Select Page

Ibn Bayyah, Avempace

Uellada en a Luna, piez en a Tierra

Zaragoza, c. 1080/85 – Fez, 1138/39

A Saraqusta d’os reis hudíes veyió naixer a Abu Bakr Muhammad ibn Yahya ibn al-Sa’ig ibn Bayyah. Fillo y nieto d’artesanos orfebres d’a plata, Avempace ha pasau a la posteridat como filosofo, medico, poeta, fisico, botanico, mosicaire, astronomo… y como un d’os transmisors alazetals d’o pensamiento d’Aristóteles en Europa. Autor d’obras matematicas, metafisicas y morals mui apreziadas, a suya filosofía mistica (que prebaba de conziliar l’empirismo aristotélico con l’ideyalismo de Platón) estió considerada eretica por beluns. Ta atros, ye o primer filosofo «propiamén dito» d’Al-Andalus.

Avempace vivió una epoca de crisis politica y militar pero tamién de puxanza cultural en o reino zaragozano. Tot y con as perdas territorials a mans d’os cristians, o reinau d’Al-Mustain (1085-1110) estió de bella estabilidat instituzional, y ixo permitió que Zaragoza seguise estando l’oasis cultural que ya eba estau, que acullise a inteleutuals y creyadors plegaus d’atros puestos. A corte de l’Alchafaría refleixó ixa esplendor. Con Avempace yeran, entre muitos atros, os chodigos Ibn Gabirol (Avicebrón) y Ibn Paquda y os musulmans Al-Kirmani y Ibn Fathun al-Himar.

Vida

Avempace estió un ombre de contradizions, arrozegau por lo ideyal, por l’afán de perfezión y d’amanamiento a la pureza, pero atraito, tamién, por lo mundano. A caballo entre l’ambizión politica y a vocazión de servizio, azeutó o cargo de visir en a Zaragoza que, gubernada por os almoravides, yera amán d’estar conquerida por os cristians. Dezaga d’a dentrada d’istos en 1118, y con mil avatars que le levoron a Xátiva, Almería, Granada, Orán, Fez… moriría en ista ziudat nor-africana, por o que pareix enverenau, victima d’intrigas. No dixaba a no dengún indiferén, y ixo significa que tamién teneba enemigos.

Estió un autor prolifico, pero d’os suyos más de sisanta libros, nos han plegau nomás que uns pocos. D’a suya etapa zaragozana, destacan os comentarios a las obras d’Aristoteles (a la Física y a la Lochica, a los trataus Sobre l’alma y Sobre a chenerazión y a corrupzión, a la  Istoria d’os animals y a la Istoria d’as plantas). A la etapa de l’exilio dezaga d’a suya marcha de Zaragoza perteneixen O rechimen d’o solitario, o Tratau d’a unión de l’Intelecto con l’Ombre y a Carta de l’adiós. En as suyas obras critica o materialismo y a corrupzión d’a soziedat y avoga por a conoixenzia y a contemplazión, que leva a la identificazión con lo divino.

Obra

Entre muitos sieglos, os sabers yeran interconeutaus: a merezina (ofizio que Avempace prauticó entre tota a suya vida) enlazaba con a botanica a traviés d’a conoixenzia de l’uso medizinal d’as plantas; l’astronomía (buegán con l’astrolochía) aplicaba a matematica a o trazau d’orbitas y o movimiento d’os planetas, que s’intuyiba gubernau por leis fisicas y marcau por un ritmo asimilable a la mosica y a la poesía… Y sobre tot ixo, planiando, a especulazión sobre lo traszendén. En totas ixas zenzias estió mayestro Avempace. Alabau por os filosofos cordobeses Maimónides (chodigo) y Averroes (musulmán), influyió en pensadors d’a tradizión cristiana como santo Tomás d’Aquino y san Alberto Magno.

Referenzias utilizadas y propuestas:

As obras conservadas d’Avempace han estau obcheto de diferens recopilazions y edizions. Con l’antezedén de l’arabista Miguel Asín y Palacios (1871-1944), que fuo o prenzipal estudioso y traductor de gran parte d’a suya obra, merexe a pena destacar, más amán d’os nuestros días, os treballos d’o profesor Joaquín Lomba, que traduzió y endrezó diferens edizions d’obras d’Avempace a cargo d’a editorial madrileña Trotta: El régimen del solitario (1997), Carta del adiós y otros tratados filosóficos (2006), Libro sobre el alma (2007). Dinantes, en 1995, o CSIC eba publicau o Libro de la generación y la corrupción, en edición de Josep Puig.

Podemos saber una mica más d’a vida de Avempace a traviés d’istas referenzias:

Autividaz didauticas

Lanzemos una uellada allena a os prechudizios

En o testo se fabla de pensadors que alaboron u se veyioron influyius por a obra d’Avempace. No yeran toz d’a suya mesma relichión. Isto da un poquet que pensar, verdat? Talmén que o profesar una u unatra (u garra) fe u creyenzia no ha d’estar obstaclo ta l’intercambio inteleutual y a transmisión y azeutazión de conoixenzias. Afortunadamén, o ser umano ye un poquet más complexo que o que a vezes pareixe dar-se a entender. Investiga un poquet sobre os nombres de santo Tomás d’Aquino y san Alberto Magno, y preba d’estrayer bella idea, bel aspeuto en o cual creigas que a obra d’Avempace podió influyenziar-les.

A Zaragoza d’Avempace

Avempace vivió os años de retacule politico y militar d’o reino de Zaragoza, que eba esperimentau os suyos días de fuga con Al-Muqtadir. A suya infanzia y choventut consonan con o reinau d’Al-Mustain, que en os zaguers años d’o sieglo XI asiste impotén a la perda de Monzón, Uesca y Balbastro a mans d’o reino d’Aragón. Una decadenzia que pornostica mals mayors y que prebó d’estar resistida por musulmans más rigoristas plegaus ta la Peninsula, os almoravides que acotolarán a monarquía zaragozana y gubernarán a resistenzia, inutil finalmén debán l’empente cristiano animau por os aires de cruzata. En 1118 Zaragoza cayerá en poder d’Alifonso I d’Aragón. Ye a fin d’o dominio andalusí en a val de l’Ebro y en as tierras d’o Sur.

Esplora sobre l’orichen y papel desempeñau por os almoravides, y qué relazión tienen con feitos acayezius en tierras aragonesas. Te damos dos pistas (anque i hai más): “Gubierno de Zaragoza” y “Batalla de Cutanda”.

Amás, te recomendamos un material mui intresán, tanto si puez azeder a o DVD, como ta poder estar visto en linia:

Saraqusta. Un recorrido por la Zaragoza musulmana. DVD. Ayuntamiento de Zaragoza, 2004.

Ista obra audiovisual amuestra una fizión sobre os zaguers días d’Avempace en Zaragoza antes de partir ta l’exilio, recreyar o rabal de Sinhaya (escubierto en 2002 entre unas obras en o zentro de Zaragoza). O vidio prenzipal (sin os extras que contiene o DVD) puede trobar-se en Youtube:

L’ideyal politico d’Avempace

Avempace aboca a suya dotrina politica en o rechimen d’o solitario: una protesta moral contra o materialismo y a corrupzión d’a soziedat fren a os cuals nomás cabe que  mantener-se a la marguin, a lo menos con o pensamiento: a la fin y a lo cabo, l’ideyal umán ye a conoixenzia pura y a especulazión (asinas lo manifiesta tamién en atras obras, como A Carta de l’Adiós). En ixa situazión contemplativa, l’ombre s’identifica y funde con Dios.

Avempace azeuta a definizión aristotelica d’ombre como “animal razional”, pero va más enta allá: por denzima d’a razón ye o “inteleuto”,  «l’ombre inteleutual». Nomás que  os sers razionals y inteleutuals pueden ordenar y endrezar as suyas aizions ta una fin y, por tanto, aspirar a o gubierno d’os suyos semellans. Y amás adibe: “Orechimen por eszelenzia ye o de Dios en crear y gubernar o mundo, d’o cualo l’ombre ye nomás una derivazión y copia defeutuosa. Y, aintro d’o rechimen umano o que s’entiende como tal y por eszelenzia, ye o politico, a saber, o d’o gubierno d’a ziudat por parte d’o gobernán que enfila as aizions de toz os suyos subditos razionals ta la fin suprema d’a perfeuzión total y felizidat plena d’os mesmos y d’o cuerpo sozial”.

Concluyindo: L’ombre ye un ser sozial por naturaleza, y nomás que eszezionalmén s’aparta d’o estau corrupto ta poder mirar a suya propia perfeuzión que dimpués aplicará a la soziedat rechida por a verdat, a virtut y l’amor. Cuan un grupo de personas alcanzen ixe libel eszelso, podrán establir una comunidat en a que reine a chustizia y a salut.

Istas parolas nos transportan ta utopías varias y s’inspiran claramén en a Republica de Platón. Investiga sobre os puntos prenzipals d’o pensamiento d’iste filosofo griego. En qué atros pensadors posteriors influyió Platón?

A o filo d’ixa formula de gubierno que suchiere… puedes mirar a etimolochía d’a parola “aristocrazia”?

Tot y con estar considerau un d’os prenzipals introductors d’a filosofía d’Aristoteles en Ozidén, Avempace se nos amuestra aquí “platonico”. Creyes que son dos visions oposadas u complementarias? Piensa-lo, comenta-lo. Seguramén, a la fin d’o camino, observarás que pon ye blanco ni negro y que perén bi ha puesto ta os matizes.

Cualsequier tiempo ye bueno ta la lirica

Cualques espezialistas atribuyen a Avempace a invenzión d’o zéjel (una mena  de poema semellán a la moaxaja, componiu en arabe dialeutal y adautau a la melodía y a la metrica de cantas como o villanzico). Podió estar un pionero en fusionar a poesía arabe clasica con as trazas romanzes d’a lirica d’influenzia cristiana, anque i hai qui fabla d’atros “inventors” (como un tal Mucáddam de Cabra). Siga como siga, o zéjel tenió muito esito entre a Edat Meya tanto en o mundo islamico como en os reinos cristianos (an os chuglars moros yeran mui cotizaus). Más tarde lo cautivoron poetas renazentistas como Juan de la Encina u Santa Teresa y en o Barroco continó tenendo seguidors. Ya en o sieglo XX, cuacó a poetas como Juan Ramón Jiménez, Rafael Alberti y Federico García Lorca. Iste zaguero replegó y adautó, entre atras cantas populars, o zéjel “As morillas de Xaén”, que interpretaría a gran cantaora Carmen Linares aintro d’o disco Flamenco Vivo, y que puedes veyer en Youtube:

As morillas de Xaén

Tres morillas m’enamoran en Xaén,

Axa y Fatima y Marién.

Tres morillas tan pinchas

iban a pillar olivas,

y trobaron-as presas en Xaén.

Axa y Fátima y Marién…

Farchau a partir de versos octosilabos, con muda, estrebillo y verso de vuelta, o zéjel yera cantau por coro y solista acompañaus de laut, flautas, tambor y castañetas y, a vegadas, de baile. Uei sigue vivo en zonas d’o Magreb y d’o Mediterranio oriental, y s’interpreta en formato de dialogo semi-cantau incluyindo improvisazions.

Ta rematar

Aragoneses en a Luna…

Avempace, baixo a suya azeuzión arabe (Ibn Bayyah), da nombre a un crater lunar d’impauto situau en o Polo Sur d’a Luna. No ye l’unico aragonés con o cual a comunidat zientifica internazional reconoixe a personas que han realizau significativas aportazions a l’astrofisica: l’insigne fisico, quimico y espeutroscopista zaragozano Miguel Catalán Sañudo (1894-1957) tamién da nombre a unatro crater d’o nuestro satelite. Mira más informazión sobre Miguel Catalán.

… y una istoria lunar

Ya que somos en a Luna, no ye de más recordar una istoria, prou espardita, relazionada con o nuestro protagonista. A suya conoixenzia de l’astronomía permitió saber a Avempace que una nuei determinata s’iba a produzir un clis lunar. Casualmén, un amigo suyo eba feneixiu; entre o velorio leyió uns versos convidando a la Luna a que s’ocultase en siñal de duelo… y o satelite “obedexió” debán de l’asombro d’os asistens.

Seguramén, ista istoria tiene más de fizión, de “leyenda urbana”, que de realidat. Pero, como totas as fizions, nos aduya a ilustrar cuestions “reals”: cómo l’aparenmén machico, esoterico y irrazional tiene, anque siga en o fondo, una explicazión causal, lochica y razional. A machia ye bonica, vistosa y entretenida. Y estimulán, porque apela a os nuestros sentius y reta a la nuestra mente. Pero, gubernando-lo tot, ye o pensamiento zientifico.

Especulativo y experimental a un tiempo, Ibn Bayyah Avempace prebó de conziliar lo ideyal y a perfeuzión d’o inalcanzable, con o material y terrestre (menos noble, pero más real). L’espiritual y o corporal conviven en a mente de l’ombre que, querindo esplicar a fe dende lo razional, nunca no renunzió a mirar-se a Luna sin dixar de tener os piez en o suelo.

El sabio Avempace

Descarga dende iste enlaz o PDF d’a publicazión editada por a editorial Xordica con o patrozinio d’a Obra Sozial d’Ibercaja.

Aragoneses ilustres, ilustrados e iluminados

Descarga dende iste enlaz o PDF d’a publicazión Aragoneses ilustres, ilustrados e iluminados, de Antón Castro y José Luis Cano, editada por o Gobierno de Aragón en 1993.

DIRECCIÓN GENERAL DE POLÍTICA LINGÜÍSTICA

Departamento de Educación, Cultura y Deporte

Parque Empresarial Dinamiza (Recinto Expo)
Avenida de Ranillas, 5D - 2ª planta
50018 Zaragoza
Tfno: 976 71 54 65

Colabora: