Select Page

Luis Buñuel

O zine como suenio, emozión y instinto

Calanda, 1900 – Ziudat de Mexico, 1983

Leonardo Buñuel yera un comerzián que s’eba enriquiu en Cuba y tornó ta la suya Calanda natal cuan a isla se metió en piet de guerra cuentra España. Se casó con una choven d’o lugar, María Portolés, y alquirió propiedaz cuals buenas rendas le permitioron tresladar-se a vivir ta Zaragoza con a suya familia. Ta alavez, Luis teneba tres años.

O mayor d’os siet chirmans Buñuel estudió en o colechio d’os chesuitas con buenas notas pero sin amagar una insolenzia que le saliba de dintro. Ta Semana Santa y vacanzias, tornaba ta Calanda, an feba teatrillos con feguras de cartón y uembras chinescas y chugaba a zelebrar misas. As fabulazions y a imachinazión desbocada casaban bien en belún que dende chicot yera espeutador de comeyas y dramas en o teatro Prenzipal, vesitaba os establimientos zinematograficos de Coyne y Farrusini y yera leutor voraz de novelas d’aventuras y de detective.

Vida

Con catorze años estió forachitau d’os chesuitas y se matriculó en l’Instituto de Enseñanza Meya (o futuro instituto Goya). A os dezisiet marchó ta Madrit a estudiar ta incheniero agronomo, anque a o poco s’afizionó a las Zenzias Naturals (y más en concreto a la entomolochía) ta rematar matriculando-se en Filosofía y Letras y estudiar a carrera d’Istoria que concluyiría en 1924. Ta par d’alavez teneba una novia madrileña, a la cuala eba conoxiu en una estanzia veranenca con a suya familia en San Sebastián. Concha Méndez estió una d’as “sinsombrero”: o grupo d’escritoras y inteleutuals ligadas a la Chenerazión d’o 27.

Ixe ambién cultural yera mui presén en a Residenzia de Estudians: un proyeuto d’a Junta de Ampliación de Estudios, ereu d’os modelos pedagochicos d’a Institución Libre de Enseñanza. Astí viviría Buñuel entre años, y a estanzia le marcaría fundamén: consonó con Federico García Lorca, Salvador Dalí, Pepín Bello, Rafael Alberti, Juan Ramón Jiménez… En ixos años asistió a rufiertas (como a d’o café d’o Pombo que manteneba Ramón Gómez de la Serna), escribió poemas y cuentos, s’intresó por o naturismo, por o boseyo, siguió amostrando-se ronquista con un claro sentiu de l’amistat. Muito más tarde eba de reconoixer a suya deuda absoluta por Federico: “Sin él, yo no abría sabiu o que yera a poesía”.

Obra

Un viache a París en 1925 le ubre a las avanguardias, consume zine sin descanso, fa pinitos en o teatro y consigue estar aduyán de direzión d’o realizador Jean Epstein. En ixos años se mueve entre Franzia y España: publica creticas de zine, interpreta chicoz papels, endreza un zineclub en a Residenzia de Estudians… En 1929 consigue diners d’a suya mai ta finanziar o rodache d’un guión escrito a meyas con Salvador Dalí en o cual dan ramal suelto a las posibilidaz de l’inconszién, o esvarío y a provocazión. O esito y a polemica d’Un perro andaluz en París le fican de raso en o mundo surrealista: Max Ernst, Paul Éluard, André Breton, Louis Aragon, Tristan Tzara, Réné Magritte… A l’año siguién La Edad de oro insiste en prenzipios esteticos que retan a moral burguesa y convenzional. O resultau: boicot a las proyeuzions por grupos d’estrema dreita y proibizión por as autoridaz. La Edad de oro no se distribuyirá en Francia dica 1980.

Hollywood

En 1930 conoixe en Hollywood a Charles Chaplin y a Serguéi Eisenstein y ye logau por a Paramount. Tres años dimpués, con diners d’o suyo amigo Ramón Acín filma Las Hurdes, tierra sin pan, zinta zensurada y proibita por a suya crudeza en a denunzia sozial. Casado con Jeanne Rucar (con qui tendrá dos fillos: Jean-Louis y Rafael) y afincau en España como direutor de doplache y produtor en Filmófono, o esclatito d’a Guerra Zevil le sorprendió en Madrit y se metió a o servizio d’o gubierno republicano, coordinando documentals y azions de propaganda y supervisando o pabellón español en a Esposizión Internazional de París.

Dezaga d’a redota d’a Republica, desempeña en Estaus Unius labors de produzión y supervisión, treballa ta lo Museu d’Arte Moderno de Nueva York, más tarde ta la Warner en Los Ángeles… ta alavez ya ha trencau a suya relazión con Dalí, en as antipodas ideolochicas. Ombre de cuchas, a suya situazión en Estaus Unius ye cada vez más incomoda y consigue emplego en Mexico ta endrezar Gran Casino: un fracaso tot y con  contar con estrelas como Jorge Negrete y Libertad Lamarque. Se recuperó con El gran calavera, cual esito le permitió acometer proyeutos más personals como Los olvidados, un retrato descarnado d’a pobreza en a gran ziudat con o cual trunfaría en o festival de Cannes. En o dezenio de 1950 se consolida con titols como Susana, Él, La ilusión viaja en tranvía, El río y la muerte o Ensayo de un crimen, entre atros, en os cuals se perfila o melodrama, os toques surrealistas, una visión muito personal d’a soledat, a picaresca y a umor negra.

Con Nazarín (mui bien rezibida en o festival de Cannes), El ángel exterminador y Simón del desierto (1964), completa a suya etapa mexicana. Antes d’ixo, en 1960, eba viacheau a España ta rodar Viridiana, una coproduzión ispano-mexicana cual guión eba escrito chunto a Julio Alejandro. Con ella obtiene a Palma d’oro en Cannes, pero a Ilesia más conservadera la considera un insulto a la relichión, y o rechimen franquista la proibirá en España (no se proyeutará dica 1977).

Dende 1963 dentra de pleno en a zinematografía franzesa (con a cuala ya eba treballau en zintas anteriors) con Diario de una camarera, Belle de jour (León d’oro en Venezia y gran esito de publico), La Vía Láctea, El discreto encanto de la burguesía (óscar a la millor zinta de fabla no anglesa en 1972) y El fantasma de la libertad. En istas zintas, en as cualas tendrá un papel muito importán o guionista Jean-Claude Carrière) esclata agún más a veta surrealista chugando con l’azar y as contradizions d’o ser umán. Dinantes eba rodau en España Tristana y tornaría a fer-lo con Ese oscuro objeto del deseo, a suya zaguera zinta en 1977.

Os suyos zaguers años estioron plenos d’omenaches y retrobadas. Ya en o dezenio de 1960 tornó a vesitar Zaragoza y a suya Calanda natal. En 1972 o gran zineasta George Cukor le ofrexió una zena-omenache en a suya casa de Los Ángeles, en a cuala partiziporon autenticas leyendas d’o zine universal como Alfred Hitchcock, Billy Milder, William Wyler, Robert Mulligan, Robert Wise, George Stevens y Rouben Mamoulian. Tamién estió obcheto d’un gran omenache en o Zentro George Pompidou en París en 1982. Ta alavez ya eba sofierto operazions de prostata y vesicula, y un canzer le iba minando. O suyo zaguer sospiro lo dio en Ziudat de Mexico en chulio de 1983. As suyas zenisas estioron espardidas en 1997 en o mon Tolocha, amán de Calanda, a an tornó ta no ir-se nunca más.

Referenzias

Sobre Buñuel esiste una bibliografía y una obra escrita inmensa. As suyas memorias, Mi último suspiro(escritas con Carrière), de 1982, han estau reeditadas muitas vezes.

En 2000, o cantautor aragonés Ángel Petisme le adedicó un libro-disco, Buñuel del desierto (LCD Prames), disponible en plataformas como Spotify. Ixe treballo formó parte d’as autividaz d’o zentenario d’a naixenzia d’o zineasta, d’o que uei agún permanexe informazión d’intrés:

Autividaz didauticas

Una recomendazión ta empezipiar

En 2019 o realizador Salvador Simó presentó a zinta Buñuel en el laberinto de las tortugas, que se fazió con o premio Goya a la millor zinta d’animazión. Se nos amuestra a o choven Buñuel que marabilla y escandaliza en o París d’as avanguardias y que se mueve ta terrenos de zine comprometiu. Aduya de traza amena a entender cualques porqués d’o zine de Buñuel, as claus que le acompañarán entre a suya carrera… Puede estar un buen punto de partida.

Se troba disponible en libre azeso en a web de Radio Televisión Española

O zine de Buñuel

Buñuel conta con una filmografía mui estensa. Ya emos fablau de cualques d’as suyas obras, as consideradas más importans, en a biografía. Sin contar atras en as cualas autuó, estió produtor u guionista… as zintas que endrezó estioron as siguiens:

  • Un perro andaluz (Un chien andalou, 1929).
  • La edad de oro (L’âge d’or, 1930).
  • Las Hurdes, tierra sin pan (Las Hurdes, 1933).
  • Gran Casino (En el viejo Tampico, 1947).
  • El gran Calavera (1949).
  • Los olvidados (1950).
  • Susana (Demonio y carne, 1951).
  • La hija del engaño (1951).
  • Una mujer sin amor (Cuando los hijos nos juzgan, 1952).
  • Subida al cielo (1952).
  • El bruto (1953).
  • Él (1953).
  • La ilusión viaja en tranvía (1954).
  • Abismos de pasión (1954).
  • Robinson Crusoe (realizada en 1952 y registrada en 1954).
  • Ensayo de un crimen (La vida criminal de Archibaldo de la Cruz, 1955).
  • El río y la muerte (1954-1955).
  • Así es la aurora (Cela s’appelle l’aurore, 1956).
  • La muerte en el jardín (La muerte en este jardín, La mort en ce jardin, 1956).
  • Nazarín (1958-1959).
  • Los ambiciosos (La fiebre sube a El Pao, La fièvre monte a El Pao, 1959).
  • La joven (The Young One, 1960).
  • Viridiana (1961).
  • El ángel exterminador (1962).
  • Diario de una camarera (Le journal d’une femme de chambre, 1964).
  • Simón del desierto (1964-1965).
  • Belle de jour (Bella de día, 1966-1967).
  • La Vía Láctea (La Voie Lactée, 1969).
  • Tristana (1970).
  • El discreto encanto de la burguesía (Le charme discret de la bourgeoisie, 1972).
  • El fantasma de la libertad (Le fantôme de la liberté, 1974).
  • Ese oscuro objeto del deseo (Cet obscur objet du désir, 1977).
En iste enlaz i hai una selezión d'as consideradas diez millors zintas de Buñuel

Pro, ixa selezión ye mui subchetiva y responde a o criterio personal de l’autor de l’articlo. Pero a traviés d’este  puedes fer-te una idea d’as carauteristicas d’o zine de Buñuel. Leye os comentarios y di qué zinta corresponde a cadagún d’istos trazos:

    1. Estió proibita en España dica dimpués d’a muerte de Franco
    2. Produzión franzesa, obtenió un Óscar de Hollywood
    3. Un grupo de ricos no puede salir d’una cambra
    4. Forma parte d’o programa “Memoria d’o mundo” d’a Unesco
    5. Una muller d’a burguesía, aborrida d’o convenzional, leva una dople vida
    6. Podió rodar-la grazias a que a un amigo le tocó a lotería
Soluzions: 1. Viridiana / 2. El discreto encanto de la burguesía / 3. El ángel exterminador / 4. Los olvidados / 5. Belle de jour / 6. Las Hurdes, tierra sin pan

Cuál te clama más l’atenzión? Te pica a curiosidat bella d’ixas zintas? Comentaz-lo en clase: tal vez se pueda proyeutar una d’ellas, y dimpués intercambiar impresions, opinions y reflesions sobre o que aigaz visto.

De totas ixas zintas, a más destrosadora y breu estió Un perro andaluz. Puede veyer-se en internet baixo dominio publico, y te proponemos una autividat espezifica sobre ella.

A provocazión como arte. D’o surrealismo…

O curtometrache "Un perro andaluz (Un chien andalou, 1929)", puede veyer-se completo aquí

Ista pieza naixió d’a confluenzia de dos suenios (Dalí sonió que unas fornigas pululaban por as suyas mans y Buñuel sonió con una novalla que tallaba a luna en dos). En tasamén vente menutos, se salta toz os esquemas narrativos convenzionals. S’usa un tiempo no linial (con brincos abanze y dezaga); a traviés de l’agresividat en as imachens y de lo inquietán, mira prevocar un impauto moral en o espeutador, remite constanmén a o esvarío y a o suenio. Os instintos, o deseyo carnal, as memorias d’o pasau, a educazión relichiosa, a opresión, o castigo, l’autoridat y a cretica d’una soziedat que se considera putrefacta (como ixos carnuzes a rastras) desfilan tamién por a zinta. O sentiu d’a umor (una umor negra, somarda y socarrona), a muerte siempre en l’orizón, os inseutos, as armas (que le apasionoron pero nunca no utilizó), l’erotismo… De traza más u menos esplizita, en mayor u menor mida, a suya filmografía ye recorrida por toz istos asuntos.

En iste parrafo emos utilizau dos parolas aragonesas: “carnuz” y “somarda”. Qué significan? Son replegadas as dos en o Dizionario d’a Luenga Española?

Somos d’alcuerdo en que ye una zinta difizil de definir y d’entender. O zine, como l’arte en cheneral, ye tamién ta fer-nos pensar, pero tamién ta remenar-nos un poquet, ta incomodar-nos.

Creyes que ista mena de zine ye fázil de veyer? Qué mena de zintas u de series te cuaca veyer? Prefieres a fizión que te conta cosas agradables u a que t’obliga a fer-te preguntas y a cuestionar-te cosetas? Dezaga de veyer Un perro andaluz… qué imachen ye a que más t’ha impautau? Creyes que pareixe tot un ripa de suenios y barucas? Qué representans de l’autoridat salen en a zinta? Por qué creyes que ista zinta sembró tanta polemica?

Mira informazión sobre o surrealismo, dó y cuán naixe y se desembolica (por qué prezisamén en ixos años?)

O surrealismo prene carta de naturaleza en o París d’o dezenio de 1920, anque s’espardirá en diferens direzions. S’inspira en o psicoanalisis, en a esplorazión d’o subconszién, dixando a un costau lo razional. Como avanguardia literaria y artistica pretende cuestionar as valors tradizionals, alterar o suyo equilibrio… en ixe sentiu obedexe a la considerazión de l’arte como bella cosa revoluzionario. A epoca d’entreguerras en Europa, os vente años que deseparan o Tratau de Versalles (1919) d’o esclatito d’a Segunda Guerra Mundial (1939), son tiempos barucosos, de crisis y d’eszitazión. Un campo abonau ta replegar os fruitos de tota ixa creyatividat desafiadera arredol d’un mundo en erupzión.

… a o drama realista. A pasión y o sofrimiento como arte

Unatra zinta que no ye “fazil de veyer” porque “mete o dido en a llaga”, ye "Los olvidados (1950)". Puedes veyer-la aquí

Istoria trachica en a estela d’o neorrealismo italián, pertenexe a unatra dinamica istorica (la d’a posguerra mundial) y ofreixe a cara menos amable d’un país, Mexico, cual creximiento economico y desembolique cultural en ixos años no dixan veyer bolsas de pobreza y desigualdat.

Si vente años dezaga, en Un perro andaluz arrullaba violenzia, tempestat y lirismo angunioso, agora en los olvidados Buñuel ye solidario con o feble, cual miseria amuestra descarnada, sin edulcorar (con similar espresionismo a o que eba plasmau en Las Hurdes). O escritor Octavio Paz definió Los olvidados como “arte pasional y feroz, conteniu y delirán, lava freda, chelo volcanico”.

As leuturas d’o choven Luis

Luis Buñuel estió un gran leutor dende nino: seduziu por novelas d’aventuras y detective, tampoco no feba fastios a asayos y obras más complexas d’a completa biblioteca que poseyeba o suyo pai. Tamién escribió muito (“Un buen escritor ha d’estar un buen leutor”): piezas liricas en os años vente, poemas surrealistas con ecos d’as greguerías y de l’ultraísmo, creticas zinematograficas, os suyos propios guions que son literatura en estau puro… A propia narrativa d’as suyas zintas contiene elementos d’a picaresca d’o Sieglo d’Oro, d’os erois romanticos, d’as empentaa d’a naturaleza, d’o realismo, de l’espresionismo…

Beluns d’ixos elementos podrían devinar-se a partir d’os libros que le seduzioron d’adoleszén. Estriamos zinco d’els (beluns los adautaría de mayor ta o zine). Relaziona-los con os suyos autors:

 

  1. Robinson Crusoe                                                     a) Charles Darwin
  2. El Buscón                                                                 b) Daniel Defoe
  3. Tristana                                                                   c) William H. Ainsworth
  4. Rookwood (Dick Turpin)                                               d) Francisco de Quevedo
  5. El origen de las especies                                      e) Benito Pérez Galdós

 

Soluzions: 1-b; 2-d; 3-e; 4-c; 5-a

Calanda en a infanzia y en a madurez d’o zineasta… Calanda en o suyo legau

Calanda ye una villa d’o “Bajo Aragón” turolense. Forma parte d’a Rota d’o Tambor y o Bombo.

Mira os nombres d’as de demás localidaz que componen ixa rota.

Albalate, Alcañiz, Alcorisa, Andorra, Calanda, Híjar, La Puebla de Híjar, Samper de Calanda y Urrea de Gaén 

Si tiens curiosidat, puedes vesitar ista pachina

O momento cruzial d’a zelebrazión d’a Semana Santa en ista localidat ye a “rompida d’a ora” a o meyodía d’o Viernes Santo.

Mira imachens en internet d’a “rompida d’a ora” en Calanda. Sabes o que se quiere represientar?

Se represienta o estrapaluzio que, seguntes se diz, s’escuitó en a Tierra dezaga d’a muerte de Chesucristo en a cruz.

Buñuel, que de nino eba viviu ista zelebrazión, perén alzó o redople d’os tambors en a suya memoria: los fazió sonar en bels pasaches de zintas suyas (La edad de oro, Nazarín y Simón del desierto) y, cuan estando ya un zineasta zelebre podió tornar a dentrar en España, s’integró en ixa fiesta (i hai imachens de Buñuel tamboreando con o suyo fillo Jean-Louis en 1963).

Calanda (que tamién ye famosa por os suyos sobrebuenos presiegos de denominazión d’orichen, y por un miraglo atribuyiu a la Virchen d’o Pilar en o sieglo XVII, cuan por o que pareix un calandino coixo recuperó a suya garra) forma parte d’o rico universo personal que Buñuel tresladó a las suyas zintas. Como diz Antón Castro, “una vez que sabió que quereba fer zintas d’eminén poderío visual sobre una subchetividat conflitiva –o sexo, a relichión y o destín–, nomás abió de tornar a suya uellada ta las fotografías amarillencas d’o suyo universo domestico: Calanda, os misterios familiars d’os Buñuel, a vida labradera, a infanzia nodrida de prodichios y d’orrors”.

En os nuestros días, o Zentro Buñuel Calanda ye una referenzia ta la investigazión y a divulgazión, ta los entendius en a obra de  Buñuel y ta qui deseye prener contauto con l’artista aragonés y l’entorno que le marcó en a suya vida y en a suya obra. Aculle una esposizión permanén y atras temporals y desembolica diferens autividaz.

Puez veyer-lo en a suya pachina

Directores españoles en los Óscar

Luis Buñuel estió o primer direutor español en conseguir un premio Óscar de l’Academia de Hollywood. Como ya sabes, estió con El discreto encanto de la burguesía (una parabola sobre a decadenzia dica l’absurdo), que le valió o premio en a categoría de “millor zinta de fabla no anglesa”. A zinta yera una produzión franzesa. Dimpués de Buñuel, atros cuatre direutors españols ganarían o mesmo premio en ixa categoría.

Te damos o nombre d’ixos direutors, y a edizión d’os Óscar en a cuala estió premiau cadagún d’els. Tu tan solo has de mirar y completar o cuadro con o títol d’a zinta correspondién:

1982 José Luis Garci  
1992 Fernando Trueba  
1999 Pedro Almodóvar  
2004 Alejandro Amenábar  

 

Soluzions. Por o mesmo orden: Volver a empezar; Belle époque; Todo sobre mi madre; Mar adentro

Atros zineastas aragoneses d’o sieglo XX

(y tamién d’o XXI)

Buñuel ha pasau a la gran istoria universal d’o zine. Pero i hai atros aragoneses que tamién han escrito pachinas gloriosas d’o seteno arte. As suyas obras han aguantau muito bien o paso d’o tiempo.

Te recomendamos un gollada a las creyazions d’istos tres grans zineastas aragoneses.

José María Forqué (Zaragoza, 1923 – Madrit, 1995). A suya obra más reconoixida, Atraco a las tres, de 1962, proyeuta una cretica mui azeta a la soziedat d’a epoca y una uellada tierna a las ambizions umanas y a la frustrazión: o tinte comico le permitió sortiar a la zensura (fren a os ignorans y obtusos, l’agudeza y l’enchenio siempre venzen).

Zinta completa en youtube
No te pierdas iste clip (ye antolochico)

José Luis Borau (Zaragoza, 1929 – Madrit, 2012). Tamién guionista de gran prestichio amás de direutor, a suya zinta más conoixida ye Furtivos (1975), que ganó a Concha d’Oro en o festival de San Sebastián. Personaches atrapaus en un ambién de claustrofobia que, por l’año en que se difundió (1975, o mesmo d’a muerte d’o ditador Franco), ha dau ta muitas interpretazions.

Trailer orichinal de “Furtivos"

Carlos Saura (Uesca, 1932). Anque no estió a primera d’as suyas zintas, La caza suposó un espaldarazo a la suya carrera, y consolidó una filmografía mui estensa y reconoixida, que agún en 2022 sigue dando fruitos. Ixa zinta de 1965 ye contemplada como una metafora d’a Guerra Zevil, y afonda en os instintos primarios d’o ser umán.

Un clip mui representativo de "La caza"

Epilogo

A Buñuel, a suya muller, Jeanne, le calificaba como “zeloso y dominán” pero a la vez “tierno, alegre y con sentiu d’a umor”. Él se consideraba a él mesmo “ateu grazias a Dios”, paradoxal y ombre de contrastes.

Antón Castro diz que a obra de Buñuel ye “una sintesis almirable y corrosiva d’a tradizión ispanica, d’as luzes y uembras d’o Sieglo d’Oro, de l’influixo d’a relichión y d’o suyo compromiso con o parlache d’as avanguardias. Crea una galería de personaches cuala esistenzia oszila entre a violenzia, a represión sesual, una profunda falaguera por a muerte y a considerazión que a bondat gosa conduzir ta o fracaso yt a l’esferra”.

A influenzia que exerze sobre o zine d’a segunda metat d’o sieglo XX y mesmo de l’autual ye incuestionable. O zine d’atros autors mundialmén famosos (Hitchcock, Fellini u David Lynch) debe muito a os mundos soniaus y esploraus por Luis Buñuel.

Buñuel y Don Luis

Descarga dende iste enlaz o PDF d’a publicazión editada por a editorial Xordica con o patrozinio d’a Obra Sozial d’Ibercaja.

Aragoneses ilustres, ilustrados e iluminados

Descarga dende iste enlaz o PDF d’a publicazión Aragoneses ilustres, ilustrados e iluminados, de Antón Castro y José Luis Cano, editada por o Gobierno de Aragón en 1993.

DIRECCIÓN GENERAL DE POLÍTICA LINGÜÍSTICA

Departamento de Educación, Cultura y Deporte

Parque Empresarial Dinamiza (Recinto Expo)
Avenida de Ranillas, 5D - 2ª planta
50018 Zaragoza
Tfno: 976 71 54 65

Colabora: