María Domínguez
a voz despierta, a voz rescatada
Pozuelo d’Aragón, 1882 – Fuendexalón, 1936
A primera muller que exerzió una alcaldía en España dintro d’un sistema democratico estió una filla de chornalers d’o campo. María Domínguez Remón gubernó o Conzello de Gallur entre chulio de 1932 y febrero de 1933. Pero, encara estando ixo importán, no dixaría d’estar una istoria si no tenésenos en cuenta o contesto y a resta d’a suya vida: una vida de treballo, esfuerzo contino y superazión personal.
María Domínguez Remón, filla de Sixto y María, estió mui poco a la escuela. Os meses de l’año ditaban as suyas fainas, como as de tantos atros, ya estase espigar, vendemar u replegar olivas, entre muitas atras labors d’o campo y d’a casa. En os suyos ratos libres leyeba tot o que cayeba en as suyas mans (impresos, romanzes, cuentos…), ta enueyo d’a suya mai, qui seguramén pensaba que salir-se d’o rol estipulau nomás podría trayer-le que desgrazias.
![30_dominguez](https://personajesilustres.lenguasdearagon.org/wp-content/uploads/2022/01/30_dominguez.jpeg)
Vida
“María a fata”, le clamaban qui la veyeban timida, sin mirar-se a os ombres a la cara (utilizaría ixa motada con intenzión ironica en beluns d’os suyos escritos periodisticos), seguindo os ditaus d’a familia. Ixa obedienzia le levó a casar-se a os deziueito con un ombre de mala lei que la maltrataba. As vexazions y as rebaixadas duroron siet años: os que tardó María en fuyir ta Barzelona, an treballaría como sirvienta. Muller dezidida, gran de cuerpo y fuerte de men, desafiando a las denunzias d’o suyo ombre, tornó ta Pozuelo; con os estalbios de Barzelona se crompó una maquina de cusir que le permitió ganar-se a vida de traza autonoma.
Prenzipió a fer servir a suya pasión por a leutura y a escritura: en 1914 ninvió un articlo d’opinión a o madrileño El País, d’afinidaz republicanas y sozialistas. O direutor d’ixe diario, Roberto Castrovido, lo veyió con bel paternalismo en calificar-lo como “felalo grito de protesta d’una labradera”, pero l’articlo estió publicau.
Mayestra
A partir d’alavez, María mantiene una intensa vida cultural. Sin dixar de cusir, en Zaragoza treballa como mayestra (se quitaría o títol ofizial bella cosa más tarde), estudia en a Escuela d’Artes y Ofizios y empeza a colaborar asiduamén en o periodico Ideal d’Aragón, organo d’o Partido Republicano Autónomo Aragonés, endrezau por Venancio Sarría. En os suyos articlos (que gosa siñar con seudonimos como “Imperia” u “Almina”) s’amuestra antibelizista y contraria a la pena de muerte.
Entre un tiempo vivirá en Nabarra, exerzendo como mayestra en a val d’o Baztán y obtenendo o títol en a Escuela Normal de Pamplona. Por o que pareix contraye a gripe arredol de 1918 y, pro malauda, torna ta Zaragoza. Tot y con levar uns cuantos años deseparada d’o suyo ombre, debió esperimentar bella liberazión cuan iste murió en 1922. Poco dimpués se casa con Arturo Segundo Romanos, esquirador de Gallur d’ideas sozialistas. O matrimonio s’instala en ixa localidat riberana de l’Ebro y organiza a sezión local d’a Unión General de Trabajadores. María torna a las suyas colaborazions periodisticas, agora con o semanario sozialista zaragozano Vida Nueva y en Avance, de Tolosa. S’amuestra esfensora d’a emanzipazión d’os desfavoreixius y d’as mullers y asistirá asperanzada a la proclamazión d’a Republica o 14 d’abril de 1931.
![María Dominguez_alcaldesa de Gallur 1932_Foto Martínez](https://personajesilustres.lenguasdearagon.org/wp-content/uploads/2022/02/Maria-Dominguez_alcaldesa-de-Gallur-1932_Foto-Martinez.jpg)
Alcaldesa de Gallur
En o verano de 1932, una crisis en o sino d’a corporazión munizipal de Gallur, de mayoría sozialista, levó a que o gubernador zevil d’a provinzia de Zaragoza designase una comisión chestora presidida por ella, que eba partizipau en o XVII Congreso d’a UGT (en o cual Juián Besteiro sustituyiría a Francisco Largo Caballero a o fren d’o sindicato). A suya labor en o Conzello nomás duró que uns meses, pero tenió ocasión de propiziar politicas que milloraban a vida d’os treballadors y dignificaban a educazión.
Cuan en febrero de 1933 a comisión chestora estió disuelta por lei, María dimitió d’o suyo cargo, satisfeita porque eba conzebiu l’alcaldía como un servizio a o lugar y nunca no como un obcheto d’ambizión ni como un meyo d’una carrera politica. A Tacona (como le clamaban afeutuosamén os suyos alumnos d’a escuela de Gallur) tornó ta las suyas clases y a las suyas colaborazions en prensa. Talmén a zierta popularidat que le reportó aber estau a unica muller alcaldesa en España fazilitó a publicazión d’una serie de conferenzias suyas en un volumen recopilatorio a cargo d’a editorial madrileña Castro. Opiniones de mujeres comprendeba istos contenius: “Feminismo”, “La mujer en el pasado, en el presente y en el porvenir”, “El socialismo y la mujer” y “Costa y la Republica”. Contó, amás, con prelogo d’a precoz avogada Hildegart Rodríguez.
Os suyos testos tienen muita personalidat: en els, l’autora lanza una uellada propia y orichinal, intelichén y ironica, sobre o mundo y l’autualidat. Pregona a igualdat d’a muller, a libertat de pensamiento, o sufrachio universal, o voto femenino, o esvurzio, a liberazión de prechudizios, a ensiñanza y a cultura como motors de cambio, a superazión, l’amor eslechiu libremén, etz.
O 18 de chulio de 1936 tot se viene abaixo. O fracaso d’o golpe d’Estau de melitars traidors a la Republica esliga una guerra zivil que divide a España y a Aragón en dos. A significazión politica que eba alquiriu María la feba ostil a uellos d’os sublevaus, que s’eban imposau en l’Aragón ozidental. S’acubilla con Arturo en casa d’a suya chirmana en Pozuelo, pero a os pocos días toz dos son aturatos y enzarraus en un caxot d’o que serán quitaus a una cambioneta con destín a Fuendexalón. O 7 de setiembre de 1936, uns disparos contra as tapias d’o fosal troban en o suyo camín o cuerpo de María Domínguez.
Referenzias
- María Domínguez (1933): Opiniones de mujeres. Madrid. Prólogo de Hildegart Rodríguez. Reeditada en 2005 (Zaragoza, Diputación Provincial, con introducción de Julita Cifuentes y Pilar Maluenda). Existe otra reedición a cargo de Pregunta Ediciones (2021). Información sobre ese libro: http://www1.dpz.es/prensa/elcuartoespacio/2005/numero4/num4pg18.pdf
- María Domínguez, la palabra libre. Documental (28 minutos) dirigido por Vicky Calavia, 2015.
- Rosa Montero (2005): “Para honrar la memoria”. Columna de El País Semanal (24 de abril de 2005): https://elpais.com/diario/2005/04/24/eps/1114324016_850215.html
- Biografía en wikipedia: https://es.wikipedia.org/wiki/Mar%C3%ADa_Dom%C3%ADnguez
Autividaz didauticas
María dimpués de María
A primera alcaldesa d’España quedó sepultada en una fuesa comuna y a suya memoria tamién quedó enronada. No eba teniu deszendens, as propiedaz d’o matrimonio eban estau requisadas… y amás, entre dezenios, a ditadura franquista eba glorificau a os caitos d’o suyo bando y ignorau a os muertos d’os redotaus.
En o dezenio de 1990, as istoriadoras Julita Cifuentes y Pilar Maluenda (que eban investigau de traza metodica a represión entre a Guerra Zevil en a provinzia de Zaragoza baixo tutela de Julián Casanova) fazioron publicos cualques trobos sobre María Domínguez y uns pocos articlos y reportaches empezoron a remerar-la y a fer chustizia a la suya memoria. En 1999 a Deputazión de Zaragoza le conzedió a Medalla de Santa Isabel a títol postumo y uns años más tarde reeditó a suya Opinions de mullers. Se creó una Fundazión con o suyo nombre, adedicada a promover as valors por as cuals ella luitó, y se suzedioron cualques omenaches y reconoixenzias.
En chinero de 2021, as suyas restas estioron recuperadas d’a fuesa an levaban más de uitanta años enronadas. L’analisis d’ADN permitió identificar-las y se les podió dar digna sepoltura en o fosal de Fuendexalón.
Mira notizias sobre azions d’exumazión de calabres d’a Guerra Zevil. I hai qui piensa que ixo supone reubrir viellas feridas y avivar venganzas. Atros consideran que ta pasar pachina y abanzar en a istoria, cal leyer todas as ringleras anque esten tuertas y sían dolorosas, y que toz tienen dreito a mirar a os suyos muertos y a enterrecar-los dignamén si ye posible. [No se pide opinión, ni chuizio de valors: se convida a la reflesión sobre un tema complexo].
O feminismo de María Domínguez
y d’atras mullers d’o suyo tiempo
Dende o suyo feminismo muito inclusivo dezaga d’a igualdat de dreitos y oportunidaz, una d’as cosas alazetals que reclamó María Domínguez estió o dreito a o voto ta las mullers.
Cuán s’instauró o voto femenino en España?
O feminismo d’a nuestra protagonista tiene una gran proyezión sozial, pues va ligau a la formazión integral d’a persona, a la educazión y a la cultura como ferramientas de transformazión d’a soziedat. A suya propia biografía ye un contino trencar moldes, ir progresando dende abaixo, con tenazidat y retando a un destín que pareixeba marcau dende a suya naixenzia. O de María Domínguez ye un causo estraordinario, pero en a suya epoca i abió atras mullers que tamién amostroron valentía u enarboloron a bandera d’a igualdat entre ombres y mullers.
Istas seis mullers estioron grans feministas, cadaguna dende a suya optica y con a suya personalidat y mesmo con esferenzias politicas entre cualques d’ellas. Investiga sobre ellas y relaziona os suyos nombres con a frase u idea correspondién.
1.- Clara Campoamor
2.- Victoria Kent
3.- Carmen de Burgos
4.- María de la O Lejárraga
5.- María de Maeztu
6.- Amparo Poch
a) Autora teatral de gran esito, clisada por o suyo ombre (tamién dramaturgo, ta qui escribiba en a uembra cuasi totas as suyas obras), fundó cuantas organizazions feministas.
b) Pedagoga, direutora d’a Residenzia Internazional de Señoritas.
c) Avogada y deputada, direutora cheneral de Prisions entre a Segunda Republica.
d) Periodista, escritora, tradutora y autivista d’os dreitos d’a muller.
e) Medica y escritora, autivista libertaria, fundadera d’a revista Mujeres libres.
f) Avogada y masima impulsora d’o sufrachio femenino.
1-f, 2-c; 3-d; 4-a; 5-b; 6-e
Fueras de Carmen de Burgos, que murió en 1932 en Madrit, cuáls son os puestos de feneiximiento d’as atras zinco mullers? Por qué garra d’ellas murió en España?
Campoamor (Lausana, Suiza), Kent (Nueva York, USA), Lejárraga (Buenos Aires, Archentina), Maeztu (Mar d’o Plata, Archentina), Poch (Tolosa, Franzia). Tenioron más suerte que no María Domínguez porque sobrevivioron a la Guerra Zivil, pero no podioron tornar ta o suyo país, baixo un rechimen que acazaba as suyas ideas y a qui las esfendeban.
Por a suya condizión d’aragonesa, sería mui intresán afondar en a fegura d’Amparo Poch y Gascón. En wikipedia i hai una aprosimazión ampla y documentada a la suya fegura.
A colección de Ideal de Aragón
Mira y estría bel testo relazionau con ella, u d’a suya autoría. Puedes aduyar-te mirando o diario en a barra de busca abanzada y combinando parolas clau: por exemplo, “maría domínguez ideal de Aragón”. As pachinas y os lumers completos son escargables. En qué consiste o testo que has estriau? Un articlo en prosa, un poema, una notizia sobre ella? Cuál ye o tema prenzipal? Qué opinions esfiende? I hai bella cretica concreta? Detalla cualsiquier custión que te pareixca siñalera. Si a o tuyo profesor/a le resulta intresán, tal vez podaz estender l’analisis a una pachina u a un lumero d’ixe diario: quí escriben en él, qué ideas se transmiten, etz.
Guerra en Europa
En os suyos articlos de Ideal de Aragón publicaus arredol de 1916, María s’amuestra antibelizista. Ta ella nomás i hai que un arma: “Sía o libro a nuestra arma de combate”. Europa se yera desangrando ta par d’alavez en a Gran Guerra y os prenzipios republicanos y sozialistas consonaban bel pazifismo teorico. Manimenos, s’amuestra tamién espezialmén cretica con o bando liderau por Alemania (más aliniada con ideas conservaderas), y más favorable a los cuals represientan países como Franzia y Reino Uniu, de tradizions más liberals y democraticas.
Mira informazión arredol d’a Primera Guerra Mundial. Qué situazión ocupó España en a mesma? Quí yeran os aliadofilos, quí os chermanofilos?
A importanzia d’a escuela
María Domínguez yera una muller d’o pueblo, treballadera, y mayestra por vocazión. Entre o suyo breu mandato como alcaldesa, tresladó ixa esperenzia personal a las milloras d’as condizions de vida en o mundo laboral y en l’educativo.
Por una parte, se preocupó por que se complisen as leis laborals d’a Republica, y creó bolsas de treballo rural ta reduzir o desemplego. Por o que fa a la educazión, constituyió una escuela unitaria de ninos y ninas, destinó fondos munizipals ta blanquiar as parez (que a escuela estase escoscada y digna), ta logar limpieza con a finalidat que os ninos no esen de limpiar (yera l’acostumbrau en muitos puestos) y ta crompar sacos de carbón ta las estufas, de traza que os alumnos no tenesen que trayer-lo de casa.
Investiga en casa: pregunta a os tuyos pais y (agún millor si puede estar) a os tuyos lolos, sobre as suyas memorias d’os tiempos escolars: os suyos chuegos, cómo estudiaban, cómo yeran as suyas escuelas, mayestros y mayestras. Estría o que más t’intrese y reconta-lo. Compartiz en clase ixas esperenzias d’os vuestros mayors.
María Domínguez da nombre autualmén a o colechio d’educazión primaria de Gallur. Un nombre más que adecuau. Qué nombre tiene o tuyo colechio u o tuyo instituto? Se trata de bel nombre de persona? Si ye asinas, replega informazión sobre a mesma.
Un tremendo mal a combatir
Entre a suya choventut, María Domínguez sofrió violenzia en a suya propia casa. María padexió malos tratos, pero no los azeutó y albandonó a o suyo ombre retando a las normas sozials, a la lei no escrita d’os suyos propios vezins. Por desgrazia, os malos tratos en o fogar y a violenzia masclista perén han esistiu. Uei día tenemos más informazión, i hai más denunzias, mayor conzenzia, más recursos… pero as informazions que nos plegan nos siguen dolendo y esterizando.
Qué consideras que ye más importán ta neutralizar y contribuyir a rematar con istos mals? As azions dende a base, a largo plazo, a educazión dende edaz tempranas en valors d’igualdat y respeto? Campañas publizitarias de conzienziazión? Atras azions puntuals, como l’endurimiento de penas a os maltratadors? Tal vez no i aiga una respuesta unica, y tot aiga d’estar teniu en cuenta, verdat? Seguramén tamién cal cusirar autituz masclistas de baixa intensidat u aparenmén “innozén” en o día a día, en o nuestro entorno cutiano (en a escuela, en casa, entre amigos y amigas…). Ye un buen tema ta comentar en l’aula.
Un epilogo ta María,
a qui a escritora Rosa Montero define como
“una muller que cremaba d’as ganas de vivir y de fer”
Treballó duro en as labors más ingratas ta salir adebán y escubrió que aguantaría estar siempre pobra pero no analfabeta, porque a cultura le salvaría a ella, como a la resta, d’a rebaixada, venise iste de cualsiquiera que querese exerzer a suya supremazía en virtut de cualsiquier desincusa. En primeras aprendió a leyer,dimpués estudió y más tarde opinó y escribió, a o mesmo tiempo que luitaba por una enieñanza publica digna. Se granxeó l’almirazión de muitos -incluyius ombres- y adubió transmitir o suyo mandau dica as chens d’o campo y os obrers. Atacó a la Ilesia como simbolo d’o disprezio a la muller y plegó a rechentar o Conzello de Gallur porque representó a onestidat, a capazidat de treballo, o talán y o compromiso sozial. Esfendió a Republica como sistema garán d’as libertaz y como instrumento transformador d’a soziedat. Masiadas gosadías ta una muller en os primers dezenios d’o sieglo XX. Finalmén pagó con a suya vida como muitos atros y entre dezenios ye estada silenziada.
![Color-negativo-horizontal-RGB-sin-fondo](http://personajesilustres.lenguasdearagon.org/wp-content/uploads/2022/02/Color-negativo-horizontal-RGB-sin-fondo.png)
![gobierno color transparente](http://personajesilustres.lenguasdearagon.org/wp-content/uploads/2022/02/gobierno-color-transparente.png)
DIRECCIÓN GENERAL DE POLÍTICA LINGÜÍSTICA
Departamento de Educación, Cultura y Deporte
Parque Empresarial Dinamiza (Recinto Expo)
Avenida de Ranillas, 5D - 2ª planta
50018 Zaragoza
Tfno: 976 71 54 65
Colabora:
![Logo Fundacion CRA H](https://personajesilustres.lenguasdearagon.org/wp-content/uploads/2022/05/Logo-Fundacion-CRA-H-1.png)
![Recurso 1@4x](https://personajesilustres.lenguasdearagon.org/wp-content/uploads/2022/02/Recurso-1@4x.png)