Pablo Serrano
A umanidat en o suyo sentiu más fundo
Crivillén, 1908 – Madrit, 1985
Fillo d’albeitar, Pablo Serrano Aguilar s’inizió en a escultura en o taller zaragozano de José Bueno y remató de formar-se en talla y modelau en as Escuelas Salesianas de Sarriá en Barzelona. Con formazión academica y ventiún años marchó ta Sudamerica. S’instaló en primeras en Archentina y, dende 1935, en Montevideo. En a capital uruguaya desfrutó d’una esplendida reconoixenzia profesional. Le plevioron encargos en obra publica en o Cono Sur, pero tamién en Mexico u Puerto Rico, acobaltando imachinería relichiosa y piezas monimentals en un estilo academico dende o cual evoluzionará ta formulas más espresionistas y innovaderas. Influyiu por os artistas Lucio Fontana y Joaquín Torres-García s’amanará a las avanguardias europeas, a o cubismo y l’abstrazión.
Vida
Cuan dezide tornar ta España, Serrano s’eba ganau una reputazión d’escultor más que solvén: ganador tres vezes d’o primer premio en o Salón de Bellas Artes de Montevideo, en ixa ziudat s’eba vinculau a o grupo renovador Paul Cézanne, eba trunfau con a suya serie Los toros (con influenzia de Brancusi). Y ixe mesmo año, 1955, ganaba os primers premios en a Bienal de Montevideo (que le permitió azeder a una beca de formazión en l’estranchero) y en a Bienal Hispanoamericana de Barzelona. Dezaga de viachear por Europa y estudiar en París a obra d’o gran Julio González (que le influyiría enormemén en a suya serie Ritmos en el espacio), s’instaló en Madrit en 1957 chunto a la suya muller, a pintora alicantina Juana Francés.
Ixe mesmo año funda o Grupo El Paso con Juana, con os pintors Antonio Saura, Manolo Millares, Rafael Canogar y Luis Feito y con o escultor Martín Chirino. El Paso suposó a dentrada de l’abstrazión en España, reavivando un triste panorama artistico a traviés de l’avanguardia que, con a guerra y a ditadura, eba quedau solapada. O suyo manifiesto deziba: “Creyemos que o nuestro arte no será valiu entre que no contienga una azogue coinzidén con os siñals d’a epoca, realizando una apasionada presa de contauto con as más renovaderas corriens artisticas. Imos ta una plastica revoluzionaria –en a cuala sigan presens a nuestra tradizión dramatica y a nuestra dreita esprisión– que responda istoricamén a una autividat universal”.
Obra
En a suya serie Ordinación del caos, dotando d’ingravidez y espresividat a un muntón de fierros, chapas, claus, enruenas… Serrano s’amostraba fidel a ixos prenzipios, pero albandonó o grupo por razons chenerazionals (quitaba vente años a os chovens de El Paso) y ta ir más a o suyo aire: esponió os suyos retratos (más bien interpretazions espresionistas y metafisicas) de personaches como Goya, Machado u Picasso, reinventó a tradizión d’a forcha d’o suyo almirau Julio González en Hierros encontrados y soldados, se zentró en a representazión d’o vuedo y d’o silenzio a partir de l’ausenzia de volumen (os filamentos d’azero en Ritmos en el espacio), y reflexó a destruzión y o renaiximiento por o fuego en as piezas de Quema del objeto.
Reconoxiu
Espone de traza regular en Madrit, pero tamién en París, Charleroi, Milán, Berlín, Nueva York, Londres y Roma. En o dezenio de 1960 a suya fama creixe. A idea cosmica y acullidora que transmite a suya serie Bóvedas para el hombre (que continaría en os suyos Hombres-bóveda) a traviés d’o bronze en diversas modulazions y testuras… trunfa en a Bienal de Venecia de 1962. Dos años más tarde, contrarrestaba dende l’arte a propaganda ofizial d’o franquismo y os suyos “25 años de paz” a traviés d’os suyos fajaditos(representazions de sers amordazaus y ligaus). En o Guggenheim de Nueva York amuestra a suya serie Hombres con puerta (1967) mientres a suya fama creixe y se suzeden por tot o mundo os encargos monimentals y as esposizions: a ziudaz an ya ye reconoxiu se sumarán Amberes, Zúrich, Lisboa… y l’Hermitage de Leningrado (autual San Petersburgo), que en 1982 ubrirá as suyas puertas por primera vez a un artista español ta una esposizión individual. En ixe mesmo año, rezibió o Premio Prinzipe d’Asturias d’as Artes.
A produzión de Serrano, treballador infatigable, s’escuelga ta lo figurativo en os suyos retratos espresionistas, no escudía lo monimental, y da paso en os suyos zaguers años a nuevas series cargadas de significau: as Unidades-yunta y El pan reflexan o pensamiento de l’artista d’orichen labrador ta qui, en una zierta tornada ta ixos orichens, deziba que “o labrador y o fornero son os primers escultors d’o mundo”. En l’agüerro de 1985, o Guggenheim de Nueva York amostró a suya serie Divertimentos con Picasso, la guitarra y el cubismo. Mui poco dimpués, moriba en Madrit l’ombre que, entre os d’o suyo tiempo, millor sabió esplorar o vuedo escultorico.
Reconoxiu en a suya tierra d’orichen (an realizó muitas obras), dotor honoris causa por a Universidat de Zaragoza, o Gubierno d’Aragón le conzedió o títol postumo a Medalla Juan de Lanuza en 1986.
Referenzias
- Antón Castro (1993): “Pablo Serrano, el hombre y sus brasas”, en Aragoneses ilustres, ilustrados e iluminados (224-229). Zaragoza, Gobierno de Aragón.
- L. Grau Tello, R. López Bielsa, C. Alquézar Villarroya (2009): Pablo Serrano, el escultor de Crivillén. Andorra, CELAN.
- Gran Enciclopedia Aragonesa on line: http://www.enciclopedia-aragonesa.com/voz.asp?voz_id=11707
- Diccionario Biográfico Español (Real Academia de la Historia): https://dbe.rah.es/biografias/8153/pablo-serrano-aguilar
- Web del Instituto Aragonés de Arte y Cultura Contemporáneos “Pablo Serrano”: http://www.iaacc.es/index.php
Autividaz didauticas
L’artista de Crivillén
Pablo Serrano marchó muito choven d’o suyo lugar ta fer-se escultor y, más tarde, l’alongada estanzia en Sudamerica retardó a retrobada con os suyos orichens dica una edat matura. Pero a partir d’alavez (a zaguers de o dezenio de 1950), l’artista querió recuperar o tiempo tresbatiu. A suya obra pareixe resumir ixa busca d’identidat.
O chicot lugar de Crivillén, en pleno Parque Cultural d’o Maestrazgo, poseye un Centro de Arte Contemporaneo adedicau a Pablo Serrano, que esparde apeutos d’a suya vida y obra y aculle diferens esposizions.
Amás d’a informazión replegada astí, esplora en internet sobre ixe zentro d’arte.
Mayestros y influenzias
Artistas que le marcoron, que le mostroron, que le ubrioron camins… Rechira un poquet sobre istos nombres que s’esgranan en a biografía, de traza más acusada en a epoca anterior a la suya tornada ta España. Relaziona cadagún d’els con o suyo puesto y calendata de naixenzia.
- José Bueno a) Montevideo (Uruguay), 1874
- Lucio Fontana b) Rosario (Argentina), 1899
- Joaquín Torres García c) Barcelona, 1876
- Julio González d) Hobita (Rumanía), 1876
- Constantin Brancusi e) Zaragoza, 1884
Soluzions: 1-e, 2-b, 3-a, 4-c, 5-d
Con Pablo Serrano por a carrera
Amás d’a obra presén en o suyo Museu, bi ha pro obra publica de Pablo Serrano en Aragón. Y no nomás que en Zaragoza… Uesca, Teruel, Alcañiz, Daroca, Exeya, Figueruelas y A Puebla de Albortón luzen en as suyas carreras y plazas cualques d’as creyazions d’o chenio de Crivillén.
Siñala o títol y localizazión d’istas obras de Pablo Serrano.
Soluzions:
-
Homenaje a Joaquín Rodrigo. Zaragoza (entrada d’o Museo Pablo Serrano)
-
Figueruelas
-
Mariano Navarro Rubio. Daroca
-
José Gervasio Artigas. La Puebla de Albortón
-
Ángel Custodio. Zaragoza, puerta d’o Conzello
-
San Valero. Zaragoza, puerta d’o Conzello
-
Monumento a la labradora turolense. Alcañiz
-
José Sinués. Zaragoza, dezaga d’o Teatro Prinzipal
-
Unidad yunta. Exeya
-
Santiago Ramón y Cajal. Uesca, plaza d’a Universidat
-
Guitarra, 3. Zaragoza, plaza d’a Ziudadanía
-
A Fleming. Alcañiz
-
Quema del objeto. Alcañiz (dentrada de l’Espital)
-
Venida de la Virgen. Zaragoza, frontera d’a basilica d’o Pilar
Atros aragoneses en avanguardia
Atros dos artistas aragoneses compartioron con Pablo Serrano azogues avanguardistas a traviés d’o Grupo El Paso. Igual como o escultor de Crivillén, os dos alcanzoron altas cotas de popularidat y un prestichio internazional que se mantenió dezaga d’a suya muerte.
Antonio Saura naixió en …(1)… en 1930 y murió en …(2)… en 1998. Dezaga d’una primera influenzia d’o …(3)…, se sintió atraito por atras avanguardias como l’informalismo europeu y l’espresionismo abstrauto estadounidense. Seguidor d’as obras de …(4)… y Goya, tamién estió …(5)… d’edizions literarias.
Manuel Viola naixió en …(6)… en 1916 y murió en San Lorién d’o Escorial en …(7)…. Esiliau en Franzia dezaga d’a …(8)…, tornó ta España en 1949. O suyo …(9)… abstrauto amuestra una preocupazión inizial por o …(10)… que a bonico va dando paso a blancos y negros.
(a) surrealismo – (b) Zaragoza – (c) espresionismo – (d) Velázquez – (y) Uesca – (f) color – (g) ilustrador – (h) guerra zivil – (i) Cuenca – (j) 1987
Soluzions: 1-e, 2-i, 3-a, 4-d, 5-g, 6-b, 7-j, 8-h, 9-c, 10-f
Zinco series de Pablo Serrano
A obra de Pablo Serrano reflesiona sobre a luz y sobre o espazio , pero a o estetico s’une a suya funda preocupazión por o ser umán. Arrulla sobre él una uellada profunda, mirando dotar-le d’una traszendenzia universal. En as suyas series escultoricas, l’artista aragonés mira armar un discurso, dar esplicazión y sentiu a os anelos y a las asperanzas de libertat.
Identifica cadaguna d’istas imachens con a serie a la cuala perteneixen.
1.
2.
3.
4.
5.
a) El pan b) Ritmos en el espacio c) Fajaditos d) Hombres-bóveda e) Ordenación del caos
Soluzions: 1-c, 2-a, 3-e, 4-b, 5-d
Cuala d’istas zinco obras te cuaca más? Por qué? T’inspira, te suchiere bella cosa? De qué material ye feita a obra? Seguramén podrías responder millor si veyeses istas obras in situ. Talmén no siga tan difizil.
O legau de Pablo Serrano
De l’artista perdura a suya obra, como un legau que se proyeuta ta o fesdevenidero. Dende a muerte de Pablo Serrano, s’ha seguiu esibindo obra suya en esposizions en Estrasburgo, Roma, Buenos Aires, Brasilia, Santiago de Chile, Rabat, Valenzia, Madrit, Barzelona… Y poseyen obras suyas o Museu d’Arte Moderno (MoMA) y o Guggenheim en Nueva York, l’Hermitage de San Petersburgo , o Zentro Georges Pompidou y o Museu d’Arte Contemporanio de París, a Fundazión Gulbenkian de Lisboa, o Museu Middelheim d’Amberes, a colezión Gaudifond Arte (Barcelona), os Museus Vaticans en Roma, o Reina Sofía de Madrit…
Pero o más importán ye en Aragón. Os ereus confirmoron a donazión de l’artista a l Gubierno d’Aragón, que creó con ixe fondo a colezión d’o Museu Pablo Serrano. Con o paso d’o tiempo, y dezaga d’una serie de proyeutos… en 2011 s’inauguró en Zaragoza l’Instituto Aragonés de Arte y Cultura Contemporaneos Pablo Serrano sobre l’antiga fabrica y tallers d’o Espizio de Zaragoza.
Amás de contener esposizions permanens d’obras de Pablo Serrano y Juana Franzés, se programan diferens esposizions temporals y atras autividaz culturals. Se mira asinas complir a visión que Serrano teneba d’o museu como puesto dende o cual “amanar as obras a o lugar y alentar a creyazión artistica”.
Ye posible programar una vesita y, a partir d’astí… Talmén dende l’aula, talmén en familia… as opzions son muitas.
Aragoneses ilustres, ilustrados e iluminados
Descarga dende iste enlaz o PDF d’a publicazión Aragoneses ilustres, ilustrados e iluminados, de Antón Castro y José Luis Cano, editada por o Gobierno de Aragón en 1993.
DIRECCIÓN GENERAL DE POLÍTICA LINGÜÍSTICA
Departamento de Educación, Cultura y Deporte
Parque Empresarial Dinamiza (Recinto Expo)
Avenida de Ranillas, 5D - 2ª planta
50018 Zaragoza
Tfno: 976 71 54 65
Colabora:
