Aragón en 1993.

DIRECCIÓN GENERAL DE POLÍTICA LINGÜÍSTICA

Departamento de Educación, Cultura y Deporte

Parque Empresarial Dinamiza (Recinto Expo)
Avenida de Ranillas, 5D - 2ª planta
50018 Zaragoza
Tfno: 976 71 54 65

Colabora: