Pedro Alfonso (Moisés Sefardí)
Un valioso puen entre culturas
C. 1050 – C.1120
No se conoixe a calendata d’a naixenzia de Pedro Alfonso, ni tampoco no a d’a suya muerte. No se sabe con certeza do vinió a o mundo y s’ignora do murió. Os unicos datos d’a suya vida que han plegau dica nusatros se troban en o prelogo d’un d’os suyos libros, Dialogo contra os chodigos. En él se nos diz que residió en Uesca y que a primers d’o sieglo XII perteneixeba a la comunidat ebrea d’o lugar, en a cuala ocupaba un puesto distinguiu, tal vegada como rabín y medico.
En 1106 dezidió albandonar a relichión d’os suyos pais, o chudaísmo, y estió baltizau como nuevo cristiano en a seu oszense, o que suponió una gran escandalera entre os seguidors d’a suya antiga fe. O patrín d’a zeremonia estió, ni más ni menos, que o rei d’Aragón, Alifonso I o Batallero.
Ta acallar as protestas de qui s’oponeban a ixe radical cambio y le acusaban de traidor y de vender-se por diners u por un puesto en a corte, escribió un libro, o ya menzionau Dialogo contra os chodigos, en o cual prebó de chustificar a suya dezisión. L’estructuró como una conversazión entre Moisés, o suyo viello yo, y Pedro, o suyo nuevo yo. Cadagún esfendeba a suya relichión y lo feba d’una traza didautica y sinzera, con una autitut conziliadera, moderada, sin de fanatismos ni intoleranzias. Qui saliban pior paraus, manimenos, yeran os musulmans, a qui se desprestichiaba. O testo conoxió una gran difusión por tota Europa. Y as acusazions contra l’islam estioron utilizadas como argumento por pedricadors cristianos ta endizcar guerras y cruzatas.
En ixe libro i eba numerosas referenzias zientificas, como l’afirmazión que a Tierra yera esferica y no plana. Bella cosa que ya se sabeba en l’Antigüidat, pero que en muitas partes d’Europa s’eba olbidau. Y ixo ye a causa que Pedro Alfonso conoixeba lo prenzipal d’a zenzia arabe, a más abanzada d’o momento. Os suyos plantiamientos, manimenos, son siempre orichinals, pus no se fía d’o que le dizen, sía qui sía l’autor d’as teorías, y lo compreba y lo revisa tot.
Se sabe que Pedro Alfonso, que fablaba y escribiba en ebreu, arabe y latín, viacheó a Anglaterra, talmén ta exerzer como medico d’o rei Enrique I, y allí esplicó astronomía y cómo calcular calandarios y preveyer clises, ta absoluto asombro d’os sabios locals. As suyas enseñanzas, que incluyiban matematicas, cheometría, mosica y medizina, resultoron fundamentals ta que tornase a Ozidente parte d’o saber tresbatiu de griegos y romanos, que os musulmans eban conservau, asinas como ta difundir destacaus abanzes feitos por istos zaguers.
Literatura
Pero si Pedro Alfonso ye uei amplamén reconoxiu no ye como teologo ni como zientifico, sino como literato. Estió autor d’un conchunto de narrazions breus que tituló Disciplina clericalis, que se podría traduzir como “instruzión d’estudiosos” u “enseñanza d’eruditos”. Beluns la consideran a primera novela medieval y, sin duda, tenió un enorme aszendén entre sieglos en a narrativa de tota Europa.
Se trata de más de trenta chicoz cuentos escritos con una finalidat didautica, ya que d’os mesmos se pueden estrayer lizions y modelos de conduta. A mayoría tienen forma de dialogo entre un mayestro y un disziplo u entre un pai y un fillo. Con ixas chicotas falordias s’aponderan virtuz y se denunzian vizios, s’alvierte d’a fugazidat d’a vida y que cal avaluar lo verdaderamén importán, l’amistat y a buena conduta, y no os esitos y as riquezas, que pueden desapareixer de sopetón. Se consella cómo tratar con as personas que te rodeyan, con os poderosos y dica con Dios. Y tot se fa d’una traza amena, con abituals toques d’umor.
Iste tipo de relatos tiene o suyo orichen en a tradizión oriental. Muitos surtioron en a India, en Persia u en a cultura ebrea y estioron adautaus por literatos arabes, que les dioron un aire particular, como en os cuentos d’As mil y una nueis. En a Peninsula Iberica, entre o dominio musulmán, tenioron gran azeutazión y fuoron luego traduzius a o latín, por o que ye fazil rastriar a suya influenzia en numerosas obras d’a literatura castellana: El conde Lucanor, El cantar de mío Cid, La Celestina, El libro del buen amor…
En a resta d’Europa, a repercusión d’a obra de Pedro Alfonso resultó formidable. Disciplina clericalis se leyió en toz os países y en tantas versions que a la fin se creyió que i eba diferens obras de diferens autors. Dezaga d’a invenzión d’a imprenta, se multiplicó a suya difusión y o suyo influixo se mantenió entre zenturias en cuentos populars y en escritors d’a talla de Boccaccio, Dante, Chaucer, Shakespeare, Molière, Cervantes, Lope de Vega, Zorrilla, Baltasar Gracián, etz., etz., que por lo común esconoixeban que l’autor d’os testos que les serviban d’inspirazión yera un antigo rabín que vivió en Uesca en plena Edat Meya.
Referenzias
- Pedro Alfonso (1980): Disciplina clericalis. Zaragoza: Guara Editorial, 1980.
- Mª Jesús Lacarra (2000): El cuento oriental. Zaragoza: CAI.
- Wikipedia: https://es.wikipedia.org/wiki/Pedro_Alfonso
- Gran Enciclopedia Aragonesa on line: http://www.enciclopedia-aragonesa.com/voz.asp?voz_id=9915
Actividaz didacticas
A epoca de Pedro Alfonso
Un poquet d’istoria.
Leye o siguién testo y observa a evoluzión en as condizions de vida d’os chodigos en l’autual territorio aragonés. Sabes cuán plegoron ta la zona os primers chodigos y cuán estioron espulsaus definitivamén? Mira informazión sobre belún d’os personaches chodigos zitaus.
En epoca d’os reinos taifas Zaragoza vivió un periodo d’esplendor que se refleixó en o desembolique d’as zenzias, as artes y o pensamiento. Os suyos reis se rodioron de poetas, artistas y zientificos. Beluns d’els profesaban a relichión chudía, como o proeta y filosofo Solomo Ibn Gabirol (a qui os cristians conoixioron con o nombre d’Avicebrón ) u Ibn Paquda, unatro destacau literato y pensador, de conchunta con poetas como o tudelano Yehuda ha-Leví. Tamién estió importán l’alportazión d’os chodigos en o campo d’as matematicas y l’astronomía .
En zaguers d’o sieglo XI l’abanz cristiano s’intensificó. Os aragoneses ocuporon o sur d’a Zinca y en Castiella Alfonso VI conquirió Toledo. Debán d’ista situazión, cuantos reis d’as taifas peninsulars solizitoron a intervenzión d’os almoravides, que reinaban en o norte d’Africa.
Poco tiempo dimpués l’imperio almoravide reunificó o dominio musulmán en a Peninsula Iberica. A unica que se mantenió independién estió a taifa de Zaragoza. Pero por o norte o reino d’Aragón continaba a suya espansión. En 1089 conquirió Monzón y en 1096 Uesca. Finalmén, en 1110, o rei saraqustí estió redotau y muerto amán de Tudela por l’Alfonso I o Batallero y os almoravides se fazioron dueños de Zaragoza, dica que en 1118 a ziudat estió ocupada por o soberano aragonés.
A situazión d’os chodigos iba a cambiar con a conquiesta cristiana y con a espansión d’o reino d’Aragón. Como caleba repoblar y organizar alministrativamén os extensos territorios conquerius a l’Islam , o monarca aragonés demandó a colaborazión d’os chodigos, tanto os que ya viviban en as zonas conqueridas como os que plegaban de territorio musulmán fuyindo d’o fanatismo relichioso d’os almoravides y os suyos suzesors, os almoades. Mientres a os musulmans se les desplazaba difuera d’o rezinto amurallau d’as ziudaz, a os chodigos se les permitiba vivir en os suyos anteriors barrios. Gozaban d’a proteuzión d’o rei, pero no teneban os mesmos dreitos que os de demás aragoneses. A suya libertat yera condizionada ya que eban de satisfer as petizions de diners d’o suyo siñor en conzeuto d’impuestos.
Muitos d’os barrios chodigos medievals han plegau dica os nuestros días camuflaus en os cascos antigos de lugars y ziudaz. En Aragón son numerosas as restas conservadas. Mira cómo yeran ixos barrios y que carauteristicas singulars teneban. Puedes aduyar-te d’istas dos publicazions que trobarás en a web.
Calle Mayor d’a Judería de l’Almunia de Doña Godina
Elabora un glosario con os siguiens termins: Sefarad, sinoga, torá y talmud.
O personache
Datos biograficos replegaus en o testo.
Emos leyiu en a biografía de Pedro Alfonso que estió apadrinau en o bautismo por o rei d’Aragón Alfonso I en Uesca. Averigua en qué atros puestos vivió, qué luengas eba de conoixer Pedro Alfonso y con qué atro rei treballó, posiblemén como medico. Puez aduyar-te ta documentar-te con a suya voz en Wikipedia.
A obra de Pedro Alfonso
As dos obras más conoixidas de Pedro Alfonso son Dialogo contra os chodigos y Disciplina clericalis
En Dialogo contra os chodigos intentó chustificar a suya dezisión de convertir-se a o cristianismo. Lo farchó como una conversazión entre Moisés, o suyo viello yo, y Pedro, o suyo nuevo yo. A esferenzia d’atros libros similars escritos en a epoca, o de Pedro Alfonso contaba con l’avantalla que o suyo autor teneba una profunda conoixenzia d’as dos relichions, por o que as suyas replicas en favor d’o cristianismo yeran millor argumentadas. A suya esfensa yera didautica y sinzera, con una autitut conziliadera, moderada, sin de fanatismos ni intoleranzias.
Disciplina clericalis ye formada por más de trenta chicoz cuentos escritos con una finalidat didautica, ya que d’os mesmos se pueden estrayer lizions y modelos de conduta. Iste tipo de relatos tiene o suyo orichen en a tradizión oriental. En a Peninsula Iberica, entre o dominio musulmán, tenioron gran azeutazión y fuoron luego traduzius a o latín, por o que ye fazil rastriar a suya influenzia en numerosas obras d’a literatura castellana: O conde Lucanor, O cantar de mío Cid, A Celestina, O libro d’o buen amor…
Contino se reproduz un d’os relatos que escribe Pedro Alfonso en o suyo libro Disciplina clericalis. Como en atras istorias d’o libro, l’autor se sirve d’os animals ta presentar as suyas enseñanzas.
Dizió un arabe a o suyo fillo: «Si veyes que belún se troba meso en asuntos malos, no te mezcles, pus gosa pasar que o que suelta pendola lo veye cayer sobre él».
Exemplo de l’ombre y a serpiente
Belún que pasaba por una selva veyió una serpiente a la cuala cualques pastors eban ligau a uns tochos luego de forzar-la a dixar a suya contorsión natural; o caminán, dimpués de soltar-la la calentó y a serpiente, una vez calién, encomenzó a enrollar-se arredol d’o suyo salvador, dica que estió a punto d’afogar-lo. Alavez l’ombre le dizió: «Qué fas? Por qué tornas mal por bien?». A isto a serpiente respondió: «No foi sino o que corresponde a la mía naturaleza». Dizió él: «Te fazié un bien y me lo pagas con un mal?». Mientres discutiban asinas, clamoron como arbitro a una rabosa y le contoron tot lo suzediu. Alavez dizió a rabosa: «No puedo chuzgar ista causa nomás de sentidas, si no veigo, en primeras, con os míos propios uellos, o que ocurrió». Estió ligada a serpiente como yera dinantes. «Agora –le dizió a rabosa– escapa si puez; y tu ombre, no t’ocupes d’esligar serpiente. No sabes que qui suelta a pendola lo veye cayer sobre él?».
Cuál crees que ye a enseñanza d’iste cuento? Mira en o ret atros relatos similars, falordias protagonizadas por animals. Fixa-te en a suya nazionalidat y por quí y cuán estioron escritos. Veyerás que los i hai d’autors mui antigos, d’a Grezia clasica (Esopo), y más modernos, d’os sieglos XVII y XVIII (La Fontaine, Iriarte, Samaniego).
T’alcuerdas de bel cuento que te contasen de nino protagonizau por animals? Teneban ixos cuentos, como o d’os tres tozinez, moralejas u ensiñanzas?
Una parte d’os relatos de Disciplina clericalis ye endrezada a eixemplificar a maldat d’as mullers. Ista autitut antifeminista, de gran popularidat en a epoca, ye mui comuna en a tradizión cuentistica medieval europea asinas como en os testos biblicos y en os d’orichen oriental.
Averigua dó s’escribió y de qué trata o libro d’As mil y una nueis. Veyes bella relazión con os cuentos de Pedro Alfonso?
Influenzia de Pedro Alfonso
Repercusión posterior d’a suya obra.
A suya obra Dialogo contra os chodigos estió utilizada como referén inteleutual contra o chudaísmo en os sieglos posteriors. Por lo que fa a la Disciplina clericalis, os suyos relatos estioron replegaus de traza más u menos literal en atras exitosas recopilazions de cuentos en a peninsula Iberica, como El conde Lucanor de l’infán Don Juan Manuel u o Libro del Buen Amor de l’Arciprestede Hita , y influyioron de traza determinán en a obra posterior de zelebres escritors de tota Europa como Bocaccio, Dante Alghieri, Chaucer, Cervantes u Lope de Vega.
Localiza bel fragmento de El conde Lucanor u d’o Libro del Buen Amor que se pueda meter en relazión con as publicazions de Pedro Alfonso.
D’a suya obra zientifica nomás nos han plegau que cuatre capitols d’unas tablas astronomicas prezedidas d’una introduzión y un prelogo, publicadas en 1115. Con os suyos escritos, as suyas traduzions y as suyas enseñanzas, Pedro Alfonso contribuyió a esparzer a zenzia arabe en Occidente. Se sabe que entre a suya estanzia en Anglaterra, an asombró a la corte en predezir un clis lunar, tenió como disziplo a Walcher, cleigo y astronomo. Tamién podió aber estau o suyo pupilo Adelardo de Bath, considerau o difusor d’as tablas astronomicas d’Al-Jwarizmi.
Mira informazión en internet sobre ixos zientificos angleses, propagadors en Ozidén d’as teorías orientals sobre a medizión d’o movimiento d’os astros y redauta unas breus biografías sobre os mesmos.
Influenzia de Pedro Alfonso
Repercusión posterior d’a suya obra.
A suya obra Dialogo contra os chodigos estió utilizada como referén inteleutual contra o chudaísmo en os sieglos posteriors. Por lo que fa a la Disciplina clericalis, os suyos relatos estioron replegaus de traza más u menos literal en atras exitosas recopilazions de cuentos en a peninsula Iberica, como El conde Lucanor de l’infán Don Juan Manuel u o Libro del Buen Amor de l’Arciprestede Hita , y influyioron de traza determinán en a obra posterior de zelebres escritors de tota Europa como Bocaccio, Dante Alghieri, Chaucer, Cervantes u Lope de Vega.
Localiza bel fragmento de El conde Lucanor u d’o Libro del Buen Amor que se pueda meter en relazión con as publicazions de Pedro Alfonso.
D’a suya obra zientifica nomás nos han plegau que cuatre capitols d’unas tablas astronomicas prezedidas d’una introduzión y un prelogo, publicadas en 1115. Con os suyos escritos, as suyas traduzions y as suyas enseñanzas, Pedro Alfonso contribuyió a esparzer a zenzia arabe en Occidente. Se sabe que entre a suya estanzia en Anglaterra, an asombró a la corte en predezir un clis lunar, tenió como disziplo a Walcher, cleigo y astronomo. Tamién podió aber estau o suyo pupilo Adelardo de Bath, considerau o difusor d’as tablas astronomicas d’Al-Jwarizmi.
Mira informazión en internet sobre ixos zientificos angleses, propagadors en Ozidén d’as teorías orientals sobre a medizión d’o movimiento d’os astros y redauta unas breus biografías sobre os mesmos.
DIRECCIÓN GENERAL DE POLÍTICA LINGÜÍSTICA
Departamento de Educación, Cultura y Deporte
Parque Empresarial Dinamiza (Recinto Expo)
Avenida de Ranillas, 5D - 2ª planta
50018 Zaragoza
Tfno: 976 71 54 65
Colabora:
