Ramón Pignatelli

O bien común como obchetivo de vida

Zaragoza, 1734-1793

Ramón Pignatelli vinió ta o mundo en Zaragoza, en o sino d’una familia d’a más altera nobleza. O suyo pai, d’orichen napolitano, yera prinzipe d’o Sacro Romano Imperio, y a suya mai, a ereua de numbrosos titols aristocraticos, entre els o condau de Fuentes. Tenió numbrosos chirmans, beluns d’os cuals sobrexioron, y muito, en politica, artes y letras. Y un d’els, o chesuita José Pignatelli, estió elevau a os altars como santo.

Ramón pasó a suya primera infanzia en Zaragoza, pero en 1740 a familia se tresladó a Nápoles, an residió dica que con doze años estió ninviau a Roma baixo a protezión d’un tío cardenal. Allí inizió a suya formazión eclesiastica y, a la vez, continó os suyos estudios, tanto d’umanidaz como d’asignaturas zientificas. Lo fazió con tanta brillantez que o papa Benedicto XIV lo premió nombrando-lo canonche d’a seu de Zaragoza. Tornó alavez ta la capital aragonesa, an en 1753 prenió posesión d’o suyo cargo. No por ixo dio por rematada a suya preparazión y en a universidat se graduó en Dreito, Canons y Filosofía y Letras, amás de seguir cursos de Zenzias Naturals, Fisica y Matematicas.

En o palazio d’os condes de Fuentes, o suyo fogar familiar, s’organizó a prenzipal escuela d’arte d’a ziudat y en él tamién teneba puesto una rufierta a la cuala asistiba un grupo d’ilustraus, entre els Ramón y o suyo chirmán Vicente, que conversaban sobre economía, zenzia y literatura d’alcuerdo a prenzipios mui abanzaus ta la epoca. De feito, a Universidat de Salamanca les negó l’autorizazión ta convertir-se en Academia d’o Buen Gusto en rayar a os cuals allí se reuniban de “enziclopedistas”.

Ixas ideyas ilustradas, que miraban a modernizazión d’o país y a utilidat publica de proyeutos y inversions, las metió Ramón Pignatelli en prautica cuan estió nombrau direutor d’a zaragozana Real Casa de Misericordia, que aculliba a popiellos y mendigos. Milloró a suya chestión ta que chenerase ingresos y no dependese d’as almosnas. Ordenó devantar tallers y atras instalazions, con plans diseñaus por él mesmo, en os cuals aprendeban un ofizio tanto os zagals como as zagalas y cuala produzión se vendeba. Os más importans estioron de texius, pero tamién los abió de bordau, sastrería, zapatería, arbañilería, carpintería, furno, cozina u enfermería. Unatra rentable fuen d’ingresos estió a plaza de toros que mandó construyir. Os benefizios que s’obteneban con os festexos se destinaban por entero ta o zentro. A primera corrida se fazió en setiembre de 1764.

Un año dinantes, en 1763, ocupó por primera vez o puesto de reutor d’a Universidat de Zaragoza, zircunstanzia que se repitió en atras cuatre ocasions, a zaguera en 1792. Entre o suyo reutorado, se reformoron os estatutos d’a instituzión y s’implantoron valiosas milloras en a ensiñanza.

O suyo intrés por os temas artisticos le empentó a presidir a partir de 1771 a chunta preparatoria encargada d’organizar a creyazión d’una academia de Bellas Artes que s’alexase d’os usos y costumbres d’os gremios, d’orichen meyeval y agún en vigor, en tot lo referén a la ensiñanza artistica y a execuzión d’as obras. Pero os suyos afans no darían fruito dica vente años más tarde, cuan Carlos IV, en 1792, dio o suyo visto bueno ta que se fese realidat a enchegada d’a Real Academia de Bellas Artes de San Luis. A suya naixenzia estió empentada por a Real Sociedad Economica Aragonesa de Amigos del País, surtida en 1776 ta espardir as ideas d’a Ilustrazión en Aragón asinas como conoixenzias teunicas y zientificas. Ramón Pignatelli estió un d’os suyos prenzipals promotors y qui prenunzió o suyo discurso inaugural.

No satisfeito con tota ixa inzesán autividat, Pignatelli encabezó tamién, dende 1772, a interpresa por a cuala uei ye más recordau, a construzión d’a Canal Imperial d’Aragón. A obra s’eba iniziau en o sieglo XVI, en tiempos de l’emperador Carlos V, d’astí o suyo nombre. Manimenos, s’eba albandonau en trobar-se con grieus problemas teunicos. O prenzipal, a nezesidat que as suyas auguas travesasen o canziello d’o río Xalón.

D’alcuerdo a l’ideyario ilustrau de benefiziar o progreso, uns años dinantes s’eba represo o proyeuto y puesto en mans d’una interpresa olandesa. Pero os problemas teunicos y, sobre tot, finanziers no desapareixieron. Estió alavez cuan o conde d’Aranda, presidén d’o Consello de Castiella, nombró proteutor d’a Canal a Pignatelli y le conzedió amplos poders. Con Pignatelli a o mando, l’obchetivo prenzipal d’as autuazions estió alportar augua de riego prozedén de l’Ebro a baixo pre a una superfizie agricola fertil anque xuta. Y, amás, establir un servizio de navegazión fluvial que permitise transportar mercaderías y pasachers.

Mui pocos creyioron que tan ambiziosos plans podesen fructificar. Pero Pignatelli no s’espantó debán de as dificultaz y se disposó a venzer toz os obstaclos. Con finanziamiento d’o Estau y l’aduya de cuantos rechimientos de militars como man d’obra, s’edificó una presa amán de Tudela, a l’inizio d’a Canal. Entre años, se construyioron esclusas, puens, molins y chicoz puertos, amás d’a Canal de Tauste, complementaria d’a prenzipal. En 1782 yera listo un gran acueduto sobre o Xalón y dos años dimpués unatro de fusta sobre a Uerva. L’augua plegaba en Zaragoza en outubre de 1784 y Pignatelli yera rezibiu como un éroi. As obras no concluyirían dica seis años más tarde, pero dinantes Pignatelli mandó instalar una fuen que zelebraba o esito d’a misión y en a cuala se puede leyer: “Ta convenzimiento d’incredulos y escanso de viachers”.

A la muerte de Pignatelli, a Canal s’extendeba uns pocos kilometros aguas abaixo d’a capital aragonesa. Se pretendeba que plegase dica o Mediterranio pero a mala calidat d’o terreno lo impidió. A suya titanica labor, que eba orichinau una gran oposizión por parte de cualques nobles y d’a Ilesia, que perdioron tierras y diezma, benefizió a las clases populars, en espezial a modestos labradors y a chornalers de Zaragoza. Como muestra d’almirazión, a ziudat dezidió devantar un molimento publico en a suya memoria, una gran escultura de bronze, a primera que i abió en Zaragoza dende epoca d’os romanos, cual devantadera se retardó, manimenos, dica 1858.

Referenzias

Antonio de las Casas y Ana Vázquez (2000): El Canal Imperial de Aragón. Zaragoza: CAI.
Antón Castro (1993): “La sagrada autoridad de Ramón Pignatelli”, en Antón Castro y José Luis Cano, Aragoneses ilustres, ilustrados e iluminados (pp. 120-125). Zaragoza: Gobierno de Aragón.
León González Rodrigo (1984): Historia del Canal Imperial de Aragón.
Guillermo Pérez Sarrión (1984): Agua, agricultura y sociedad en el siglo XVIII. El Canal Imperial de Aragón, 1766-1808, Zaragoza, IFC, 1984.
Guillermo Pérez Sarrión, Guillermo Redondo Veintemillas y Fernando Baras Escolá (1997): Los tiempos dorados: estudios sobre Ramón Pignatelli y la Ilustración. Zaragoza: Gobierno de Aragón.
Wikipedia: https://es.wikipedia.org/wiki/Ram%C3%B3n_Pignatelli

Autividaz didauticas

A Ilustrazión

En o siguién video se fabla d’a Ilustrazión.

Dezaga de veyer-lo, indica as ideas en que se basa a Ilustrazión y contesta iste breu cuestionario. Da-te cuenta que tot y con estar un movimiento de fa más de doszientos años posó as bases d’o pensamiento autual.

En qué consiste a deseparazión de poders?

Por qué a educazión ye tan importán ta os ilustraus?

Qué filosofos franzeses son basicos en a formazión d’o pensamiento ilustrau?

Qué ye a Enziclopedia? Por qué tenió tanta repercusión?

Qué feito afavorió o desembolique d’a Ilustrazión en España? Zita beluns d’os suyos representans.

O movimiento ilustrau en Aragón

A Ilustrazión aragonesa prenzipia a manifestar-se a partir d’esmeyaus d’o XVIII, amplando a suya influenzia en os dos zaguers dezenios d’o sieglo. En ella partizipan tres grupos de protagonistas diferenziaus:

Nobles.
Miembros d’a clase meya, más ubiertos a las reformas propuestas por a corte.
Personalidaz aragonesas afincadas en Madrit, an exerzen puestos destacaus en l’ambito politico y cultural.

Localiza bel personache ilustrau aragonés perteneixién a cadagún d’istos gruposMenziona bella iniziativa concreta que se levó a cabo en Aragón entre o sieglo XVIII que aiga de veyer con os obchetivos que s’esponen contino:

Igual que atros grupos ilustraus, os aragoneses se proponen una serie d’obchetivos entre os cuals destacan:

Reforma educativa en os libels basicos.
Creyazión de zentros d’estudios a la marguin d’a Universidat, ta completar a formazión en os ambitos zientifico, umanistico y churidico.
Atenzión a la sanidat publica (luita contra as epidemias, analisis de potabilidat de l’augua, campañas de vacunazión, etz.).
Adopzión de midas ta millorar a situazión d’a poblazión adedicada a la mendizidat.
Promozión d’a educazión artistica seguntes os presupuestos d’a epoca.
Modernizazión d’a maquinaria agricola orientada a la optimizazión d’os recursos.
Creyazión de Soziedaz Economicas que promozionasen cambios lechislativos en materia economica.

Fuen

Amigos ilustraus y o «Partiu Aragonés»

En Aragón, esistiba dende meyaus d’o sieglo XVIII un autivo movimiento ilustrau.

A Ilustrazión aragonesa se carauterizó, por un costau, por a suya preocupazión reformista, pues prebó de revitalizar a economía rechional fren a la tendenzia zentralista d’o despotismo ilustrau; y, por unatro, por a suya notable partizipazión en os cuadros dirichens d’a corte. Dos d’os suyos ombres más representativos estioron o conde d’Aranda, dende Madrit, como presidén d’o Consello de Castiella y cabeza d’o clamau por cualques istoriadors «Partiu Aragonés», y Ramón Pignatelli, en Zaragoza. Con a suya intelichenzia y tozoludez desempeñoron un destacau papel ta adubir que o tan deseyau proyeuto d’a Canal Imperial plegase a feliz termin. O momento y as zircunstanzias afavorioron ixa gran interpresa.

Mira beluns d’os personaches aragoneses d’a epoca que formaban parte d’o clamau «Partiu Aragonés» (O conde d’Aranda, o duque de Villahermosa, José Nicolás d’Azara, Manuel Roda y Arrieta…) y destaca qué amistaz refirmoron a Pignatelli en as suyas iniziativas.

En ista web trobarás datos intresans de toz els

Sabes qué ye a Real Sociedad Economica Aragonesa de Amigos del País? Cuán surtió? Estió a primera d’España? Partizipó en ella Ramón Pignatelli? Cuáls yeran as suyas prenzipals autividaz? Mira en internet informazión a o respeuto.

Iniziativas de Pignatelli

Emos leyiu en a biografía de Ramón Pignatelli belunas d’as iniziativas que levó a cabo moviu por as ideas d’a Ilustrazión y o deseyo de progreso ta Aragón. Describe as que s’enumeran contino, comenta qué creyes que teneban d’abanzau ta o suyo tiempo y si siguen funzionando en l’autualidat.

- Hogar de Misericordia
- Plaza de toros
- Academia de San Luis

En ista web trobarás informazión detallada sobre os mesmos

Canal Imperial d’Aragón

A prenzipal obra de Ramón Pignatelli estió a continazión d’a Canal Imperial d’Aragón, iniziada en tiempos de Carlos V, d’astí o suyo nombre.

Mira informazión sobre a suya construzión y sobre atras similars levadas a cabo en diferens países d’Europa, asinas podrás comprebar a importanzia que iste tipo d’obras tenió en a Europa d’o sieglo XVIII. De seguras que en Wikipedia trobarás datos relazionaus.

Son numbrosos os proyeutos ilustraus d’as canals, iniziaus en Franzia en o sieglo XVII, y continaus en atros países como España en o sieglo XVIII, ta la navegazión como funzión prenzipal, y o riego como funzión secundaria. As canals de Braire, Languedoc u Midi, Burgogne u Loira en Franzia, unindo capiters de ríos con o mar, tenioron a suya respuesta en España a partir d’esmeyaus d’o sieglo XVIII con o proyeuto d’a Canal de Castiella ta la cual o marqués de Cala trayió a Carlos Lemaur de Francia con l’obchetivo de dar salida a os produtos castellans a traviés d’o Cantabrico, d’o que s’ubrioron 207 km, y con a Canal Imperial d’Aragón, ta comunicar o Cantabrico con o Mediterranio, d’o que s’ubrioron 101 km, dende o Bocal (auguas abaixo de Tudela) dica pasau Zaragoza, como vías artifizials d’augua, que compensasen a manca de navegabilidat d’os ríos naturals.

Atros puestos an se levoron a cabo obras d’incheniería similars estioron Franzia, Escozia y Rusia, beluns con más esito que no atros.

Fuen

Observa o recorriu d’a Canal Imperial d’Aragón. Qué dificultaz aprezias que tenioron en a suya construzión? Sabes cuantos kilometros se construyioron finalmén? Estió navegable? Ta qué se sigue utilizando en l’autualidat?

Fuen

O legau de Pignatelli

Dó se conservan vestichios de Pignatelli en l’autualidat? Estatuas, carreras, obras publicas, instituzions empentadas por él… Son numbrosos os siñals que ha dixau iste personache aragonés en o suyo trango por a nuestra istoria.

Localiza eixemplos y esplica bella carauteristica d’els. Ilustra-los con bella fotografía autual.

Aragoneses ilustres, ilustrados e iluminados

Descarga dende iste enlaz o PDF d’a publicazión Aragoneses ilustres, ilustrados e iluminados, de Antón Castro y José Luis Cano, editada por o Gobierno de Aragón en 1993.