Ana Abarca de Bolea no ye a primera escritora “culta” que treslada elementos populars a unas trazas literarias más elaboradas. Pero sí ye a primera que lo fa en Aragón y con l’aragonés. A luenga romanze que, en o sieglo XVII, tot y con o suyo retrozeso, seguiba estando presén en manifestazions populars a traviés d’a transmisión oral, prene cuerpo literario en a obra d’a moncha de Casbas.

Ya emos fablau d’a suya Vigilia y Octavario de San Juan Baptista: una obra miszelania, de fizión, que combina formas y contenius mui diversos dintro d’un marco de dialogos pastorils ambientaus en o Moncayo (prenendo distanzia, pero a la vez familiarizando l’ambién con a sarra de Guara más amán a ella). Os protagonistas combinan a orazión en onor de San Chuan Baptista con diferens entretenimientos más mundans, entre chentas, cantas, villanzicos, danzes, chistes, etz. Tot ixo sirve a l’autora ta reunir abundans y variaus materials literarios sin de relazión beluna. Lo fa con erudizión y enchenio (cualques espezialistas deteutan o siñal de Góngora). Entre os muitos escritos poeticos apareixen tres composizions en aragonés. Dos d’ellas son de tema nadalenco (“Albada al Nacimiento” y “Bayle pastoril al Nacimiento”) y l’atra s’adedica a alabar, en boca d’un labrador y con toque umoristico, as festividaz que ta zelebrar o Corpus se feban en Zaragoza (“Romance a la procesión del Corpus”).

Amás d’atros contenius mui recomendables que pueden clamar a la tuya curiosidat… en as pachinas 65 y 66 puedes leyer sobre cualques manifestazions literarias en o sieglo XVII y, más en concreto (pachinas 78-79) saber un poquet más d’Ana Abarca de Bolea, asinas como leyer un fragmento d’o “Bayle pastoril al nacimiento”. S’entiende bien, verdat? Ye un aragonés con pros castellanismos, pero  i hai parolas que te clamarán l’atenzión: puedes estriar bella que te cueste replecar?

Os zaguers versos d’iste “Bayle…” son:

Si con ramos y sonajas / oy a Belén acudimos / rajas abremos de hazernos / baylando con regocijo.

Qué te suchieren? Clama l’atenzión que una moncha de clausura escriba en un tono tan festivo y desenfadado, fablando de goyos y plazers… Suzede que as cosas no son ni blancas ni negras.

L’ “Albada al Nacimiento”

Qué ye una “albada”? Con qué momento d’o día se relaziona? Has sentiu fablar de belatra “albada”? Mira informazión.

A “Albada al Nacimiento” consta de uitanta versos distribuyius en vente coplas arromanzadas (octosilabos, rimando en encarraze os versos pars) y ye de tema nadalenco, y delata costumbres d’o folclore (“cantada por Ginés y Pascual a l’uso d’o suyo lugarón y son d’a gaita”). Son uitanta versos d’esprito relichioso, sin rebuscamientos, más bien con senzillez, candor y sensibilidat, amostrando una abundanzia verbal y riqueza espresiva,

Istas son as suyas primeras estrofas:

Media noche era por filos,
as doce dava el reloch,
quando ha nagido en Belén
vn mozardet como vn sol.

Naçió de vna hermosa Niña,
virgen adú que parió,
y diz que dexó lo cielo
por este mundo traydor.

Buena gana na tenido
pues no len agradejón
aquellas por qui lo fizo
y bien craro lo beyó

En fin, naçió en vn pesebre,
como Llucas lo dizió,
no se enulle si le dizen
que en as pallas lo trobón.

Mini vocabulario:

por filos, en punto; adú que, aunque; dexó, dejó; fizo, hizo; veyó, vio; enulle,enoje; trobón, encontraron.

L’autora no pareixe tener una nozión guaire esclatera de que o que emplega sía “luenga aragonesa” identificada como tal, pero lo importán ye o suyo legau que transmite y a o que se puede dar validez como un elemento fundamental que aporta riqueza a o patrimonio aragonés.

Te sona bella canta, conoixes parolas, en aragonés? Sabes de belún que fable en ixa luenga? Metez-lo en común.

Abrás sentiu fablar, y tal vez aigas visitau, o monesterio de Piedra, o de Veruela, talmén tamién o de Rueda… Mira bel elemento común a toz els: A qué orden, a qué estilo artistico, perteneixen istos monesterios? De dó prozede y en qué epoca s’implanta en Aragón ixe estilo?

Zisterziense, prozedén de Francia, segunda metat d’o sieglo XII, transizión entre romanico y gotico.

Menos conoixiu, o monesterio d’a nuestra Siñora de Gloria de Casbas ye una d’as más intresans muestras de l’arte zisterziense. En os tiempos d’Ana Abarca de Bolea, iste convento yera en una situazión esplendida. Uei día, agún puede apreziar-se aquella grandeza. A meya ora escasa de Uesca, y en un entorno mui singular, una vesita permite conoixer l’entorno en o cual a moncha escritora levó cuasi tota a suya existenzia. Ye recomendable informar-se previamén sobre azesibilidat y posibilidaz de vesita:

.Autualmén se troba en un prozeso de remodelazión, tot aguardando reabilitazión, con posibles cambios de titularidat y diferens proyeutos arredol d’ixe importán enclave. O tiempo nos dirá si a memoria d’a moncha escritora, a muller que combinó a clausura con o muto zircumdán, capuzando-se en canals de soziabilidat y creyatividat… podrá tener un puesto digno an abitar. L’un de chulio de 2022 s’inauguró en as suyas dependenzias o Zentro d’Interpretazión de l’aragonés “Ana Abarca de Bolea”. Aquí tiens más informazión