Pablo Gargallo
O chenio de l’artista clasico y innovador
Maella, 1881 – Reus, 1934
Fillo de Mariano y Petra, mayor de cuatre chirmans, cuan Pablo teneba siet años, marchó con a suya familia ta Barzelona. O suyo pai, labrador que en Maella eba conduziu coches de viachers como a dilichenzia Caspe-Maella, se fazió pompier en a ziudat condal. Timido y con una fermosa voz, o chicot Pablo formaba parte de coros en obras que se representaban en o Lizeu mientres estudiaba en a escuela de La Galera. Ya eba amostrau unas notables cualidaz de debuixán y, dezaga d’uns meses prauticando l’alfarería, con catorze años, dentró como aprendiz sin soldata en o taller d’o escultor Eusebi Arnau, an podió esperimentar con a talla d’a piedra, o modelau d’o bardo y a escayola, o treballo con bronze, o poliu de vidreras…
Vida
Arredol de 1900 se fazió asiduo d’o café Els Quatre Gats, que yera punto de trobada d’artistas d’avanguardia. Trató a os modernistas Isidre Nonell, Ramón Casas y Santiago Rusiñol y entabló amistat con un prometedor artista d’a suya edat: Pablo Picasso. Con él compartió ideas creativas y nueis de boemio. Mientres perfezionaba as suyas conoixenzias en a Escuela de la Lonja, Gargallo prenzipió a dar-se a conoixer partizipando en muestras coleutivas, con obras como una alabada Cleopatra en mármol, y obtenió una beca de l’Academia de Bellas Artes ta estudiar en París. Abió de retardar o viache a causa d’a muerte d’o suyo pai pero en a capital franzesa, en a colonia de Bateau-Lavoir (en o barrio de Montmartre), alternó con pintors impresionistas y poetas y conoixió a obra retunda y clasica d’o gran Auguste Rodin.
De nuevas en Barzelona, con taller propio, s’empezó a dar a conoixer como escultor artesanal, con treballos como medallista y en escultura monimental y mural, dintro d’a estetica d’o modernismo. Partizipó en as decorazions de portegaus y fronteras d’edifizios tan emblematicos como o Espital de Sant Pau u o Palau de la Música Catalana (con o responsable d’iste proyeuto, l’arquiteuto Lluís Domènech i Montaner, colaborará en cuantos proyeutos). Entre istos años de treballo intenso, con moltetut d’encargos y esposizions, a suya salut s’empeza a amostrar fráchil.
Obra
En 1912 torna ta París, se chupe de cubismo, convive con Picasso, con o escultor Manolo Hugué, o pintor Juan Gris, o mosicaire de Mequinenza José Soler Casabón y o escritor Max Jacob; entabla relazión con o cretico y teorico d’arte Maurice Raynal y o pintor Modigliani, y conoixe a qui será a suya compañera ta tota a vida: Magali Tartanson. As suyas obras en chapa metalica empezan a vender-se, pero dezaga d’o esclatito d’a Guerra Europea (preba d’alistar-se en l’exerzito franzés sin d’esito), torna ta Barzelona. Entre problemas economicos y esporadicos viaches con a suya muller a la suya Maella natal, azeuta nuevos encargos y partizipa en más esposizions. En 1919 presienta a suya obra por primera vez en Aragón: ye en a Loncha de Zaragoza, en a Esposizión Ispano-Franzesa de Bellas Artes de Zaragoza.
En París
Dende 1920 ye profesor d’escultura y repuxau en a Escuela Técnica de Artes y Oficios de la Mancomunitad y a l’año siguién contará con una sala espezial en a Exposición de Arte de Barcelona. En 1922 naixe a suya filla Pierrette y trunfa en o Salón d’Agüerro de París, an va a estar un asiduo. S’instalará definitivamén en a ziudat d’o Sena, por a cuala siempre se i eba sentiu atraito, con más motivo dimpués que a ditadura de Primo de Rivera le destituiga d’os suyos cargos dozens.
A os apuros economicos dezaga d’a marcha ta París, perén a remolque d’una salut precaria y d’os suyos febles libianos, seguirán más treballos, encargos como os que le plegarían dende Barzelona (por parte d’o Conzello u d’os organizadors d’a Esposizión Internazional de 1929). Prenzipiarán a acobaltar-se as suyas grans creyazions en chapa recortada (preservada grazias a os patrons de cartón que realizó): Maternidad,Arlequín a la mandolina u a mascareta de bronze de Kiki de Montparnasse, entre muitas atras.
Dende 1929 utiliza de traza más dezidida o fierro, en primeras en chapa recortada y dimpués en plancha, conzibe esculturas tan significativas como El Profeta u Urano, que le consagrarán como o gran mayestro d’a escultura metalica no fundida. En ixas obras Gargallo no renunzia a o clasizismo en o cual se formó, pero s’amuestra revoluzionario en sustituyir as estruturas mazizas y formas retundas por o vuedo y o vaco, por a lichereza espazial. El profeta (1933), escultura que conchuga volumen y vuedo, teoría cubista con un singular y enerchico espresionismo, mirando a perfezión teunica, ye seguramén a suya obra zima.
Tamién partizipó en esposizions difuera d’España y de Franzia: Estocolmo, Berlín… y Nueva York, an (en o que supondrá o suyo gran espaldarazo internazional) espone con gran esito entre os primers meses de 1934. A zaguers de ixe año lo fa en Barzelona y en Reus, an amás se le para un omenache con esposizión. Ye en ista ziudat tarraconense, en l’otel Londres, an una repentina bronconeumonía le dixa sin vida. L’ombre treballador y serio, con un aire retraito que amaga una singular amabilidat y un esprito onesto y cheneroso, poco dau a aparatos y a grandezas… dixa paso ixe 28 d’aviento de 1934 a l’artista inmortal.
Referenzias
- Antón Castro (1993): “Pablo Gargallo. La profecía del vacío”, en Aragoneses ilustres, ilustrados e iluminados (174-179). Zaragoza: Gobierno de Aragón.
- Carlos Mas Arrondo (2021): Pablo Gargallo. La luz habitada. Zaragoza: Prensas Universitarias.
- Diccionario Biográfico Español, Real Academia de Historia: https://dbe.rah.es/biografias/10479/pablo-gargallo-catalan
- Biografía muy completa y documentada en la web del Museo Pablo Gargallo: https://www.zaragoza.es/sede/servicio/equipamiento/2174
Autividaz didauticas
Partindo d’una formazión mui academica, Pablo Gargallo ye un d’os escultors más innovadors d’o sieglo XX. Combinó o clasizismo con a experimentazión. A suya temprana muerte le privó d’aber plegau a cotas más elevadas de fama y popularidat. Con ixo y con tot, o suyo treballo estió mui intenso y o suyo legau sobrevive dica os nuestros días.
Rastros d’a infanzia de Gargallo
En a localidat de Maella, an o escultor pasó os suyos primers siet años (y an tornaría de vez en cuan) puede visitar-se a suya casa natal, reabilitada como museu, con cualques obras suyas y material sobre a suya vida y obra. Maella, presidida por as restas d’o suyo antigo castiello, tiene atros puntos d’intrés (as ilesias, a Torre d’o Reloch…), que bien mereixen una visita.
Ueito obras de Gargallo
Profeta en a suya tierra, dimpués de muerto
Pablo Gargallo se movió entre cuasi tota a suya vida entre París y Barzelona. A suya relazión con Aragón estió escasa: se sabe d’as suyas estanzias breus en a suya Maella natal y d’a suya partizipazión en esposizions en Zaragoza, pero no estió sufizienmén conoixiu entre os suyos paisanos. Por eixemplo, a suya muerte no tenió un gran eco en a prensa aragonesa pero, a l’año siguién, o periodista José García Mercadal ya metió l’azento sobre a convenienzia d’alquirir obra suya por parte d’o Museu Provinzial de Zaragoza. Vente años dimpués, o catedratico y colezionista José Camón Aznar insistió sobre ixe tema, y a Institución Fernando el Catoólico propizió un omenache en Maella en 1962. Diez años más tarde tenió puesto una esposizión en Zaragoza y, por fin, l’alquisizión d’una versión d’o Gran Profeta.
Consonando con o zentenario d’a suya naixenzia, en 1981, una completa esposizión en a Loncha de Zaragoza estió o portegau a o contrato fundazional d’un museu cuals fondos prozedeban d’alquisizions y d’una donazión mui chenerosa por parte d’a filla d’o escultor, Pierrette Gargallo-Anguera. O Museu s’instaló en o palazio renazentista d’os Torrero, en a plaza de San Felipe y s’inauguró en chulio de 1985. O Museu amuestra una colezión permanén de Gargallo y aloxa tamién esposizions temporals y atras autividaz culturals.
Cómo estrutura os suyos contenius? I hai una biografía d’o escultor trestallada por epocas. Acobalta un feito de cadaguna d’ellas que te clame l’atenzión.
Clasico u vanguardista?
Por a suya formazión y desembolique profesional, Gargallo ye un escultor clasico: l’aprendizache de teunicas y recursos de l’ofizio, as conoixenzias que alquiere con tenazidat y o suyo perfezionismo abonan ixa idea más clasica. Pero a suya curiosidat le leva a mantener elementos d’o simbolismo y d’o modernismo en una evoluzión que le leva un poquet más enta allá. Partizipa en a escuela de París pero no s’integra dezididamén en grupos d’avanguardia. No ye un vanguardista en o sentiu estrito d’o termin, pero sí partizipa d’una indudable tradizión innovadera que ha empentau a evoluzión de l’arte en totas as epocas.
Investiga y mira o significau d’istos estilos y tendenzias artisticos entre os cuals se movió Pablo Gargallo:
Simbolismo – Modernismo – Novezentismo (noucentisme) – Cubismo – Espresionismo.
Pablo Gargallo se relazionó con importans artistas d’avanguardia en París. Con beluns d’els mantenió gran amistat. T’amostramos as obras que cuatre d’els realizoron en a epoca en a cuala consonoron astí con o nuestro escultor. Investiga y identifica cada autor con a suya creyazión.
- Juan Gris a- Mujer sentada
- Pablo Picasso b- Desnudo en jardín
- Manolo Hugué c- Guitarra
- Amedeo Modigliani d- Fumador
Soluzions: 1-d; 2-c; 3-a; 4-b
Lo novedoso en Pablo Gargallo
En escultura ha estau perén muito abitual a sustrazión (tirar a la piedra, a la fusta u a unatro material o que sobra dica plegar a la forma deseyada), pero Pablo Gargallo esplora unatra operazión menos frecuén: l’adizión; ye dezir, sumar, construyir a pur de planchas metalicas recortadas, estorzidas y encastadas chugando con lo concavo y lo conveso y con o vuedo entre as piezas como un elemento construtivo más: a luz y os reflexos, as uembras, enriqueixen ixe volumen.
A escultura autual debe muito a ixe trango que dio Gargallo, autor de piezas clasicas con mentalidat cubista. Ixo esplica que, tot y con no conseguir cualques obchetivos en vida (por eixemplo, no conseguió finanziamiento ta pasar a bronze o Gran Profeta, que se quedó, como atras obras, en o modelo d’escayola), estase reconoixiu internazionalmén sobre tot entre colezionistas, marchans, criticos y espezialistas. Dezaga d’a suya muerte s’organizoron esposizions individuals y coleutivas y nunca no dixó de tener una posizión importán en a istoria d’a escultura.
Pablo Gargallo influyió sobre escultors contemporanios u bella cosa posteriors, como Julio González, Henry Moore, David Smith u Martín Chirino. A partir d’a informazión que puedas localizar sobre cadagún d’istos 4 escultors, relaziona-los con o suyo puesto de naixenzia.
- Julio González a- Canarias
- Henry Moore b- Illinois, Estados Unidos
- David Smith c- Inglaterra
- Martín Chirino d- Cataluña
Soluzions: 1-d; 2-c; 3-b; 4-a
Aragoneses ilustres, ilustrados e iluminados
Descarga dende iste enlaz o PDF d’a publicazión Aragoneses ilustres, ilustrados e iluminados, de Antón Castro y José Luis Cano, editada por o Gobierno de Aragón en 1993.
DIRECCIÓN GENERAL DE POLÍTICA LINGÜÍSTICA
Departamento de Educación, Cultura y Deporte
Parque Empresarial Dinamiza (Recinto Expo)
Avenida de Ranillas, 5D - 2ª planta
50018 Zaragoza
Tfno: 976 71 54 65
Colabora:
