Tot y con as dificultaz economicas d’a suya umil y numbrosa familia, o chicot Miguel trobó un ambién propizio ta reforzar un taliento mosical que le veniba de naturaleza. Os suyos años d’infanzia en Albalate estioron fundamentals ta alazetar o suyo futuro.

Sitúa Albalate de Zinca sobre un mapa d’Aragón. A qué provinzia y comarca perteneixe? De qué forma se recuerda a Miguel Fleta en Albalate?

Tot y con l’elitista que ha estau tradizionalmén o mundo d’a opera, i abió fautors que aduyoron a convertir a Miguel Fleta en un idolo de masas. O suyo amplismo treballo en gravazions sonoras, a suya moltetut de rechistros sin fer fastios a cheneros más populars, a espansión d’a radio en o dezenio de 1920… afavorioron tot ixo. Amás d’encarnar o trunfo d’una persona d’o lugar (un fillo de labradors), o mesmo yera una persona simpatica, impetuosa (con un punto d’inconszienzia), y tot ixo aduya.

A suya voda en Salamanca con Carmen Mirat en 1927 estió tot un acontezimiento sozial: dica dio ta un documental. Dillá de ixo, as aparizions zinematográficas de Miguel Fleta son mui raditas. Clama o ficazio que un personache tan popular, tan a o tanto d’a importanzia d’os meyos de comunicazión sozial, no tenese más protagonismo en o zine: tan solo mereixe a pena destacar-se a zinta Miguelón o el último contrabandista(realizada por l’aragonés Adolfo Aznar y Hans Behrendt, y con banda sonora de Pablo Luna) y una breu intervenzión en a zinta Gigantes y cabezudos, de Florián Rey.

Mira informazión sobre os zineastas Adolfo Aznar y Florián Rei: os dos yeran de l’Almunia de Doña Godina; o segundo tenió una carrera más alongada, estió un direutor mui esitoso. Tiene bella zinta de tema aragonés? Investiga sobre ella (dó se rodó, qué istoria contaba, quí la protagonizaba).

 A suya vida publica y as suyas opinions se relazionan con una evoluzión politica complexa y contraditoria. Cantó o “Cara al sol” (imno falanchista), pero tamién o “Himno de Riego” y “La Marsellesa”, que tienen una identificazión más republicana. Le pertocó vivir tiempos mui barucosos, y no ye fázil chuzgar-le por as suyas autituz, espezialmén porque a suya muerte tan choven impide trazar un recorriu ideolochico más completo. Dengún no sape qué evoluzión ese levau d’aber viviu entre a ditadura de Franco: s’ese desengañau y convertiu en un antifranquista, como fazioron notables falanchistas de primera ora?, s’ese acomodau en o rechimen? Millor ye dixar-lo escansar y desfrutar d’ixa voz eszezional con fraseo, con “aire” y con prodichiosa carnalidat.

Tot y con a prematura muerte de Miguel Fleta, a mosica siguió mui ligada a o suyo apelliu. O suyo fillo mayor, Miguel, estió achén artistico y profesor de canto (daría clases a la gran Montserrat Caballé) y Alfonso s’adedicó tamién a la canta lirica como “Pierre Fléta”.

A suya vidua Carmen Mirat se preocupó que os suyos fillos rezibisen formazión mosical. Entre els, destacoron Elia y Paloma, que formoron un dugo de mosica lixera. As Chirmanas Fleta trunforon entre o dezenio de 1950 en España y en Cuba, sobre tot en a radio, con grans esitos como “El chacachá del tren” (canta que ye estada mui versioneada). Dezaga de dixar Paloma a mosica, Elia prosiguió a suya carrera en solitario, más vinclada a o jazz, entre pros años. Paloma s’afincó en Estaus Unius, y o suyo fillo desarrolla un singular rock acustico baixo o nombre artistico de Kirk Fleta, luzindo l’apelliu d’o suyo lolo.

Unatro fillo d’o tenor, Javier, tenió incursions mosicals como baritono y como interprete en español de cantas de zintas y series norteamericanas. O chicot, Miguel Ángel, s’instaló en Colombia y dos fillas suyas formoron o dugo Elia y Elizabeth, pioneras d’o funk soul caribeño con bella mica de psicodelia, en una carrera breu pero intensa y mui apreziada en a primera metat d’os años setanta. O suyo tema “Todo en la vida” forma parte d’a banda sonora d’a serie Narcos de Netflix. A colombiana Paula Arenas, casada con un bisnieto suyo, fa mosica melodica y en 2021 estió nominada a cuatre grammy latins.

Mira informazión sobre os estilos mosicals que s’han zitau en iste trestallo: mosica lixera – jazz – funk – soul – rock acustico.

Te sona belún d’els? Pregunta en casa sobre ixos estilos… consonan con gustos mosicals d’os tuyos familiars?

Ixas dos cantas d’Elia y Elizabeth son de fa cuasi zincuanta años, no te pareixen dica bel punto autuals?