En 1992, el Oráculo manual y arte de prudencia estió entre uns meses un d’os libros más vendius d’as listas estadounidenses. Con diferens reedizions, se vendioron 200.000 eixemplars. “O más viello libro d’instruzions d’a vida”, deziba The Publishers Weekly sobre ista obra escrita por “un pensador chesuita de fa más de treszientos años”. En o Library Journal, se siñalaba que ista obra “s’amuestra sorprendenmén autual uei” en combinar “brevedat y grazia d’esprisión con sabios consellos, o cual abría d’apareixer debán de os cuals miran de  fer as cosetas espiritualmén como una formula universal, prautica y aplicable a os negozios”.

Somos fablando d’una persona de fa cuatre sieglos, pero no te sona un poquet a autual? Cómo lo veyes?

A moral de Gracián ye prautica y orientada a o trunfo. Uei diríanos que acaza trobar a eszelenzia, con una combinazión de voluntat, intelichenzia, prudenzia y desconfianza. No ye contemplativo, convida a l’azión (o suyo propio pelegrinar por un muntón de colechios d’a Compañía de Chesús le amuestra como un culo de mal posiento), puede pareixer fredo y poco dau a os afeutos. A suya visión de l’ombre y d’a vida (“perpetuo engaño”) mantiene un fondo pesimista, pero ye o suyo un pesimismo autivo.

Aquí no imos a dezir que “tot ye inventau” porque siempre i hai posibilidat d’innovar, pero sí ye verdat que muitas cosas que nos pareixen absolutamén autuals responden a ecos d’o pasau, que i hai cosas “viejunas” que nunca no rematan d’ir-se-ne porque, baixo nuevas formas, responden a l’azogue que perén ye estau astí.

Leye aquí sobre o parentesco entre as nuestras anzestral jotas de picadillo y as batallas de gallos d’os rapers:

Tornando ta Gracián, o nuestro autor desembolica a idea de “éroi”, plega a meter ixe títol a uyo primer libro: “Querendo, puedes estar muito. Cualsequiera puede y ha d’estar éroi”. Dillá d’a presenzia cutiana d’érois en a istoria d’a Umanidat, en a fizión, en a cultura popular (d’Hércules a Supermán), como personificazión y sublimazión de determinatas valors… se mira a eroizidat no en un ser estraordinario y ultrapoderoso, sino en nusatros mesmos. Ixa idea que toz podemos estar érois ha estau siempre astí y… de nuevas, la veyemos en o nuestro presén.

Escuita y desfruta d’ista alfaya d’o pop de toz os tiempos, “Erois” de David Bowie:

Parte d’a obra de Gracián, espezialmén d’a suya primera epoca, salió d’imprenta grazias a o refirme finanziero d’un personache mui singular. L’oszense Juan Vincencio de Lastanosa yera propietario d’un palazio-museu con exquisitos chardins y gran biblioteca an se reuniba lo más granau d’a inteleutualidat aragonesa d’o momento. Astí, o chesuita podió atrabar contauto con artistas y escritors de gran prestichio y salir d’o estreito marco que le precuraba a suya rotina y o suyo treballo en a Compañía. Sin duda, ixo reforzó a suya condizión de verso suelto en a orden.

Dentra en a web “Proyeuto Lastanosa” de l’Instituto de Estudios Altoaragoneses. S’aporta informazión mui intresán sobre iste personache y, espezialmén, d’o suyo entorno, a Uesca d’o sieglo XVII, de gran dinamismo cultural.

Baltasar Gracián ye un autor barroco que nos amuestra que tot lo umano puede estar interpretau de traza diferén y contradictoria. Ye teniu como modelo d’o “conzeptismo” (seguiu tamién por Quevedo y contraposau a l culteranismo).

Como estilo carauterizau por formas basadas en l’asoziazión incheñosa y estudiada de conzeptos, o conzeptismo s’asozia a l’agudeza, a rapidez mental. No ye casual que Gracián titulase Agudeza y arte de ingenio a lo que ye considerau obra clau d’o conzeptismo (astí Gracián no amaga cosa).

Mira en o dizionario (en linia tiens o d’a Real Academia: https://dle.rae.es/) o significau d’istas parolas:

• • antítesis
  • paradoja
  • oxímoron
  • anfibología
  • elipsis
  • zeugma
  • alegoría
  • prosopopeya

O conzeptismo queda conzentrau en a frase más zelebre d’as ditas por Baltasar Gracián (ixa que a toz nos sona): “lo bueno si breu, dos vezes bueno”. Pero i hai muito más.

Leyez y comentaz istas frases estraitas d’a suya obra (dan que pensar):

• • Saber y saber-lo contrimostrar ye saber dos vezes.
  • Mete un gramo d’audazia en tot o que faigas.
  • O primer trango d’a ignoranzia ye presumir de saber.
  • Errar ye umano, pero más lo ye culpar d’ixo a atros.
  • As cosas no pasan por o que son, sino por o que pareixen.

Ye a obra zima de Baltasar Gracián. A que despertó as iras d’os suyos superiors en a Compañía de Chesús y le levó, como ya sabemos, a estar duramén castigau. Pro, cosas como “Hanse de precurar os meyos umans como si no esen divins, y os divins como si no esen umans” debeba enuyar a más d’un, que debeba interpretar ixas dudas como desafíos a o dogma. Gracián se pregunta por a razón d’esistir (ser en o tiempo), renunziando a la esenzia, y privilechia a esperenzia. Lo importán ye o modo, o estilo, a forma, tanto d’o escribir, como d’o pensar u d’o vivir.

Ista novela alegorica reconta un largo viache: o que siguen Critilo (o chudizioso) y Andrenio (l’ombre natural) en busca de Felisinda, mai d’Andrenio y amada de Critilo, dica alcanzar a immortalidat. Ixe viache que ye a vida mesma ye recontau por l’autor dende o desengaño y a cretica, con un cheneroso desplegue de reflesión y satira, un parlache cortante y preziso, repleto de metaforas, chuegos de parolas y aragonesismos… para, como siempre, embarcar y sumir a o leutor. Ixa intensidat estió mui apreziada por pensadors de la talla de Nietzsche y Schopenhauer u cualques filosofos existenzialistas en os cuals ha influyiu.

Mira datos sobre l’existenzialismo, preba de coneutar con ideas que s’han tratau en fablar de Baltasar Gracián.

Existenzialismo: corrién filosofica de meyaus d’o sieglo XX, reflexada tamién en a literatura, orientada arredol d’a existenzia a traviés de l’analisis d’a condizión umana, a libertat y a responsabilidat individual, as emozions, asinas como o significau d’a vida. 

En tot, lo importán ye o final, tamién en o “gran teatro d’o mundo”: “Va-se empeñorando a nuestra vida como en comedia; a la fin, viene a desenreligar-se: atenzión, pues, en acabar bien”.