Select Page

Santiago Ramón y Cajal

A cultura d’o esfuerzo,

a valor d’a voluntat

Petilla d’Aragón, 1852 – Madrit, 1934

Ramón y Cajal vivió os suyos primers años en Larrés (o lugar d’a suya familia), Luna, Valpalmas y Ayerbe, an o suyo pai, Justo Ramón, concluyió o suyo rosario de destins como medico rural. Santiago yera un nino inquieto, coi y de curiosidat innata. O suyo pai, severo y poco amigo de bromas, no le permitió desembolicar a suya gran afizión por o debuxo (que más tarde aplicaría mui bien a las suyas investigazions), pero imprentó en Santiago una cultura d’o esfuerzo que él mesmo (que i eba progresau de barbero a zrujano de segunda, dica obtener o puesto de profesor de Disezión en a Universidat de Zaragoza) eba seguiu sin conisión.

Dezaga de pasar por os Escolapios de Chaca, remataría en l’Instituto de Uesca os estudios de bachiller. En as vacanzias, o suyo pai intentaba ligar-lo en curto, dominar a suya tendenzia indomita y inculcar-le conoixenzias d’anatomía con escletos d’o sagrero d’Ayerbe. Apasionau por a educazión fisica, por a literatura fantastica y por a filosofía, marchó ta Zaragoza a estudiar Merezina. Nunca no perdió a rebeldía, pero yera disziplinau, estudiaba, se dixaba orientar por o suyo pai, y conseguió o títol en 1873.

Vida

O nuestro protagonista azedió a una plaza en a Sanidat Militar, asistió en Cataluña a episodios d’a guerra carlista y estió destinau en Cuba. En ixa isla contempló orrorizau a corrupzión d’os mandos y o desemparo d’a tropa, y contrayió o paludismo. En tornó feble y malaudo ta Zaragoza, y estió prauticán en o Espital d’a nuestra Siñora de Grazia y profesor aduyán d’Anatomía en a Universidat de Zaragoza.

Ta par d’alavez se doctora y, baixo a influenzia d’o catedratico Maestre de San Juan, s’intresa por a Histolochía (a parte de l’Anatomía que trata d’os texius organicos) y merca, con enorme esfuerzo, un micoscopio ta abanzar en o suyo estudio. Gana a plaza de direutor de Museus Anatomicos y prenzipia a publicar treballos zientificos, pero no tiene suerte en as oposizions catedra a las cualas se presienta en Zaragoza y Granada. Mirando millora ta os suyos maltreitos libianos, viachea por o Pirineu y s’afiziona enormemén a la fotografía, an, entre paisaches, retratos y bodegons, troba un singular campo d’esperimentazión: será un d’os pioners d’a fotografía en color y un innovador, mui reconoixiu en ixe arte.

Obra

Casau con a zaragozana Silveria Fañanás, en 1883 obtiene una catedra en a Universidat de Valenzia. En ixa ziudat leye, escribe, s’intresa por l’hipnotismo, chuga a o xadrez y, cuan en 1886 se declara una epidemia de colera, estudia os treballos d’o dotor Ferrer y elabora un informe ta la Deputazión de Zaragoza. Gana a catedra d’Histolochía d’a Universidat de Barzelona y en 1892 ocupará a vacán d’ixa mesma asignatura en Madrit, an s’instalará definitivamén. Ta alavez ya ye estudiando a fondo o sistema niervoso y os suyos treballos han rezibiu elochios d’a Soziedat Anatomica Alemana en Berlín. En España, o suyo treballo, que eba estau absolutamén ignorau, prenzipia a estar reconoixiu a bonico.

Cajal investiga, publica, asiste a congresos internazionals en os cuals aumenta o suyo prestichio. Ye omenacheau en Cambridge y en Harvard, entre atras universidaz, y en 1900 rezibe o prestichioso Premio Moscú d’o Congreso Internazional de Medizina de París. Ingresa en a Real Academia de Ciencias y en 1902 ye nombrau direutor d’o rezienmén creau Instituto Nacional de Higiene y d’o Laboratorio de Investigaciones Biologicas (prezedén de l’Instituto Cajal de Investigaciones Biológicas, en 1922, que más tarde s’incorporaría a lo CSIC). A suya publicazión pluriañal Testura del sistema nervioso del ombre y de los vertebrados (1897-1904) replega un impresionán fazienda investigadera.

O Nobel

Ta 1903 desarrolla as suyas investigazions sobre fisiolochía d’o sistema nervioso. A partir d’os treballos de Camillo Golgi, cual preparazions ta observar a o microscopio milloró, podió veyer as acabanzas d’as zelulas nerviosas (neuronas) y contrimostrar que yeran unidaz independiens, movidas por empenta (por transmisión quimica u eleutrica, “sinapsis”). Asinas, tot y que l’investigador italián manteneba una postura diferén (“reticularista”, esfendeba una estrutura de neuronas más enreligadas), l’aragonés avaluaba ixa aportazión tot y con refetar fundadamén as suyas teorías. De feito o Premio Nobel de Merezina(1906) les sería conzediu de traza conchunta, anque a relazión personal yera nula y Golgi no reconoixeba os meritos d’o suyo colega.

L’año anterior a o Nobel, o treballo de Cajal eba estau reconoixiu con a Medalla d’Oro d’Helmholtz de l’Academia de Berlín: un gualardón que en aquella epoca yera agún más prestichioso que o de l’Academia sueca.

Presidén d’a Chunta de Ampliazión de Estudios (que endrezaría dica 1932), no dixa d’investigar, de prebar metodos, d’innovar. Una muestra ye a suya obra Degeneración y regeneración del sistema nervioso (1912-1914). A Guerra Europea le imple de tristeza: ta él ye o fracaso d’a razón y d’as valors que siempre le eban guiau. Crea y mantiene escuela, con disziplos de gran recorriu academico y investigador. Ta él, tot ixo ye muito más importán que as onors y os afalagos d’as autoridaz (ya en 1907 se le eba ofreixiu, sin esito, estar ministro d’instruzión publica; más tarde le ferán senador).

Consagrau como una gloria nazional, cosirando en os suyos zaguers años a Silveria, adedicau tamién a ordenar as suyas memorias… o pai d’a neurozienzia moderna, cuals investigazions continan escubrindo nuevas claus y estimulando a investigadors, murió en Madrit o 17 d’outubre de 1934.

Referenzias

Autividaz didauticas

A infanzia de Santiago. Os lugars

A infanzia d’o nuestro protagonista se desarrolla en diferens puestos a causa d’os destins d’o suyo pai como medico rural. Justo Ramón yera treballando en Petilla d’Aragón, un enclave nabarro en o norte d’a provinzia de Zaragoza, cuan naixió Santiago. Pero tanto a familia como as vivenzias infantils d’o futuro medico son netamén aragonesas, con gran presenzia d’as tierras d’o Prepirineu.

Sitúa en un mapa d’Aragón istos puestos: Larrés – Luna – Valpalmas– Ayerbe– Chaca.

A qué comarcas perteneixen?

Larrés (Alto Gállego) – Luna (Cinco Villas) – Valpalmas (Cinco Villas) – Ayerbe (Plana de Uesca) – Jaca (Jacetania).

Dos recomendazions ta conoixer millor os primers años de Santiago Ramón y Cajal:

  • Santiago Ramón y Cajal (2006): Recuerdos de mi vida (Edición de Juan Fernández Santarén). Barcelona: Crítica.
  • José Luis Cano (2007): Cuando yo era un niño. La infancia de Ramón y Cajal contada por él mismo(Introducción, edición y notas de José Luis Nieto Amada). Zaragoza: Prensas Universitarias de Zaragoza. Colección Larumbe Chicos.

Dos recomendazions ta conoixer millor a Ramón y Cajal “en a suya salsa”:

Programa una escursión que incluiga vesitas a ixos zentros y a atros puestos d’intrés en as suyas redoladas. Por eixemplo, en Ayerbe i hai muestras mui intresans d’arte renazentista y barroco; amán de Valpalmas, son os Aguarales (qué son, esautamén?).

Una singular aportazión de Cajal

Ramón y Cajal ha pasau a la istoria universal d’a zenzia por os suyos estudios sobre o funzionamiento d’o sistema niervoso y por as suyas observazions sobre a dechenerazión y rechenerazión, desembolique y plastizidat de dito sistema. As suyas teorías siguen estando uei día una referenzia en a investigazión d’os neurozientificos sobre ixe mundo interior tan compleixo que cadagún de nusatros auespa dintro d’o suyo cuerpo (un mundo con muito por esplorar y por escubrir agún).

Ta Cajal, l’autividat inteleutual no pende tanto d’o lumero de neuronas como d’o lumero de conisions que s’estableixen entre ellas: más importán que a cantidat ye a relazión, o dinamismo entre ixos elementos microscopicos. No ye tanta a importanzia d’as “capazidaz innatas” ya que ixas capazidaz se pueden exerzitar: con voluntat y estudio, toz podemos modelar o nuestro zelebro.

Él mesmo dende choven s’eba preocupau por a suya forma fisica (entre atras razons ta esfender-se de beluns “malotes” que se trobó en plegar en l’instituto de Uesca) y sapeba lo importán que ye l’eixerzizio fisico… y mental. Ye por ixo que, amás d’o cuerpo, cautivase tamién afizions que exerzitan y retan a mente: a suya pasión por o xadrez, as suyas incursions en o campo de l’hipnotismo, l’intrés por a literatura y a filosofía, l’afán por esperimentar y innovar teunicas fotograficas…

Mira o significau d’a esprisión latina “mens sana in corpore sano”. Qué relazión le veyes con o que rematas de leyer?

Ramón y Cajal dizió una vegata: “soi un obrero d’o microscopio”. Cómo interpretas ixo, con qué termins lo relazionarías?

Por eixemplo: treballo, pazienzia, umildat, tenazidat…

En o suyo discurso de dentrada a la Real Academia de Ciencias, aproveitó ta esplicar cómo abrían de formar-se os chovens ta plegar a estar buens zientificos: con tenazidat, pazienzia, independenzia de chuizio y curiosidat inteleutual. Y tamién… con becas ta estudiar en l’estranchero. Isto nos leva a unatro asunto.

Qué inventen els? Sí, pero nusatros tamién

A frase que ubre iste enunziau ye una esprisión de Miguel d’Unamuno quitada de contesto y que s’ha estirau como un topico sobre o conformismo y o escaso esprito emprendedor y investigador en España a lo largo d’a suya Istoria. Uei día, ixo queda como una frase anticuada, pero cal reconoixer que a inversión en educazión y en investigazión, que ye una valor segura con a cual ye más fázil afrontar o futuro… ye agún insufizién. As crisis d’os zaguers quinze años han ralentizau una tendenzia que, con o cambio de sieglo, iba de puyada. Uei día s’intenta superar ixa situazión, pero no yeguaire fázil…

Mira a definizión de “fuga de zelebros”. Mira en internet notizias en prensa sobre  ixe fenomeno en relazión con España y, si puede estar, con Aragón. Mira referenzias sobre a inversión en investigazión en España: qué puesto ocupa dintro d’Europa?, cómo ha evoluzionau? Mira bella notizia en relazión con a situazión de becarios, logaus en universidaz y zentros d’investigazión, precariedat laboral d’istas personas, comparanza con atros puestos de l’estranchero…

A zenzia en España, a zenzia en Aragón… no vive o millor d’os momentos, ye verdat, anque bi ha abiu epocas muito piors y bella cosa s’ha abanzau. Os abanzes deben muito a o esfuerzo de chens de zenzia d’o pasau. Chens que tienen o suyo prenzipal esponén en Santiago Ramón y Cajal.

En 1900 España teneba más d’un 60 por ziento d’analfabetos. A Universidat, mugada a uns pocos, teneba un tufo ranzio; o mundo academico yera incapaz d’asumir a revoluzión zientifica y teunolochica que atros puestos ya yeran esperimentando. Cajal estió aire fresco. Grazias a él, se recuperó parte de l’enorme rezago que se sofriba dende sieglos dezaga y, amás d’estar en contauto con l’avanguardia d’a zenzia internazional, se creó infraestrutura investigadera. Estió a o fren d’a Junta de Ampliación de Estudios: un ambizioso proyeuto rechenerador y modernizador d’o sistema educativo que contaba con as estanzias de formazión d’investigadors en l’estranchero como una pieza alzetal.

I hai abiu muitos atros, muitas atras. No tot se debe a Cajal, pro, pero a suya fegura va dillá de lo esclusivamén “investigador”, en convertir-se en referenzia ta la chestión y ta las politicas publicas en relazión con a educazión y a zenzia. En o sentiu en o cual pretende aduyar a transformar inerzias eredadas… Ramón y Cajal ye un rechenerazionista.

A JAE ye o chermen d’o Zentro Superior de Investigazions Zientificas (que incorporaría más tarde a l’Instituto
Cajal de Investigaciones Biológicas). Uei día ixe Zentro auespa o Legau Cajal, formau por pertenenzias de don Santiago Ramón y Cajal, mayoritariamén zientificas.

Atros zientíficos aragoneses y en Aragón

Más u menos contemporanios de Cajal, entre esmeyaus d’o XIX y os primers dezenios d’o XX, bi abió ombres de zenzia aragoneses (u que desarrolloron as suyas carreras en Aragón) que realizoron importantismas contribuzions a las diferens ramas d’a conoixenzia zientifica.

Mira informazión sobre istas personas, escubre un poquet d’ellas, y asozia-las con a disziplina en a cuala destacoron:

  1. Zoel García de Galdeano                                        a- Botanica
  2. Julio Palacios                                                             b- Quimica
  3. Francisco Loscos                                                       c- Geolochía
  4. José Pardo Sastrón                                                  d- Fisica
  5. Lucas Mallada                                                           e- Botanica
  6. Miguel Catalán                                                          f- Matematicas
  7. Bruno Solano                                                              g- Fisica          
Soluzions: 1-f; 2-d (o g); 3-a (o e); 4-e (o a); 5-c; 6-g (o d); 7-b

Isto… y as zientificas?

Mira informazión sobre o Día Internazional d’a Muller y a Nina en a Zenzia: cuán se zelebra?, qué obchetivos tiene?

11 de febrero.

Mira informazión sobre Blanca Catalán d’Ocón , en qué destacó?

De Calatayud (1860-1904), ye considerada a primera botanica española.

Mira informazión sobre istas tres mullers y escubre qué singularidat les une: Antonia Zorraquino, Jenara Vicenta Arnal Yarza y Ángela García de la Puerta.

Estioron as tres primeras mullers en dctorar-se en España en Zenzias Quimicas, en a Universidat de Zaragoza, en 1929.

Ombre de zenzia y… umanista

Salvando as distanzias, Santiago Ramón y Cajal se nos asemella a un d’istos tipos d’o Renaiximiento, como Leonardo, que le daban a toz os palos. Amás d’as suyas alportazions a la zenzia mundial, iste aragonés cautivó y prauticó l’atletismo y a chimnasia, o debuxo, a fotografía y o xadrez, estudió sobre hipnosis y filosofía, cautivó a literatura y se preocupó por o mundo d’arredol. Por más que o suyo treballo le podese absorber, no obedeixe a o topico de “sabio despistau, ensimesmau y difuera d’o mundo”.

Mete en evidenzia l’artifizioso que resulta etiquetar y fablar de “zenzias” y “letras” como estallos estancos, de lo simplista que ye diferenziar entre zenzias naturals y esperimentals por un costau, y zenzias sozials y umanidat por unatro.

En a obra literaria d’o sabio, podemos destacar os suyos libros autobiograficos Recuerdos de mi vida: Mi infancia y mi juventud (1901) y Recuerdos de mi vida: Historia de mi labor científica (1917), que reeditaría posteriormén. Tamién, como una autividat ludica y d’evasión, publicó Cuentos de vacaciones (1905), en o cual repreneba escritos de choventut, u Charlas de café (1921). Tamién escribió asayos como La psicología de los artistas (1902), Psicología de Don Quijote y el quijotismo (1905) o La fotografía de los colores. Bases científicas y reglas prácticas (1912).

En a suya zaguera obra, El mundo visto a los ochenta años: impresiones de un arteriosclerótico (1934), Cajal realiza un ironico analisis d’o mundo en os zaguers días d’a suya vida, y tot y con a suya desmoralizazión con o que veye, no albandona nunca l’asperanza que tiene por l’ombre y o progreso.

En o suyo prelogo amuestra un significativo grau d’autocretica y sentiu d’a umor:

Si o publico docto cuaca d’istas futesas literarias, a la serie autual continará unatra dica completar a dozena de cuentos; si, por cuentra, y ye de presumir, os míos sermons zientificos y trasnuitaus lirismos no troban grazia a os suyos uellos, a resta d’istas composizions dormirá o suenio d’os enatizos malograus, que ha d’estar farto más profundo que o clamau suenio de l’olbidar.

Santiago Ramón y Cajal en a cultura popular (televisiva)

The Big Bang Theory ye una esitosa y mui premiada telecomedia norteamericana que se produzió entre 2007 y 2019. Conta as peripezias d’un grupo d’amigos, zientificos con uns dotes inteleutuals superiors a lo normal, pero absolutamén incompetens en as relazions personals y sin garra abelidat sozial. O protagonista ye o fisico Sheldon Cooper (paradigma d’egozentrismo), qui, en l’episodio 16 d’a temporada 6ª, quiere fer un presén a la suya novia, a neurozientifica Amy Farrah Fowler. Una becaria que treballa temporalmén ta él como asistén le aduya en l’empeñoro.

En o dezenio de 1980, Santiago Ramón y Cajal alquirió bella popularidat grazias a una serie televisiva de gran calidat, mui seguida (en ixas envueltas no i eba tanta ofierta audiovisual como agora). Se trata de Ramón y Cajal (historia de una voluntad), endrezada por o realizador aragonés José María Forqué, protagonizada por Adolfo Marsillach y Verónica Forqué, y emitida en 1982.

Don Santiago Ramón y Cajal

Descarga dende iste enlaz o PDF d’a publicazión editada por a editorial Xordica con o patrozinio d’a Obra Sozial d’Ibercaja.

Aragoneses ilustres, ilustrados e iluminados

Descarga dende iste enlaz o PDF d’a publicazión Aragoneses ilustres, ilustrados e iluminados, de Antón Castro y José Luis Cano, editada por o Gobierno de Aragón en 1993.

DIRECCIÓN GENERAL DE POLÍTICA LINGÜÍSTICA

Departamento de Educación, Cultura y Deporte

Parque Empresarial Dinamiza (Recinto Expo)
Avenida de Ranillas, 5D - 2ª planta
50018 Zaragoza
Tfno: 976 71 54 65

Colabora: