Odón de Buen y del cos

A zenzia y a libertat de pensamiento

Zuera, 1863 – México, 1945

O fillo de Petra del Cos y Mariano de Buen, sastre en Zuera, naixió a treszientos kilometros d’o mar. Mui dotau ta o estudio, o Conzello d’o suyo lugar le becó ta que podese fer o bachillerato en Zaragoza. A familia tamién fazió un gran esfuerzo: se tresladoron toz ta la capital, an o suyo pai obtenió un emplego d’acomodador en o Teatro Principal. O choven Odón impartiba clases particulars ta completar ingresos. Remató bachillerato con matricula d’onor y, de nuevo becau, marchó ta Madrit a estudiar Zenzias Naturals. Sentiba espezial predilezión por ixa materia dende que un amigo le regalase o Tratado de plantas de Aragón d’o gran botanico de Samper de Calanda Francisco Loscos.

S’inizió en o estudio d’a petrografía, mientres seguiba dando clases particulars (tenió como alumno a o futuro ditador Miguel Primo de Rivera) y asistindo a treballos de campo en a sarra madrileña. Os suyos treballos botanicos quedarían plasmaus en os suyos Anales de Historia Natural (1883). Chunto a Vicente Castelló creó l’Anuario Científico Español.

Vida

Dezaga de morir o suyo pai entre a epidemia de colera de 1885 y fer-se cargo d’a familia, o choven naturalista estió estriau ta una espedizión zientifica a bordo d’a fragata Blanca. Conzebiu como instruzión ta guardamarinas, o viache se plantió en dos fases: por o norte d’Europa y por o Mediterranio. Replegó muestras d’espezies que clasificó y forchó a suya vocazión ozeanografica, como contaría más tarde en o suyo libro De Kristianía a Tuggurt:

Alquirié en aquel viache a orientazión definitiva ta la mía vida personal esdevenidera. Me trobé con o mar y lo contemplé: magnifico, imponén y dispreziando a insignificanzia d’o nuestro barco de fusta. Trobé ombres espiertos, consziens d’a superioridat d’a intelichenzia umana. Sintié un ansia insaziable ta conoixer os secretos amagatos baixo as ondas y as causas de l’orichen d’a vida en os ozianos. Prenié a dezisión de adedicar-me a la ozeanografía, que alavez yera en os suyos inizios.

Obra

A la tornada, optó por un puesto universitario. En 1889 (o mesmo año d’a suya voda con Rafaela Lozano) ganó a catedra de Zoolochía en a Universidat de Barzelona, an desarrolló o suyo treballo dica 1911, empentando a ensiñanza d’as zenzias de traza notable: conseguió material zientifico abanzau, establió prauticas de laboratorio y salidas ta o campo y esfendió a esplicazión d’os fenomenos naturals a partir de l’evoluzionismo. D’ideas progresistas, abanzadas y republicanas, colaboró en a revista Las Dominicales del Libre Pensamiento que endrezaba o suyo suegro Fernando Lozano (Demófilo). Más tarde s’embrecaría con a Escuela Moderna endrezada por Francisco Ferrer Guardia: colaboró con o suyo Boletín, s’integró en o suyo patronato, impartió conferenzias y escribió libros de testo ta ixe innovador proyeuto pedagochico.

Istoria Natural

A suya Istoria Natural (zoolochía, botanica y cheolochía) ilustrada, muito popular en España y en cualques países sudamericans, esligó as iras d’os seutors más conservadors. A Ilesia catolica lo incluyió en l’Indice de libros prohibidos, mientres a suya esfensa y divulgazión d’os prenzipios evoluzionistas de Darwin levó a que o bispe de Barzelona (más tarde cardenal) Salvador Casañas le escomulgase: en 1895 se le deseparó d’a catedra y, entre fuertes corriens de protesta (os estudians plegoron a apedregar a residenzia d’o bispe), De Buen tresladó as suyas clases a o Zentro Federal continando con as suyas salidas ta o campo, dica que o Gubierno le tornó a catedra. Estió eslechiu conzellero en o Conzello de Barzelona en 1903 y cuatre años más tarde estió senador.

Grazias a la suya labor se creoron laboratorios biolochicos marinos en Mallorca, Malaga, Vigo y Santa Cruz de Tenerife, alazetals ta la formazión de chenerazions d’ozeanografos. Diferens campañas maritimas dende 1908 a bordo d’o buque Averroes, le permitioron trazar cartas de navegazión, estudiar os fondos d’o estreito de Chibraltar y analizar a fauna y a flora mediterranias.

En 1911 se treslada a la Universidat de Madrit: dende a catedra de Mineralochía y Botanica, dica la suya chubilazión en 1934, prosiguió a suya obra pedagochica en esfensa d’una ensiñanza zientifica, integral y esperimental. Publicará obras como Origen de los mares y Metamorfosis de los animales marinos. A suya labor estió dezisiva ta la fundazión en 1914 de l’Instituto Español de Oceanografía.

Amigo de Santiago Ramón y Cajal y d’o escultor valenziano Mariano Benlliure (que le fazió un busto), o suyo prestichio internazional ye creixén y le pleverán reconoixenzias y condecorazions. En 1919 partizipa en a Conferenzia Internazional ta la Esplorazión Zientifica d’o Mediterranio y diez años más tarde preside o Congreso Internazional d’Ozeanografía que se zelebró en Sevilla. Intervinió en o Consello Internazional ta la Esplorazión d’o Mar y en o Consello Oceanografico Iberoamericano entre muitas atras organizazions zientificas.

Cuan esclató a Guerra Zivil, Odón de Buen yera en o laboratorio de Palma de Mallorca. A isla quedó en mans d’os sublevaus, que le engarcholaron entre un año, dica a suya liberazión por o Gubierno republicano en un trueque con familiars de Primo de Rivera. Ta par d’alavez, o suyo fillo Sadí, medico y brilán investigador cuentra o paludismo y a malaria, eba estau asasinau en Cordoba por os insurchens. Vivió dica a fin d’a guerra en Barzelona, an presidió o Consejo Superior de Cultura , y dende astí se desplazó ta Franzia. En Banyuls-sur-Mer, puesto d’un laboratorio marino con o cual De Buen eba colaborau entre tota a suya vida profesional, murió a suya muller.

Beluns d’os suyos fillos s’eban exiliau a Mexico, y en 1941 se reunió con els. Colaboró con a Universidat Autonoma y publicó en prensa articlos sobre zenzia y politica. Murió en ziudat de Mexico en 1945. As suyas restas tornoron ta Zuera cuantos dezenios dimpués. Dende 2003, Odón de Buen escansa en a villa que tanto le dio, a la cuala perén tenió en corazón y mente, y d’a cuala ye fillo predileuto.

Referenzias

Antonio Calvo Roy (2015): Odón de Buen. Toda una vida. Zaragoza: Ediciones 94.
José Luis Cano (2003): Odón de Buen. El republicano de los mares. Zaragoza: Xordica.
Antonio Pérez Morte (2013): “Odón de Buen”. Revista Imán. https://revistaiman.es/odon-de-buen/
Wikipedia: https://es.wikipedia.org/wiki/Od%C3%B3n_de_Buen
Diccionario Biográfico Español, Real Academia de Historia: https://dbe.rah.es/biografias/9233/odon-de-buen-y-del-cos
Odón de Buen (2003): Mis memorias (Zuera 1863 – Toulouse, 1939). Zaragoza: Institución Fernando el Católico – Ayuntamiento de Zuera.
Odón de Buen (2018): Cartas a un labrador, 1887-1894. [Edición, introducción y notas: Antonio Calvo Roy]. Zaragoza: Institución Fernando el Católico. https://ifc.dpz.es/publicaciones/ebooks/id/3715

Autividaz didauticas

O lugar d’Odón de Buen

Odón de Buen yera de Zuera, a menos de trenta kilometros de Zaragoza.

Sitúa Zuera en una mapa d’Aragón.

Uei día ixa distanzia se salva en uns menutos, pero fa ziento zincuanta años… ixo yera unatra cosa. Ta poder seguir os suyos estudios dimpués d’a escuela primaria, amenestó una beca d’o Conzello y a suya familia se desplazó con él ta la capital aragonesa. Isto nos da idea d’a gran confianza d’os suyos en a suya valía como estudián y dica qué punto yera importán ta els o suyo esdevenidero profesional en una epoca en a cuala estudiar no yera a l’alcanz d’a mayoría.

Mientres alazetaba a suya carrera profesional, Odón escribiba en prensa librepensadera y publicó una serie d’articlos pedagochicos titulada “Cartas a un labrador”, endrezadas a un fictizio amigo de Zuera. Una d’as cosetas que deziba yera ista:

A tu no ha d’estrañar-te que yo sía naturalista; sabes que he naixiu en o campo y m’he criau entre o verdor d’os chopos y os fruitals que rodeyan o nuestro lugar natal, que se refleixan en as auguas purismas d’o Gallego. Sabes que he dormiu más d’una siesta entre as espigas doradas que escacha o trillo ta quitar o rico grano, convertiu más tarde en o blanco pan d’os nuestros fogars, y que, en cuenta d’alentar l’umido y floriu aire d’os claustros, he precurau perén emplir os míos libianos con l’aire d’os nuestros ortals, perfumau en primavera por l’aroma salvache d’as rosas, os chasmins y as cañuteras.

Si vives en una ziudat, tiens bel lugar, d’os tuyos pais, d’os tuyos lolos, a o que vaigas ta vacanzias, fiestas u cabos de semana? Si ye asinas, u si vives en una localidat más chicota, bi ha rincons u puestos que te cuaquen espezialmén, en os cuals te sientas a gusto? Compartiz memorias u esperenzias en clase.

Nunca no perdió o contauto con o suyo lugar d’orichen. Entre a suya vida, pasaba puendas de escanso en Zuera. Se sentiba en deuda con os suyos vezins y, grazias a la suya relazión personal dende antigo con o ditador Primo de Rivera, conseguió a construzión d’unas nuevas escuelas.

En o suyo testamento i eba dixau escrito que, fidel a las suyas ideas librepensaderas, deseyaba un entierro zevil y estar aloxau, cuan estase posible, chunto a las restas d’a suya muller. En 2003, as suyas restas estioron levadas ta un mausoleu en o fosal de Zuera (tres años más tarde, Rafaela sería traita dende Franzia), y o Conzello, chunto a atras instituzions provinzials y autonomicas, le fazió cuantos omenaches, editó obras suyas, etz.

Creyes que Odón de Buen sabió corresponder a la bogalería d’os suyos vezins? Piensas que Zuera ha sabiu reconoixer a valía d’iste fillo suyo?

A zaguers de 2021 se presentó en Zuera a Fundación Odón de Buen, replegando o testigo d’o Zentro de Estudios que, con o nombre d’o sabio zufariense, treballa dende tiempo dezaga. L’obchetivo d’ista Fundación ye o estudio y difusión d’a vida y obra d’Odón de Buen y del Cos, asinas como continar con a suya labor por medio d’a investigazión y divulgazión d’as materias en as cualas zentró a suya labor.

Entre istas mazadas u ditos, beluns s’achustan más a la gratitut y a bogalería, entre que atros induzen a desconfianza. Cuáls s’achustarían más a la esperenzia d’Odón de Buen?

Ye de bien naixius estar agradeixius
No mosiegues a man que te da de minchar
Cría cuervos, que te quitarán os uellos
Qui muito da, muito rezibe
Grazias y buen trato valen muito y cuestan barato

Sin duda, l’1; tamién o 4 y o 5; ta cosa: o 2 y o 3.

O viache iniziatico

A fragata Blanca, en a cuala s’embarcó Odón de Buen ta o viache que le decantó definitivamén ta la ozeanografía, eba sobreviviu a la batalla d’o Callao.

Mira informazión: dó y cuán tenió puesto ixa batalla? En qué mar? En qué conflito s’enmarca?

Puerto d’o Callao, en Perú (Oziano Pazifico), o 2 de mayo de 1866, dintro d’a guerra ispano-sudamericana que enfrontinó a España con Perú, Chile, Ecuador y Bolivia.

En ixe buque, emprendió una espedizión zientifica que se desarrolló en dos fases: una por o Mar d’o Norte y l’atra por o Mediterranio. Como ombre de zenzia afizionau a la escritura y con buena pluma (cosas que son perfeutamén compatibles), plasmó l’aventura en o suyo libro De Kristianía a Tuggurt.

Una recomendazión: o libro de Celia Marcén, de 2018, De Kristianía a Tuggurt: a odiseya d'Odón de Buen (Ed. Punto rojo), sobre o cual fabla l'autora en iste enlaz

Mira informazión y asigna cada puesto d’os cuals vesitó Odón de Buen a un d’os dos ambitos: Mar d’o Norte y Mar Mediterranio, indicando o país en o cual se troban autualmén:

Kristianía (Oslo) / Villefranche-sur-Mer / Tuggurt / Copenhague /

- Mar d’o Norte: Kristianía (Noruega), Copenhague (Dinamarca)
- Mar Mediterranio: Villefranche (Franzia), Tuggurt (Argelia)

Ya que somos fablando de misions zientificas que tenioron un caráuter “precursor”, nos trobamos con unatro viache que tenió puesto zincuanta años dinantes que a espedizión d’o Blanca. En aquella ocasión, unatro naturalista, en iste caso anglés, prenzipió a columbrar una importán teoría zientifica d’a cuala, prezisamén, Odón de Buen será un firme esfensor. Completa iste parrafo con as parolas que mancan:

Charles Darwin s’embarcó en o buque … (1) …. Partió d’o puerto anglés de … (2) … en 1831 y tornó en … (3) …. En ixos zinco años arredol d’o mundo prenió notas de tot o que veyió: fauna, flora, restas fosils, nuevas espezies, fenomenos que le clamoron l’atenzión, etz. Tot ixe treballo, d’o que estió ninviando cronicas periodicamén, lo maturaría entre muito tiempo dica a publicazión en 1859 d’a suya gran obra: … (4) … Ixe libro ye a base d’a Teoría d’a … (5) …, revoluzionaria y polemica en o suyo momento, y uei día incuestionable.

(1) HMS Beagle; (2) Plymouth; (3) 1836; (4) L’orichen d’as espezies; (5) Evoluzión

Odón de Buen escubrió y clasificó cualques espezies marinas cuals nombres, en descripzión latina, sonan un poquet a trabaluengas, y que incorporan l’apelliu d’iste sabio. Se trata de dos isopodos (Metopontus Bueni yPorcelio Bueni) y un gobido (Odondebuenia balearica).

Investiga: qué son os isopodos, qué son os gobidos?

L’esilio d’os zientificos… y a zenzia salvadera

Odón de Buen abió de marchar d’España ya viello, anque mui autivo inteleutualmén. A ideolochía dominán dezaga d’a vitoria en a Guerra Zevil d’os sublevaus cuentra a Republica yera incompatible con o suyo pensamiento y a suya trayeutoria politica, sozial y zevica. L’esilio estió una dolorosa esperenzia compartida por muitos zientificos que, a la calor d’iniziativas como a Junta de Ampliación de Estudios, y grazias a l’empenta y a chestión de chens como o propio Odón de Buen y muitos atros (entre els Santiago Ramón y Cajal) eba dau un empenta notable a la zenzia en España en os primers dezenios d’o sieglo XX. Os ideyals de modernizazión quedoron truncaus a partir de 1939.

Os prenzipals destins d’os zientificos esiliaus estioron Franzia y Mexico (prezisamén os dos países a os cuals marchó Odón de Buen), pero tamién Venezuela, Estaus Unius, Archentina, Cuba y a Unión Sovietica. Más de treszientos yeran catedraticos d’universidat, zincozientos yeran medicos y más d’un zentenar zientificos y profesionals d’atras arias: quimicos, farmazeuticos, fisicos, biologos, antropologos u matematicos. Y amás, zientos d’investigadors en zenzias sozials y umanisticas.

Entre els, muitos yeran aragoneses, igual que o nuestro protagonista. Documenta-te sobre istos personaches y relaziona cadagún d’els con a descripzión y disziplina que millor se le acomoda.

Honorato de Castro a) Gran pedagogo naixiu en Atea
Santiago Hernández Ruiz b) Museografo y istoriador de l’arte
Juan Vicéns de la Llave c) Fisico y matematico natural de Borxa
Rafael Sánchez Ventura d) Bibliotecario y archivero zaragozano

Soluzions: 1-c; 2-a; 3-d; 4-b

No olbidemos tampoco no o “exilio interior” que sofrioron inteleutuals que pagoron o suyo compromiso con a Republica y estioron escorporaus profesionalmén, alpartaus d’as suyas catedras, degradaus d’escalafón, ezetera. Entre els podemos destacar a dos aragoneses: Miguel Catalán (prestichioso fisico y espeutroscopista) y a insigne bibliotecaria, archivera, documentalista y lexicografa María Moliner. Ixo, por no afondar en atras profesions relazionadas con a investigazión y a dozenzia (mayestros y mayestras d’escuelas, profesors y profesoras en institutos y facultaz…), a comunicazión y o periodismo, as artes y as letras… y sin olbidar finals agún piors que l’esilio interior y esterior.

Trobas bel paralelismo entre istas situazions de fa uitanta años y más, y atras d’os nuestros tiempos, en atros puestos? Qué guerras, qué conflitos, en qué puestos, se son dando autualmén? De qué traza se perzibe a os acubillaus, a os acazaus? Tienen muito protagonismo en a prensa?

Odón de Buen se retrobó en l’esilio de Mexico con beluns d’os suyos fillos, que tamién desarrolloron brilans carreras profesionals. D’os seis “De Buen Lozano” que tenió con Rafaela, Rafael y Fernando siguioron os suyos trangos en a ozeanografía, Demófilo estió churista, Víctor incheniero, y Eliseo y Sadí se adedicoron a la medizina. Iste zaguero sofrió un trachico final, en estar asasinau en setiembre de 1936 por os insurchens faixistas en Cordoba. Sadí de Buen yera un prestichioso investigador en a luita cuentra o paludismo y a malaria. A estrutura que eba creau se vinió abaixo, dica tal punto que, en opinión de muitos espezialistas, o prenzipal problema sanitario en a España d’a inmediata posguerra yera prezisamén a malaria, cuentra a cuala no esistiba una estratechia medica solvén.

A trachedia personal y familiar d’Odón de Buen s’enreliga con bella cosa que ye una trista y real metafora d’o que suponió a Guerra Zivil por lo que fa a perda de capital umano, d’empobrimiento en toz os sentius, y esplica de qué traza ixo inzidió en as condizions y en a calidat de vida d’as personas.

Te pareixe que frases como “A zenzia nos salva” u “Sin zenzia no i hai futuro” pueden resultar un poquet exacheradas? Puedes argumentar a tuya opinión? Lo veyes en relazión con bel tema d’autualidat?

L’amistat por alto de tot

Odón de Buen tenió amistat con personas con as cualas compartiba sensibilidat y ideas (a o menos en parte), como Santiago Ramón y Cajal u l’anarquista Francisco Ferrer y Guardia, impulsor d’a Escuela Moderna. A iste zaguero le pediba que fuyise de l’adotrinamiento fázil, pero s’apachaba de raso con os suyos proyeutos razionalistas y de renovazión pedagochica.

Investiga sobre a Escuela Moderna: en qué consistiba? Qué le pasó a o suyo impulsor?

Prezisamén, en a Escuela Moderna consonó con unatro gran zientifico aragonés que, d’ideas más conservaderas, mantendría perén una gran integridat. Andrés Martínez Vargas, de Balbastro, ye un d’os grans impulsors d’a pediatría moderna. Tot y con as suyas esferenzias ideolochicas, Odón de Buen perén mantenió con él una buena relazión. Y nunca no perdió l’amistat que inizió mutoi choven con unatra persona que yera en as suyas antipodas de pensamiento: Miguel Primo de Rivera, militar ditador d’España entre 1923 y 1929 con a conformidat d’o rei Alfonso XIII.

Te pareixe chocán que dos personas que piensan mui distinto puedan estar amigas?

En una recopliazión de discursos suyos, Síntesis de una vida política y científica (Buenos Aires, 1944), Odón de Buen diz: “Tiengo a satisfazión de poder afirmar que he merexiu o respeto y encara l’afeuto de cuantos m’han tratau, tenendo ideas diametralmén oposadas a las mías. Nomás os que no me tratoron u os guiaus por a pasión insana, que enziega, me combatioron y m’acazoron”.

Ideas, chestión, memoria… y una zita ta rematar

Odón de Buen nunca no arrenunzió a las suyas ideas. Esfendeba a educazión ta totas as clases sozials (él mesmo partiba d’a suya esperenzia de nino pobre que podió estudiar grazias a o esfuerzo y a bogalería d’atros) y prauticaba con l’exemplo dando clases nueiturnas a obrers y ubrindo-se dende a richidez d’a Universidat. D’o mesmo modo, yera conszién que a inversión en investigazión yera clau ta o desembolique economico: por ixo, creyeba que os suyos estudios zientificos podrían dar empenta a la industria pesquera, a criaderos y piszifautorías… que os erbarios de plantas marinas, estudios d’o plancton y analisis de contaminazión aduyarían a tot ixo.

Tot lo conzebiba dintro d’una clara esfensa de “lo publico” y como base d’una riqueza coleutiva:

En o futuro a Ozeanografía ha d’estar a base comuna d’o nuestro treballo (…) ya que os ozianos l’han estau tot en o pasau d’a Tierra y dominan agún. Como os ozianos perteneixen a toz y dengún no los poseye, perteneixen a os más atrevius pensamientos, a os espritos zientificos más emprendedors, a la labor umana más difizil y a la millor organizada, a os lugars más zevilizaus y a os más poderosos. Serán o campo de toz os esfuerzos d’a zenzia, y a esplorazión ha d’estar coleutiva y a suya explotazión razionalizada por alcuerdos comuns. Agún conservan revelazions zientificas transzendentals y inesplorada riqueza. A Ozeanografía ye, pues, una zenzia internazional y perén abrá d’estar asinas.

En ixe sentiu estió tamién un chestor que, no pocas vezes, eba de clamar l’atenzión de qui prenen dezisions politicas.

O suyo prestichio internazional aduyó a ixo. A relazión de titols y condecorazions que rezibió ye larguisma: estió Presidén d’Onor d’a Societé Zoologique de France, dotor honoris causa por Bordes, miembro d’a Geographic Society de Washington, Gran Cruz d’a Orden de Santiago portuguesa, Gran Ofizial de Santo Carlos de Múnegu, Gran Ofizial de la Corona italiana, Comendador d’a Lechión d’Onor franzesa… En España numbrosas corporazions academicas le onroron con as suyas distinzions.

Pero, curiosamén, talmén a causa d’a suya muerte en l’esilio y a o vuedo d’os dezenios de ditadura en España… contina sin estar sufizienmén conoixiu. Como emos visto, en Aragón han cambiau as cosas: Odón de Buen mereixe agún mayor reconoixenzia.

Amás d’as suyas obras zientificas, divulgaltivas y didauticas, Odón de Buen escribió muito más: emos visto obras en diferens rechistros: libros de viaches, memorias, asayos (tamién una traduzión d’as memorias d’o revoluzionario italián Garibaldi y una biografía d’o gran economista ilustrau aragonés Jordán de Asso). Tot ixo quedó mui disperso por as zircunstanzias de l’esilio, anque tamién s’han feito abanzes (puedes veyer muestra d’ixo entre as referenzias que s’amuestran).

Pero talmén o que millor resume a suya acuitut debán de a vida, sía ista frase que replegamos d’o suyo testamento:

“A nuestra relichión se zifraba en una gran reutitut de conzenzia, en o culto d’o bien, d’a familia, d’a libertat, d’a chustizia y d’o treballo. Faziemos tot o bien que nos estió posible; no faziemos a sabiendas mal a no dengún”.