María Andresa Casamayor

A prosperidat a traviés d’as matematicas

Zaragoza, 1720 – 1780

A matematica zaragozana María Andresa Casamayor y de la Coma estió a primera muller d’a cuala se tiene notizia en publicar un libro de tema zientifico en España. Lo fazió entre a primera metat d’o sieglo XVIII y, si s’ha de chuzgar por o conteniu d’a suya obra y por a traza en que ye esponiu, a suya intenzión estió la de «democratizar» o saber y dotar de ferramientas utils a os suyos conziudadans ta que podesen prosperar en as suyas fayenas cutianas.

Naixida a canto de l’Ebro en 1720, o 30 de noviembre, o día de San Andrés (d’astí o suyo nombre, que mal transcrito por un comentarista posterior s’ha conoixiu dica calendatas reziens como Andrea), estió una d’as mayors de nueu chirmans, fillos d’un pai comerzián.

Vida

L’Aragón en o cual vivió ista pionera d’a zenzia vivió una d’as más floreziens etapas d’a suya istoria. Eba dixau dezaga as esferras d’a Guerra de Suzesión y con a plegada d’os Borbones ta o trono d’o país s’estioron ubrindo trango en él, a bonico, as tesis d’a Ilustrazión. Ixa corrién cultural susteneba que caleba combatir a ignoranzia y a superstizión, y acudir ta la razón, a zenzia y a educazión ta empentar o progreso economico y millorar a soziedat.

Nomás que una minoría azeptó semellán ideyario, que podeba cambiar l’orden sozial. Pero una elite acomodada l’asumió, entre els a familia de María Andresa, ya que ista rezibió una esmerada formazión, bella cosa insólita ta una muller en a España d’o suyo tiempo. Entre a suya infanzia, agún no i eba en Zaragoza colechios femeninos y os mistos yeran impensables. Cualques privilechiadas desfrutaban de tutors privaus. Pero, por lo común, as zagalas nomás rezibiban nozions de doctrina catolica y labors domesticas. Aprender a leyer y escribir, por eixemplo, se consideraba secundario.

Obra

María Andresa alcanzó un almirable libel en as zenzias matematicas y treballó en compleixos calculos aritmeticos ta ubrir nuevas vías d’investigazión. Manimenos, en o primer libro que escribió albandonó ixas compleixidaz ta esplicar de traza mui senzilla as operazions más basicas: sumar, restar, multiplicar y dividir. Lo levó ta la imprenta en 1738, antes de complir os deziueito años, y lo tituló Tyrocinio Artihmetico, ye dezir, aprendizache aritmetico.

Esistiban ya atras publicazions con o mesmo tema, anque totas yeran más difizils de replecar. O libro de María Andresa alportaba eixemplos asequibles estrayitos d’a vida real en ambitos como o comerzio, l’agricultura y a ganadería. Y, a la suya vez, incluyiba un completo conchunto d’os pesos y midas vichens en Aragón (i eba moltetut, cuals valors variaban en cualques causos pendendo d’a comarca), asinas como d’as diferens monedas en curso (tamién moltetut), con detalladas tablas d’equivalenzias.

Descarga a obra aquí

Casandro Mamés de la Marca y Araoia

Como en ixa epoca dengún s’iba a creyer que esistise un libro de matematicas escrito por una muller, abió de siñar o testo con un nombre masculino, Casandro Mamés de la Marca y Araoia, un anagrama d’o suyo propio. Isto ye, trestucó l’orden d’as letras d’o suyo verdadero nombre ta componer o suyo seudonimo.

O libro lo adedicó a o colechio d’as Escuelas Pías zaragozanas, d’as cualas «l’autor» se reconoixeba disziplo. Y astí puede estar unatra d’as claus d’un testo en o cual priman cuantos prenzipios: estar azesible, didautico, util y ofreixer ferramientas ta prosperar. Os escolapios s’instaloron en Zaragoza en 1731 y con els trayioron a primitiva filosofía d’a orden, fundada en 1597, en Roma, por l’oszense José de Calasanz: a educazión gratuita d’os más pobres, tota una revoluzión ya que podría prevocar enormes cambios en a soziedat. Amás, ta que a formazión permitise a os alumnos ganar-se o pan cuan alcanzasen a edat adulta, meteban espezial ficazio en as matematicas y en as suyas aplicazions prauticas. Os poderosos veyioron tot ixo como una menaza y miroron d’eliminar a orden, que pasó por profundos tollos, anque finalmén s’estendilló por tota Europa y por atros continens.

A o poco tiempo d’editar o suyo libro, feneixió o pai d’a choven matematica y a familia zozobró en un mar de deudas. Tot y con ixo, María Andresa nunca no contrayió matrimonio ni buscó cobexo en a Ilesia, cuasi as unicas salidas viables de supervivenzia ta una muller d’o suyo tiempo en as suyas zircunstanzias. Se metió a treballar difuera de casa ta subsistir, una eszezión a la norma. Estió mayestra de ninas en colechios publicos a cambio d’una modesta soldata.

Escribió unatra obra, ista de matematica superior, uei tresbatida. Ni ella ni os suyos chirmans, que la eredoron, la plegoron a editar, pues no resultaba rentable. Nomás la podioron leyer que cualques eruditos y curiosos, que la alaboron.

Poco más se sabe d’ista zaragozana eszezional, a la cuala sabios d’o suyo tiempo adedicoron escasas pero elochiosas linias. Desfrutó d’o saber y d’a suya difusión en una epoca en a cuala totas dos autividaz yeran vetadas a o sexo femenino. Y tot y que s’esconoxcan a mayor parte d’a suya trayeutoria vital y d’os suyos logros, no apareixca en garra manual y dengún no aiga sentiu nunca menzionar o suyo nombre, se trata d’a primera muller de zenzia española d’a cuala se conserva obra publicada. Ixo sí, oculta baixo un seudonimo masculino.

Referenzias

Julio Bernués, Pedro J. Miana (2019): “Soñando con números, María Andresa Casamayor (1720-1780)”, Suma: Revista sobre Enseñanza y Aprendizaje de las Matemáticas, 91, pp. 81-86.
María José Casado Ruiz (2006): Las damas del laboratorio. Mujeres científicas en la historia. Barcelona: Debate.
R. Domínguez (1999): La enseñanza de las primeras letras en Aragón (1677-1812). Zaragoza: Mira.
Fico Ruiz (2017): Aragoneses olvidados. Zaragoza: Anorak.

Autividaz didauticas

A educazión d’as mullers en o sieglo XVIII

A mida que abanza o sieglo XVIII y conforme s’estende a Ilustrazión, creixe a preocupazión entre as clases acomodadas por a educazión de ninos y chovens, tanto zagals como zagalas. Manimenos, a educazión femenina no yera regulada agún y yera menos cheneralizada que no a masculina.

Se continaba con o costumbre de l’Antigo Rechimen d’impartir una educazión separada por sexos. Y esistiba una evidén esferenzia entre as primeras escuelas elementals de zagals, tuteladas por organismos publicos que impartiban as primeras letras a las clases baixas, y os colechios rechius por ordens relichiosas femeninas, ta ninas d’una posizión sozial más elevada. En toz os zentros, manimenos, primaba a ensiñanza de doctrina cristiana y labors domesticas, como custura y bordau.

Os colechios relichiosos, con o tiempo, encomenzoron a incluyir tamién en as suyas ensiñanzas nuevas materias como Aritmetica, Cheografía y Istoria, Luenga y Mosica. Pero o suyo lumero yera escaso, por o cual muitas aristocratas yeran educadas por prezeutors privaus mientres que zagals d’as clases meyas aprendeban en as suyas casas, supervisadas por as suyas mais. Entre as lizions que rezibiban yeran o franzés u o baile, impartidas por profesors logaus, que s’anunziaban como tals en a prensa.

Mira informazión sobre a educazión d’as mullers en o sieglo XVIII y responde verdadero u falso a las siguiens afirmazions:

En o sieglo XVIII totas as mullers rezibiban educazión	V	F
Os estudios universitarios yeran nomás que ta os varons	V	F
Ninos y ninas estudiaban as mesmas disziplinas	V	F
Ombres y mullers podeban amostrar por igual	V	F
As ninas podeban rezibir bel tipo d’educazión	V	F
A educazión yera obligatoria ta os varons	V	F
A educazión pendeba d’a voluntat y posibilidaz d’as familias	V	F
A Ilustrazión esfendeba a educazión como unico meyo ta alcanzar o conoixenzia	V	F

Soluzión: 1-F / 2-V / 3-F / 4-F / 5-V / 6-F / 7-V / 8-V

Os escolapios en Zaragoza

Os escolapios son una orden relichiosa fundada en Roma, en o sieglo XVII, por l’aragonés José de Calasanz, con a finalidat d’educar a os ninos pobres d’a ziudat. En l’año 1597 ubrió a primera escuela popular gratuita d’Europa y en 1622 a orden estió aprebada por a Ilesia.

Calasanz perzibió a importanzia d’as matematicas y a zenzia ta o futuro y dio repetidas instruzions ta que totas dos asignaturas se mostrasen en as suyas escuelas y ta que os suyos mayestros tenesen una base más firme en ixas materias ya que podeban aduyar a prosperar en os negozios y en a vida a os alunnos.

En un prenzipio, os colechios escolapios, como toz, yeran ubiertos nomás que ta os ninos. No pas ta las ninas.

A familia d’Andresa yera de clase acomodada y como tal proporzionó educazión a os suyos fillos, pero tamién a las suyas fillas, con profesors privaus. Como s’ha dito, Andresa dimpués destacó en Matematicas y se le ocurrió a traza de fer-las más asequibles a toz.

Quí estudió en os escolapios.

Cualques autors esfienden que o propio Goya estudió en os Escolapios. Sabes quí más estudió allí?

Aquí apareixen beluns d’os suyos alunnos ilustres d’ixa epoca (mesmo i hai carreras con os suyos nombres), mira bel dato sobre els.

- José Palafox
- Francisco Bayeu
- Santiago Sas
- Pedro María Ric

Atras mullers matematicas

Une istos nombres de mullers matematicas d’a istoria con o suyo treballo y o suyo tiempo.

Hipatia d’Alejandría 337 – 415 d. C.	Sieglo d’as Luzes	Matematica y fisica franzesa autodidauta. Estió una d’as pioneras d’a teoría d’elastizidat. Baixo o pseudonimo d’Antoine Auguste Le Blanc, siñó cuantos articlos ninviaus a o matematico Joseph-Louis Lagrange.
Ada Lovelace 1815 – 1852	Autualidat	Matematica, astronoma y filosofa. Comentó grans obras d’a matematica griega clasica. Ye una d’as primeras zientificas que se conoixen.
Mariam Myrzakhani 1977 – 2017	Tardorromana	Matematica y programadora britanica escribió o primer algoritmo ta una maquina analitica, por o que se le considera a mai d’a informatica y a programazión.
Sophie Germain 1777 – 1831	Revoluzión Industrial	Matematica iraní, estió a primera muller ganadera d’a medalla Fields considerau o premio Nobel d’as Matematicas. As suyas contribuzions más importans a la zenzia son en o campo d’a Cheometría.

Soluzión: 1-C-II / 2-D-III / 3-B-IV / 4-A-I

Mira más informazión sobre ellas y describe en qué entorno desembolicoron a suya autividat como zientificas, contimpara-lo con lo de María Andresa.

Cual ye a que presienta mayors semellanzas con a nuestra protagonista? Por qué?

I hai en a tuya familia bella muller que treballe en fayenas zientificas? Sabes a qué se adedica?

Unatra pionera aragonesa d'o sieglo XVIII, Josefa Amar y Borbón

La obra de Andresa y su firma

Andresa escribió con 17 años o suyo primer libro y l’unico conservau Tyrocinio Artihmetico (aprendizache aritmetico) y, a esferenzia d’atros manuals d’a mesma epoca, se carauteriza por a suya finalidat claramén didautica y prautica. Como s’ha comentau en o testo:

aportaba eixemplos asequibles estrayitos d’a vida real en ambitos como o comerzio, l’agricultura y a ganadería. Y, a la suya vez, incluyiba un completo conchunto d’os pesos y midas vichens en Aragón (i eba moltetut, cuals valors variaban en cualques causos pendendo d’a comarca), asinas como d’as diferens monedas en curso (tamién moltetut), con detalladas tablas d’equivalenzias.

Mira cualques midas de peso, longaria y capazidat usadas en Aragón en o sieglo XVIII, como a roba, a fanega, o cafiz, a libra, l’alquez, o cantaro u a vara. Mira tamién belunas d’as monedas que esistiban en Aragón en a mesma epoca, como a libra chaquesa.

En has trobadas muitas? Resultaba prautico conoixer a suya equivalenzia ta no estar engañau en os negozios, verdat?

Casandro Mamés d’a Marca y Araioa ye o seudonimo emplegau por Andresa ta siñar o suyo primer libro y unico conservau. L’abió de fer con un nombre de varón pues dengún ese creyiu en ixa epoca que una muller yera capaz d’escribir un libro de Matematicas. Ixe seudonimo aconforma un perfeuto anagrama d’o suyo nombre completo, as mesmas letras que lo componen distribuyidas en diferén orden.

CASANDRO MAMÉS DE LA MARCA Y ARAIOA