Leye y comenta o siguién testo, con curiosos datos sobre a importanzia d’o conde d’Aranda en a organizazión de l’exerzito español. Observa cómo beluns d’os plantiamientos d’iste ilustrau aragonés han plegau dica os nuestros días.

O X conde d’Aranda, naixiu en Sietemo en 1719, d’o que se cumplen agora tres sieglos, estió politico, diplomatico, gran propietario agrario, emprendedor industrial, letrau y poliglota, mezenas y filantropo. Pero, debán de tot, estió y se sintió militar. Probablemén una d’as mayors frustrazions d’a suya vida consistió que a Corona no le permitió desempeñar-se como competén chefe de guerra, que lo fuo, en numbrosas ocasions. De tal traza que mesmo plegó a albandonar a suya innata arroganzia ta soplicar a la suya Catolica Machestat que azedese a encomendar-le cualques campañas. Pocas vezes l’adubió. Sorprendenmén, podría dezir-se, porque as suyas autuazions estioron esitos d’organizazión y demostrazions de dreito entendimiento d’as zircunstanzias, a ormino tan complicadas, d’a guerra.

Con 17 años, cuan usaba como títol o de duque d’Almazán –secundario en a suya familia–, s’escapó sin permiso d’o colechio de chesuitas italians an s’educaba –o suyo pai, o IX conde, teneba en Italia un mando militar– y s’enroló en l’exerzito español d’Italia. Un noble d’alta cuna con aptituz teneba o camín escampau en a milizia. A l’inte estió capitán d’os granaders –una tropa distinguida y bien entrenada, a la cuala se demandaban condizions espezials de fortaleza, presenzia, achilidat y onradez– en o rechimiento que mandaba y susteneba o suyo pai. Por zierto que ixa unidat agún esiste: alavez se nombraba Castiella y uei se diz Inmemorial del Rey nº 1. O suyo orichen se remonta a o sieglo XIII y, lochicamén, encabeza a nomina d’os autuals rechimientos españols d’infantería.

Luego (1740) estió nombrau coronel d’infantería por Felipe V, o que le capazitaba ta fer-se cargo d’un rechimiento. O 8 de febrero de 1743 intervinió en una cruenta batalla con motivo d’a guerra de Suzesión d’Austria, una conflagrazión entre grans potenzias, librada en tres continens, en a cuala Prusia, España y Franzia s’enfrontinoron con Austria, Rusia y Anglaterra. En o lugar lombardo de Campo Santo tenió una dura preba, cuasi letal. Quedó inerte, muerto en aparienzia y entre calabres, dica que lo troboron a l’atro’l día. Amás d’una convalezenzia que no le disuadió de tornar ta la batalla, a suya valor y nuevas feridas padexidas en combates posteriors le valioron l’aszenso a brigadier.

Pero como artillero –rama belica teunicamén exichén y de triada plantilla– por formazión y vocazión, y con valor prebada en o combate, tasamén podió contrimostrar as suyas reconoixidas capazidaz en a organizazión lochistica y o mando d’operazions. Estió eszezión una guerra ispanofranzesa cuentra Portugal y Anglaterra (1762), en a cuala abió de sustituyir, dezaga de meses de combates, a un chefe incompetén y ronico, cambiando ta millor o curso d’a campaña.

Politica de defensa

Aranda estió notable chestor de recursos, en cheneral, y d’os castrenses, en particular. Como embaixador con vasta esperenzia internazional conoixeba a valor que ta un país tiene a suya capazidat militar. I hai testos suyos cuentra una propaganda enemiga que desfeguraba a cuantía y capazidat d’as tropas españolas y replicó, airau, a un libelo que asignaba a la Corona tres rechimientos d’Infantería cuan yeran trenta y dos, sin contar os d’America, “tan bien disziplinaus como os de l’exerzito d’Europa”. Sabeba que rediculizar ixa potenzia dañaba a politica española que yera refirmar a os rebeldes norteamericans, mirar a recuperazión de Chibraltar y afavorir a las vastas tierras españolas en Norteamérica.

Carlos III, conoixedor d’as defizienzias d’o suyo exerzito, formó una comisión presidida por un capitán cheneral. Os treballos incluyiban a redazión de nuevas Ordinazions, pero s’interrumpioron. Aranda yera capitán cheneral dende 1763 y, en 1767, o rei le encargó reprener a fayena, que remató con esito. A calidat d’o testo lo fazió perdurar dica que Juan Carlos I encargó a suya renovazión a o cheneral Gutiérrez Mellado en 1978. Se retocoron en 2007 y un eixemplo que amuestra o suyo enzierto ye o parrafo que define a fegura d’o cabo:

Como chefe más inmediato d’o soldau u marinero, se ferá querer y respetar d’él; no le desimulará nunca as faltas de subordinazión; le infundirá amor a o servizio y muita exautitut en o desempeño d’as suyas obligazions; será firme en o mando, graziable en o que pueda y será mesurau en a suya autitut y parolas tot y que entime u reprenga.

Compare o leutor con o testo de 1767:

Como chefe más inmediato d’o soldau se ferá querer y respetar d’él, no le desimulará nunca as faltas de subordinazión. Infundirá en os d’a suya escuadra amor a l’ofizio y muita exautitut en o desempeño d’as suyas obligazions. Será firme en o mando, graziable en o que pueda, castigará sin cólera y será mediu en as suyas parolas, encara cuan reprenga.

Sorprendén coinzidenzia y, más, si se tiene en cuenta que, en o testo antigo, o rei fablaba en primera persona. Asinas y tot, tasamén calió cambiar-le pon, tal estió a suya atinada conzepzión. Aranda, como atras vezes, i eba supliu as defizienzias con incansable zelo.

Fuen: Aranda Militar, por Guillermo Fatás.

Mira informazión y esplica en qué consiste ista forma de gubierno

Qué monarcas europeus son consideraus ilustraus en o sieglo XVIII?

En a imachen s’ilustran os problemas ocasionaus por cualques de las reformas levadas a cabo sobre a vestimenta tradizional derivadas d’o reformismo de Carlos III, en iste causo alcorzar as capas y cusir as alas d’o chapero.

Estioron istas reformas sobre vestimenta as unicas causas d’o clamau Motín de Esquilache?, qué atros suzesos prevocoron as tornas por tot o país? Averigua en internet en qué consistió el Motín del Pan de Zaragoza. Cuán se produzió?, por qué?, cómo remató?, creyes que tiene bella relazión con o Motín de Esquilache?

Dimpués d’o Motín de Esquilache (1766), Carlos III clamó a o conde d’Aranda a Madrit y le nombró gubernador d’o Consello de Castiella, cargo dende o cual inizió o prozeso que remataría con a espulsión d’os chesuitas en 1767, baixo l’acusazión d’autuar cuentra o rei y organizar revoltina.

Por qué creyes que s’espulsó en realidat a os chesuitas d’o país? Quí controlaba a educazión meya y superior en España a primers d’o sieglo XVIII? Qué consecuenzias podeba tener ixe control? Os chesuitas estioron espulsaus nomás d’España u tamién d’atros países? Qué consecuenzias tenió en os dominios españols en America? Averigua en internet qué yeran as reduzions chesuitas de Paraguai y qué pasó con ellas dezaga d’a espulsión d’os chesuitas.

A lo largo d’os siet años que estió a o fren d’o Consello de Castiella, instauró una politica reformista basada en os prenzipios d’a Ilustrazión con a cuala conseguió l’elochio d’o mesmo Voltaire.

Acometió muitas atras fayenas d’as más variadas carauteristicas: promulgó leis favoreixedoras d’a minería, a navegazión y o comerzio; promovió a urbanizazión de Madrit (división en barrios, construzión d’o paseyo d’o Prado) y d’atras grans ziudaz, y organizó bailes y atras diversions; fazió salir d’a capital a os numbrosos cleigos esqueferaus u que se trobaban difuera d’o suyo puesto de residenzia; creyó zentros de cultura d’ensiñanza gratuita y milloró as universidaz, ficando-las baixo o control d’o Estau y dotando-las de nuevos plans d’estudios…

Qué autuazions acordes con o pensamiento ilustrau levó a cabo Aranda como responsable d’o Consello de Castiella? Quí estió Voltaire?

Intrigas d’os suyos enemigos y a enemistat d’o rei causoron a suya cayedura en 1773 y l’invío como diplomatico ta París ta alpartar-lo d’a Corte. Manimenos, se trataba d’un puesto importán y dende él s’ocupó d’a politica esterior española, en espezial os dominios españols en America.

Leye a novela d’Arturo Pérez Reverte titulada Ombres buenos. Qué papel desempeña en ella o conde d’Aranda? Qué sabes d’a Enziclopedia que s’editó en Francia en o sieglo XVIII? Qué consecuenzias tenió a suya publicazión? Por qué creyes que beluns pensoron que s’oponeba a la Biblia?

En a suya biografía emos leyiu que o conde d’Aranda viacheó a lo largo d’a suya vida por tota Europa. Entre a suya infanzia y primera choventut por Italia, con o suyo pai. Más tarde, entre 1748 y 1755 realizó un instructivo viache por Franzia y Zentroeuropa, o que le permitió observar os abanzes d’a Ilustrazión y tener una visión moderna sobre l’exerzito, as industrias, a educazión, etz. Posteriormén, estió embaixador en cuantos países: Portugal, Polonia y Franzia.

Coneutar os viaches d’o Conde d’Aranda con as suyas autividaz.

1-d, 2-f, 3-a, 4-e, 5-b, 6-c

Enlaza os reis con os cargos que desempeñó o conde d’Aranda con cadagún d’els.