JOHan Ferrández de Heredia
o guerrero umanista
Munebrega, c. 1310 – Aviñón, 1396
En a Edat Meya, cuasi más que os reis y os papas, qui ostentaban o mayor poder en Europa yeran os grans mayestres d’as ordens militars. Baixo o suyo mando se conzentraban poderosos exerzitos de caballers dedicaus en cuerpo y alma a batallar en nombre de Cristo y d’o suyo siñor, y en as suyas arcas acumulaban inchens cantidaz de diners que ampraban a convenienzia. Un d’os más poderosos, d’entre ixos poderosos caudillos, se clamó Johan Ferrández d’Heredia. Venió ta o mundo l’año 1310 en Munebrega, un lugarón d’a comarca de Calatayud, y vivió una vida de novela.
Prozedeba d’una familia d’a baxa nobleza aragonesa. Cuan agún yera mui choven, ingresó en a orden de San Chuan de l’Espital, en os nuestros días conoixida como orden de Malta. Ista eba estau creada en Cherusalén entre a primera Cruzata, a zaguers d’o sieglo XI, igual que as ordens d’o Santo Sepulcro y o Temple, y en o sieglo XIV teneba a suya seu prenzipal en a isla de Rodas, anque as suyas posesions s’extendeban dende Asia dica l’Atlantico. Os suyos integrans yeran “monches guerrers” que eban feito voto de castidat, pobreza y obedienzia. Plegoron t’Aragón ta enfrontinar-se a os musulmans y grazias a o testamento d’Alifonso I o Batallero controlaban amplos territorios.
Johan Ferrández d’Heredia estió aszendendo en o escalafón d’a orden dica ocupar o puesto más altero en o reino castellán d’Amposta , títol que rezibiba en Aragón o representán d’o gran mayestre. Simultaniamén, encomenzó a exerzer d’estreito colaborador d’o rei Pietro IV, a qui aduyó espata en mano a safocar rebelions internas en Aragón y Valenzia, a ocupar a isla de Mallorca y a combatir a os castellans.
En 1351, o monarca aragonés lo ninvió ta Aviñón, residenzia en ixas envueltas d’os papas, ta esfender os suyos intreses. Allí, se ganó a confitanza d’o pontifize Inozenzio VI qui le encargó meyar, sin suerte, entre Franzia y Anglaterra, embarzadas en a Guerra d’os Zien Años, y endrezar a esfensa d’os suyos dominios, menazaus por tropas merzenarias. A truca d’os suyos servizios diplomaticos y militars, o papa le recompensó con nuevos cargos d’a orden espitalaria en Castiella y o sur de Franzia.
Con a plegada ta o trono de San Pietro d’un nuevo papa, Gregorio XI, o poder de Johan Ferrández d’Heredia aumentó encara más. En 1377 estió nombrau finalmén gran mayestre d’a orden de l’Espital y se le encomendó enfrontinar-se a os turcos. Manimenos, en una espedizión a Grezia estió feito prisionero. Dimpués de cuasi dos años engarcholau, estió liberau a cambio d’un gran rescate, y s’acubilló en Rodas.
Se veyió obligau a tornar ta Aviñón en 1382, pus dezaga d’a muerte de Gregorio XI, cuatre años dinantes, s’eba produziu o Zisma d’Ozidén. Os cristianos europeus s’eban dividiu en dos bandos que refirmaban a dos papas diferens, la un establiu en Aviñón y l’atro en Roma. El se mantenió fidel a os suzesivos papas fincaus en Aviñón, en espezial a o suyo paisano, o tamién aragonés Benedicto XIII, o “Papa Luna”, a qui ampró un impreszindible ausilio economico entre o suyo largo mandato.
En ixe zaguer periodo d’a suya vida, compachinó a suya labor politica con a promozión d’importantismas autividaz artisticas y literarias. Patrozinó o treballo de pintors prozedens de tota Europa, como Simone Martini, que revoluzionoron a pintura tardogotica. Pero, sobre tot, reunió a una colla de tradutors ta que treballasen en testos d’autors griegos y romanos de l’Antigüidat. Grazias a la suya estanzia en Rodas y en atros puntos d’o Mediterranio Oriental podió contautar con eruditos locals y escubrir obras clasicas que allí s’alzaban. En o scriptorium de Ferrández d’Heredia, por eixemplo, s’abocoron por primera vez a una luenga romanze, en iste caso l’aragonés, escritos en griego de Tuzidides y de Plutarco que se creyeban perdius en Europa. Ixas versions en aragonés estioron emplegadas posteriormén ta traduzir-las a atras luengas, como l’italián, extendendo-se asinas por gran parte d’o continén.
Unatra fazeta destacada de a empenta cultural acomesa por Johan Ferrández d’Heredia estió a confezión d’obras istoricas. Mandó redautar una Gran Cronica d’España y tamién una Cronica d’os Conqueridors, en a cuala se repasaban as biografías y os feitos d’armas d’ilustres caudillos d’o pasau como Marco Antonio, Octavio Augusto, Tiberio, Atila, Carlomagno, Gengis Kan u Chaime I o Conqueridor, entre muitos atros. Asinasmesmo, recreyó a guerra de Troya y replegó istorias d’emperadors bizantinos y narrazions orientals, amás de fer una edizión d’o Libro de Marco Polo, en a cuala se detallan os viaches d’ixe aventurero veneziano.
Johan Ferrández d’Heredia murió en Aviñón, ya mui viello, en 1396. As suyas restas estioron tresladadas ta o convento sanchuanista de Caspe y depositaus en una prinzipesca fuesa de mármol, que estió destruyida entre a Guerra Zivil de 1936-1939. Tot y con aber feito voto de pobreza y de castidat, acumuló una inmensa fortuna y tenió a lo menos cuatre fillos, que dioron orichen a un d’os linaches más destacaus d’Aragón entre sieglos.
A mayor parte d’a suya magnifica colezión de libros, entre as millors d’o mundo en o suyo tiempo, fuo a parar a mans d’Íñigo López de Mendoza, o marqués de Santillana, mientres que atros eixemplars rematoron en a biblioteca d’o zitau Benedicto XIII.
Referenzias
- Juan Manuel Cacho Blecua (1997): El gran maestre Juan Ferrández de Heredia. Zaragoza: CAI.
- Ana Mateo Palacios (1999): Las órdenes militares en Aragón. Zaragoza: CAI 100.
- José Luis Corral (2002): El invierno de la Corona (novela). Barcelona: Edhasa.
- Rafel Vidaller, Mª Ángeles Ciprés (2021): Johan Ferrández de Heredia. Zaragoza: Aladrada.
- Una biografía: https://dbe.rah.es/biografias/9397/juan-fernandez-de-heredia
La Universidad de Zaragoza y el Gobierno de Aragón mantienen una cátedra dedicada a la promoción de las lenguas propias de Aragón como parte del patrimonio inmaterial de nuestra comunidad autónoma, con el nombre de Johan Ferrández de Heredia. https://catedrajohanferrandezdheredia.lenguasdearagon.org/ferrandez-dheredia/
Autividaz didauticas
Johan Ferrández d’Heredia,
caballero d’a orden de l’Espital
A orden espitalaria de San Chuan de Cherusalén
Leye o siguién testo y fe un esquema d’a organizazión alministrativa d’a orden espitalaria de San Chuan de Cherusalén. Sabes por qué se deziba asinas? I eba atras ordens militars en a epoca?, cuals?, sabes si i eba ordens militars nomás españolas u aragonesas?, por qué surtioron?
Puedes mirar en a pachina web de referenzia os cargos que desempeñó Johan Ferrández d’Heredia en a orden espitalaria y as posesions d’ixa orden entre o suyo mandato como gran mayestre, dende 1377 dica a suya muerte, en 1396. Asinas podrás veyer o gran poder que plegó a exerzer en ostentar iste puesto.
Johan Ferrández d’Heredia naixió en una familia d’a baxa nobleza aragonesa. A suya condizión de chirmán menor no le permitió eredar garra títol familiar por o que, ta asegurar-se un porvenir, ingresó en una orden militar, en iste causo a espitalaria de San Chuan de Cherusalén, como atros segundons d’orichen noble. En 1328 ya se le menziona como caballero d’a mesma.
En epoca de Johan Ferrández d’Heredia, o gran mayestre de dita orden s’estaba en a isla griega de Rodas, amán de Turquía, dende an controlaba un compleixo ret alministrativo. A o suyo cargo i eba siete grans zircunscripzions, clamadas “luengas”: Provenza, Auvernia, Franzia, Italia, Anglaterra, Alemaña y España. Ixas luengas yeran trestalladas en prioratos y castellanías. Istas zagueras teneban un carauter más militar y se trobaban en as zonas de guerra contra os musulmans. A “luenga” d’España se dividiba a la suya vez en os prioratos de Castiella-León, Portugal, Navarra, Cataluña y a castellanía d’Amposta. O castellán d’Amposta yera vasallo d’o rei d’Aragón. Os prioratos y castellanías, por a suya parte, yeran subdivididas en encomiendas a cargo de comendadors que autuaban como siñors d’o puesto, gubernando y recautando una serie d’impuestos destinaus a o tresoro d’a orden ta la conquiesta de Tierra Santa.
Johan Ferrández d’Heredia, erudito
Leye os siguiens testos y preba de responder a las custions que se planteyan.
En os zaguers años d’a suya vida Johan Ferrández d’Heredia s’establió en Aviñón, an residió dica a suya muerte. Dende Aviñónlevó a cabo una gran autividat erudita. Formó un scriptorium encargau de copiar, traduzir y escribir libros de diferens temas. Muitos d’os libros que d’allí saliban yeran ornamentaus con pinturas en miniaturas d’elevada categoría artistica, an a ormino o propio mayestre apareixeba retratau; amás, toz estioron redautaus en luenga romanze aragonesa.
Sabes qué ye un scriptorium y cómo funzionaba? Cuán desaparexioron y por qué? En a zinta El nombre de la rosa podrás apreziar o funzionamiento d’un.
Mandó escribir y revisó u escribió el mesmo a obra Grant Cronica d’Espanya , que ha plegau prou completa dica nusatros. Y tamién baixo a suya tutela y con a suya intervenzión se redautoron a Cronica de los Conqueridores, o Libro de los Emperadores, lo d’os Fechos y Conquiestas del Principado de Morea, Flor d’as Ystorias d’Orient y o Libro de Marco Polo.
Triga bella d’as obras que mandó escribir Juan Ferrández d’Heredia y averigua cuál ye o suyo conteniu. Tienen totas bella cosa en comuna?
S’ocupó, asinasmesmo, que se traduzisen a l’aragonés testos d’escritors griegos y romans de l’Antigüidat, como Plutarco, Tuzidides, l’istoriador cristiano Orosio y atros más.
Conoixes a belún d’os autors zitaus? Sabes de qué va Vidas paralelas, de Plutarco? De qué guerra estió cronista Tuzidides?
Igualmén se preocupó por o mundo d’as artes y se rodió d’artistas destacaus d’a epoca. A suya propia fuesa d’alabastro, encargada por el mesmo ta o monesterio sanchuanista de Caspe, sigue modelos d’a escultura funeraria d’a epoca. I hai eixemplos semellans en Franzia, como a fuesa de Felipe l’Atreviu de Borgoña, y tamién en Zaragoza, como a fuesa de don Lope Ferrández de Luna en a catedral d’a Seu.
Mira imachens y compara as fuesas de Lope Ferrández de Luna, eenterrecau en 1382; Johan Ferrández d’Heredia, feneixiu en 1396; y Felipe l’Atreviu, duque de Borgoña, que murió en 1404. Destaca as carauteristicas que creigas que tienen en común.
Johan Ferrández de Heredia, politico europeu
Europa en o sieglo XIV
A lo largo d’a suya vida Johan Ferrández d’Heredia viacheó por as cortes y prenzipals reinos d’o suyo tiempo, bien como representán d’o rei d’Aragón, bien como diplomatico a o servizio d’os papas d’Aviñón u bien como alto cargo d’a orden de l’Espital.
A la cabeza de diferens misions vesitó Cherusalén, Roma, Rodas, Grezia, Anatolia y, por descontau, as cortes d’Aviñón, París, Pamplona, Burgos y Zaragoza. Amás, entre dos años estió preso d’os poderosos turcos otomanos.
Como gran mayestre d’a orden espitalaria gubernó ombres, tierras y churisdizions que s’estendeban dende l’Asia dica l’Atlantico y proporzionaban inchens recursos de tota mena.
Localiza y siñala en iste mapa a isla de Rodas y os atros puestos zitaus en os cuals estió Johan Ferrández d’Heredia. Tamién puez contrimostrar as tuyas conoixenzias sobre a Europa d’o sieglo XIV en o siguién enlaz. T’atrives?
Consellero d’os reis d’Aragón y d’os papas d’Aviñón
Johan Ferrández d’Heredia estió siempre a o servizio d’a monarquía d’Aragón, con Pietro IV gran parte d’a suya vida y en os suyos zaguers años con Chuan I. Tamién asistió a diferens papas en a suya seu d’Aviñón.
Mira informazión sobre istos conflictos d’a epoca y siñala en qué mida partizipó Johan Ferrández d’Heredia en els: Guerra d’os Dos Pedros, Guerra d’os Zien Años y Zisma d’Ozidén.
Truca o ficazio que un personache tan destacau en a suya epoca no tienga un papel más reconoixiu en a istoriografía meyeval. Reflesiona sobre as causas d’iste feito.
DIRECCIÓN GENERAL DE POLÍTICA LINGÜÍSTICA
Departamento de Educación, Cultura y Deporte
Parque Empresarial Dinamiza (Recinto Expo)
Avenida de Ranillas, 5D - 2ª planta
50018 Zaragoza
Tfno: 976 71 54 65
Colabora:
