Marco Valerio Marcial
L’enchenio y a contradizión, a esenzia de lo umano
Bilbilis, 40-104
Iste miembro d’una familia de notables locals que estudió leis y declamazión en Tarraco, marchó ta Roma ta proseguir a suya cursa baixo l’amparo de Séneca. A cayedura en desgrazia d’o cordobés baixo l’autoridat de Nerón le dixó desemparau y pobre, obligau a exerzer ofizios de diversa mena (entre els o de soldau).
Rondaba os cuaranta cuan os suyos escritos prenzipioron a fer-le popular en l’atrachinada y bullera Roma y a gozar d’a favor d’os poderosos. Correba l’año 80. O emperador Tito inauguró l’anfiteatro Flavio (o Coliseu) y Marcial componió en tono zelebratorio o Liber Spectaculorum. A protezión imperial proseguiría con o suzesor Domiciano y fuo un gran aval ta la suya cursa literaria.
Vida
Marcial ye o mayestro d’a poesía epigramatica, un chenero carauterizau por a brevedat y l’enchenio. A obra d’a suya vida, replegada en quinze libros, son os Epigramas: uns mil zincozientos testos breus y inzisivos, exerzizios de prezisión y agudeza con motivos a ormino festivos, en ocasions dedicatorios y elechiacos (chenero en o cual estapa enorme sensibilidat) y, sobre tot, satiricos.
Marcial retrata con singular mayestría as miserias y as grandezas d’a vital y cosmopolita ziudat de Roma: una soziedat desenfadada y inchusta que conoxe a la perfeuzión. Luen de narrar chestas y secundar cheneros retoricos, o bilbilitano critica a hipocresía, reflesiona sobre a condizión umana y as suyas contradizions… y empondera a qui le conviene. Antón Castro le califica de “servil y lisonxero con os siñors” y “sarcastico y procaz con os inmorals y os cretinos”. Pero, adibe o escritor gallego-aragonés, por meyo d’una poesía definida por a senzillez, a espontaneidat, a prezisión y a eleganzia, l’ispanorromano “se sabe un moralista y a suya vocazión ye la de restituyir una visión umanista y no la de destruyir una reputazión”.
Obra
Amigo d’escritors como Plinio o Choven, Juvenal y Quintiliano, Marcial tiene un punto rabietas: se quexa de lo cara que ye a vida, d’as desventallas d’a gran ziudat, d’a monotonía y a servidumbre de mirar patronos y aber de fer-les a pilota en gambada, conversazions, tiermas y zenas. Troba vueda una vida sozial d’a cuala forma parte; tiene propiedaz y servizio d’esclaus; goza de notoriedat en os ambiens culturals de Roma (ye plachiau, y ixo da idea d’o suyo esito), pero contina chemecando, fendo-se veyer más desgraziau y menesteroso d’o que ye. Transitando d’o más puramén lirico a l’obszeno, d’o digno a o rastrero… le cuaca abundar en a paradoxa: “As mías pachinas son endinas, pero a mía vida ye onesta”.
Bilbilis
Ixe carauter estudiadamén gruñón ye una d’as claus de leutura d’a suya obra, en a cuala se deteuta tamién bels recosiros retorica d’a suya patria, ideyalizada, a la cuala i tornará. A dezisión se ferá firme en zaguers d’o sieglo, cuan os aires d’o poder cambien a suya adreza, y a la dinastía Flavia suzedan os mandatos de Nerva y Trajano. Marcial pierde as favors imperials y, antes de veyer-se más comprometiu, abanzada a edat matura y con o refirme d’a suya almiradora Marcela, una fazendada local, emprenderá o retorno a Bilbilis.
Irene Vallejo recreya o retorno de Marcial a la suya tierra, avistando o solitario Mon Cayo, retrobando-se con o Xalón, y sintetiza as suyas sensazions: “Baixo o zielo tranquilo de Zeltiberia, amigo Marcial, dormirás a cama suelta (…). [Grazias a la tuya benefautora Marcela], fuyirás por fin a la menaza d’a miseria, que nunca no t’albandonó d’o tot en Roma”. A escritora zaragozana compendia tamién as suyas contradizions: “Conoixerás a la fin a calma, pero dixarás d’escribir. Con o estamago pleno, a tuya rabia s’apaziguará y dixarás dezaga o tuyo desfraz de nino terrible (…). Cuan yeras en Roma, t’irritaba a vida artifizial y a hipocresía que observabas a la tuya arredol. Yeras farto d’afalacar a os poderosos. Alavez a recosiros te ditaba poemas en os cuals enumerabas os aspros nombres d’a tuya tierra. Bien, ya has tornau a o tuyo chicot paradiso de susiego. Luego prenzipiarás a morgoniar entre diens, morgoniando a tuya añoranza d’as reunions, os teatros, as bibliotecas de Roma, l’agudeza d’o tuyo redol sozial, os plazers y o estrapaluzio d’a capital; en suma, de tot o que has dixau por afán de tranquilidat”.
A la suya muerte, Plinio o Choven dizió d’él: “Marcial yera ombre incheñoso, agudo y mordaz, malas que escribiba meteba muita sal, muita fiel y no menos candor”.
Puñal
Un puñal a lo que un chicot redol marca en a suya curva fuella. A iste lo templó rusiente o Jalón con as suyas auguas cheladas.
Autividaz didacticas
L’entorno y o contesto d’os Epigramas
Os Epigramas de Marcial tienen una indudable valura documental: aportan informazión de primera mano sobre a soziedat romana d’o sieglo I d’a nuestra era. Un momento de cuasi culminazión d’a espansión territorial, fuga politico-militar, consolidazión de l’alministrazión, d’o dreito, d’a cultura… un mundo globalizau arredol d’o Mediterranio, o Mare Nostrum. A obra de Marcial se queda más en lo cutiano, pero refleixa ixe dinamismo: mobilidat cheografica entre as provinzias perifericas y a metropolis, oportunidaz (limitadas) de promozión sozial y profesional… y refleixa tamién inchustizia, desigualdat, y as dos caras que puede amostrar a fortuna.
Mira en internet informazión sobre os emperadors que gubernoron Roma entre os años aproximaus d’a estanzia de Marcial en a capital de l’Imperio (65 a 100 dimpués de Cristo): yeran toz d’a mesma dinastía? Te truca o ficazio bel episodio que protagonizó belún d’els? Cómo azedioron ta o trono y cómo murioron? En o testo se nombran atros personaches: beluns d’els son ispanorromanos como Marcial: Séneca, Quintiliano (tamién l’emperador Trajano). Indaga sobre as suyas biografías.
Sucherenzias
Istoria de Roma, d’Indro Montanelli
Cómo viviban os romans (BBC, 2012), de Mary Beard
Ista espezialista anglesa en o mundo clasico (y magnifica divulgadora) esgrana en tres episodios a vida cutiana en a ziudat de Roma, atendendo espezialmén a seutors menos afavorius, y con una gran presenzia d’as mullers.
Marco Valerio Marcial: Epigramas. Versión completa de Segunda edizión
A cuestión de chenero
O papel d’a muller en epoca romana ye un tema a tener mui en cuenta. Marcial, fillo d’o suyo tiempo, no sale prezisamén airoso d’ixe tranze. Claman l’atenzión as suyas invectivas, en ocasions groseras, ta mullers que forman parte d’ixe universo mundano (a botiguera, a prostituta, etz.) d’o que Marcial partizipa. Pero tamién ye delicau en a descripzión d’a belleza y a bondat (as más d’as vezes personificada en o femenino) y en l’alabanza de virtuz d’a muller u a nina plorada en bella d’as elechías. Puez mirar cualques d’ixas referenzias en os dos pdf que t’has escargau, contenendo os Epigramas.
En as referenzias que zitamos (como a breu biografía d’Antón Castro) i hai cualques alusions a la suya vida privada y a la suya relazión con as mullers. Y ye mui chocán que o suyo retorno a Bilbilis estase mui condizionau por l’almirazión de Marcela. Mira más informazión sobre tot isto.
“Marcial, o pelegrino en a suya patria”, d’Antón Castro y José Luis Cano
En a publicazión Aragoneses ilustres, ilustraus y iluminaus (entre as pachinas 12 y 17), i hai cualques alusions a la suya vida privada y a la suya relazión con as mullers. Y ye mui chocán que o suyo retorno a Bilbilis estase mui condizionau por l’admirazión de Marcela.
A critica de costumbres
En ocasions, a muller ye “victima” d’una retranca que, en bel modo, no tiene chenero y ye universal (tamién traviesa epocas, y en ixe sentiu, muitos testos de Marcial mantienen tota a suya vichenzia). A denunzia de vizios como a presunzión: “Yes fermosa, lo sabemos; y choven, ye verdat; y rica, pus, quí ye capaz de negar-lo? Pero, cuan t’alabas, Fabula, masiau, ni rica ni fermosa ni choven yes” (Epigramas, I, LXIV). Iste mandau vendría a equivaler a un “Di-me d’o que presumes y te diré d’o que mancas”, y forma parte d’ixa critica de costumbres y moralismo que fa gala o bilbilitano.
A ironía debán de a picaresca
Por exemplo, a o tabernero que vende vino aguachinau le adedica ista frase: “A vendema ye chupida por as plevias continas; anque quieras, tabernero, no puez vender vino puro” (I, LVI).
Tampoco no escatima sarcasmo debán d’os plachiadors y (en iste causo) “interprete” d’a suya obra: “O libro que rezitas, Fidentino, ye de yo; pero cuan lo rezitas malamén, prenzipia a estar de tu (I, XXXVIII). En tiempos en que a propiedat inteleutual y os dreitos d’autor no yeran materias fazils d’esfender, Marcial reivindicaba a integridat d’as suyas creyazions. Unatro exemplo de vichenzia.
O comentario faltón, no exento de bella finura
“Zoilo, por qué emporcar a bañera lavando-te o culo? Ta que s’emporque más, capuza a cabeza, Zoilo” (II, LXII). A o bueno de Zoilo le da o suyo pareixer sobre a calidat d’os suyos pensamientos (los mete a l’altaria d’a mierda). Sobran más comentarios. Uei fablamos de zaskas y de troleos, pero… como veyes, pon ye nuevo. Marcial podeba plegar a estar feridor, pero nunca toxico (u sí?, qué te piensas?).
Mira entre os zientos d’Epigramas, tres que te pareixcan autuals, que te clamen l’atenzión, reflesions que compartas u pienses que son vichens uei día. En ixa edizión escargable i hai muitos elementos y notas d’aduya, que fazilitan muito a suya comprensión.
A vuelta a l’orichen: zarrar o redol a canto d’o Xalón
En os Epigramas Marcial fabla muito d’a patria que albandonó en a choventut, y a la cuala rematará tornando. La ideyaliza dende a distanzia.
O nuestro escritor naxe en una Zeltiberia que un par de sieglos dezaga eba cremau en rebeldía fren a l’invasor romano. Un país que levaba ya dezenios baixo a pazificazión imposada por o venzedor (ixo estió a Pax Romana), que baixo ixe dominio prosperó economicamén y que s’incorporó a o mundo romano (recuerda o que emos comentau en o primer parrafo).
Talmén puedas trobar notizias de estrazios romanos en a tuya localidat. Investiga sobre ixo. Si esiste un pasau romano reconoixible, ye musealizado u s’exibe de bella traza?
A vichenzia de Marcial
En resumidas cuentas, a posteridat ha tratau bien a iste bilbilitano. Umanista d’o sieglo XVI, latinistas, eruditos y moralistas, o mayestro d’o conzeutismo barroco Baltasar Gracián (coterranio suyo, por zierto), l’ilustrau Juan d’Iriarte, entre muitos atros, dica investigadors más contemporanios le han estudiau y comentau.
Si observas a obra, en o fondo d’a eszena, s’aprezia una inscripzión latina que, traduzida, diz: “Arte, sisquiera podeses plasmar a conduta y o esprito, no i abría en a tierra pintura más fermosa”. Ye una más d’as muestras de profundo lirismo que, entremesclau de frases más prosaicas, nos regaló Marco Valerio Marcial.
Retrato de Giovanna Tornabuoni (1488), Domenico Ghirlandaio
Marcial el travieso
Descarga dende iste enlaz o PDF d’a publicazión editada por a editorial Xordica con o patrozinio d’a Obra Sozial d’Ibercaja.
Aragoneses ilustres, ilustrados e iluminados
Descarga dende iste enlaz o PDF d’a publicazión Aragoneses ilustres, ilustrados e iluminados, de Antón Castro y José Luis Cano, editada por o Gobierno de Aragón en 1993.
DIRECCIÓN GENERAL DE POLÍTICA LINGÜÍSTICA
Departamento de Educación, Cultura y Deporte
Parque Empresarial Dinamiza (Recinto Expo)
Avenida de Ranillas, 5D - 2ª planta
50018 Zaragoza
Tfno: 976 71 54 65
Colabora:
