En 1591, a monarquía ispanica exerzeba, dende a suya echemonía en Europa, un liderazgo mundial acreixiu dende que, años dezaga, o rei Felipe asumise tamién a corona de Portugal, sumando posesions por tot o planeta: ta par d’alavez se cudió a frase que en os dominios d’o rei castellano “no se meteba o Sol”. Pero se travesaba una crisis d’identidat. A esferra de l’Armada Invenzible fren a las costas britanicas eba acotolau a supremazía naval en l’Atlantico a favor d’Anglaterra. No yera, pues, un poder indiscutible. En ixa situazión, cualsiquier ronca, cualsiquier fensiella, por chicota que estase, yera importán ta o rei, que exichiba una reparazión inmediata. Mesmo anque ixa ronca provenise d’un territorio con notable peso istorico y simbolico, pero poco releván en custions economicas y demograficas, como yera o reino d’Aragón .

Identifica, por continens, en qué Estaus autuals s’incluyirían ixas posesions. Puedes aduyar-te d’un mapa politico autual como iste:

O reino d’Aragón manteneba os suyos fueros y instituzions, pero o suyo papel yera cada vegata más secundario y yera mui subordinau a os intréses de l’Imperio. A tendenzia, debuxada ya por os Reis Catolicos dezenios dezaga, iba en a onda d’estaus fuertes, autoritarios y zentralizaus, bella cosa incompatible con as peculiaridaz d’os territorios que los componeban. Zelosas d’a suya identidat politica, as clases dirichens d’o reino levaban tot o sieglo immersas en una desputa de competenzias con os monarcas, que designaban como representans en o reino a personas no naixidas en Aragón. Iste conflicto churidico (o pleito d’o virrei extranchero) yera indicador d’un malestar más fundo que s’estillaba ta atras napas d’a soziedat. En o sieglo XVI, a produzión no eba aumentau tanto como a poblazión, primaban a desigualdat y a inchustizia (espezialmén en bels dominios señorials). A rebeldía de vasallos cuentra os suyos siñors (mui violento estió o levantamiento labrador en Ribagorza), o bandolerismo… evidenzioron una situazión de gran conflicto.

L’episodio en que se veyió embolicau Chuan de Lanuza yera un reflexo de tot ixe malestar. Tamién delataba a inadautazión d’as instituzions d’o reino a una realidat cambián y as contradizions d’una clase dirichén aferrada a os suyos privilechios. Si leyes os temas 4 y 5 d’a Gran Enciclopedia Aragonesa on line que zitamos en a Bibliografía, podrás responder a istas senzillas custions:

1.- O reinau de Felipe II suposó a zaguera y definitiva etapa d’imposizión d’o…

a) sozialismo coronau

b) autoritarismo regio

c) liberalismo monarquico

2.- Os fueros d’Aragón yeran una compilazión de leis que…

a) mugaban o poder d’o rei

b) reforzaban o poder d’o rei

3.- En as tierras de señorío, os representans d’o rei…

a) podeban prener os produtos que queresen

b) podeban chuzgar delitos de sangre

c) teneban viedau l’eixerzizio d’a chustizia

Soluzions: 1 (b), 2 (a), 3 (c)

Manimenos, en ixa ziudat se zitaban tamién miserias y desigualdaz que, sin duda, alimentoron as alterazions y revueltas de 1591.

Como ya emos visto, a vida de Chuan de Lanuza ye mui marcada por un traszendental feito politico-sozial acayeziu en o reino d’Aragón a zaguers d’o sieglo XVI: as alterazions d’Aragón, u a rebelión aragonesa cuentra o rei Felipe. Un feito que, como tamién sabemos ya, responde a un contesto. Muitos d’os suzesos ligaus a iste momento istorico tenioron eszenarios mui reconoixibles dintro d’o espazio zaragozano.

Sobre un plano de Zaragoza, ubica istos puestos ligaus a os acontezimientos de 1591:

• A puerta de Toledo, an yera a garchola de manifestaus, arredol d’o que agora ye a calle Manifestazión (agora ya sabrás a qué obedeixe ixe nombre).
• A plaza d’o Mercau, que se trobaba en as inmediazions d’o Mercau Zentral, an estió executau Chuan de Lanuza. Una placa en a paret d’o Mercau lo recuerda.
• O palazio de l’Alchafaría , an se trobaba a garchola d’a Inquisizión.
• A puerta de Santa Engrazia, por an fuyió Antonio Pérez en os desordens d’o 24 de setiembre.
• A els se sumarían atros dos importans puestos de memoria: o molimento a o Chustiziazgo d’a plaza d’Aragón, y a ilesia de Santa Isabel (u Santo Cayetano, en a plaza d’o Chustizia), an se troban as restas de Lanuza.

Lo ideyal sería poder conoixer ixos puestos in situ en una escursión por Zaragoza que se puede programar mui fazilmén.

A represión d’a rebeldía fren a o rei cristalizó en a execuzión de Chuan de Lanuza y de más de zincuanta personas significadas, asinas como en a prisión d’Aranda y Villahermosa. Uns meses dimpués, ya en 1592, Felipe convocó Cortes d’o reino en Tarazona, an se dio carta blanca ta que  o rei podese nombrar virrei a la suya voluntat y destituyir a o Chustizia, rematando con o caráuter vitalizio y ereditario d’a instituzión. Tamién se vazió de competenzias en orden publico a la Deputazión en favor de l’Audienzia Real, se posibilitó que os ofizials d’o rei podesen dentrar en tierras de señorío ta acazar criminals y s’articuloron midas de control en a impresión de libros. As Cortes apreboron un subsidio de 700.000 libras chaquesas y as tropas abandonarían o reino, dixando guarnimientos en l’Alchafaría de Zaragoza y en a Ziudadela de Chaca.

O pulso entre o rei y o reino se decantó a favor d’o primer. As instituzions propias quedoron mui mermadas en as suyas funzions. S’anunziaba una nueva epoca en a cuala a iniziativa sería d’o monarca.

Mira en os rez informazión sobre istas Cortes de Tarazona. En a dentrada de wikipedia puedes amplar informazión sobre o que rematas de leyer, y saber tamién cuán se zelebroron as siguiens. Por qué creyes que se tardó tanto?

As siguiens Cortes d’o reino se zelebroron en Balbastro en 1626, 34 años dimpués! Las convocó Felipe IV, dimpués que o suyo pai Felipe III nunca no l’ese feito. Os reis perén eban estau retizens a convocar Cortes porque ixo significaba aber de fer conzesions; cuan lo feban gosaba estar meyo obligaus ta resolver situazions d’extrema urchenzia y, sobre tot, con a finalidat d’obtener subsidios ta finanziar campañas militars. A situazión creada dezaga d’os suzesos de 1591, claramén favorable ta os intréses d’a monarquía, feba cada vez menos nezesario iste instrumento de control sobre as azions d’o rei: a monarquía cuasi teneba carta blanca ta fer y desfer a o suyo gusto.

Unatra espezie de consecuenzias son as que se materializan en traza d’omenache y reconoixenzia, tanto d’a fegura de Lanuza como d’a instituzión d’o Chustiziazgo en cheneral. Se fa corresponder a memoria d’una afrenta, d’un atentau cuentra as libertaz d’o reino, con a memoria d’ixas  mesmas libertaz.

En o sieglo XIX, churistas y politicos liberals y progresistas reivindicoron o constituzionalismo aragonés y a fegura d’o Chustizia como a suya aportazión más definida, y cuantos pintors d’istoria reflexoron os criticos momentos previos y posteriors a la muerte de Lanuza. En o panel 5 d’a esposizión «El Justicia de Aragón, 1265-2015» puedes contemplar obras d’Eduardo López d’o Plano, Victoriano Balasanz y Mariano Barbasán.

A devantadera d’o monimento a o Justiciazgo, obra de Félix Navarro, en 1904, aportó un puesto de memoria emblematico ta l’imachinario coleutivo aragonés. O 20 d’aviento (cabo d’año d’a execuzión de Lanuza) ye instituyiu como Día d’os Dreitos y Libertaz d’Aragón, y entre o mesmo se programan autos instituzionals y reivindicativos. En o panel 8 d’a menzionada esposizión puedes conoixer más detalles arredol d’iste asunto.