A MULLER, O MITO

Barzelona, 1786 – Ceuta, 1851

Referenzias

• Daniel Aquillué (2021): Guerra y cuchillo. Los Sitios de Zaragoza, 1808-1089. Madrid: La Esfera de los Libros.
• José Luis Cano (2008): Las sitiadas. Zaragoza: Xordica.
• Antón Castro (1993): “Agustina Zaragoza entre heroínas”, en Aragoneses ilustres, ilustrados e iluminados (138-143). Zaragoza: Gobierno de Aragón.
• Diccionario Biográfico Real Academia de la Historia: https://dbe.rah.es/biografias/6525/agustina-zaragoza-domenech
• Ana María Freire López (2002): “Historia y literatura de Agustina de Aragón”. Comunicación en el III Coloquio Lectora, heroína, autora (la mujer en la literatura española del siglo XIX)http://www.cervantesvirtual.com/obra-visor/historia-y-literatura-de-agustina-de-aragn-0/html/018bd15e-82b2-11df-acc7-002185ce6064_3.html

O marco istorico cheneral. A Guerra d’a Independenzia

Leye iste testo:

En 1789, s’enziende en Franzia una dinamica que alteró as estruturas de l’Antigo Rechimen, iniziando o ziclo d’as revoluzions burguesas que entre o sieglo XIX irán asoziadas a la imposizión d’o liberalismo. A Revoluzión franzesa se refirmaba en gran mida en as ideas d’a Ilustrazión, con predominio d’a razón, a zenzia y a conoixenzia teunica. En España, ixas ideas ilustradas eban inspirau politicas reformistas por parte d’a monarquía absoluta, conzebidas ta aprevenir, prezisamén, esclatitos revoluzionarios como o que remató suzedendo en Franzia.

A Revoluzión franzesa, por tanto, prevocó una reazión de esfensa de monarquías como a española, que estioron dixando de costau ixas politicas ilustradas. Mientres, en Franzia, os acontezimientos se prezipitaban: resistenzias y guerra zivil, cambios de sistema de gubierno, conflitos internos, a decapitazión d’os reis, esferens liderazgos y traidurías… acompañaban a tiempos convulsos que, manimenos, tamién veyioron desembolicar-se ideas que nunziaban un nuevo marco: a perda de privilechios d’as clases dominans, a estensión de dreitos ta atras clases sozials, l’alministrazión razional, as ideas modernizaderas d’a Ilustrazión… Muitos franzeses pensaban que ixos abanzes yeran universals, que nomás podeban desarrollar-se en un ambito global: por tanto, ta sobrevivir, a Revoluzión amenestaba estendillar-se ta atros países.

Asinas, Franzia enchegó una potén maquinaria de guerra que le enfrontinó a muitos países d’Europa (por eixemplo, mantenió con España a clamada guerra d’a Convenzión). Un d’os suyos chenerals, Napoleón Bonaparte, aproveitó o prestichio ganau en campañas militars y, con gran abelidat politica, se metió a o fren d’o Estau, plegando a proclamar-se emperador. L’Imperio recuperaba formas d’a monarquía y aparenmén traizionaba o esprito revoluzionario, pero contribuyiba eficazmén a estender ixos prenzipios asoziaus a o progreso y consagraus a la libertat y a la igualdat. O problema ye que a imposizión d’ixos prenzipios por a fuerza d’as armas no yera, prezisamén, a millor d’as trazas.

En os primers años d’o sieglo XIX, España travesaba una situazión de crisis economica, sozial y politica. Napoleón aproveitó a debilidat d’as instituzions, a división interna entre as clases poderosas (y mesmo d’a propia familia real) ta convertir o que yera un permiso de paso ta que as suyas tropas s’endrezasen a conquerir Portugal… en una invasión en tota regla. En moltetut de puestos, se constituyioron Chuntas ta organizar a esfensa, o lugar se rebeló, i abió respuestas de tota mena…

Sin dentrar en masiaus detalles, istos parrafos meten en antezedens y esplican qué estió o que levó a las tropas franzesas a plantar-se debán de as murallas de Zaragoza. Mira informazión. En qué atras ziudaz u puestos i abió resistenzia a la presenzia de tropas franzesas? I abió bel tipo d’organizazión zentralizada?

Muitas personas de talán ilustrau y liberal compartiban en o suyo fuero interno os prenzipios d’a Revoluzión franzesa, os dreitos y libertaz ziudadanas que ixos prenzipios deziban esfender… pero a brutalidat y as albitraridaz d’as tropas napoleonicas no podeban dixar-les indiferens y estioron muitos os que, con ixo y con tot, plantoron cara a l’invasor. En ixa resistenzia consonoron personas d’ideas y condizions muito diferens. Toz els “patriotas” como defensors d’o suyo país y d’o suyo paisache, con un conzeuto de “patria” muito más rico que a que a vezes se da a entender: a idea de “patriota”  como esfensor d’a monarquía, a relichión, as tradizions y l’orden entendius a o modo absolutista, fren a o maligno que representaba l’enemigo… estió por desgrazia a idea que imperó con o retorno de Fernando VII dezaga d’a retirada d’as tropas de Napoleón. A represión d’iste rei absolutista afeutó a muitos liberals que s’eban enfrontinau a os franzeses y a os cuals agora s’acusaba de “afranzesaus”.

Mira informazión sobre a Constituzión de 1812. En qué ziudat s’aprebó? Cómo la definirías: democratica, liberal u absolutista? Entre cuántos años estió vichén? Influyió sobre belatra constituzión? Tría bel punto que te clame o ficazio.

Ye zierto que i abió muitos “afranzesaus” en puestos (espezialmén ziudaz) y momentos en os cuals os franzeses s’imposoron y instaloron a suya alministrazión. Dende qui feban negozio con ista presenzia estranchera dica qui creyeban sinzeramén en ixos prenzipios revoluzionarios de progreso y modernidat, pasando por qui azeutaban os feitos consumaus con resignazión como modo de supervivenzia. No yera fázil a convivenzia con tot ixo. O nuestro chenio Francisco de Goya, d’ideas liberals, no veyió con malos uellos a intervenzión franzesa en a politica española… dica que estió conszién d’as barbaridaz produzidas, que de traza tan esgarradera plasmó en a suya serie de gravaus “Los desastres de la guerra”. Más tarde, dezaga d’a plegada de Fernando VII, pintó os suyos famosos cuadros d’o 2 y o 3 de mayo como “desagravio”. Afranzesau? Liberal? Patriota a la suya manera y dende a suya parzela? Simplamén umán? Qué piensas?

O marco istorico local. Os Sitios de Zaragoza

Mullers en piet de guerra

Imo-nos a tiempos anteriors. Mira informazión sobre istas tres mullers: Boudica, Juana de Arco y María Pita. A qué momento istorico pertenexe cadaguna? En qué puestos autuoron y son uei día mitificadas?

Os estudios y rechiras sobre aspeutos sozials y de chenero en a Guerra d’a Independenzia (y en atros momentos istoricos) han evoluzionau muito. No se quedan esclusivamén en azions militars, sino que s’estienden en analisis más amplas, sobre o propio papel d’a muller en a soziedat, como autriz prenzipal y determinán.

T’aduyará a replecar millor a propia peripezia d’Agustina de Aragón, en meter-la en un contesto muito más amplo.

Lo zierto ye que, d’Agustina de Aragón, poco gosa conoixer-se dillá d’a suya fazaña entre o primer sitio de Zaragoza en 1808. En a biografía has visto que fazió muitas más cosas, pero no se les ha dau masiada importanzia, y amás… sobre a propia vida d’ista muller siguen zirculando notizias muito estrañas y contraditorias.

Agustina estrañada

Tot o que rodeya a Agustina d’Aragón mezcla a realidat y a fizión, a persona de carne y ueso y o mito, a muller y o simbolo. Aquí emos siñalau un itinerario vital que uei día apareixe pro escampau, pero i hai abiu relatos “alternativos” que espiguardan y que, en muitos casos, se mezclan entre él y con os feitos reals, con o cual nos trobamos con un enredo difizil de desenreligar.

Uns relatos contan, por eixemplo, que naixió en Reus (ziudat no masiau leixana d’o lugar d’os suyos pais), y en ocasions s’ha fablau d’un primer fillo feneixiu mui chicot, antes que Agustina recalase en a capital aragonesa. Pero l’infeliz Juan vivió con a suya mai en a Zaragoza sitiada ta morir, como emos contau, entre a penosa marcha de mai y fillo como prisioners d’os franzeses. Agustina daría a luz más tarde a unatro nino, clamau tamién Juan en memoria d’o chirmán feneixiu, y o suyo ombre, Roca, moriría como tenién en 1823.

Porque ixa ye unatra… en cualques puestos se siñala que o suyo primer ombre murió en os inizios d’a guerra en Barzelona y que ella plegó en Zaragoza nuevamén casada u seguindo a un capitán, un tal Luis de Talarbe que, atenzión, nunca no esistió! Mesmo s’ha plegau a mantener que l’artillero a o que Agustina sustituye en l’azión d’o Portillo ye o suyo amau. A l’equivoco contribuyen istorias como a que, por o que pareix, se dio poco tiempo dimpués d’os suzesos de Zaragoza, cuan Agustina pasó uns meses en Andaluzía y unatra muller se fazió pasar por ella barafundiando a os de demás con azions poco eixemplars.

Agustina Saragossa tamién s’ha visto involucrada en bel que unatro guión digno de telenovela. S’ha plegau a dezir que, dezaga d’instalar-se con Talarbe en Valenzia, sabió que o primer ombre a o que eba dau por muerto, Juan Roca, yera vivo y le reclamaba tornar con él. Agustina estió salomonica y dezidió aleixar-se d’os dos. Cuan le plegó a notizia que, agora de verdat, o primer remataba de feneixer, miró de  retornar con Talarbe, pero iste, que eba marchau ta America, se casó astí. Y alavez ella se retiró ta Zeuta emparellada con un medico, Cobos, muito más choven que ella.

Parte d’ista confusión podemos esplicar-la en o sino d’a propia familia d’Agustina. A suya filla, Carlota Cobos, publicó en 1859 una novela, La ilustre heroína de Zaragoza, en a cuala mezcla fizión y realidat arredol d’a suya mai, feneixida poco tiempo dezaga. Astí apareixe Talarbe, qui (seguntes investigazions d’Ana María Freire) podría corresponder a o militar José Carratalá, cual fuella de servizios indica coinzidenzia con Agustina en o segundo sitio de Zaragoza y en atros destins posteriors, dende o suyo apresamiento y fuyida camino de Franzia, pasando por azions militars en Tortosa y Vitoria. Por a razón que estase, a Agustina (que en os suyos zaguers años yera a o tanto d’a redazión d’a novela) le agradaba que a suya filla fese ixa clucada y s’inventase una vida “alternativa”, de novela.

Ya sabemos que o fenomeno viral afeuta tamién a la propagazión de falsedat… y isto esplica en parte que os datos erronios sobre a vida d’Agustina d’Aragón sigan campando.

Agustina, personache romantico eszindiu en dos

D’a nuestra protagonista s’ha espardito una dople memoria:

• • A eroína d’os Sitios, emplegada por a propaganda, por a epica d’España fren a l’invasor, de esfensora d’a tradizión que os enemigos quieren destruyir.
  • A muller contraditoria, inconstán, dada a las deleras sentimentals…

A primera Agustina ha protagonizau novelas, obras de teatro, zarzuelas, zintas…

Mira informazión sobre a zinta Agustina de Aragón (1950, endrezada por Juan de Orduña, protagonizada por Aurora Bautista).

Ta zarrar… un consello d’Agustina

A valentía, a valor, a eroizidat… en o fondo son conzeutos mui volubles, que ye mui fazil inflamar u atapizar. Talmén más que personas valiens, aigamos de fablar d’autituz valiens. Talmén l’éroi, a eroína, ye dintro d’un mesmo, d’una mesma.