Miguel Servet
Martir d’a libertat de conzenzia
Villanueva de Sixena, 1511 – Chinebra, 1553
Fillo d’o notario Antón Serveto, de familia infanzona, Miguel amostró dende nino taliento y aplicazión ta las letras: aprendió latín, griego y ebreu en l’abadía de Montearagón y más tarde estudiaría Dreito y Teolochía en Tolosa. Clamau por o suyo parién Juan de Quintana, que plegaría a estar confesor de Carlos I, le acompañó como pache y secretario por Alemania y Italia. En 1530 presenzió a coronazión d’o rei Carlos como emperador en Bolonia: tanta ostentazión le pareixeba indigna de l’autentico esprito cristiano. Tamién estió con Quintana en ziudaz como Granada y Valladolid (an asistió a prozesos d’a Inquisizión) y acudió ta la Dieta d’Augsburgo, an podió comprebar a imposibilidat d’entendimiento entre o catolizismo y o luteranismo.
Vida
A Reforma pregonada por seutors d’o clero yera ya una mecha enchegada en Europa. Serveto se sentiba prosimo a las propuestas moderadas d’Erasmo de Roterdam. Eba conoixiu a reformistas en Tolosa: le intresaban as suyas ideas, pero no comulgaba con ellas, plantiando-se interrogans, cuestionando muitas cosas y sin de creyer-se pon d’o tot. Con tasamén vente años viachea por ziudaz de zentroeuropa, conoixe a os reformistas Ecolampadio en Basilea y Bucero en Estrasburgo y convenze a un impresor ta publicar o suyo tratau de teolochía Siete libros de los errores sobre la Trinidad. O libro esliga as iras de protestans y de catolicos. Dende España, a Inquisizión preba de que s’entregue ta estar chuzgau. L’aragonés no nomás no se retracta, sino que en Dialogos sobre la Trinidad y sobre la justicia en o reino de Cristo se refirma en as suyas tesis: reconoixe a un Dios unico, pero niega o dogma d’a Trinidat (Pai, Fillo y Esprito Santo), d’o que no veye referenzias en a Biblia, y mantiene que Jesús, o fillo de Dios, ye umano, un intermediario ta que l’ombre conoixca a Dios.
Dezaga de conoixer a o reformista Juan Calvino en París, con qui mui luego chocará, cambia de nombre y, como Michel de Villeneuve, s’instala en Lyon an treballa como correutor de prebas en una imprenta. Alquirió conoixenzias sobre Medizina, Filosofía y se ganó prestichio con reedizions como a Cheografía de Ptolomeo. Estudeya Medizina en París, an aprende anatomía con Vesalio, prautica disezions y escribe sobre charopes.
En a capital franzesa imparte clases sobre Cheografía, Astronomía y Astrolochía. Heterodoxo ta toz, o suyo Discurso en pro de la astrología esliga nuevas iras (o suyo libro ye cremau), viachea a Montpellier ta amplar estudios y reprene a suya relazión con os impresors de Lion; ta els edita y correx libros zientificos y biblias. Exerze como medico en Charlieu y, dende 1540, en Vienne d’o Delfinau. Astí se naturaliza como franzés.
Vive tranquilo en Vienne, pero no zesa en os suyos proyeutos. Calvino, que ya ye chefe politico y relichioso en Chinebra, le manda o suyo libro Institución cristiana, y l’aragonés le’n torna pleno de tachaduras y anotazions, de conchunta con una copia d’o suyo libro Restitución del cristianismo (editau en secreto con as inizials MSV), que remata d’enemistar-le con o lider reformista. En ixa obra, Servet insiste en as suyas teorías cuentra o dogma d’a Trinidat, esplica que tot o que esiste en o mundo emana direutamén de Dios, considera que l’ombre ye incapaz de pecar dica os vente años y que os sacramentos (tan solo bautismo y eucaristía son impreszindibles) han d’alministrar-se a partir d’ixa edat. Propone suprimir a burocrazia y a cherarquía en a Ilesia, con un contauto más dreito d’o creyén con Dios.
Obra
A obra de Servet ye un canto a la toleranzia relichiosa. Comparte argumentos con diferens fazions protestans, pero ye visto con desconfianza (y mesmo con ostilidat) por muitos d’os suyos liders. En a Restitución del cristianismo describe a zirculazión menor u pulmonar d’a sangre. Ta Servet, l’alma reside en a sangre y en pasar por os libianos ye revitalizada por o esprito de Dios, que ye en l’aire.
Tot isto yera un escandalera ta muitos. As ideas esposadas por Servet en a suya obra zima van a estar condenadas, os suyos eixemplars serán incautados y destruyius. As incognitas sobre l’autoría anonima serán luego esclarexidas a causa de l’eixemplar inviau tiempo dezaga a Calvino.
Servet estió apresau en Vienne, pero conseguió escapar. Sentenziau a muerte, se cremó en ixa ziudat un monigote representando-le chunto a os suyos libros. Dimpués de cuatre meses en paradero esconoxiu, se le reconoixió en Chinebra y estió delatau a Calvino. Chuzgau por ereche en un prozeso irregular, un trebunal le condenó a morir en a xera. O 27 d’outubre de 1553, en o barrio chinebrino de Champel, cremó a fuego lento, entre enormes sofrimientos, un d’os paladins d’a libertat de conzenzia.
Referenzias
- Obras Completas, en seis volúmenes, editadas por Ángel Alcalá, entre 2003 y 2006 por Prensas Universitarias de Zaragoza.
- José Luis Cano (2002): Miguel Servet y el doctor de Villeneuve. Zaragoza: Xordica.
- Antón Castro (1993): “Miguel Servet o la transparencia del mal”, en Aragoneses ilustres, ilustrados e iluminados (66-71). Zaragoza: Gobierno de Aragón.
- Gran Enciclopedia Aragonesa on line: http://www.enciclopedia-aragonesa.com/monograficos/biografias/miguel_servet/default.asp
- Podcast del programa “Acontece que no es poco”, de Nieves Concostrina en la SER dedicado a Servet.
Autividaz didauticas
O tiempo de Servet
A Miguel Servet le pertocó vivir una epoca de grans cambios. En a primera metat d’o sieglo XVI se consolidoron tendenzias esbozadas en sieglos anteriors, que pilotarán o paso d’a Edat Meya enta la Edat Moderna.
Mira istas definizions: Umanismo – Renaiximiento – antropozentrismo.
L’Umanismo, ligau a o Renaiximiento como movimiento cultural y artistico, supera os plantiamientos d’a escolastica meyeval: l’ombre pasa agora a estar o zentro.
O feudalismo da paso a la formazión de poders fuertes y zentralizaus y os reis s’imposan a os siñors: más bien los meten a o suyo servizio. A monarquía autoritaria se cheneraliza como conzepzión d’o poder, y tiene en a Ilesia un firme aliau.
Tot y con ixa considerazión que Dios ya no ye en o zentro de tot, contina abendo una alianza dezisiva entre l’autoridat politica y o poder relichioso. Mesmo anque a vezes dentren en competenzia, toz dos poders son consziens que s’amenestan mutuamén.
Amás d’a perspeutiva global construyida grazias a o contauto con un nuevo mundo a l’atro costau de l’Atlántico, o campo d’as mentalidaz tenió un gran estimulo con a invenzión d’a imprenta. O fluxo de conoixenzias y l’intercambio d’ideas alquirioron mayor velozidat y plegoron ta más chen. Ixe mayor azeso a la cultura motivó que muitos dogmas estasen cuestionaus y, con els, cualques instanzias de poder.
Dende o norte d’Europa plegan corriens de pensamiento relichioso que se replanteyan cualques d’as doctrinas d’o catolizismo. Sin plegar a enfrontinar-se a ellas, Erasmo de Roterdam promueve una relichiosidat alexada de zeremonias, personal, basada en a senzillez d’os orichens, fidel a las escrituras. Erasmo estió mui influyén… no nomás en Servet. En o reino d’Aragón (que ya eba teniu contauto con l’umanismo italián), muitos zientificos y pensadors se sentirán atraitos por as suyas ideas.
En ella puedes leyer breus biografías de Juan Sobrarias, Gaspar Lax, Pedro Sánchez Ciruelo, Fernando de la Encina, Miguel Mezquita y Miguel Donlope. En qué disziplinas destacoron? Qué consecuenzias tenió en as suyas vidas o mantener opinions a la marguin de l’ofizial y autorizau? Indaga un poquet más en a vida de belún d’els, o que te pete.
Erasmo ubrirá un d’as canals por os cuals o flaire alemán Martín Lutero y atros, como Juan Calvino (enemigo declarau, y de qué traza, d’o nuestro protagonista), zircularán con mayor estrapaluzio.
A Reforma protestán. Un asunto relichioso… y politico
En 1517, l’agustino Martín Lutero clavó en a puerta d’a ilesia de Wittenberg (en cuala Universidat mostraba Teolochía) unas fuellas con as clamadas “novanta y zinco tesis”, en as cualas cuestionaba prauticas exerzidas por a Ilesia, denunziaba a fachenda y a corrupzión d’a suya cherarquía, meteba en duda muitos dogmas, y convidaba a o debate.
Zita as prenzipals ideas que refleixaba Lutero en as suyas tesis.
Lutero s’oposa a o poder d’o Papa y a o suyo monopolio en a interpretazión d’a Biblia. Reclama la reforma d’a curia, a supresión d’o zelibato y d’os sacramentos (fueras d’o Bautismo y a Eucaristía).
O documento tenió una ampla difusión grazias a las teunicas d’imprenta y distribuzión. A Ilesia catolica, abituada dende sieglos dezaga a partizipar en o poder temporal y a alministrar influenzia, encaxó mui malamén ixa ronca que, realmén, afeutaba tamién a os poders politicos vichens.
Muitos prinzipes alemans aproveitoron a situazión ta oponer-se a l’emperador. Ixa dignidat yera en manos de Carlos, titular por erenzio d’a monarquía ispanica y de l’Imperio alemán. Os intentos por amanar posturas (como a Dieta d’Augsburgo) fracasoron y muitos pensadors (o propio Servet, como emos visto) se veyioron atraitos por a Reforma. Pero muitos d’els (Calvino y atros) tamién van a cayer en o dogmatismo y en a creyenzia de que nomás que a els asiste a razón.
Europa se va a veyer entre dezenios embolicada en guerras de relichión. En 1555, a Paz d’Augsburgo dixó fixau que cada prinzipe alemán podría triar a suya propia relichión, que sería la d’os suyos subditos.
A respuesta teolochica a la Reforma vino d’a propia Ilesia catolica: o conzilio de Trento (1545-1563) m iró d’aclarir puntos doctrinals y organizativos, correxir abusos y millorar a formazión y cudiau d’a moral d’os cleigos. Pero fracasó a la ora de tender puens con os reformistas: de Trento surtirá a Contrarreforma, a Ilesia s’enzarra más en ella mesma y se potenzian mecanismos represivos como o Trebunal d’a Inquisizión.
A coronazión de l’emperador Carlos
Como s’ha dito, o choven Serveto quedó impautau (negativamén) por a fateza y boato que rodioron a la coronazión de l’emperador Carlos en Bolonia, con a sumisión d’una Ilesia a la cuala veyeba mui alexada de l’autentico esprito cristiano.
Ixe feito tenió una manifestazión artistica mui notable en un puesto que mereixe a pena estar visitau: Tarazona. A suya casa consistorial, un magnifico palazio renazentista construyiu a meyaus d’o sieglo XVI, amuestra un friso que represienta ixe acontezimiento.
Puedes beyer a foto y fer-te idea d’a grandeza que pretendeba transmitir, anque si puedes veyer-lo en vivo, muito millor. Ixa ziudat aragonesa y o suyo entorno, en as zercanías d’o Moncayo, tienen muitas cosas que veyer.
Os equivocos sobre o suyo orichen
Agún i hai bella biografía de Miguel Servet en a cual se sitúa a suya naixenzia en Tudela (Nabarra), y tamién se calenda o mesmo en 1509. Pero no: Miguel Serveto Conesa naixió en Villanueva de Sixena en 1511. Os equivocos obedexen a que él mesmo se veyió obligau a chugar a o espiguarde en a suya azarosa vida, s’ocultaba baixo pseudonimos y acronimos en l’autoría de testos polemicos que podeban causar-le problemas, impostaba nombres y ficaba datos falsos en os prozesos chudizials… Asinas, trobamos referenzias como Michael Servetus, Michael Villanovanus, Michel de Villeneuve u M.S.V.
O que tamién fazió estió eliminar a “o” final d’o suyo apellito (Serveto, puesto d’a val de Chistau d’an prozedeba a suya familia). Entre un tiempo tamién se pensó que ixe chuego d’identidaz amagatas obedexeba a un orichen chudeoconverso que consideraba oportuno amagar, pero no pareixe estar o causo, tot y que a suya rama materna sí que teneba vinclos con o linache d’os Zaporta.
Unatra visita impreszindible: Villanueva de Sixena. A localidat an naixió Miguel Servet conta dintro d’o suyo patrimonio con un Monesterio que ha travesau enormes vizisituz y que uei día mereixe a pena estar visitau. Pro, a casa natal d’o nuestro protagonista, que ye seu de l’Instituto de Estudios Sijenenses Miguel Servet:
A zirculazión pulmonar d’a sangre,
Servet, engalzau dica dimpués de muerto
Miguel Servet ha pasau ta la Istoria por bella cosa que, en realidat, estió secundario dintro d’a suya obra y o suyo pensamiento. Talmén por ixo pasó desaperzibiu entre sieglos. En o libro V d’a Restitución del Cristianismo describe a zirculazión menor u pulmonar d’a sangre: ista ye empentada dende o corazón ta os libianos (a traviés d’as arterias pulmonars), an ye oxichenada y tornada por as venas ta o corazón; dende astí ye distribuyida a totas as partes d’o cuerpo ta tornar una vez que ha baixau a conzentrazión d’oxicheno y reiniziar o ziclo.
Puede resultar estraño que en un tratau de Teolochía se describa un prozeso anatomico. Seguntes a Biblia, l’alma se troba en a sangre, inyeutada por Dios a traviés d’a respirazión. Servet creye que ta entender l’alma umana cal conoixer dinantes o funzionamiento d’a zirculazión sanguínea por o cuerpo.
En o sieglo XIII, o medico echipzio Ibn an-Nafis eba abanzau ixa teoría. I hai constanzia que o suyo manuscrito, olbidau entre sieglos, yera en Venezia en 1521, y bien podió aber estau conoixiu bella cosa más tarde por Servet. Iste, en fin, fuo o primer en describir ixe prozeso en Ozidén. Con ixo y con tot, o merito s’atribuyiría más tarde a l’anglés William Harvey, qui eba feito a mesma descripzión en 1616 (cuantos dezenios dimpués d’a muerte de Servet). Sería o filosofo y matematico alemán Gottfried Leibniz (un d’os grans pensadors razionalistas d’o sieglo XVII) qui recuperaría a memoria de l’aragonés. Un Servet a o que, mesmo dimpués de muerto, acazó l’aire d’ombre maldito y clandestino.
Dezaga d’a suya muerte, as autoridaz calvinistas, os inquisidors catolicos y protestans, en Franzia, en Alemania… preboron de destruyir tota la obra de Servet. En cualques redols clandestinos (Basilea en Suiza, Padua en Italia…) se miró de preservar o suyo legau. Nomás que tres orichinals d’a Restitución del Cristianismo (d’os ueitozientos que s’imprentoron) son plegaus ta os nuestros días. Os ilustraus d’o sieglo XVIII, con Voltaire a la cabeza, le reivindicoron como paladín d’a libertat de conzenzia.
Servet uei
Miguel Servet responde a o perfil de l’autentico umanista, intresau en multiples sabers y conoixenzias, disposau perén a aprender y a esperimentar. Suma a ixo a valentía, a firmeza (que beluns podrían clamar arroganzia, soberbia y insolenzia), a zerteza en os suyos plantiamientos mesmo a la ora d’espresar as suyas multiples dudas. A coderenzia y a fe en o suyo dreito a espresar libremén as suyas ideas rematarían costando-le a vida, pero le reservoron un puesto en a posteridat.
Uei día, se reconoixen os meritos y a chenialidat de Miguel Servet, qui da nombre a o prenzipal complexo espitalario d’a nuestra comunidat autonoma (ixe a o que muitos zaragozanos continan clamando “la Casa Grande”). Como diz Ángel Alcalá, “esconoxer-le ye crimen de lesa patria aragonesa”.
Mira referenzias a Miguel Servet en diferens ambitos cutianos, en Aragón, y difuera d’Aragón (carreras, premios, molimentos, etz.).
Miguel Servet y el doctor de Villeneufve
Descarga dende iste enlaz o PDF d’a publicazión editada por a editorial Xordica con o patrozinio d’a Obra Sozial d’Ibercaja.
Aragoneses ilustres, ilustrados e iluminados
Descarga dende iste enlaz o PDF d’a publicazión Aragoneses ilustres, ilustrados e iluminados, de Antón Castro y José Luis Cano, editada por o Gobierno de Aragón en 1993.
DIRECCIÓN GENERAL DE POLÍTICA LINGÜÍSTICA
Departamento de Educación, Cultura y Deporte
Parque Empresarial Dinamiza (Recinto Expo)
Avenida de Ranillas, 5D - 2ª planta
50018 Zaragoza
Tfno: 976 71 54 65
Colabora:
