Raquel Meller
A diosa d’o eszenario
Tarazona (Zaragoza), 1888 – Barzelona, 1962
En concluyir en 1918 a Primera Guerra Mundial, que alleró Europa como nunca dinantes eba suzediu, y dimpués que una terrible pandemia, a clamada “gripe española”, sembrase de muerte tot o planeta, tanto en o Viello Continente como en Norteamérica s’inizió una etapa d’optimismo, de querer desfrutar d’a vida, os “alegres años vente”. Os mosicals, o teatro y o zine, agún muto, vivioron una edat dorada. Y en ixe ambién festivo surtioron nuevas estrelas d’o espeutaclo que cautivoron a millons d’espeutadors. Una d’as más zelebres d’a suya epoca, por a cuala se peliaban os produtors de cualsiquier país y a la cuala yeran disposaus a pagar sumas estraordinarias estió una mesacha naixida en Aragón de mui umil familia que sería conoixida mundialmén por o suyo nombre artistico, Raquel Meller.
Vida
Francisca Marqués López, Paca, naixió en 1888, en Tarazona. Allí, o suyo pai yera ferrero mientres a suya mai treballaba como botiguera en una botiga de comestibles. A mala salut d’a mai y o gran lumero de fillos d’o matrimonio, ueito, obligó a os suyos pais a dixar a Paca a cargo d’una tía moncha, con a cuala vivió en primeras en un convento de Tudela y, dimpués, en unatro de Montpellier, en Franzia. Pero como a zagala no querió seguir a vida relichiosa, cuan a suya tía estió destinada ta Filipinas en tornó con a suya familia, que s’eba instalau en Barzelona.
Ta levar bella mica de diners a casa, Paca conseguió treballo en un taller de custura. En ixe taller se confezionaban u s’apañaban os vestius de cualques populars artistas. Y a una d’ellas, Marta Oliver, que un día la sintió cantar, le cuacó cómo lo feba y la convenzió ta que prebase suerte sobre un eszenario. Con a suya aduya, debutó en 1907 como cantaire en un chicot teatro con un nombre más artistico que o de Paca, “La bella Raquel”, que poco dimpués cambió por o de “Raquel Meller”, pareixe estar que en memoria d’un fugaz amor alemán que tenió apellidau asinas. Y luego ixe nombre prenzipió a sonar con fuerza en as salas de fiesta de Barzelona.
Obra
Alentada por a buena acullida, albandonó a custura y s’adedicó plenamén a la canta. Prenió clases de canto, como tamién fería a suya chirmana Tina, y miró un nuevo repertorio que interpretar, cada vez más alexau d’as cantas picarescas y indecorosas d’os suyos inizios. Cuplés y tonadillas, con mosicas y letras apegadizas, pasoron a predominar en as suyas funzions, que s’anunziaban como cultas, morals y de buen gusto, por o que o suyo publico, agora de tot tipo, estió en aumento. Se presentó con esito en Madrit y salió de chira por tota España.
En 1911 siñó un fabuloso contrato con o teatro Arnau de Barzelona, con una soldata ya astronomica. A suya fama no dixaba de creixer. Compositors “serios”, de mosica clasica, le escribioron melodías. Se publicoron libros sobre ella y inteleutuals, escritors, pintors, escultors, aristocratas y dica o rei Alfonso XIII asistioron a las suyas funzions. Raquel Meller no teneba una gran voz, pero lo supliba con a suya espresividat y a suya traza de cantar. Como una autriz, interpretaba as cantas d’una forma teatral, las viviba, y d’ixa manera enluzernaba a o publico.
Artista mundial
Dimpués d’a Primera Guerra Mundial, presentó o suyo espeutaclo en París y en Londres. Y as ovazions estioron apoteosicas. Cuan salió a la venda o suyo disco El relicario, nomás que en a capital franzesa se vendioron más de 100.000 copias. Fazió chiras trunfals por tota Ispanoamerica. Y tamién por os Estaus Unius (Nueva York, Filadelfia, Chicago, Boston, Baltimore, Los Ángeles…), cantando perén en español. Y mesmo plegó a estar portalada d’a prestichiosa revista Time. No i eba alavez una artista más famosa.
O zine s’intresó por ella y, encara estando cantaire, rodó esitosas zintas mutas, tanto en España como en Franzia. Daba o mesmo que no se sentise a suya voz, pues con as suyas espresivas interpretazions asombraba a l’audienzia. A gran autriz britanica Sarah Bernhardt la emponderó en os diarios y o mitico Charles Chaplin, autor d’o personache de Charlot, fazió tot lo posible ta logar-la, a lo que Raquel Meller, que viviba una vida de fachenda, se negó. Tot y con ixo, Chaplin incluyiría a mosica d’una d’as suyas cantas, La violetera, como tema prenzipal d’a suya zinta Luces de la ciudad.
Con a plegada d’o zine sonoro, Raquel Meller rodó una nueva versión d’una antiga zinta muta suya, Violetas imperiales, que cuacó muito. Pero cuan yera rodando unatra, en 1936, s’inizió a Guerra Zivil y toz os suyos plans se vinioron abaixo. Dezaga d’a Guerra Zivil, dio comienzo a Segunda Guerra Mundial y, dimpués, a posguerra. O mundo d’o espeutaclo, como tot, quedó arruinau. Y cuan un tiempo dimpués encomenzó a recuperar-se as modas eban cambiau.
Raquel Meller, que ya no yera choven, se casó por segunda vez y s’instaló en Barzelona con os dos fillos que adotó. Tornó ta os eszenarios, pero os suyos tiempos de gloria eban pasau. Treballó cada vez menos, dica que finalmén se retiró. Cuan feneixió, en o verano de 1962, levaba tiempo “olbidada”. Manimenos, o suyo entierro estió moltetudinario. Asistió muitisma chen. Tota la prensa publicó a notizia y se multiplicoron os omenaches en memoria d’una muller, aragonesa, que nomás uns años dinantes eba estau una d’as cantaires y autrizes más aplaudidas en tot o mundo .
Referenzias
- Javier Barreiro (1992): Raquel Meller y su tiempo. Zaragoza: DGA.
- María Dolores Calvo Romero (2004): Raquel Meller, una mujer, una artista. Zaragoza: DPZ.
- Antón Castro (1993): “Raquel Meller, el alma del cuplé”, en Aragoneses ilustres, ilustrados e iluminados(186-191). Zaragoza: Gobierno de Aragón.
- Enrique Gómez Carrillo (2009): Raquel Meller. Madrid: Reino de Goneril.
- Diccionario Biográfico Español, Real Academia de Historia: https://dbe.rah.es/biografias/12541/francisca-marques-lopez
Autividaz didauticas
Raquel Meller y a España d’a suya epoca
Entre a infanzia y choventut de Raquel Meller, España y a resta d’o mundo vivioron una convulsa etapa politica y sozial, que amás conoixió una revoluzión teunolochica como nunca dinantes en a istoria eba suzediu. En os países más desarrollaus s’encomenzó a estender l’uso de novedosos inventos que cambiarían definitivamén os costumbres y as formas de vida: a eleutrizidat, l’augua corrién, o telefono, a radio, l’automobil, os avions… Tamién ixa etapa veyería a naixenzia d’atros fenomenos sozials, como os sports u o psicoanalisis.
Cronolochía d’a vida de l’artista y cronolochía d’os acontezimientos politicos y sozials en España, dende a naixenzia de Raquel Meller dica a suya epoca dorada.
|
1888 Raquel Meller naixe en Tarazona, Zaragoza. |
|
1888 Esposizión Universal de Barcelona. |
|
Dica 1900, educazión en Montpellier, con una tía moncha. |
|
1898 Esferra colonial. Perda de Cuba, Puerto Rico y Islas Filipinas. |
|
1908 Debut en un modesto music hall como cantaire de cuplé con o nombre d’a Bella Raquel. |
|
1909 Semana Trachica de Barcelona desencadenada por o ninvío de tropas ta Marruecos. |
|
1911 Primera fegura en o teatro Arnau de Barcelona, como Raquel Meller, gran esito. En 1912 a interpresa de discos Odeón la loga ta las suyas primeras gravazions. |
|
1912 Asasinato d’o presidén d’o gubierno José Canalejas. Se frenan as reformas politicas liberals ta rematar con o caziquismo y o frau eleutoral. |
|
1914 -1918 Desapegue d’a carrera de Raquel Meller. Autuazions por tot o país y gran lumero de gravazions. Enguera as suyas dos cantas más emblematicas, componidas por José Padilla: El relicario y La violetera. Se popularizaron en tot o mundo. |
|
1914 – 1918 Primera Guerra Mundial. España neutral. Consecuenzias economicas y sozials: aumento d’a produzión industrial española ta os países belicherans. Puyan os pres y no os salarios. Carestía d’os produtos de primera nezesidat. Revoltina y conflitos laborals. |
|
1919 – 1930 Primers trunfos en París y America. Esitos en o zine muto: Violetas imperiales y Carmen. |
|
1919 – 1930 Periodo de crisis economica y sozial en España. Esferra d’Annual en Marruecos. Ditadura de Primo de Rivera. Renaiximiento cultural en o primer terzio d’o sieglo XX. En literatura: Chenerazión d’o 27. En mosica: Isaac Albéniz, Enrique Granados, Joaquín Turina y Manuel de Falla. En pintura: Pablo Picasso, Salvador Dalí y Joan Miró. En zine: Luis Buñuel. |
Observa as dos columnas. Creyes que en a vida de l’artista recuten os feitos istoricos que se suzeden en o país? Por qué?
¿Qué ye o cuplé? Orichen y evoluzión
A meyaus d’o sieglo XIX, apareixe a revista mosical. Se trata d’una suzesión de lumers mosicals con un filo argumental común cual orichen se troba en Francia y os Estaus Unius. Dica alavez l’unico entretenimiento teatral con mosica yera a opera u a zarzuela.
Con o tiempo, entre ixos lumers mosicals trunforon os que teneban un conteniu trazero, con cantas de letras con doples sentius y artistas prozedens d’as clases baixas con sucheridors vestius que dixaban veyer parte d’o suyo cuerpo. Ta os más conservadors, suponeban una menaza ta os buens costumbres. Pero o suyo esito estió moltetudinario. O cuplé y a tonadilla protagonizoron a mosica popular en a primera metat d’o sieglo XX, con cantaires tan almiradas como La Fornarina, Tórtola Valencia, La Camelia, La Goya… Entre totas ellas va a acobaltar Raquel Meller, que evoluzionó ta una mena de canta diferén, “culta, moral y de buen gusto”, con argumentos dramaticos, que cuacaban a tot tipo de publicos.
Has escuitau bella vez bel cuplé? Investiga en internet qué mena de canta ye. Pregunta-les a os tuyos lolos u a bella persona mayor d’o tuyo entorno si conoixen o que se siente en os enlazes que tiens contino. O primer ye con a voz d’a propia Raquel Meller, remasterizada. O segundo, ye a mesma canta interpretada por una cantaire más moderna.
Qué te pareixe a letra? Refleixa a vida d’a epoca en que s’escribió. A España d’o suyo tiempo.
Creyes que podría tener esito uei en día? Razona a tuya respuesta. Se podría convertir en un rap? T’atrives a intentar-lo?
Una fama planetaria
Raquel Meller estió famosa en tot o mundo. Pintors, escritors, mosicaires y autors de toz os países alaboron as suyas autuazions mosicals y zinematograficas.
Leye belunas d’as creticas que se publicoron sobre ella:
Juan José de Soiza: A o prenzipio tos chela aquella chiquilina de bori. Tremolosa. Escolorita. Ullerosa. Tiene o rostro de virchen bizantina… Sale a eszena como si caminase por a carrera… empeza a cantar como si no cantase ta o publico. Canta ta ella mesma, con a mesma suavura con que conversa. Tos asombraz que ixa zagala tienga a obligazión d’entusiasmar-tos. Ista ye a zelebre, commovedora de publicos britanicos? No puede estar… Canta ta ella como si cantase sotto voce . Y a mida que canta tos intresa más ixa silueta de novela. Veyez que o suyo rostro se transforma sin corrucar-se. Fa a riseta sin ubrir a boca. S’esteriza d’espanto sin fer un zeño. Tos pareixe que chila y ye fablando en secreto. Plora y plora con glarimas… Qué ye ixo? A suya voz alavez s’estira, s’alarga, plega dica os zaguers rincons d’o teatro y trespasa o rezibidor sin que Raquel aiga dixau de cantar en voz baixa… Tos fa l’efeuto que tos canta a o sentito, confidenzialmén. Y ixe ye o secreto d’o suyo arte. Creyez sin rechistar que ixa mullereta escolorita, niervuda, de vestiu barato, que tos fabla d’as penas que sofre, d’as felizidaz que goza, de l’amor que deseya, ye allí en o teatro ta vusatros nomás.
Álvaro Retana: Qué espiritualidat en a suya aparizión desembolicando o cantable y, sobre tot, en fer mutis! Cruzaba por a eszena como una creatura d’ixas que nomás veyemos que en suenios, en una realidat esvaneixida como o fumo. A delicadeza con que s’embolicaba en un chal d’encaxe y a dolién ternura con que se retiraba lentamén! No i hai pluma ta describir a emozión que l’auditorio esperimentaba…
Sebatián Gasch: …trunfó en toz cantando en español. Garra atra artista ha ganau a suya fama. Dengún no fazió por España o que ha feito Raquel con solo dezir as suyas tonadillas. En o que va de sieglo garra atra ha lograu elevar a canta a o rigoroso d’arte, un arte feito de cosas chicotas y mui fundas, de misterio, y tamién de luminosidat. Raquel ha estau unica.
Percy Hammond: Poco importa comprender u no o español; a fuerza d’a esprisión ye tan tanchible y real que mantiene a tot l’auditorio enchizau.
Y beluns d’os comentarios que le adedicoron importans personalidaz:
Armando Palacio Valdés: Tiengo más d’una deuda contraita con Raquel Meller. En oras tristas de tedio y desencanto, cuan o mundo m’apareixeba desierto y vuedo, marché ta o teatro a veyer-la autuar sobre as tablas. A suya polideza singular, o suyo arte amable, felalo, sereno, o timbre anchelical d’a suya voz, a candida malizia d’os suyos zeños, refrescoron a mía alma; floreixió o goyo en o mío corazón y me reconzilié con a vida.
Cecil B. de Mille: Ye a mascareta d’a trachedia.
Sarah Bernhardt: Ye una artista de gran raza. Quiero fer constar publicamén a mía eterna gratitut por a ora inixuplidable que le debo.
Aldous Huxley: Ye a más refinada, a más notablemén aristocratica interprete que yo aiga visto nunca. Ye o parlache d’a pasión.
Sabes quí estioron Armando Palacio Valdés, Cecil B. de Mille, Sarah Bernhardt y Aldous Huxley? Mira informazión sobre as suyas vidas y a importanzia que tenioron en os suyos respeutivos ambitos.
Raquel Meller, estrela zinematografica
Resulta paradoxal que Raquel Meller, que adubió o suyo esito como cantaire, alcanzase a suya masima popularidat en a epoca como autriz de zine muto.
En os años 20 d’o sieglo pasau os discos teneban una difusión reduzida y a radio eba plegau en poquez fogars. Manimenos, millons de personas s’agolpaban en as salas de zine ta contemplar os mutos rostros d’as grans estrelas d’o zeluloide: Rodolfo Valentino, Gloria Swanson…
Iste fenomeno no yera nuevo. Os almiradors y fans ya esistiban en o teatro, a opera y os espeutaclos de variedaz. A espresividat con que acompañaba as suyas autuazions en o eszenario fazilitó a Raquel Meller o suyo trunfo como autriz. Interpretaba as cantas d’una traza teatral, las viviba. Y igual que enluzernaba en os teatros faszinaba en a gran pantalla, pero con una repercusión muito mayor.
Investiga cuals estioron as suyas prenzipals zintas, dó las filmó y o esito que tenioron. Plegó a protagonizar bella zinta sonora?
Visualiza fragmentos d’istas zintas y comenta qué te pareixe como autriz.
Raquel Meller, en convertir-se tamién en una estrela d’o zine, plegó a estar una autentica “celebritie” d’a epoca. Ella mesma controlaba a suya imachen y tot o que quereba que salise en a prensa y o que no.
A voz gravada
En zaguers d’o sieglo XIX encomenzan os primers esperimentos ta conseguir a gravazión d’o son y a suya posterior reproduzión. Os primers sistemas yeran mecanicos, como o fonografo y o gramofono.
Mira informazión sobre istos inventos Cuán s’inventoron? Quí los inventoron? Cómo yera o suyo funzionamiento?
Entre 1920 y 1925 se ficó l’uso d’a eleutrizidat ta gravar y reproduzir os sons –que reemplazó por completo a o rechistro mecanico– y s’incorpororon os tres componens basicos d’o sistema moderno: O microfono, que replega o siñal sonoro y lo convierte en impulsos eleutricos. L’amplificador, que aumenta a potenzia d’o siñal eleutrico prozedén d’o microfono. Y l’altavoz, que rezibe o siñal eleutrico de l’amplificador y lo transforma de nuevo en ondas sonoras.
Raquel Meller encomenzó a gravar as suyas cantas en 1912 con o sistema mecanico, agún sin utilizar microfonos, fren a unas grans bozinas que replegaban os sons y los transmitiban a una cambra contigua, an quedaban gravaus en zilindros de zera, que posteriormén se transferiban a discos feitos de pasta. Raquel Meller gravó más de 200 titols con iste prozedimiento. Más tarde gravaría de nuevo beluns d’os suyos titols más populars con o sistema eleutrico.
Creyes que a evoluzión en os sistemas de gravazión podió afavorir a carrera artistica de Raquel Meller? Esplica por qué.
A calidat de reproduzión d’a mosica d’alavez, tiene bella cosa que veyer con l’autual, con DVDs, Spotify, mobils, rez sozials, etz.?
A suya baixada y o suyo legau
Entre a suya larga carrera artistica Raquel Meller contribuyió con incontables instituzions beneficas en España, Franzia, Belchica, Reino Uniu, Estaus Unius y atros países. Entre as suyas posesions más quiestas alzaba dedicatorias siñadas por os reis d’España, Anglaterra y Suezia, por os presidens de Franzia, Archentina, Estaus Unius, etz., antiparte d’as bendizions apostolicas d’os Papas Pío XI y Pío XII y muitas atras reconoixenzias que se le atorgoron a traviés d’os años por a suya labor filantropica.
Manimenos, dimpués d’a Guerra Zivil y a Segunda Guerra Mundial os espeutaclos y zintas de Raquel Meller estioron perdendo l’atenzión d’o gran publico. O puesto privilechiau que eba manteniu entre tanto tiempo agora lo compartiban nuevas estrelas d’a canta, entre ellas Imperio Argentina, Estrellita Castro y Concha Piquer. Un nuevo chenero mosical clamau copla s’eba establiu fuertemén en España en o gusto popular. A bonico Raquel estió desaparexida d’a vida publica y luego tanto o cuplé como ella estioron consideraus anacronicos.
Plegó a gravar más de cuatrezientos temas, entre os cuals El relicario y La violetera se fazioron universals. Rodó zintas numbrosas en meyo mundo, en espezial en Franzia y España, entre as cualas s’acobaltan:
Los arlequines de seda y oro (Ricardo de Baños, 1919), refundiu más tarde baixo o títol de La gitana blanca.
Rosa de Flandes (Henry Roussell, 1922).
Violetas imperiales (Henry Roussell, 1923).
La tierra prometida (Henry Roussell, 1924).
Ronda de noche (Marcel Silver, 1925).
Nocturno (Marcel Silver, 1926).
Carmen (Jacques Feyder, 1926).
La venenosa (Roger Lion, 1928).
Tarde de Corpus, La mujer del torero, Flor del mal y El noi de la mare (1930), ta la estadounidense Fox Movietone.
Violetas imperiales (Henry Roussell, 1932), versión sonora.
Lola Triana (inacabada, 1936).
Estió almirada por inteleutuals y artistas y sirvió de modelo a los más afamaus pintors españols d’a suya epoca, como Romero de Torres y Joaquín Sorolla.
Retrato de Raquel Meller, por Joaquín Sorolla
Mira informazión sobre una d’as cantaires españolas autuals más populars en tot o mundo: Rosalía. Fe un breu resumen d’a suya carrera profesional y comenta cómo se promoziona. Creyes que tiene a popularidat que tenió Raquel Meller en o suyo momento, más u menos? Piensas que con os meyos que i eba en os primers años d’o sieglo XX ta promozionar-se abría alcanzau a mesma repercusión que tienen uei en día?
Aragoneses ilustres, ilustrados e iluminados
Descarga dende iste enlaz o PDF d’a publicazión Aragoneses ilustres, ilustrados e iluminados, de Antón Castro y José Luis Cano, editada por o Gobierno de Aragón en 1993.
DIRECCIÓN GENERAL DE POLÍTICA LINGÜÍSTICA
Departamento de Educación, Cultura y Deporte
Parque Empresarial Dinamiza (Recinto Expo)
Avenida de Ranillas, 5D - 2ª planta
50018 Zaragoza
Tfno: 976 71 54 65
Colabora:
