Petronila I d’Aragón
Reina en un tablero de deZisions allenas
Uesca, 1136 – Barzelona, 1173
Cuan Petronila, filla d’o rei d’Aragón, vinió ta o mundo, a suya naixenzia estió una autentica custión d’Estau.
Tan solo dos años dezaga, en 1134, Alifonso I d’Aragón, o bravo soldau que i eba liderau grans interpresas militars, levando a o chicot reino de montañeses ta las tierras fertils d’o Valle de l’Ebro y a os suyos afluyens d’o Sur, murió de traza inasperada y sin deszendenzia. En a suya desposizión, o Batallero legó o reino a las ordens militars d’o Temple, os Espitalarios y o Santo Sepulcro. Ixo yera imposible de sustener, con o rei de León ocupando as tierras de Zaragoza y os almoravides ansiando recuperar parte d’o tresbatiu.
O reino yera en periglo. A unica opzión de dar continuidat a la dinastía pasaba por o chirmán d’o rei, o monche Remiro, que abió de penchar os abitos y mirar deszendenzia. Inés de Poitou, vidua de contrastada fecundidat que en o suyo anterior matrimonio eba dau a luz a cuatre creaturas, estió a eslechida entre as casas nobles europeas ta que o reino d’Aragón podese guarenziar a suya supervivenzia. O rei eba preso muller, en as suyas parolas, ta “restaurazión d’a sangre y d’a estirpe”.
Y asinas, como bebé d’encargo, naixió Petronila. Una vez cumplida a suya misión, Inés tornó a cruzar os Pirineus y se recluyó en l’abadía de Fontevrault: astí moriría en 1159 sin que a suya filla tenese nunca comunicazión dreita con ella. Fueras d’en as suyas primeras semanas de vida (sin posibilidat de garra memoria) y encomendada a una dueña de cría, Petronila nunca no veyió a la suya mai. Y a o suyo pai, con cuentagotas: Remiro II se retiró ta o monesterio de San Pietro o Viello en Uesca, con escapadas a Nozito, y a partir d’alavez (dica a muerte de Remiro en 1157) as suyas trobadas serían esporadicas. Petronila no yera d’os suyos pais, sino d’o reino.
O suyo matrimonio estió alcordau, tamién en intrés d’a razón d’Estau, con Ramón Berenguer IV. Entre os años d’aspera dica a voda (1150), o conde de Barcelona, ventitrés años mayor que ella, abió de competir con as intrigas lanzadas dende León ta canzelar ixe alcuerdo. Mientres, Petronila yera educada en a corte condal de Barzelona (ziudat d’a cuala s’enamoró y en a cuala viviría os zaguers años d’a suya curta existenzia) y pasó bella temporada en León con a suya cuñada Berenguela. O catalán estió un buen gubernán, leyal a la suya palabra y abil negoziador. Prinzipe d’Aragón, recuperó Daroca, ganó plazas en os Monegros y a Zinca, conquirió Lérida y Tortosa, pero nunca no estió rei, ya que ixe títol yera privativo d’a familia d’a suya muller, dende a cuala pasaría a la suya deszendenzia.
Dende l’inizio d’a suya edat fértil, Petronila enchendró cuantos fillos. Con 16 años, entre a naixenzia d’o primer d’os suyos fillos, Pietro (que moriría mui nino), abió de ditar desposizión en pleno parto. Isto nos da idea d’o precaria que yera a custión suzesoria, a conservazión de l’apelliu y d’o patrimonio d’a casa d’Aragón. O mayor d’os cuals sobrevivioron a la infanzia sería Alifonso II d’Aragón. Vidua con 26 años, Petronila no querió tornar a prener ombre y estió dueña d’os suyos autos. Muller dezidida, en 1164 renunzió a o reino donando-lo a o suyo fillo. Estió alavez cuan naxió a Corona d’Aragón, que, si bien eba estau alazetada con o suyo matrimonio, preneba agora a suya carta de naturaleza.
As angulemas arredol d’a fegura de Petronila continan estando muitas. Se conoixe o suyo legau y as zircunstanzias que rodioron a la suya vida, determinatos autos publicos… muito más que a suya vida real. Se sabe d’os suyos fillos, qui dezaga d’Alifonso ocuparían diversas responsabilidaz y onors (Pedro, conde de Provenza; Dulze, reina consorte de Portugal; Sancho, conde de Rosellón, Provenza y Zerdaña). Se sabe d’a suya muerte y o suyo entierro en a seu de Barzelona en l’agüerro de 1173, pero contina abendo enigmas arredol d’a suya fuesa, que no ye realmén localizada, y sobre a cuala i hai diversas hipotesis.
Referenzias
- Antonio Ubieto (1987): Los esponsales de la reina Petronila y la creación de la Corona de Aragón. Zaragoza: Diputación General de Aragón.
- José Luis Corral (2021): La reina olvidada. Zaragoza: Doce Robles. En esta novela se recrea, en primera persona, la imagen de una mujer culta y sensible, que desde niña debió sortear intrigas y juegos a varias bandas.
- Podcast Reinas, damas y señoras (Ana Segura y Ana Isabel Lapeña): “Petronila de Aragón”: https://www.cartv.es/aragonradio/podcast/emision/petronila-de-aragon-el-origen-de-la-corona-1
- Wikipedia: https://es.wikipedia.org/wiki/Petronila_I_de_Arag%C3%B3n
Autividaz didauticas
Petronila, Ramón y o casamiento en casa
Se diz que os pautos ta l’enlaz entre Petronila y Ramón Berenguer se basoron en una instituzión clamada “casamiento en casa”. Isto consiste que l’ombre s’adscribe a la familia d’a muller: ella ye qui transmite a pertenenzia a o grupo familiar, de conchunta con o patrimonio que ereda; l’ombre se sozmete formalmén a o suyo suegro u a lo “siñor mayor” d’a casa, y este, a truca, le atorga a potestat sobre o solar familiar, pero reservando-se o suyo señorío tanto sobre os biens d’o solar patrimonial como sobre os cuals alporta l’ombre. Tresladau a o causo que aquí nos ocupa: Ramón Berenguer pasaba a estar un miembro más d’a Casa d’Aragón y d’o suyo linache, a toz os efeutos, y a dinastía reinán emplegaría a designazión “d’Aragón”.
Mira informazión sobre o conzeuto churidico de “casa”, mui presén en o Dreito aragonés. Se refiere nomás que a l’edifizio, u incluye bella cosa más? Por qué creyes que tiene tanta importanzia? (guarenzia a continuidat d’o patrimonio, priva a suya dispersión).
Unatra autividat, a o filo d’iste alcuerdo matrimonial: sitúa en un mapa as conquiestas y territorios consolidaus por Ramón Berenguer IV. Contimpara a situazión d’o reino d’Aragón a la muerte d’Alifonso I (1134) con as posesions que dixó o prinzipe d’Aragón a la suya muerte en 1162.
Fabricas de fillos (conzebidas ta conzebir)
y o rechimen demografico antigo
O papel reservau a Inés y a Petronila, mai y filla, encara estando prauticamén dos esconoxidas entre él, yera mui similar (instrumentalizadas como contenedors d’ereus) y alcanza uns cabos que a los uellos de uei se fan difizils d’entender.
Dillá d’a opinión que nos mereixca ixe feito, a realidat ye que Petronila feneixió a los 37 años. Una edat a la cuala, uei día, muitas mullers (espezialmén en a nuestra soziedat ozidental) engueran a suya maternidat. En a suya curta vida, a reina d’Aragón tenió zinco fillos, d’os cuals le sobrevivioron cuatre (o primochenito Pietro murió de nino), que alcanzarían istas edaz: 23 (o segundo Pietro), 38 (Dulze), 39 (Alifonso), plegando tan solo o menor Sancho a “viello” (62 años, que “uei no ye pon”).
Si isto suzedeba en casas ricas y nobles, con cudiaus estremos, prexina-te o que pasaría en capas sozials más desfavorecidas (que yera a inmensa mayoría d’a poblazión). Muitas naixenzias yeran nezesarias ta compensar l’elevau endiz de mortalera infantil; as mais prenzipiaban a estar-lo mui chovens ta optimizar a suya edat fértil; yera difizil superar en buenas condizions os cuaranta años (superada ixa edat, muitas personas podeban considerar-se viellas).
Indaga sobre istos termins:
- Taxa de fecundidat.
- Taxa de natalidat.
- Taxa de mortalera infantil.
- Esperanza de vida.
- Rechimen demografico antigo / moderno.
Cómo se definen? Han evoluzionau a o largo d’a Istoria? Qué relazión alzan con os cambios culturals, sozials y economicos? Tienen bella cosa que veyer en o cambio d’un rechimen a unatro os abanzes zientificos, en a medizina, en a ichiene…?
Una visita a lo Museu
A la zurda, Sala de Doña Petronila, an seguntes a tradizión se zelebró a voda entre ella y o Conde Ramón Berenguer IV. Alto, sala d’a Campana.
O Museu de Uesca contiene una parte importán d’o que fuo o Palazio d’os Reis d’Aragón, y mantiene uei día tres d’as suyas estanzias: a Sala d’a Campana, la de Doña Petronila y o Salón d’o Trono.
Vesita o Museu: amás d’a suya colezión permanén y as suyas esposizions temporals, mui intresans, podrás saber bel poquet más d’a istoria de l’edifizio, d’as leyendas forchadas en o suyo interior, alentar ambiens mui evocadors…
Chicotas istorias que pueden despertar a tuya curiosidat
Roma no reconoixió nunca a Petronila ni a o suyo pai como reis d’Aragón. Tan solo cuan as ordens militars renunzioron a l’erenzio d’o Batallero, a Ilesia almitió a situazión… y lo fazió a meyas, reconoixendo como gubernán a Ramón Berenguer, tot y que no yera el, sino a suya muller, a titular d’o reino.
Petronila estió a primera muller reina d’Aragón con totas as d’a lei, con títol en propiedat. Nomás i abría unatra más en tota a istoria d’o reino, cuantos sieglos dimpués. Naixió en Toledo en 1479 y ha pasau a la posteridat como “Chuana a Loca”, anque a suya trista realidat ye la d’una persona maltratada y rebaixada por o suyo pai, en primeras, y por o suyo propio fillo, dimpués: Fernando lo Catolico y Carlos I. De nuevo… isto nos da muito que pensar.
Alifonso u Ramón? Qui eba de zeñir a corona dezaga d’a renunzia d’a suya mai eba estau bautizau como Alifonso, pero ta o suyo pai estió siempre “Ramón”, y asinas consta en cualques documentos. Ta o barzelonés yera importán mantener a nomenclatura tradizional d’a suya casa condal, y Petronila yera mui zelosa d’os nombres abituals en a suya “casa”. O suyo tío Alifonso, o campión d’os reis d’o suyo tiempo, pesaba muito, y cuan ya no i ese “competenzia”, dezaga d’a muerte de Ramón Berenguer, l’ereu d’o trono azedería a o mesmo, ya sin meyas tintas, como Alifonso II d’Aragón.
Mira informazión sobre iste rei Alifonso, o primer d’a Corona d’Aragón. Entre atras cosas, tiene una relazión con Teruel, la puedes esplicar?
DIRECCIÓN GENERAL DE POLÍTICA LINGÜÍSTICA
Departamento de Educación, Cultura y Deporte
Parque Empresarial Dinamiza (Recinto Expo)
Avenida de Ranillas, 5D - 2ª planta
50018 Zaragoza
Tfno: 976 71 54 65
Colabora:
