Félix de Azara

Darwin antis de Darwin

Barbuñals (Uesca), 1742 – 1821

As teorías de Charles Darwin sobre a evoluzión d’as espezies trestucoron o pensamiento ozidental, que dica alavez eba teniu a Biblia, revelada por Dios, como fuen segura de conoixenzia. O naturalista anglés basó a suya tesis en a detallada observazión d’animals y plantas entre as espedizions intercontinentals en as cualas partizipó. Y en ellas ye más que prebable que tenese a man, como refirme impreszindible, os libros d’un aragonés que le prezedió en as suyas investigazions, Félix d’Azara, a o que zitó en as suyas obras en cuantas ocasions y perén con respeto.

Félix d’Azara naixió en un lugarón de Uesca, Barbuñals, como seiseno fillo d’un miembro d’a nobleza rural, barón de Pertusa. Entre os suyos chirmans abió destacaus eclesiasticos y churistas, y un d’els, José Nicolás, amigo personal de papas, emperadors, reis y d’o mesmo Napoleón, se convertiría en un d’os diplomaticos y ombres de cultura de mayor relevanzia en Europa.

Vida

Félix inizió estudios superiors de Filosofía y Dreito en Uesca, d’a man d’o suyo tío canonche Mamés d’Azara, anque los albandonó en cuentra d’a opinión d’o suyo pai ta obtener en Barzelona a lizenziatura d’incheniero militar, cuerpo en ixe momento en lo más altero de l’avanguardia zientifica española. En salir de l’academia, proyeutó fortificazions y a regulazión de cuantas cuencas fluvials antis d’embarcar-se en a espedizión naval que, en chulio de 1775, partió ta conquerir Archel, foco d’a piratería en o Mediterranio. L’asalto resultó un retundo fracaso y Azara remató feriu de gravedat. Nomás grazias a o refirme d’o conde de Fuentes podió restablir-se y continar a suya corrida en l’exerzito.

En 1781, ya tenién coronel, Carlos III lo metió a o fren d’un equipo de topografos, cheografos y incheniers que, en colaborazión con un grupo similar que ninviaría Portugal, eba de trazar una muga estable entre os dominios de toz dos países en America d’o Sur, en a redolada d’o Río d’a Plata. Entre zenturias, os portugueses s’eban aprofeitau que se trataba d’un territorio inesplorau y agreste ta desoír os trataus siñaus y amplar as suyas posesions, por lo común, ixo sí, con a eficaz colaborazión de gubernadors y terrateniens españols, que se benefiziaban economicamén.

Obra

Asentó o suyo cuartel cheneral en a ziudat paraguaya d’Asunzión y, a l’aspera que plegase a espedizión portuguesa, dezidió abanzar a fayena y encomenzó a esplorar o territorio y a confezionar mapas. En primeras lo fazió a o mando d’os suyos subordinaus pero, más tarde, continó él nomás, ya que istos le fueron albandonando cuan as desincusas portuguesas y os aplazamientos se suzedioron y a suya tardanza no dixó d’aumentar. De feito, os portugueses nunca no tenioron intenzión de ninviar a no dengún, pues ixo ese frenau o suyo abanz y meso de manifiesto o suyo incomplimiento d’as leis internazionals.

Félix d’Azara, fidel a las ordens rezibidas, estió asperando-los entre años y años. Ixa aspera no estió, manimenos, improductiva. No i permanexió man sobre man, como podeba aber feito. Investiu d’una increyible tozoludez, devantó plans de ziudaz y lugars, confezionó listaus de localidaz, redautó informes… y tot ixo con a sañuda oposizión d’autoridaz, fazendaus, esclavistas y una burocrazia farragosa y corrupta que veyeban menazaus os suyos intréses.

Moderno antropologo

En complimiento d’o suyo deber, s’adentró en rechions nunca pisadas por l’ombre blanco. En as suyas notas, como un moderno antropologo, describió usos y costumbres d’infinidat de comunidaz indichenas, sin fer chuizios morals u de valor. Replegó as carauteristicas foneticas d’as fablas autoctonas. Y promovió a fundazión de nuevos aposamientos en a buega con Brasil, con l’aduya, entre atros, de José Gervasio Artigas, deszendén d’un emigrán de La Puebla d’Albortón, que años más tarde capitaniaría a independenzia d’Uruguai.

A o mesmo tiempo, y por ixo ye uei más conoixiu, estudió a flora y fauna locals, en particular as aus y os mamifers. Replegó fosils y animals, tanto vivos como moritos (conservaus en alcol u disecaus). Dezaga d’a suya observazión dreita, preneba notas y feba debuxos. No teneba una formazión espezifica en o tema y esconoxeba as publicazions espezializadas. Tot y con ixo, ideyó un sistema clasificatorio ta las aus d’alcuerdo a o suyo pipón, esgarrapaderas y alas. En as suyas fichas describió 448 espezies, d’as cualas a metat yeran esconoxidas. Azara almitiba a Creyazión divina, pero comprebó l’adautazión a o meyo d’as espezies en busca d’a supervivenzia. No sistematizó ni alazetó una teoría evolutiva, pero alportó eixemplos que contradeziban as teorías ofizials.

En 1801, vente años dimpués d’a suya plegada en America, tornó ta Europa y poco dimpués viacheó a París, protechiu por o suyo chirmán José Nicolás, embaixador en Franzia. Allí estió presentau en os redols zientificos, que l’acullioron con almirazión, y editó dos obras, una sobre paxaros y unatra sobre cuadrupedos, que devantoron gran contraversia, ya que tanto a Ilesia como o conde de Buffon, o prenzipal naturalista d’a epoca, refusaban cualques d’as suyas afirmazions. Con tot y con ixo, as suyas publicazions tenioron una repercusión internazional. Se traduzioron a cuantos idiomas y en l’autualidat son consideradas un claro prezedén d’os prenzipios que Darwin sustendría dezenios dimpués. Como omenache a la suya gran labor, o nombre zientifico de distintas espezies animals incluye o termin azarae, una cordelera d’a luna se diz Dorsal Azarae y una ziudat archentina, Azara, leva o suyo apelliu.

Referenzias

Mª Dolores Albiac (2000): Félix de Azara. Zaragoza: CAI.
Antón Castro (1993): “Félix de Azara en las selvas del Yacaré”, en Aragoneses ilustres, ilustrados e iluminados (126-131). Zaragoza: Gobierno de Aragón.
Augusto Ocampos (1999): La conquista científica de Azara en el Paraguay: su fascinación y respeto hacia la naturaleza. Huesca: IEA.
Diccionario Biográfico Español, Real Academia de Historia: https://dbe.rah.es/biografias/7255/felix-de-azara-y-perera
Su principal biógrafo fue Julio Rafael Contreras Roqué (1933-2017), científico argentino que publicó varios volúmenes dedicados al aragonés que pueden descargarse en internet.

Autividaz didauticas

Una educazión ilustrada

Cheografo, etnografo, naturalista, botanico, diplomatico… Anque asentada en un chicot lugar aragonés, a suya familia perteneixió a la nobleza rural y ista elevada posizión sozial permitió que Félix d’Azara y toz os suyos chirmans rezibisen una cudiada educazión y alcanzasen puestos relevans: un cardenal, un bispe, un deán, dos militars, un churista y un reconoixiu diplomatico.

Félix cursó estudios de Filosofía, Artes y Dreito en a Universidat de Uesca. Manimenos, como ixas disziplinas yeran sobre tot teoricas y poco adecuadas ta tresladar-las ta la vida real y incrementar a prosperidat d’a chen, dezidió amplar a suya educazión en l’exerzito, que en ixe tiempo ofreixeba una mena de formazión más zientifica y prautica, prosima a os plegaus d’a Ilustrazión.

Con a plegada d’a Casa de Borbón l’exerzito se reorganizó por meyo d’una nueva ordinazión d’as unidaz y d’a cherarquía militar, d’a suya alministrazión y d’a suya distribuzión territorial. Ta poder estar ofizial en a carrera d’as armas se creyó o grau de «cadet», reservau a fillos d’ofizials u de familias nobles. Asinas, se podió contar con una ofizialidat bien formada grazias a un novedoso plan d’estudios que incluyiba disziplinas zientificas: Matematicas, Fisica, Quimica, etz.

En a primera metat d’o sieglo XVIII, os chesuitas controlaban a educazión secundaria en España y en a Universidat agún se cursaban estudios d’orichen meyeval.

Mira informazión sobre a Universidat de Uesca y responde as siguiens preguntas:

Quí fundó a Universidat de Uesca y en qué año?

Pietro IV, en 1354
Fernando o Catolico, en 1507
Miguel Servet, en 1545

Cuál estió a primera Universidat d’Aragón?

Zaragoza
Alcañiz
Uesca

Qué disziplinas se podeban estudiar en a Universidat en o sieglo XVIII?

Teolochía, Filosofía, Dreito y Medizina
Istoria, Dreito, Astronomía y Matematicas
Quimica, Istoria, Medizina y Física

Soluzión: a, c, a

Comenta cuáls creyes que estioron as razons por as cualas Félix Azara prefirió a educazión militar.

Completa as frases d’a zurda con as d’a dreita ta conoixer as prenzipals carauteristicas d’a Ilustrazión.

1	A razón se considera l’unico meyo	a	fuen de verdat y bondat.
2	Os ilustraus esfienden que o progreso	b	y a politica y os gubernans han de precurar a felizidat a os suyos lugars.
3	Avogan por a educazión como veiclo nezesario	c	s’ha de basar en a zenzia y en a tecuica.
4	A felizidat ye a verdadera meta d’o ser umán	d	ta alcanzar o conoixenzia y a verdat.
5	Se considera a Naturaleza como	y	ta difundir as conoixenzias y fer progresar un país.

Soluzión: 1-d / 2-c / 3-e / 4-b / 5-a

Expedizión ta America

Félix d’Azara estió ninviau a la cabeza d’a espedizión española que eba de fixar as buegas entre as posesions d’España y Portugal en una zona en a cuala i eba desputas, seguntes o tratau de Santo Ildefonso siñau en 1777.

Partió ta Sudamérica en 1781 ta una misión de cualques meses, pero permaneixió en Paraguai y en a rechión d’o Río d’a Plata entre vente años.

Entre a suya estanzia en territorio americano, partizipó en o establimiento d’una muga estable entre o sur d’os dominios de Portugal y os d’España. Ta trazar mapas fiables, s’adentró nomás que por rechions inesploradas. En os suyos informes, describió os usos y costumbres d’os indichenas que trobó a o suyo trango, asinas como as carauteristicas d’os suyos idiomas.

Tot y con a suya escasa preparazión zientifica, aproveitó ista alongada estanzia ta estudiar tamién a fauna y a flora d’a zona.

En iste mapa d’America d’o Sur, fica o nombre d’os países. Siñala qué países autuals perteneixeban a o reino de Portugal y cuáls a o reino d’España en o sieglo XVIII.

Sabes a qué autuals países perteneixeban as tierras que recorrió Félix d’Azara?

Qué luengas se fablan en l’autualidat en ditos países?

Mira y traza de forma amanada a buega que eba de mugar a espedizión que endrezaba Azara.

O tratau de San Ildefonso se siñó en 1777 «con o sinzero deseyo d’extinguir as desavenenzias que bi eba abiu entre as coronas d’España y Portugal y os suyos respeutivos vasallos por cuasi o espazio de tres sieglos sobre as buegas d’os suyos dominios d’America y Asia». As prenzipals condizions d’o tratau estioron as siguiens:

I abría paz entre toz dos países.
Ratificazión d’os trataus de Lisboa (1668), Utrecht (1715) y París (1763).
Liberazión d’os prisioners de toz dos bandos. Restituzión mutua d’as presas navals feitas dende 1763.
A muga entre toz dos países quedaba buegada por una linia trazada seguindo o curso d’os ríos relazionaus contino: arrigachuelo de Chuy, basa Merín, río Piratiní, o capitero d’o río Negro, río Pepirí Guazú dica o suyo capitero y d’allí a la d’o río San Antonio, río Iguazú, Paraná y l’Igurey aguas alto dica a suya naixenzia. Dende allí dica o capitero d’o río Corriens y seguindo o curso d’este por o río Paraguai dica a desembocadura en él d’o Yaurú. D’allí en linia dreita ta l’ueste dica o río Guaporé, baixando o río Madeira; dende o punto equidistán entre a desembocadura d’o Mamoré en o Madeira y o río Amazonas a frontera iría en linia dreita ta lo este dica o río Yabarí; baixando por l’Amazonas dica o Yapurá, río Negro y Orinoco dica a suya desembocadura en l’oziano Atlantico. En as zonas montañosas a frontera se fixó en os puntos más alteros d’as cordeleras que deseparasen os capiters d’os ríos. A Colonia d’o Sacramento y a isla Santo Gabriel quedaban definitivamén en mans d’España.
A navegazión por os ríos menzionaus en os tramos en os cuals istos formasen muga sería libre ta toz dos países.
Formazión d’una comisión mixta ta fixar sobre o terreno as buegas.
España evacuaría a isla de Santa Catalina; Portugal abría de negar a dentrada en iste puerto a barcos que no estasen españols u portugueses.
Negazión d’os puertos de toz dos países firmans a las naus de países enemigos de cualsiquiera d’els y a cualsiquier nau de cualsiquier bandera que levase contrabando.
Zesión a España d’os territorios de Guinea Ecuatorial y as islas d’Annobón y Fernando Poo , en a costa ozidental africana.
Renunzia de totas dos partes a os dreitos sobre os territorios de l’atra parte firmán establius por meyo d’iste alcuerdo. Renunzia de Portugal a os posibles dreitos sobre as islas Filipinas y Marianas.

Rechira un poquet y enumera beluns d’os trataus que han siñau España y Portugal a o largo d’a istoria ta o reparto d’os territorios colonials d’America, África y Asia.

Una d’as clausulas d’o Tratau de San Ildefonso establiba un intercambio de tierras. Os españols zedeban a Portugal a isla de Santa Catalina, a o sur de Brasil, y iste a cambio zedeba a España a Colonia de Sacramento, en Uruguai, y as suyas posesions en Guinea Ecuatorial.

Cuál yera l’autividat prenzipal que os portugueses desarrollaban en Guinea? Mira en wikipedia a voz Guinea Ecuatorial, que te dará a respuesta.

Qué sabes d’o zaragozano Emilio Bonelli, un d’os esploradors españols que en o sieglo XIX recorrió Guinea? Mira informazión sobre él en internet.

Dica cuán perteneixió Guinea Ecuatorial a España?

Os chesuitas en Paraguai

Como s’ha menzionau, a meyaus d’o sieglo XVIII os chesuitas controlaban a educazión meya y superior en España y s’oponeban a las reformas que os ministros ilustraus d’o rei Carlos III quereban quitar adebán. Ixa estió una d’as razons, anque no a unica, que estasen espulsaus d’o país en 1767.

Suzedió ixo nomás que en España u tamién en atras partes? Mira informazión a o respeuto en internet.

A espulsión d’os chesuitas, manimenos, tenió repercusions mui negativas en l’America española, sobre tot en a zona que uei se corresponde con Paraguai, an s’establioron ta cristianizar a os indichenas. Allí fundoron unas misions u reduzions que respetoron muitas d’as suyas trazas de vida, millororon a economía y privoron que os indios estasen esclataus u esclavizaus. Cuan os chesuitas estioron espulsaus, totas ixas comunidaz decayioron.

Mira en a wikipedia a voz Misions chesuiticas guaraníes y siñala o suyo prozeso de creximiento y crisis.

Has visto a zinta titulada La misión? T’aduyará a comprender tot o prozeso y a importanzia que tenió ta un amplo territorio que recorrerá Azara poco tiempo dimpués d’os feitos que en ella se recontan.

Zinta britanica de 1986 enfilada por Roland Joffé y interpretada por Robert De Niro, Jeremy Irons, Ray McAnally y Aidan Quinn en os prenzipals papels.

O largometrache tiene como telón de fondo o Tratau de Madrit (1750), siñau entre España y Portugal. Con ixe alcuerdo se soluzionó momentaniamén a desputa por a Colonia d’o Sacramento, en a desembocadura d’o Río d’a Plata. Tamién sirvió ta unir a dos monarquías absolutas europeas en a suya luita cuentra o poder d’a Ilesia, en ixe momento exerziu por a Compañía de Chesús, os chesuitas. Istos eixerzeban una gran influenzia en os ambitos educativo, politico y economico. Ta par d’alavez, os reis catolicos europeus consideraban a o papa como un monarca, amás de como un dirichén relichioso, con o que os chesuitas yeran vistos como os representans d’un Estau extranchero dintro de os suyos dominios.

Azara y Goya

Félix d’Azara estió retratau por o tamién aragonés Francho de Goya en 1805. Contempla o suyo retrato en internet u en o Museu Goya de Zaragoza, an ye esponiu, y di qué te clama l’atenzión d’él.

Azara naturalista

Como ya s’ha menzionau, Azara estió clamau ta formar parte d’a comisión encargada de mugar con prezisión as buegas fixadas por España y Portugal en o Tratau de San Ildefonso de 1777.

Seguntes as suyas propias parolas, inizialmén s’endrezó a Asunzión (a capital autual de Paraguai) ta realizar os preparativos nezesarios y asperar a espedizión portuguesa. Dada a tardanza d’o comisario portugués (que no i plegó nunca), Azara dezidió emprender viache por a suya cuenta y realizar un mapa d’a rechión.

En 1784 escribió:

…yo sospeitaba con pro alazet que ditos portugueses tardarían en plegar-ie, y que por consecuenzia a mía demora en o Paraguai sería dilatada. No se m’eba dau instruzión ta iste causo y me veyié prezisau a meditar a eslezión de bel obcheto que ocupase a mía detenzión con utilidat. Pro, veyié que o que conveniba a la mía profesión y zircunstanzias yera acopiar elementos ta fer una buena carta u mapa, sin omitir o que podese ilustrar a cheografía fisica, a istoria natural d’as aus y cuadrupedos, y finalmén o que podese conduzir ta la perfeuta conoixenzia d’o país y os suyos abitadors.

Fuen

Cualques animals levan o suyo nombre, como iste. Sabrías indicar a qué imachen se corresponden?

Pijuí d’Azara
(Sinallaxys azarae)

Inseuto Alfaya de Fisher
(Conognatha azarae fisheri)

Marikiná d’Azara
(Aotus azarae)

Agutí d’Azara
(Dasyprocta azarae)

Ratón d’Azara
(Akodon azarae)

Soluzión: 1-y / 2-d / 3-a / 4-b / 5-c

Mira qué obras escribió Nicolás d’Azara relazionadas con as suyas espedizions por America d’o Sur, en qué luengas se publicoron y describe breumén o conteniu d’as mesmas.

Qué sabes d’atros naturalistas d’a epoca, como o conde de Buffon u Carlos Linneo?, cuáls estioron os suyos prenzipals logros?

A la suya tornada d’America Félix d’Azara acudió a París an yera destinau o suyo chirmán Nicolás como embaixador d’España. Ista estacha en a capital cultural d’a epoca le sirvió ta dar a conoixer a suya obra como naturalista, relazionar-se con atros zientificos d’o momento y poder publicar y esparzer os suyos estudios, tanto en castellán como en franzés y anglés. Son istas edizions as que posteriormén podió consultar y utilizó como libros de cabezera Charles Darwin.

Qué problemas tenió Darwin en publicar as suyas teorías sobre a evoluzión? Por qué? Uei toz son d’alcuerdo en que son correutas?

Has visto a zinta Master and Commander. Al otro lado del mundo? En ella s’alvierten as rivalidaz entre distintos países por controlar o sur d’America en o sieglo XVIII y a importanzia que se conzedeba a la investigazión d’a naturaleza en a epoca.

Zinta estadounidense de l’año 2003 enfilada por Peter Weir, interpretada por Russell Crowe y Paul Bettany. Basada en as novelas de Patrick U’Brian.

Argumento: entre as guerras napoleonicas a fragata britanica HMS Surprise, de 28 cañons, tiene ordens de seguir dica as costas de Brasil a o buque de guerra franzés Acheron, muito mayor, de 44 cañons y construyiu más rezienmén. De traza imprevista, a nau franzesa enriste a o Surprise, lo que causa considerables estricallos y baixas. Tot y que as suyas ordens no lo contemplaban, o capitán anglés emprende a persecuzión de l’Acheron bordiando o cabo de Fornos y navegando dica as islas Galapagos. Allí os dos buques s’enfrontinan de nuevas y os britanicos aduben a victoria usando una trapa, en camuflar a suya nau como si estase un buque ballenero, ta atacar por sorpresa a os franzeses. Ixa teunica copiaba o mimetismo observau por o capitán anglés en as islas Galapagos, en beluns d’os inseutos colezionaus por o medico d’a suya embarcazión, afizionau a la botanica.

Aragoneses ilustres, ilustrados e iluminados

Descarga dende iste enlaz o PDF d’a publicazión Aragoneses ilustres, ilustrados e iluminados, de Antón Castro y José Luis Cano, editada por o Gobierno de Aragón en 1993.

DIRECCIÓN GENERAL DE POLÍTICA LINGÜÍSTICA

Departamento de Educación, Cultura y Deporte

Parque Empresarial Dinamiza (Recinto Expo)
Avenida de Ranillas, 5D - 2ª planta
50018 Zaragoza
Tfno: 976 71 54 65