A Ilustrazión ye un movimiento cultural que afeuta a la Europa d’o sieglo XVIII, an ideas basadas en a esperenzia y en a razón miran d’imposar-se a la tradizión dominada por a relichión y as superstizions. No ye en sí un movimiento revoluzionario, ni cuestiona l’orden establiu, pero aspira a una millora d’as condizions de vida ta tota la soziedat, por meyo de l’aplicazión prautica de conoixenzias teunicas que afavoreixcan o creiximiento d’a economía. Seguntes os ilustraus, l’aumento d’a riqueza va en benefizio de tota la soziedat y inzide en a felizidat cheneral (identificada tamién con a “utilidat”). A estensión d’a educazión, conzebida dende a confianza en o progreso zientifico, ha d’aduyar a ixas fins.

A Ilustrazión no ye un movimiento uniforme: tiene muitismas manifestazions y varians seguntes puestos. Posa as bases d’o liberalismo d’o sieglo posterior, ya que contiene simiens que, con o tiempo, grillonarán contra l’absolutismo monarquico. Pero, por o momento, os ilustraus van d’a man d’o poder politico. De feito, no pocos gubernans adotan politicas reformistas endrezadas por personas ilustradas.

“Tot ta o pueblo, pero sin o pueblo”. Qué te suchiere ixa frase? Investiga un poquet sobre ella. Mira nombres d’atros monarcas europeus atraitos por ixe esprito ilustrau.

Catalina II de Rusia, Gustavo III de Suezia, Federico II de Prusia, José I de Portugal, entre atros.

L’eixemplo más claro de monarca ligau a o despotismo ilustrau ye, en España, o de Carlos III. Mira bella mica d’informazión sobre él. Por qué te pareixe que adotó ixa politica reformista y se dixó asesorar por ilustraus?

As reformas se consideran un buen antidoto ta aprevenir revoluzions pues a millora de condizions chenerals que suponen, alivian en gran mida o descontento. Manimenos, dezaga d’o esclatito d’a Revoluzión franzesa (1789), as monarquías se tornan más conservaderas, en reazión a ixos feitos subversivos que han estorbau tot o tablero. En ambitos influyens se considera que muitas ideas d’a Ilustrazión, d’una traza u d’unatra, son estau adotadas por os revoluzionarios. Cosa que, en parte, yera zierta.

O mundo con o cual dentra Josefa en contauto a la suya tornada, rezienmén casada, a Zaragoza, ye lo d’a Real Sociedad Economica Aragonesa de Amigos del o País.

Ye en ixe contesto en o cual a fegura de Josefa Amar y Borbón alquiere a suya grandeza. Cal dezir que, tot y con  l’abanzau d’as suyas ideas ta la epoca, Josefa tamién se debe a la suya clase y a o tiempo d’o que ye filla. Ye inevitable resultar a vezes un tanto “elitista”, pues iste azeso a la educazión no se planteya igual ta toz. A Ilustrazión tiene un trasfondo paternalista (o propio poder la patrozina) y l’obchetivo no ye tanto una transformazión sozial “revoluzionaria” como un cambio gradual que permita sustener-se a o estau d’as cosas.

Ixo sí: Josefa Amar podría aber-se quedau astí, pero va un poquet más enta allá.

O suyo pensamiento ye entre os más abanzaus d’a Ilustrazión. A suya erudizión no ye un simple acopio de conoixenzias: ella analisa, interpreta os datos y exerze a suya labor con independenzia. Partizipa d’o esprito d’a Enziclopedia, ye europeísta y liberal en o sentiu autentico d’o termín. Se declara enemiga d’a relichiosidat extrema, avoga por o laizismo (dintro d’as buegas que se podeba: remeramos que, anque o sieglo XVIII ye o d’a Ilustrazión, a Inquisizión agún yera en funzionamiento, anque con muita menos influenzia que en tiempos preteritos).

A Ilustrazión apareixe asoziada a la idea de “modernizazión”. Pero, tot y con a idea de progreso y modernidat que comparten os ilustraus, a presenzia de mullers en ixos ambitos ye mui marguinal. A qué creyes que puede deber-se? 

“No contentos os ombres con aber-se reservau, os emplegos, as onors, as utilidaz, en una palabra, tot o que puede animar a suya aplicazión y esveile, han espullau a las mullers dica d’a complazenzia de tener un entendimiento ilustrau. Naixen y se crían en a ignoranzia absoluta: aquels las disprezian por ista causa, ellas plegan a persuadir-se que no son capazes d’unatra cosa, y como si tenesen o taliento en as mans, no cautivan atras abelidaz que as que pueden desempeñar istas”.

Tría un parrafo de cualsiquiera d’ixas dos obras: belún que te clame l’atenzión, que te resulte significativo, u mesmo chocán. Metez en común en clase os diferens parrafos eslechius.

A Revoluzión franzesa iniziada en 1789 atendió a unas causas y unas zircunstanzias mui compleixas, pero muitas d’as ideas que la inspiroron y atras más que se metioron sobre a mesa a lo largo de tot o prozeso revoluzionario, yeran emparentadas con o movimiento ilustrau. Podríanos dezir que, en iste causo, se caloron en una coctelera, se sobatioron, y o resultau estió esplosivo (anque, con o tiempo, se tornaría a encauzar en parte).

Un d’os documentos más reconoixius d’iste momento istorico ye a Declarazión d’os Dreitos de l’Ombre y d’o Ziudadano. Tot y con o suyo plantiamiento “universal” (y con gran proyezión en toz os sentius), pareixe que en o suyo enunziau s’omite una parte importán (a lo menos un 50%) d’a Umanidat.

Un parrafo diz: “Si bien l’alegoría d’a Republica se represienta por meyo d’una fegura femenina, iste simbolo no se traduzió en milloranzas ta las mullers. Franzia, a Nazión y a Libertat pueden pintar-se con cuerpo de muller a o mesmo tiempo que as mullers mancan de dreitos politicos y zivils basicos”.

De seguras que te sona a canta “Ai mama” de Rigoberta Bandini. Puedes escuitar-la en diferens plataformas. En ista de Youtube, con letra.

En ista reivindicazión d’o papel d’a muller, de valors ligadas a la maternidat, ezetera, se canta “Quitando un peito difuera a o puro estilo Delacroix”. Quí ye ixe Delacroix? A qué imachen se refiere? Por qué creyes que a cantaire recorre a ixe icono?

A Libertat guiando a o lugar, d’o pintor Eugène Delacroix. Una imachen iconica y universalmén reproduzida. Atenzión: s’identifica con a Revoluzión franzesa, pero… con a de 1830 (que estió una vuelta de tuerca más dintro d’o ziclo d’as revoluzions burguesas ubierto en 1789).

Tornemos ta o panorama de 1789. Gosa dezir-se que os orichens d’o feminismo como formulazión teorica y movimiento sozial se remontan a os primers años d’a Revoluzión franzesa. Tot y con as suyas limitazions, a Declarazión d’os Dreitos de l’Ombre y d’o Ziudadano estió un punto de partida, una base de refirme ta empentar atras iniziativas como a que, dos años más tarde, dio lugar a la Declarazión d’os Dreitos d’a Muller y a Ziudadana. Un d’os suyos parrafos diz: “Muller, despierta! As campanadas d’a razón se dixan sentir en tot l’universo. Reconoixe os tuyos dreitos!”.

Quí escribió ixa Declarazión? Investiga sobre l’autora.

Olympe de Gouges (1748-1793) avogó tamién por l’abolizión d’a esclavitut, esfendió a deseparazión de poders; as suyas denunzias d’a ditadura de Robespierre la levoron ta la guillotina.

Mira informazión sobre istas atras dos mullers, tamién ligadas a ixe momento istorico y a similar sensibilidat: Pauline Léon y Anne-Louise Germain Necker (Madame de Staël).

Josefa Amar y Borbón tendría mui poco que invidiar a ixas mullers, mui reconoixidas uei día como pioneras, inteleutuals, autivistas, empoderadas… De feito, as suyas obras conservadas más significativas con tematica feminista (de 1786 y 1790) son anteriors en o tiempo a las más reconoixidas d’Olympe de Gouges y Madame de Staël. A pensadora aragonesa teneba una formazión más que solida y eba leyiu a umanistas d’o sieglo XVI, a Bacon, a Leibniz y a ilustraus y ideologos como Voltaire, Rousseau, Montesquieu y Locke. O razionalismo, a división de poders, o cuestionamiento d’o dogma y a superstizión, amás d’a suya denunzia radical d’as desigualdaz de chenero, la convierten en una autoridat, en una referenzia sin igual… inchustamén postergada.

En a biografía emos dito que a soziedat d’o sieglo XVIII yera agún, d’Antigo Rechimen. En ixe sentiu, creyes que Josefa Amar estió una muller abanzada a o suyo tiempo?

Josefa Amar se casó en un matrimonio conzertau por a suya familia. O suyo ombre le doblaba a edat… y ixo que os 23 años que contaba yeran, ta la epoca, una edat ya abanzada ta la voda d’una muller. Intuyimos que ixe “retardo” podió obedeixer a o forzío entre a independenzia de criterio d’a filla y a obligazión d’os pais de “complir con a soziedat con ixo y con tot”; talmén tamién tenió bella cosa que veyer o cudiau d’istos ta trobar-le un buen ombre… Dillá d’as divagazions de si podió u no aber amor en ixe matrimonio (en una epoca rechida por pautas diferens d’as autuals) y, anque Joaquín resultase estar un buen compañero que le aduyaría mesmo en os suyos proyeutos inteleutuals… ye mui chocán l’enradicaus que yeran usos, costumbres y tradizions de sieglos y lo difizil que yera forachitar-los en un mundo que quereba estar moderno y razional.

No totas as obras de Josefa Amar han sobreviviu: por eixemplo, bi ha notizia d’un libro titulado Importancia de la instrucción que conviene dar a las mujeres (publicau en Zaragoza en 1784), d’o que no se conserva garra eixemplar. Pero podemos aconortar-nos con as sobreviviens. Leuturas que constituyen un gran legau, que mantienen vichenzia, que son mui autuals, y que a o menos, en parte, le fan chustizia.

Porque a posteridat no s’ha portau pon bien con ella. Ta prenzipiar: os suyos zaguers vente años (sisquiera nos entivocásenos) debioron estar tristes y solitarios, vivius, amás, en un clima politico adverso. Por qué dezimos isto? Qué pasó en España dende 1814?

Dezaga d’a Guerra d’a Independenzia, Fernando VII torna d’o suyo falso exilio, y reprime con zereñura o liberalismo que s’eba manifestau con a Constituzión de Cádiz (1812). L’absolutismo (que tan solo quedó breumén tallau entre o trienio 1820-1823) prevale dica a muerte d’o rei (casualmén o mesmo año en que feneixe Josefa). S’ubrirá alavez una dura pugna (manifestada en as guerras carlistas) entre un absolutismo que quiere mantener l’Antigo Rechimen y un liberalismo que, a duras penas, irá imposando-se.

Pero dezaga d’a suya muerte, quedó olbidada. No d’o tot: o suyo impauto entre as chens ilustradas le valió una senzilla memoria en una carrera curta en o zentro de Zaragoza y en o nombre d’un colechio d’educazión primaria… y un curioso y incomprensible equivoco en Internet, an a Josefa (d’a cuala no se conoixen retratos en vida) se le emparella en toz os buscadors con una imachen que no ye a suya, sino la d’una escritora (Patrocinio Biedma) de zien años dimpués!

Afortunadamén, d’un tiempo a ista parte, ixos escudios quedan compensaus por una reconoixenzia d’a suya vida y d’a suya obra. No ye tan famosa como as suyas contemporanias franzesas pero os suyos meritos son mayors. Que una persona que tanto fazió por a visibilidat d’as mullers en epoca tan temprana, dixe d’estar cuasi invisible… ye fayena de toz, ye fayena de totas.