Al-Muqtadir
A esplendor d’a Zaragoza islamica. A espata y a pluma
C. 1010? – Zaragoza, 1082
Entre a Edat Meya, l’islam no nomás floreixió en o sur d’a Peninsula Iberica. Tamién alcanzó un espeutacular desembolique en atros puestos, como a val de l’Ebro y a suya redolada. Aquí, as autoridaz locals estioron en contina pugna con o poder zentral establiu en Cordoba y, en estallar en 1031 una guerra zivil que remató por escuarterizar o califato cordobés, aproveitoron ta crear un reino u taifa independién con capital en Saraqusta (Zaragoza).
![almuqtadir Large](https://personajesilustres.lenguasdearagon.org/wp-content/uploads/2022/01/almuqtadir-Large.jpeg)
Dos dinastías d’orichen arabe se suzedioron en o trono, os tuyibíes y os hudíes, con os cuals a zona conseguió alcanzar una estraordinaria esplendor, en espezial entre o gubierno d’o segundo d’os monarcas hudíes, clamau Abú Yafar Ahmed ibn Sulaymán. Cuan plegó a o trono, en 1046, dominaba un territorio reduziu, pus o suyo pai eba repartiu o reino entre os suyos zinco fillos. Pero luego reduzió a la obedienzia a os suyos chirmans asentaus en Uesca, Calatayud y Tudela. Nomás que o suyo chirmán Yúsuf, en Léida, mantenió a suya rebeldía, entre más de trenta años, dica que finalmén estió redotau y feito prisionero.
Tot y con as luitas familiars y d’a presión militar que exerzeban os gobernans cristianos de Castiella, o choven reino d’Aragón y os condaus catalans, o soberano saraqustí conseguió amplar o suyo poder politico y militar dica o Mediterranio. Ocupó Tarragona, Tortosa y Denia, y sozmetió a vasallache a Valencia, fendo d’a taifa zaragozana a más poderosa d’a Peninsula, de conchunta con a sevillana.
En o norte d’os suyos dominios, disputó o control d’as ziudaz de Graus y Balbastro a os aragoneses. En 1063, venzió a las puertas de Graus a Remiro I, qui murió en a batalla. Pero un año dimpués o papa Alexandro II decretó a Cruzata –un asayo d’as cualas luego s’endrezarían a la conquiesta de Jerusalén– y caballers prozedens d’o sur de Franzia arrasoron Balbastro y matoron u esclavizoron a os suyos abitadors. Dada a brutalidat d’os cristianos, o rei zaragozano clamó a la guerra santa, demandó aduya a tot Al-Ándalus y a o fren d’un poderoso exerzito recuperó Balbastro en 1065. Por o suyo gran trunfo rezibió o renombre d’Al-Muqtádir Billah, isto ye, “o poderoso por a grazia de Dios”.
![Santiago Cabello Solanas](https://personajesilustres.lenguasdearagon.org/wp-content/uploads/2022/02/Barbastro023_RT16-Editar.jpeg)
L’Alchafaría
Ta zelebrar a suya victoria, Al-Muqtádir dezidió devantar en os arredols de Zaragoza un palazio d’ensueño, como quitau d’un cuento d’As mil y una nueis, l’Alchafaría, cual nombre promana d’un d’os nombres d’o monarca, Yafar. Por difuera, as suyas poderosas murallas, con torretons ultrasemizirculars, remeran tanto a la muralla romana de Zaragoza como a las d’os primers castiellos arabes en o desierto sirio. O suyo interior, por contra, ye tot delicadeza, con fuens y chardins, como describe o Corán o paradiso, y estanzias ricamén decoradas con sofisticaus motivos cheometricos y vechetals ya sía en cheso, ya en zeramica u fusta. O monarca quedó tan regostau con o resultau d’a construzión que dica le adedicó un poema:
Oh, palazio d’o goyo (qasr al-surur).
Oh, salón d’oro,
en vusatros han trobau o suyo caramuello os míos deseyos.
Si cosa más poseyese en o mío reino
tendría tot o que podese ansiar.
En l’Alchafaría o rei ordenó crear una gran biblioteca y entre as suyas parez se reunioron literatos, filosofos, ombres de relichión, istoriadors, espiertos en leis, zientificos y tradutors prozedens de tot Al-Ándalus, atraitos por a seguranza que brindaba Al-Muqtádir, y que se sumoron a os sabios locals, que ya sobrexeban. En Saraqusta, por eixemplo, naxió una d’as millors escuelas filosoficas de l’islam, que incorporó definitivamén os legaus d’Aristoteles y que influyirá en o pensamiento cristiano medieval. Pero a ziudat tamién acullió a mosicaires, medicos, matematicos, fisicos u astronomos d’enorme fama, cuals enseñanzas s’espandioron por tot o mundo musulmán, con o cual a ziudat yera coneutada a traviés d’o suyo autivo puerto fluvial y d’as auguas de l’Ebro, navegable dica a suya desembocadura.
En os suyos zaguers años de vida, Al-Muqtádir, ya mui enfermo, deixó o poder a os suyos fillos. Y istos, a la suya muerte, se dividioron o reino. O suyo suzesor, Al-Mutamán (“o que confía en Dios”), un d’os matematicos más destacaus d’Europa en a Edat Meya, amás de rei, continó as guerras d’o suyo pai contra os cristianos y, a la suya vez, s’enfrontinó a o suyo chirmán establiu en Léida, ta tot o cual contó con a valiosa aduya d’un aliau a chornal, Rodrigo Díaz de Vivar, o Cid Campeador.
Referenzias
- Mª Jesús Viguera (1995): El islam en Aragón. Zaragoza: CAI (col. Pano y Ruata), 1995.
- José Luis Corral (1998): Historia de Zaragoza 5, Zaragoza musulmana (714-1118). Zaragoza: Ayuntamiento.
- Mª José Cervera (1999): El reino de Saraqusta. Zaragoza: CAI.
- Marcos Castillo Monsegur, ed. (1987): La casa del placer (poesía). Calatayud: Sociedad de Estudios Hispano-Árabes Al-Ándalus As-Samali.
- Abú Bakr al-Gazzar (2005): Abú Bakr al-Gazzar, el poeta de la Aljafería. Zaragoza: Prensas Universitarias.
- Fernando Andú (2007): El esplendor de la poesía en la taifa de Zaragoza. Zaragoza: Mira.
- José Luis Corral (1998): El salón dorado (novela). Barcelona: Edhasa.
- Arturo Pérez-Reverte (2019): Sidi. Un relato de frontera (novela). Madrid: Alfaguara.
Autividaz didauticas
A marca superior
Os reinos de taifas
Qué son os reinos de taifas? En o tuyo libro d’istoria, en internet u en bella d’as publicazions d’a bibliografía podrás trobar a respuesta, si no la sabes ya.
En l’año 929, Abderramán III se proclamó califa d’Al-Ándalus y establió a suya capital en Cordoba, declarando a independenzia politica de Bagdad, capital d’o califato abasí.
Con o califato de Cordoba, Al-Ándalus vivió a suya epoca de masima esplendor y estabilidat: se produzió un gran creiximiento d’a economía grazias a o comerzio por o Mediterranio y se frenó l’abanz d’os reinos cristianos.
Manimenos, l’autoridat d’o califa estió perdendo fuerza con o tiempo y o poder pasó finalmén a mans de Almanzor, un cheneral que imposó una ditadura militar.
A la suya muerte, a guerra zivil entre distintos grupos musulmans (arabes, bereberes y eslavos) prevocó a disoluzión d’o califato en 1031 y a división d’o mesmo en os clamaus reinos de taifas. Os más importans estioron os de Sevilla, Toledo, Badajoz, Zaragoza, Tortosa, Denia y Granada.
Fronteras d’a taifa de Zaragoza
Mira en o testo con qué reinos teneba buega a taifa de Zaragoza entre o gubierno d’Al-Muqtádir (1047-1082). Situa-los en a mapa y siñala cuals yeran aliaus y cuals enemigos.
![mapa](https://personajesilustres.lenguasdearagon.org/wp-content/uploads/2021/10/mapa.jpg)
A o norte
- reino de Navarra: Sancho IV, tratau d’alianza y pago de parias (impuestos).
- reino d’Aragón: Remiro I y Sancho Remírez, frontinazos por o control d’os territorios en a buega norte.
- condau de Barzelona: condes Ramón Berenguer I y Ramón Berenguer II, frontinazos por os territorios d’o este.
A o sur
- taifa de Toledo: Al-Mamún y Al-Cádir enfrontinaus por o dominio d’a taifa de Valenzia.
- taifa d’Albarrazín: Abd-al Maliq, entre 1045 a 1086 paga parias a Castiella ta mantener a suya autonomía fren a Zaragoza y Toledo.
- taifa de Denia: Ali Iqbal al-Dawla, conquerida en 1076 por Al-Muqtádir.
- taifa de Valencia: Abu Bakr ben Abd al-Aziz, en 1075 o suyo reino ye vasallo d’a taifa de Zaragoza.
A o este
- taifa de Léida, Yusuf al Muzaffar. Largo frontinazo entre chirmans por o territorio de Léida, anexionau a la taifa zaragozana en 1078.
- taifa de Tortosa: aministrada por reizuels d’orichen eslavo, o zaguero estió Nabil Nabil Al-Fatá. En 1061 pasó a mans d’Al-Muqtádir.
A o ueste
- Reino de León y Castiella: Fernando I, Sancho II y Alfonso VI. A taifa de Zaragoza paga contrebuzión de traza regular ta no estar agredida.
Zaragoza y l’Alchafaría.
Saraqusta, a Ziudat Blanca. Zaragoza en epoca hudí
Urbanismo
Localiza en iste plano de Saraqusta os prenzipals puestos d’a ziudat que se menzionan en o testo. Mira informazión y esplica qué son: medina, barrios nuevos, zocos, fosals, chudería, barrio mozarabe, zuda, mezquita mayor, mezquitas, ilesias, puertas, muralla d’a medina, muralla de tapial.
![plano aljaferia](https://personajesilustres.lenguasdearagon.org/wp-content/uploads/2021/10/plano-aljaferia.jpg)
Saraqusta contaba con una muralla de piedra blanca, de cheso, d’epoca romana. Rodiaba a medina y le dio o renombre de Medina Albaida, a Ziudat Blanca. Con o tiempo s’estioron sumando barios nuevos difuera d’o rezinto amurallau, que se fortificoron con una nueva muralla construyida con tapial.
Dentro d’a medina se trobaba a mezquita aljama, a prenzipal, construyida en os primers años d’a ocupanzia islamica y amplada con posterioridat en cuantas ocasions seguntes iba creixendo a poblazión d’a ziudat. Amás d’a mezquita aljama u mayor, i eba atras mezquitas en os diferens barrios.
A poblazión cristiana, que se respetó, contaba con dos templos. En o barrio mozarabe se trobaba a ilesia de Santa María a canto de l’Ebro y extramuros a ilesia d’as Santas Masas.
Tamién a poblazión chudía, en a chudería, contaba con edifizios relichiosos propios.
O trazau d’as carreras dentro d’a medina formaba cuadriculas, tal como l’eban diseñau os romanos. Manimenos, en creixer a ziudat ista adotó una mena d’urbanismo propio d’o mundo musulmán, de carreras estreitas y irregulars.
A Zuda, u palazio d’o gubernador, se trobaba en l’extremo norueste d’a medina chunto a la muralla, a o costau de l’Ebro. En numerosas ocasions os zaragozans se rebeloron y prenioron a Zuda por a fuerza ta derrocar un mal gubernador. Tal vez ixa estió una d’as razons por as cualas o palazio de l’Alchafaría se construyió bella cosa alexau d’a ziudat.
O mercau u zoco prenzipal se situó amán d’a mezquita mayor, en o solar de l’antigo foro romano, zamán d’o río dende an plegaban numerosas mercaderías prozedens d’o Mediterranio.
Os fosals se construyiban chunto a las puertas d’a ziudat, alexaus d’o zentro d’a ziudat.
Autividaz economicas
Mira en o testo qué produtos agricolas se produziban en l’ortal de Zaragoza y obchetos conservaus d’ixa epoca elaboraus en a ziudat.
Zaragoza yera una d’as ziudat más ricas d’Al-Ándalus. O suyo emplazamiento a o canto de l’Ebro, cruze de camins de numerosas rotas comerzials afavorió o suyo desembolique industrial y mercantil.
A proximidat d’as desembocaduras d’os ríos Uerva, Galligo y Xalón, amás d’a fertil ribera de l’Ebro, la furnioron d’un rico y variau ortal. Os musulmans sabioron aproveitar y millorar as infraestruturas hidraulicas d’a epoca romana ta optimizar a produzión d’os suyos ortals. Cuantos cronistas de diferens epocas asinas lo replegan:
-
- Idrisi (sieglo XII) afirmaba que Zaragoza yera “rodiada de chardins y vechetals”.
- Al Himyari (sieglo XV) comentaba que Zaragoza poseyeba “o territorio más fertil y os vechetals más numerosos” de tot Al-Ándalus.
- Al Qalqasardi (sieglo XV) la describiba con istas parolas: “pareixe una bolisa blanca en o zentro d’una gran ezmaralda sobre a cuala s’esliza l’augua de cuatre ríos, transformando-la en un mosaico de piedras preziosas”.
Amás d’os produtos de l’ortal, arredol de Zaragoza se produziba trigo, uga y azeite d’oliva. Son varias as referenzias que fan menzión a la existenzia de molins y fornos ta la produzión d’o pan. Istos zaguers yeran en mans d’as mezquitas de cada barrio y parte d’os benefizios obtenius se destinaban a aduyar a os más pobres.
En o tocán a las industrias artesanals, as fuens son tamién prolificas en afalagos a os produtos que se cheneraban, por eixemplo, as prendas de piel, cual industria se situaba en l’autual barrio d’as Tenerías; u os tallers de paños de cotón, cañimo, lino y mesmo seda. Istos texius y atuendos de piel, cual bordaus y confezión yeran mui apreziaus, se conoxeban como “zaragozíes”.
Unatra importán industria local estió la d’o metal. Se fabricaban espatas y cotas de malla de fierro, obchetos de crobe y de bronze y mesmo se treballaba a plata.
L’alfarería estió sin duda atra destacada autividat si s’ha de chuzgar por as restas de fornos, testars y piezas trobaus en excavazions arqueolochicas levadas a cabo en o casco antigo de Zaragoza.
As materias primas nezesarias que no se produziban en as zercanías d’a ziudat plegaban a traviés de l’Ebro, navegable dica la suya desembocadura, que lo coneutaba con os prenzipals puertos d’o Mediterranio. D’iste modo s’afavoriba tamién una prospera autividat comerzial.
En epoca d’Al-Muqtádir amás d’os abituals feluses de pellón (aleyazión de plata y crobe a o 50%) y dírhems de plata, se cudioron tamién dinars d’oro, reflexo d’a riqueza existén en o suyo reino.
L’Alchafaría , o palazio d’Al-Muqtádir.
Veye a visitar l’Alchafaría. Si de momento no tiens ixa oportunidat, puez veyer o siguién vidio de Youtube, de l’Auriga de l’Arte:
Creyes que tien bel pareixiu con os edifizios d’orichen musulmán que se conservan en Cordoba u en Granada? Qué diferenzias alviertes respeutive a os castiellos y catedral cristianos d’a epoca?
A corte d’Al-Muqtádir
Mira en internet y en o siguién testo beluns d’os personaches que formaban parte d’o redol inteleutual d’a corte d’Al-Muqtádir y escribe en qué destacoron. Por eixemplo: o literato Ibn Hasday, os matematicos Abú Abd Allah Assaraqustí y Al-Karmani, u l’astrónomo Ahmad ben Muhammad Al-Naqqash.
En a suya corte destacó o chodigo Ibn Hasday, que estió visir u secretaire de tres reis suzesivos d’a taifa (Al-Muqtádir, Al-Mu’tamin y Al-Musta’in II). Escribió en arabe poesías y epistolas.
Atros ilustres chodigos vivioron en a capital d’A-Muqtádir, como o gran literato y pensador Ibn Gabirol, qui criticaba a os suyos correlichionarios zaragozans por escudiar l’ebreu y usar en cambio l’arabe y o romanze.
O estudio d’as zenzias en a val de l’Ebro alcanzó un momento zima. Se cautivó a medizina y a farmacolochía, astronomía y astrolochía, matematicas y cheometría, y tamién a fisica. A corte zaragozana destacó prezisamén por istas zenzias baixo o mezenazgo d’os Banu Hud, sobre tot d’Al-Muqtádir y d’o suyo fillo Al-Mu’tamin.
Pero en a corte saraqustí tamién i abió prosistas y poetas como Ibn Al-Dabbag, Ibn’Amar, Ibn Ya’far Al-Qaysí, Al-Husrí, etc. plegaus en Zaragoza dende diferens puestos, amás de atros literatos oriundos d’a val de l’Ebro, entre os cuals sobrex Al-Yazzar, o Tablachero.
A Zaragoza d’Al-Muqtádir en a literatura autual
Leye beluna d’as novelas contino menzionadas, que t’amanarán a la epoca d’a taifa zaragozana a traviés de faszinans aventuras.
José Luis CORRAL, El salón dorado
Chuan, un mesache vendiu como esclau en Constantinopla, plega en Zaragoza, an consigue a suya libertat. Convertiu a l’islam, ocupa importans cargos en a corte d’Al-Muqtádir. Conoixe a grans personaches, viachea a Toledo y a Marrakech y, ya viello, vive a conquiesta de Zaragoza por parte d’os cristians. Os suyos zaguers años los pasa en Fez, en o norte d’Africa, an adedica o suyo tiempo a amostrar astronomía.
Arturo PÉREZ-REVERTE, Sidi. Un relato de frontera
Desfruta d’as andanzas y os combates de Rodrigo Díaz de Vivar, o Cid Campeador, en primeras en Castiella y dimpués a las ordens d’os reis musulmans de Zaragoza en a suya luita por mantener seguras as suyas mugas contra os suyos enemigos, ya estasen cristianos u musulmans.
![Color-negativo-horizontal-RGB-sin-fondo](http://personajesilustres.lenguasdearagon.org/wp-content/uploads/2022/02/Color-negativo-horizontal-RGB-sin-fondo.png)
![gobierno color transparente](http://personajesilustres.lenguasdearagon.org/wp-content/uploads/2022/02/gobierno-color-transparente.png)
DIRECCIÓN GENERAL DE POLÍTICA LINGÜÍSTICA
Departamento de Educación, Cultura y Deporte
Parque Empresarial Dinamiza (Recinto Expo)
Avenida de Ranillas, 5D - 2ª planta
50018 Zaragoza
Tfno: 976 71 54 65
Colabora:
![Logo Fundacion CRA H](https://personajesilustres.lenguasdearagon.org/wp-content/uploads/2022/05/Logo-Fundacion-CRA-H-1.png)
![Recurso 1@4x](https://personajesilustres.lenguasdearagon.org/wp-content/uploads/2022/02/Recurso-1@4x.png)