Isabel d’Aragón,
reina de Portugal
A pazificadora, a chenerosa,
a pazién
Zaragoza, 1271 – Estremoz, Portugal, 1336
Isabel naixió en o palazio de l’Alchafaría, residenzia de reis cristianos como dinantes l’eba estau de moros. Yera filla de Pietro III d’Aragón y Constanza de Sizilia, que sintetizaban a vocazión mediterrania d’a Corona.
O suyo pai vivió un reinau aturmentau por conflitos esteriors con Franzia y con o Papa, que le escomulgó. Tamién abió d’afrontar problemas internos con a nobleza aragonesa, que le rancó o Privilechio Cheneral, y solventar desavenenzias en a suya propia familia (o suyo chirmán Chaime II de Mallorca y o suyo sobrino Sancho IV de Castiella, tibios en o refirme esterior). Os enueyos y os trachins le levoron ta la fuesa con 45 años.
Ta alavez, 1285, a nina Isabel, devota y de corazón cheneroso, ya eba estau sacrificada en intrés d’a cheopolitica por medio d’un matrimonio conveniu. Yera reina consorte de Portugal por o suyo matrimonio con o rei Dionís I, ombre culto, resolutivo y de gran personalidat que, tot y con no achustar-se masiau a la moral catolica, perén toleró o carauter piadoso y a entrega absoluta d’a suya muller ta os esfavoreixius.
A reina de Portugal adedicó muitas oras y fondos a l’atenzión d’enfermos, viellos y mendigos, ordenó a construzión de conventos, espitals, escuelas y orfanatos… y suportó sin estridenzias as infidelidaz d’o suyo ombre, que tenioron o suyo fruito en uns cuantos fillos naturals. Mientres, ella daba a luz a Constanza (que sería reina de Castiella) y a Alifonso, que eba de suzeder a o suyo pai como rei de Portugal… no sin de problemas. Dionís yera un alministrador eficaz, culto, prudén y innovador, y o suyo reinau no estió masiau conflitivo, pero en os suyos zaguers años se nubló por luitas suzesorias que enfrontinoron a o suyo fillo Alifonso y a un d’os suyos bastardos (Alifonso Sánchez).
Se sabe que Isabel medió en ixas desputas por o trono, plegando –se diz– a esponer-se enmeyo d’o campo de batalla. Cualques versions sitúan ixos suzesos enmeyo d’un frontinazo entre pai y fillo (y no entre chirmanastros, ya que Dionís pareixió afavorir a o vastago naixiu difuera d’o matrimonio). Dezaga d’a muerte de don Dionís en 1325, y asentau o suyo fillo en o trono, Isabel peregrinó ta Santiago de Compostela y a la suya tornada ingresó en o convento de Santa Clara-a-Velha en Coimbra, que ella mesma eba fundau, an prenió o costumbre d’as clarisas y continó finanziando obras de caridat. Mui viella, tornó a oponer a suya fegura pazificadora debán de as ambizions politicas d’os suyos deszendiens: o suyo fillo Alifonso de Portugal y o suyo nieto Alfonso de Castiella. En ixas penas caminaba cuan le sosprendio a muerte un 4 de chulio de 1336.
Se le atribuyioron miraglos dezaga d’a suya muerte. A Ilesia la beatificó en 1526 y, un sieglo dimpués, en 1625, estió canonizada por o papa Urbano VIII.
Referenzias utilizadas
Antón Castro (1993): “Isabel de Portugal, una alondra de piedad”, en Antón Castro y José Luis Cano, Aragoneses ilustres, ilustrados e iluminados (pp. 42-47). Zaragoza: Gobierno de Aragón.
María Pilar Queralt del Hierro (2009): La rosa de Coimbra. Barcelona: Styria. Novela.
Wikipedia: https://es.wikipedia.org/wiki/Isabel_de_Portugal_(santa)
Autividaz didauticas
O miraglo d’as rosas, un pintor barroco y
as buegas entre leyenda y istoria
Isabel pareixeba predestinada ta la santidat. Se le bautizó con ixe nombre en memoria d’a suya tía lola Isabel d’Hongría (canonizada en 1235). Y gosa relazionar-se a “nuestra” Isabel con una leyenda tamién atribuyida a o suyo parién.
A tradizión nos conta que bel día a reina levaba entre as suyas ropas una gran cantidat de diners destinada ta os pobres. O suyo ombre o rei l’eba proibito dar almosnas y cuan iste le pidió que amostrase o que levaba en l’alda, as monedas s’eban convertiu en un manullo de rosas, evitando-se asinas a ira de l’ombre.
Francisco de Zurbarán representó a Isabel d’ista guisa en 1626, con motivo d’a suya canonizazión.
(Tamién se conserva una efichie de Santa Isabel en a catedral viella de Coimbra)
Lo zierto ye que a iconografía y as versions en torno a las dos santas, a hungara y l’aragonesa, se barafundían a vezes. Ixo dixa en l’aire una custión: An queda a leyenda y an a realidat? A tradizión d’Isabel autuando a amagatons d’un ombre carrañoso no pareixe consonar con o que contan os istoriadors sobre Dionís como una persona comprensiva (y encara consiente) con as campañas caritativas d’Isabel.
Mira informazión en linia sobre o rei Dionís I de Portugal: i hai qui le considera un d’os puntals d’a modernizazión y d’o sentimiento nazional portugués. En qué se basan? I hai atras cosas que se contan d’o rei por lo que fa a la suya vida privada. Ixo coneuta con o venién trestallo.
O rei y a reina, y o dople rasero
Ye posible que o monarca tenese con a suya muller un alcuerdo tazito de no meter arreparo a las autividaz caritativas d’ella, entre que Isabel feba a vista gorda t’as continas deleras de l’ombre. O rei, trovador y sedutor, tenió amans ambute y fillos a los que dimpués caleba “colocar”. A propia Isabel afavorió a educazión y sostenimiento privilechiau d’os mesmos (un d’els, prezisamén, disputaría sin esito o trono a o fillo lechitimo, Alifonso).
Iste comportamiento extramatrimonial en ambitos privilechiaus ye un causo mui repetiu a lo largo d’a istoria, y en muitas epocas yera teniu por “normal”. Ixo sí, siempre en a mesma direzión: l’ombre podeba mantener ixa “dople vida”, pero ai d’a muller adultera! D’estar escubierta, podeba quedar marcada de por vida… en o millor d’os causos.
Tresladau a os nuestros días, y dillá d’asuntos de reis y poderosos… creyes que uei día se mantiene bella mica d’ixe dople rasero a la ora de tratar custions sentimentals y de mena sexual? Se veye d’a mesma traza a la persona que mantiene muitas relazions si ye ombre que si ye muller?
A la marguin d’istas reflesions, istas cosas pasaban tamién porque, en as esferas de poder (y en atras más modestas), o matrimonio yera un asunto politico. As vodas yeran fruito d’un alcuerdo entre Estaus, una formula ta conziliar intreses, chunir patrimonios y influyenzias, ensayar alianzas fren a terzers… En ixos causos, l’amor yera lo de menos (si apareixeba yera por casolidat), y no se veyeba malamén que, una vez compliu o tramite, o rei (en iste causo) mirase dar ramal suelto a os suyos instintos.
O matrimonio por razons d’Estau y ista considerazión utilitaria d’a muller como “fabrica de suzesors” los emos visto con más detalle en fablar d’a reina Petronila d’Aragón. Sieglo y meyo desepara a Isabel d’a bislola d’o suyo lolo Chaime, pero as cosas no cambiaban guaire, ni eban de cambiar en muito tiempo.
As casas reals, os suyos parentescos…
y una ausenzia chocán
Sin perder o filo de “matrimonio y politica”, veyemos que en o testo s’han zitau uns cuantos parentescos y países de tota Europa. Adibimos beluns ta componer iste mosaico tan curioso:
Os pais d’Isabel yeran Pietro d’Aragón y Constanza de Sizilia. Os suyos dos chirmans mayors serían reis d’Aragón (suzesivamén Alifonso III y Chaime II). A suya tía lola, Isabel d’Hongría, yera chirmana de Violán (a suya lola, casada con Chaime I). Isabel se casó con o rei de Portugal: o suyo fillo Alifonso tamién ocuparía ixe trono. A suya atra filla, Constanza, se casaría con o soberano de Castiella, y o suyo nieto reinaría astí como Alfonso XI.
Sitúa en un mapa d’Europa: Aragón, Sizilia, Hongría, Portugal y Castiella… Clama l’atenzión a leixanía d’Hongría y… que no salga Franzia, tan zercana a Aragón, y tan relazionada con a suya istoria en sieglos prezedens.
Entre o sieglo XIII, as relazions d’Aragón con o reino de Franzia no estioron buenas. De feito, fuoron ubiertamén ostils: a rivalidat por a influenzia sobre os territorios d’Oczitania en primeras, as pugnas por o Mediterranio dimpués… deseparoron a os dos estaus, tot y que tiempo dezaga ese estau corrién que os primers reis d’Aragón mirasen matrimonios a o norte d’os Pirineus, tot y con a presenzia dezisiva de gascons, bearneses, etz., en a conquiesta de Zaragoza por Alifonso o Batallero, u pese a lo contino fluxo encauzau por o Camino de Santiago. A razón d’Estau tiende a imposar atras relazions.
Ta rematar…
A festividat de Santa Isabel
O 4 de chulio (calendata d’a suya muerte) ye consagrau a ista santa, que ye patrona d’a provinzia de Zaragoza. A Deputazión de Zaragoza da o nombre de Santa Isabel a os suyos premios añals asignaus a entidaz y coleutivos, y tamién a diferens zertamens d’arte, narrativa, artes plasticas, artes eszenicas, guión audiovisual, etz.
Una nina en l’Alchafaría
O patio zentral de l’Alchafaría ye conoxiu como patio de Santa Isabel, en memoria d’a ilustre naixida entre os muros d’o palazio taifal. Ye fázil prexinar a una nina aparenmén privilechiada, chugando en o chardín, amagando-se entre arcos y narancheras, talmén allena a o papel que se le teneba reservau, talmén en parte conszién d’ixa responsabilidat, preguntando-se por as ausenzias d’o suyo atrebulau pai…
Aragoneses ilustres, ilustrados e iluminados
Descarga dende iste enlaz o PDF d’a publicazión Aragoneses ilustres, ilustrados e iluminados, de Antón Castro y José Luis Cano, editada por o Gobierno de Aragón en 1993.
DIRECCIÓN GENERAL DE POLÍTICA LINGÜÍSTICA
Departamento de Educación, Cultura y Deporte
Parque Empresarial Dinamiza (Recinto Expo)
Avenida de Ranillas, 5D - 2ª planta
50018 Zaragoza
Tfno: 976 71 54 65
Colabora:
